ஜனநாயகன்: அறிவிப்பு முதல் படம் வெளியாவது வரை விஜயின் படம் கடந்துவந்த பாதை

தமிழ்நாடு முதலமைச்சரும் தமிழக வெற்றிக் கழக தலைவருமான விஜய் நடித்த ஜனநாயகன் திரைப்படம் இன்று (ஜூலை 23) வெளியாகிறது. இந்தாண்டு ஜனவரி மாதம் வெளியாகவிருந்த இப்படம், பல்வேறு காரணங்களால் தற்போது வெளியாகிறது.

முன்னதாக, ஜனநாயகன் வெளியீடு குறித்து பேசிய படத்தின் தயாரிப்பாளர் வெங்கட் கே. நாராயணா, "ஜனநாயகன் படத்தை இந்தியா தவிர 30 நாடுகளில் திரையிடுகிறோம். உலகம் முழுக்க 7 ஆயிரம் முதல் 8 ஆயிரம் வரையிலான திரைகளில் படம் வெளியாகிறது.' என்று கூறியிருந்தார்.

தமிழ்நாட்டில் காலை 9 மணிக்கு முதல் காட்சி தொடங்குகிறது. கர்நாடகம், கேரளா ஆகிய மாநிலங்களில் காலை 6 மணிக்கே முதல் காட்சி தொடங்கியுள்ளது.

இப்படம் விஜயின் கடைசி திரைப்படம் என அறிவிக்கப்பட்டதால் அவரின் ரசிகர்கள், தவெகவினர் படத்தை வரவேற்று கொண்டாட்டத்தில் ஈடுபட்டுள்ளனர்.

விஜய் நடிப்பில் பகவதி படத்துக்குப் பிறகு கிட்டத்தட்ட 24 ஆண்டுகள் கழித்து ஜனநாயகன் படம் ஏ சான்றிதழ் பெற்றுள்ளது. ஏ சான்றிதழ் வழங்கப்பட்டுள்ளதால், 18 வயதுக்கும் குறைவானவர்கள் படத்தை பார்ப்பது சட்டப்படி குற்றம். இதனால், குழந்தைகள், 18 வயதுக்கு உட்பட்டோர் திரையரங்குகளுக்கு வர முடியாத நிலை ஏற்பட்டுள்ளது. பெற்றோர்களுடன் வந்தாலும் குழந்தைகளை திரையரங்குக்குள் அனுமதிக்க முடியாது.

இப்படம் நடிகர் பாலய்யா நடித்தா 'பகவந்த் கேசரி' திரைப்படத்தின் தழுவல் என பேசப்பட்டு வந்தது. 'பகவந்த் கேசரி' வெளியான சமயத்தில் விஜய் தன்னை பாராட்டியதாக அதன் இயக்குநர் அனில் ரவிபுடி கூறியிருந்தார்.

"பகவந்த் கேசரி படத்தை விஜய் என்னை பார்க்கச் சொன்னார். எனக்கு மீண்டும் ஒரு ரீமேக் படத்தை எடுக்க ஆர்வம் இல்லை. பகவந்த் கேசரி-யை ஒரு 'இன்ஸ்பிரேஷனாக' வைத்து பலவற்றை மாற்றி ஜனநாயகன் படத்தை எடுத்துள்ளோம்." என இயக்குநர் ஹெச்.வினோத் பல பேட்டிகளில் கூறியுள்ளார். "இது விஜய் படமாக இருக்கும்" என்றும் அவர் தெரிவித்துள்ளார்.

இத்திரைப்படம் ஜனவரி மாதமே வெளியாவதில் என்ன பிரச்னை?

விஜயின் 69வது படத்தை இயக்க பல்வேறு இயக்குநர்களின் பெயர்கள் பேசப்பட்டுவந்த நிலையில் கடைசியில் இயக்குநர் ஹெச்.வினோத் ஒப்பந்தம் ஆனார்.

பெங்களூருவை சேர்ந்த கேவிஎன் நிறுவனம் தயாரிக்க, விஜய் நடிக்கும் 69வது படம் தொடங்குவதாக 2024-ஆம் ஆண்டு செப்டம்பர் 14-ஆம் தேதி முறைப்படி அறிவிப்பு வெளியானது. அக்டோபர் 4-ஆம் தேதி சென்னையில் படப்பூஜை போடப்பட்டு மறுநாள் படப்பிடிப்பு தொடங்கியது.

இப்படத்தில் விஜயுடன் மமிதா பைஜூ, ப்ரியாமணி, பிரகாஷ்ராஜ் உள்ளிட்டோர் நடித்துள்ளனர்.

டிசம்பர் 27-ஆம் தேதி மலேசியாவில் பிரமாண்டமாக ஜனநாயகன் பாடல் வெளியீட்டு விழா நடந்தது. அதில் 1 லட்சம் பேர் வரை கலந்துகொண்டனர். அந்த நிகழ்ச்சி லிம்கா சாதனை புத்தகத்தில் இடம் பெற்றது.

"எனக்காக எல்லாவற்றையும் விட்டுக்கொடுத்த என் ரசிகர்களுக்காக, நான் சினிமாவையே விட்டுக் கொடுக்கிறேன். இந்த விஜய் ரசிகர்களுக்கு ..சும்மா 'நன்றி'ன்னு சொல்லிட்டு போறவன் கிடையாது. நன்றிக்கடன் தீர்த்துவிட்டுதான் போவேன்.." என்று பேசினார் விஜய்.

2026-ஆம் ஆண்டு ஜனவரி 9-ஆம் தேதி ஜனநாயகன் படத்தை தமிழ் உள்ளிட்ட பல மொழிகளில் வெளியிட முடிவு செய்து, மத்திய திரைப்பட சான்றிதழ் வாரியத்தின் சான்றிதழ் பெற டிசம்பர் 18-ஆம் தேதி படக்குழுவினர் விண்ணப்பித்தனர். படத்தில் இடம்பெற்ற சில காட்சிகளுக்கு அந்த வாரியத்தின் உறுப்பினர் ஆட்சேபம் தெரிவித்தார்.

இதையடுத்து, சான்றிதழ் கிடைப்பதில் சிக்கல் ஏற்பட்டதால் ஜனவரி 6-ஆம் தேதி படத்தயாரிப்பு நிறுவனம் நீதிமன்றத்தை அணுகியது. இதனால் ஏற்கெனவே அறிவிக்கப்பட்டபடி ஜனவரி 9-ஆம் தேதி பொங்கல் வெளியீடாக படத்தை ரிலீஸ் செய்ய முடியாத நிலை ஏற்பட்டது.

நீதிமன்றத்தில் என்ன நடந்தது?

ஜனவரி 9-ஆம் தேதி சென்னையில் வழக்கை விசாரித்த தனி நீதிபதி பி.டி.ஆஷா படத்துக்கு யு.ஏ சான்றிதழ் வழங்க உத்தரவிட்டார். ஆனால், அதை எதிர்த்து மத்திய திரைப்பட சான்றிதழ் வாரியம் இரு நீதிபதிகள் அமர்வில் மேல்முறையீடு செய்தது. அவர்கள் நீதிபதி பி.டி.ஆஷா தீர்ப்புக்கு தடை விதித்தனர். உயர் நீதிமன்றத்தின் தடையை எதிர்த்து தயாரிப்பு நிறுவனம் உச்ச நீதிமன்றத்தில் மேல்முறையீடு செய்தது.

இந்த வழக்கில் தலையிட மறுத்த உச்ச நீதிமன்றம், வழக்கை உயர் நீதிமன்ற அமர்வே விசாரித்து முடிவெடுக்க உத்தரவிட்டது. மீண்டும் சென்னையில் வழக்கு நடந்தது. கடைசியில் பிப்ரவரி 10-ஆம் தேதி கேவிஎன் நிறுவனம் தனது வழக்கை வாபஸ் பெற்றது. தாங்கள் மத்திய திரைப்பட சான்றிதழ் வாரியத்திடம் மீண்டும் அனுப்புவதாக அந்நிறுவனம் தெரிவித்தது.

தேர்தல் நடத்தை விதிகள் அமல்

மார்ச் 17-ஆம் தேதி சான்றிதழ் வாரிய அதிகாரிகள் ஜனநாயகன் படத்தை மீண்டும் பார்த்தனர். தமிழக சட்டப்பேரவை தேர்தலை முன்னிட்டு தேர்தல் நடத்தை விதிகள் அமலில் இருந்த காலம் என்பதால், தவெக தலைவரான விஜய் நடித்த ஜனநாயகன் படத்தை வெளியிட தேர்தல் ஆணையத்தின் அனுமதி தேவை என்று மத்திய திரைப்பட சான்றிதழ் வாரியம் கூறியது.

சில கட்ட பேச்சுவார்த்தைக்கு பின் தமிழக தேர்தல் முடிந்த பின்னரே படத்தை வெளியிடுவோம் என பட நிறுவனம் சொல்ல, அந்த பிரச்னைக்கு முற்றுப்புள்ளி வந்தது.

இணையத்தில் கசிந்த ஜனநாயகன்

ஆனாலும், பல வாரங்களாக ஜனநாயகன் படத்துக்கு முறைப்படி சான்றிதழ் கிடைக்காத நிலை நீடித்தது. இந்நிலையில், ஏப்ரல் 9-ஆம் தேதி ஜனநாயகன் படத்தின் காட்சிகள் இணையத்தில் கசிந்ததாக செய்திகள் வந்தன. படத் தொகுப்பாளர் பிரதீப் அலுவலகத்தில் தவறு நடந்ததாக கூறப்பட்டது. அவர் படத் தொகுப்பாளர் சங்கத்தில் இருந்து நீக்கப்பட்டார்.

ஏ சான்றிதழ், ரிலீஸ் தேதி அறிவிப்பு

ஜூலை11-ஆம் தேதி ஜனநாயகன் படத்துக்கு ஏ சான்றிதழ் வழங்கப்பட்டதாக மத்திய திரைப்பட சான்றிதழ் வாரிய இணையதளத்தில் அறிவிப்பு வந்தது. அதன் தொடர்ச்சியாக ஜனநாயகன் படம் ஜூலை 23-இல் உலகம் முழுக்க வெளியாகும் என்று படத்தை தயாரிக்கும் கேவிஎன் நிறுவனம் அதிகாரப்பூர்வமாக அறிவித்தது.

சமீபத்தில் ஜனநாயகன் பட தயாரிப்பாளர் வெங்கட் கே நாராயணா தமிழக அரசின் டெல்லி சிறப்பு பிரதிநிதியாக நியமிக்கப்பட்டதும், அது சர்ச்சை ஆனதும் நடந்தேறியது.

- இது, பிபிசிக்காக கலெக்டிவ் நியூஸ்ரூம் வெளியீடு