Spòrs

Tha Iain Robinson ag ràdh gur e "urram mòr" a th' ann dha a bhith air ainmeachadh mar sgiobair ùr Bhaile Ùr an t-Slèibh is gur e rud a bha e ag iarraidh bhon a bha e na bhalach òg.

Dhearbh an cluba aig a' choinneimh bhliadhnail aca nas tràithe air a' mhìos seo gum biodh an sgioba choidsidh aca a' fuireach mar a bha le Peadar Ros mar mhanaidsear, ach gum biodh Robinson a' dol an àite Craig Ritchie mar sgiobair.

Bidh am Baile Ùr ag atharrachadh an sgiobair aca a h-uile bliadhna.

A' bruidhinn ris an Strathspey is Badenoch Herald, taobh a-muigh, thuirt Ros nach eil duine eile cho freagarrach ri Robinson is gu bheil e fìor mhath air cluicheadairean òga a bhrosnachadh, a thuilleadh air a bhith na shàr-chluicheadair e fhèin.

"Tha e cho cudromach a bhith a' sealltainn ceannas air a' phàirc is tha mi air a bhith a' feuchainn ri sin a dhèanamh 'son ùine a-nise", thuirt Robinson fhèin.

"Tha tòrr cheannardan san sgioba againn is tha sin na chuideachadh mòr.

"Bha 2025 math dhuinn ach tha mi a' smaointinn gur e an dùbhlan a th' ann a-nise a dhol ceum eile is a bhith ag amas air a h-uile duais nuair a thig deireadh seusain 2026".

Bhuannaich Baile Ùr an t-Slèibh Cupa na Camanachd am-bliadhna is bha iad san dàrna àite sa Phrìomh Lìog.

Tha an rothaiche Albannach, Oscar Onley, a' dol a ghluasad gu sgioba Ineos Grenadiers, a' tòiseachadh ann an seusan 2026.

Bidh Onley, às na Crìochan, a' fàgail Picnic PostNL a tha stèidhichte san Òlaind.

Thàinig Onley gu aire an t-sluaigh nuair a chrìochnaich e san 4mh àite aig an Tour de France am-bliadhna, agus b' esan an rothaiche as b' òige anns a' phrìomh deich a chrìochnaich an rèis as motha ann an saoghal na rothaireachd.

Thuirt Onley: "Dh'fhàs mise suas a' coimhead Geraint (Thomas), Dave (Brailsford) agus an sgioba aig an ìre as àirde san spòrs agus tharraing iad aire gu rothaireachd anns an Rìoghachd Aonaichte, mar sin tha mi air leth moiteil a bhith nam ball aig na Grenadiers air aonta fada."

"Tha e cuideachd a' ciallachadh gum bi mi a' farpais ann an sgioba Breatannach nuair a thòiseachas an Tour de France ann an Alba ann an 2027", thuirt e.

Thug Onley taing dhan t-seann sgioba aige, Picnic PostNL, airson taic a chumail ris agus thuirt e gum bi ionndrainn mòr air na caraidean aige agus air an sgioba, agus gun robh e moiteil às na rinn iad còmhla.

Rinn Geraint Thomas, a chaidh fhastadh mar Stiùiriche Rèisean aig Ineos Grendiers san t-Samhain, moladh mòr air Onley.

"Tha mar a rinn Oscar ann an 2025 air a bhith sònraichte math.

"Tha an dòigh anns a bheil a' farpais air a' bhaidhg aige agus an tuigse a tha aige air an rèis fada seachad air an aois aig a bheil e, 's e farpaisiche dha-rìribh a th' ann", thuirt Thomas a bhuannaich an Tour de France ann an 2018.

Chaidh fear de sheann laoich cluba iomain Chill Mhàilidh, Liam Dòmhnallach, ainmeachadh mar mhanaidsear ùr na sgioba.

Tha Dòmhnallach a' gabhail àite Mark Mhic a' Phearsain, a sheas sìos aig deireadh an t-seusain a chaidh.

Thog e Cupa a' Bhaile Mhòir dà thuras le Cill Mhàilidh.

Bhuannaich iad 6-0 sa chuairt-dheireannaich an aghaidh Chabar Fèidh ann an 2016 agus rinn iad a' chùis air Glaschu Meadhan Earra-Ghàidheil 3-2 ann an 2018.

Fhuair Dòmhnallach cuideachd ceithir ceapan eadar-nàiseanta do dh'Alba.

Bidh seann fear-glèidhidh na sgioba, Shane MacIllÌosa, na leas-mhanaidsear còmhla ris.

Chrìochnaich Cill Mhàilidh san t-siathamh àite anns an Lìog Nàiseanta air an t-seusan a chaidh.

Tùs an deilbh, SNS

Chan ann a' gluasad gu slaodach ach aig 100msu a tha Ross County a dh'ionnsaigh tuiteam a-mach às an Championship, a' rèir a' mhanaidseir eadar-amail, Iain Robasdan.

Chaill County air an deireadh-sheachdain 2-0 ri Obar Bhrothaig, gam fàgail fhathast aig bonn na lìge, còig puingean air cùlaibh an Àird Ruigh a th'anns an naoidheamh àite.

A' bruidhinn ri meadhanan a' chluba às dèidh a' gheama thuirt Robasdan gun robh na cluicheadairean a' dèanamh an dearbh rud is a bha iad fo Don Cowie agus Tony Docherty, is gum feum piseach tighinn orra san aithghearrachd.

Chan eil County ach air aon phuing a thogail a-mach às na sia geamaichean mu dheireadh aca.

Bidh dùbhlan romhpa san ath-gheama cuideachd, is iad a' cur fàilte air St Johnstone, a th' aig bàrr na lìge, Disathairne.

Cha robh deireadh-seachdain ro mhath aig Caley Thistle Inbhir Nis nas motha is iad a' call 1-0 air falbh bhon taigh an aghaidh Stenhousemuir.

Tha iad fhathast aig bàrr Lìog a h-Aon ge-tà, ged a tha Stenhousemuir air a' bheàrn a ghiorrachadh gu trì puingean a-niste.

Tha Caley Thistle a' siubhal a Mhon Rois airson an ath-gheama aca Disathairne.

Tùs an deilbh, PA

Chaidh Megan Keith à Inbhir Nis ainmeachadh ann an Sgioba Bhreatainn is Èireann a Tuath 'son Farpaisean Ruith Thar-dùthcha na Cruinne tràth sa Bhliadhna Ùir.

Bidh na farpaisean ann an Tallahassee ann am Florida air an 10mh den Fhaoilleach.

Tha seo a' tighinn dìreach làithean às dèidh do Keith bonn airgid a bhuannachadh aig Farpais Euro Cross sa Phortagail.

Còmhla ri Megan ann an sgioba nam ban 'son Tallahassee tha Phoebe Anderson, Verity Ockenden is Poppy Tank.

Tha bliadhna mhòr ro Mhegan Keith ann an 2026 is i roimhe air a h-ainmeachadh ann an sgioba na h-Alba 'son Geamaichean a' Cho-fhlaitheis as t-samhradh.

San Spòrscast as ùire tha Dòmhnall Angaidh Moireasdan a' bruidhinn ri DK Mac a' Phì mu na tadhail as fheàrr a chunnaic e riamh bho chluicheadairean na h-Alba agus mu na cothroman a th' aig sgioba Steve Clark aig Cupa na Cruinne 2026.

Èist ris a' chòmhradh air fad agus beachd cuid eile mu na tadhail as fheàrr leotha air BBC Sounds.

Tùs an deilbh, SNS

'S e Raghnall Ros manaidsear ùr Chinn a' Ghiùthsaich.

Chuala coinneamh bhliadhnail a' chluba gu bheil Iain 'Corky' Borthwick a' seasamh air ais às dèidh trì bliadhna aig an stiùir.

Bhuannaich Ceann a' Ghiùthsaich 10 de na 12 prìomh dhuaisean a bh' ann fhad 's a bha Borthwick os cionn na sgioba.

Bha briseadh-dùil ann am-bliadhna nuair a chaill iad 3-2 ris na nàbaidhean aca Baile Ùr an t-Slèibh sa chuairt dheireannaich de Chupa na Camanachd.

Bhuannaich iad a' Phrìomh Lìog às dèidh sin ge-tà, is iad mar-thà air Cupa MhicThàmhais is Cupa MhicAmhlaigh a thogail.

Thug an cluba taing dha Borthwick is dhearbh iad gur e Raghnall Ros a thèid na àite.

A' bruidhinn ris a' phàipear naidheachd ionadail an Strathspey Herald, taobh a-muigh, thuirt Borthwick gun robh e bho thùs e 'son fuireach mar mhanaidsear is gun robh e "a chridhe briste" leis mar a thachair gnothaichean.

Thuirt e cuideachd gu bheil e an dòchas gun soirbhich an sgioba fo stiùir Raghnaill Rois.

Tha mòran a' meas Rois - a tha ag obair do Chomann na Camanachd - mar an cluicheadair iomain as fheàrr a bha riamh ann.

Tha e air coidseadh aig diofar ìrean cuideachd thar nam bliadhnaichean is bha e ùine os cionn sgioba nàiseanta na h-Alba.

Cuideachd aig an AGM chaidh athair Raghnaill, Iain, ainmeachadh mar cheann-cinnidh Chinn a' Ghiùthsaich is chaidh dearbhadh gur e John Gibson a bhios os cionn na dàrna sgioba.

Bha oidhche air leth aig Caley Thistle Inbhir Nis ann an Cupa Dùbhlain na h-Alba is iad a' dèanamh a' ghnothaich 9-0 air Dùn Breatann.

'S e seo a' bhuaidh as motha a bha riamh aig a' chluba, a dh'aindeoin gun robh iad air an sgioba atharrachadh 'son a' gheama.

Rinn Dùn Breatann fhèin sreath de dh'atharrachaidhean ro-làimh is cuid bhon sgioba-òigridh am measg na thàinig a-steach.

'S e bogadh gu math cruaidh a fhuair na balaich sin is Alfie Bavidge a' cur ICT air thoiseach às dèidh dìreach ceithir mionaidean.

Mus tàinig lethach-slighe bha Bavidge fhèin air trì tadhail eile fhaighinn is Calum MacLeòid, Billy MacAoidh is Luis Longstaff cuideachd air an targaid.

Cha robh Inbhir Nis buileach cho cruaidh air Mic na Creige san dàrna leth is dìreach dà thadhal eile a' tighinn bho Ross Millen is MacAoidh a-rithist.

"Bha sinn air leth sa chiad leth gu sònraichte", thuirt MacAoidh, a tha cuideachd na leas-mhanaidsear aig ICT.

"Sheall balaich a thàinig a-steach dhan sgioba againn gu bheil iad 'son cluich a h-uile seachdain is tha sinn air ar dòigh a bhith san ath-chuairt".

Bidh Inbhir Nis a' tilleadh gu geama lìge Disathairne is iad gu bhith a' tadhal air Stenhousemuir.

Tùs an deilbh, JEFF HOLMES

Chaidh duais Para-lùth-chleasaiche na Bliadhna a bhuileachadh air an rothaiche Fin Greumach à Srath Pheofhair aig Duaisean Spòrs na h-Alba.

Tha an duais a' tighinn aig deireadh bliadhna iongantaich dhan Ghreumach, 26, san do ghlèidh e a cheathramh tiotail Cruinne sreath a chèile ann an rèis rathaid C3 sa Bheilg.

Tha e a-niste air ochd tiotalan eadar-nàiseanta a bhuannachadh ann an ceithir bliadhna.

Choisinn e bonn òir agus bonn airgid an-uiridh aig na Geamannan Paralimpigeach anns an Fhraing, agus chaidh urram MBE a bhuileachadh air ann an liosta urraman an Rìgh aig àm na Bliadhna Ùire.

An dèidh sin chaidh fàilte mhòr a thoirt dha nuair a thill e dhan Ghàidhealtachd 's a thadhail e air an t-seann sgoil aige, Acadamaidh Inbhir Pheofharain.

Tùs an deilbh, SNS

Dh'ainmich Caley Thistle Inbhir Nis gun deach an t-aonta iasaid airson Liam Sole a leudachadh gu deireadh an t-seusain.

Thàinig Sole a dh'Inbhir Nis bho Bhaile Dhùn Lèibhe air iasad chun an Fhaoillich sa chiad dol a-mach.

Tha e air còig tadhail fhaighinn ann an 26 geama agus e air a bhith na chluicheadair cudromach don sgioba a tha an-dràsta aig bàrr Lìog a h-Aon.

Tha Inbhir Nis a-nis ga chumail airson grunn mhìosan eile is iad ag amas air sreap air ais dhan Championship.

A' bruidhinn ri meadhanan a' chluba, thuirt Sole: "Tha mi cho toilichte, 's fhìor thoil leam e an seo, tha mi ann an àite math.

"Tha mi toilichte gun d' fhuair sinn air an t-aonta a leudachadh agus 's urrainn dhomh a-niste fòcas a chumail air cùisean air a' phàirc."

Tùs an deilbh, SNS

Tha iad fada bho ghàirdeachas ann an Inbhir Pheofharain is ceistean mòra mun t-slighe air adhart do Ross County.

Tha dùil ri barrachd fiosrachaidh bhon chluba às dèidh do Tony Docherty is Callum Davidson an dreuchdan fhàgail is na Staggies aig bonn an Championship is air pronnadh 6-0 fhulang an aghaidh Raith Rovers.

'S iomadh geama Chounty a chunnaic Pàdraig MacAmhlaigh thar nam bliadhnaichean agus 's e a bha dubhach is e a' bruidhinn air BBC Radio nan Gàidheal madainn Diluain.

"Tha rudeigin fada, fada, fada ceàrr is chan eil mi idir a' smaoineachadh gur e na cluicheadairean fhèin as coireach, co-dhiù gur iad a-mhàin as coireach.

"Tha rudeigin ceàrr aig ìre nas àirde na sin. Cuid de na cluicheadairean, tha mi a' smaoineachadh nach eil iad ag iarraidh a bhith ann.

"Cò thig a-steach....tha ceist eile cò tha ag iarraidh na h-obrach".

Bha pàrtaidh mòr ann am Pàislig oidhche Dhòmhnaich is luchd-taic a' cruinneachadh ann am meadhan a' bhaile gus gàirdeachas a dhèanamh.

Rinn na Buddies an gnothach 3-1 air Celtic aig Hampden nas tràithe air an là 'son Cupa na Lìge a bhuannachadh airson dìreach an dàrna turas nan eachdraidh.

A' bruidhinn air Aithris na Maidne Diluain, thuirt Ailig O'Henley gu bheil Stephen Robinson a-nise suas còmhla ri feadhainn mar Ailig Mac a' Ghobhainn is Ailig Fearghasdan am measg nam manaidsearan a b' fheàrr a bha riamh aig St Mirren.

"Tha beàrn cho mòr a thaobh ionmhais ann am ball-coise na h-Alba is mar sin 'son cluba beaga mar St Mirren 'son cupa fhaighinn, agus mar a rinn sinn e, tha mi dìreach cho toilichte airson nam balach", thuirt Robinson.

Tùs an deilbh, SNS

Tha Ross County air cuidhteas fhaighinn den mhanaidsear Tony Docherty leis an dà thaobh air tighinn gu aonta an dèidh mar chaill iad 6-0 ri Raith Rovers san Championship Disathairne.

Tha sgioba Inbhir Pheofharain an-dràsta aig bonn an Championship, dà phuing air dheireadh air Queen's Park.

Chan eil County ach air dà gheama anns an lìog a bhuannachadh air an t-seusan seo.

Fhuair Docherty a leabhraichean à Dun Deagh anns a' Chèitean agus iadsan air crìochnachadh san 10mh àite sa Phrìomh Lìog.

Dh' fhàg Don Cowie dreuchd mhanaidsear County aig toiseach an t-seusain seo agus bha John Robertson os an cionn airson aona gheama.

Tha an leas-mhanaidsear Callum Davidson a' fàgail còmhla ri Docherty.

Thug County taing dhan dithis agus thuirt iad gun deadh fios a sgaoileadh gu luchd-leantainn an ceann ùine.

Tha Iain Moireasdan agus grunn Chaluman a' toirt thugaibh beachdan air ball-coise na deireadh sheachdain - gu sònraichte sùil air adhart gu cuairt dheireannach Cupa Lìog na h-Alba eadar Celtic is St Mirren.

Cluinnear cuideachd mu fharpais mhòr darts na cruinne a th' air tòiseachadh aig an Ally Pally agus gu leòr eile.

Èist ri Spòrs na Seachdain air BBC Sounds

Tha seusan ùr na h-iomain pìos às fhathast ach tha fios a-nise cò bhios a' cluich cò sa chiad chuairt de Chupa MhicAmhlaigh.

Thàinig na geamaichean às an ad mar a leanas:

• Ceiltich an Òbain - Obar Dobhair

• Caol Bhòid - Glaschu Meadhan Earra-Ghàidheal

• Camanachd an Òbain - Inbhir Aora

• Caol Gleann - Eilean Bhòid

• Lòbhat - An t-Eilean Sgitheanach

• Cabar Fèidh - An Gearasdan

• Baile Ùr an t-Slèibh - Ceann Loch Seile

• Ceann a' Ghiùthsaich - Loch Abar

Bidh a' chiad chuairt ann air an 9mh den Chèitean agus a' chuairt dheireannach aig Pàirc Mossfield san Òban air an 22na den Lùnastal.

Tha Javen Houston agus an dà aoigh aige, Calum MacNeacail agus Jamie Kieran, air gach dheasbad co-cheangailte ri Rugbaidh na h-Alba a chur ceart air an Spòrscast às ùire.

Am measg nan cuspairean, thog na balaich air taghadh Chupa na Cruinne 2027, Griogair Townsend, a bharrachd air Warriors Ghlaschu agus sgioba Dhùn Èideann.

Agus rinn iad cinnteach gun robh gàire agus fealla-dhà ann cuideachd.

Cluinnear an còmhradh air fad air BBC Sounds.

Chaidh Caley Thistle air adhart dhan cheathramh chuairt de Chupa na h-Alba oidhche Chiadain, ged nach robh oidhche ro chofhurtail aca an aghaidh Tranent ann an Lodainn an Ear.

'S ann an Haddington a chaidh an geama a chluich às dèidh nan trioblaidean le pàirc Tranent is chaidh ICT air thoiseach le tadhal bho Mitchell Robertson às dèidh 17 mionaidean.

Bha Tranent co-ionnan tro Sam Jones às dèidh 25 mionaidean, mus do chuir Chanka Simba ICT 2-1 air thoiseach ro letheach slighe.

'S ann mar sin a chrìochnaich e, ged a bha Tranent gu làidir den bheachd gun robh còir aca a bhith air breab-peanais fhaighinn sa mhionaid mu dheireadh.

Bidh Caley Thistle a-nise an aghaidh Spartans san ath-chuairt air deireadh-seachdain an 17mh den Fhaoilleach.

Air a' cheathramh oidhirp tha dùil gun tèid an geama eadar Tranent agus Caley Thistle Inbhir Nis ann an Cupa na h-Alba a chluich a-nochd.

B' fheudar an geama san treas cuairt a chur dheth air sgàth thrioblaidean le pàirc Tranent.

Chaidh co-dhùnadh Diluain an geama a ghluasad gu Millfield, dachaigh Haddington Athletic.

Dh'ainmich Tranent an-diugh gu bheil àireamh bheag de thiceadan ri fhaotainn airson a' gheama leis gun deach barrachd na bha iad a' sùileachadh a thilleadh thuca.

Bha iad air a h-uile ticead a reic ron a' chiad oidhirp air a' gheama a chluich.

Cluichidh an sgioba a bhuannaicheas an aghaidh Spartans san ath-chuairt an ath-mhìos.

Rinn Ross County adhartas ann an Cupa Dùbhlan na h-Alba oidhche Mhàirt às dèidh dhaibh a' chùis a dhèanamh air Celtic B 4-0.

Chuir dà thadhal air gach taobh de leth-ùine bho Jay Henderson agus Ross Docherty County air adhart.

Fhuair Jamie Lindsay dà thadhal anmoch sa gheama airson gleans a chur air a sgòr dha na Staggies.

Tha aire Chounty a-niste a' tionndadh air ais gu bhith a' feuchainn ri èirigh far bhonn an Championship, is iad gu bhith a' cluich Raith Rovers Disathairne.

Thug Stoirm Bram buaidh air mòran gheamaichean eile ann an Cupa Dùbhlan na h-Alba ge-tà le sia air an cur dheth air sgàth na droch shìde.

Bha cuid de luchd-leantainn feargach le cho anmoch is a chaidh cuid dhiubh an cur dheth.

Cha deach co-dhùnadh an geama eadar Queen of the South agus Dun Phàrlain a chur dheth gu às deidh an uair a bha an geam còir tòiseachadh.

Thèid an taghadh airson cuairt na 16 mu dheireadh dhen fharpais a chumail Diardaoin aig 1f.

Tùs an deilbh, SNS

Chaidh dearbhadh gun tèid an geama eadar Caley Thistle is Tranent ann an Cupa na h-Alba a chluich ann an Haddington oidhche Chiadain.

Tha trioblaidean le pàirc Tranent air fàgail gun deach an geama a chur dheth trì tursan gu seo.

'S e sin as coireach gu bheil e a-nise air a ghluasad beagan mhìltean sìos an A1 gu Millfield, dachaigh Haddington Athletic.

Tòisichidh an geama Diciadain aig 7:45f.

Thèid an sgioba a nì a' chùis an aghaidh Spartans san ath chuairt.

Ann an naidheachd eile Diluain chaidh Scott Kellacher aig ICT ainmeachadh mar mhanaidsear na mìos ann an Lìog 1 'son na Samhna.

Rinn Inbhir Nis an gnothach tron mhìos air Mon Rois, Cove Rangers is Queen of the South is bha iad co-ionnan an aghaidh Alloa.

Tùs an deilbh, SNS

Dè dìreach a tha air a dhol ceàrr ann an Inbhir Pheofharain?

'S e sin a' cheist a tha air gu leòr is Ross County a-nise air tuiteam gu bonn an Championship às dèidh call 2-1 ri Airdrieonians air an deireadh-sheachdain.

A' bruidhinn air Aithris na Maidne Diluain, thuirt Ailig O'Henley nach eil piseach idir air tighinn air cùisean mar a bha dùil bho ghabh Tony Docherty an stiùir aig deireadh na Sultuine.

"Tha fios gu bheil a dhreuchd-san fo bheagan de chuideam a-nise", thuirt Ailig.

Mura buinnig iad an ath gheama chanadh tu gum biodh co-dhùnadh aig Roy MacGriogair timcheall air àm na Nollaige agus chan e Bodach na Nollaige a bhios e a' cluich idir".

Thèid County a Chair Chaladain Disathairne airson a dhol an aghaidh Raith Rovers.

Tha ceistean de sheòrsa air choireigin eile aig sgioba eile na Gàidhealtachd.

Chaidh an geama ann an Cupa na h-Alba eadar Caley Thistle is Tranent a chur dheth an dàrna turas Disathairne is a' phàirc ann an Lodainn an Ear fo uisge.

Bha dùil an geama a chluich oidhche Luain ach chaidh a chur dheth an treas turas Didòmhnaich.

Tha fios ri brath eile tràth san t-seachdain a thaobh dè thachras a-nise.