రోహిత్ శర్మ: హిట్‌మ్యాన్ 'రిటైర్మెంట్' ఊహాగానాలకు బీజం పడింది ఎక్కడ?

భారత్, ఇంగ్లండ్ జట్ల మధ్య ఆదివారం లార్డ్స్‌లో మొదలైన మూడో వన్డే మ్యాచ్‌కు ముందు హిట్‌మ్యాన్ రోహిత్ శర్మ గురించే చర్చ నడించింది. లార్డ్స్‌లో 'హిట్‌మ్యాన్' తన చివరి వన్డే ఇంటర్నేషనల్ మ్యాచ్ ఆడేస్తున్నాడని కొన్ని మీడియా కథనాలు పేర్కొనడమే ఇందుకు కారణం.

రోహిత్ 'వన్డే రిటైర్మెంట్' పై ఎన్నో కథనాలు ప్రచారంలోకి వచ్చాయి. ఈ గందరగోళం ఎక్కువ కావడంతో భారత క్రికెట్ నియంత్రణ మండలి (బీసీసీఐ) స్వయంగా వివరణ ఇవ్వాల్సి వచ్చింది.

ఇంగ్లండ్‌తో ఆదివారం లార్డ్స్‌లో జరిగే మూడో వన్డే రోహిత్ చివరి మ్యాచ్ కాదని స్పష్టం చేస్తూ, అతని భవిష్యత్తుపై వస్తున్న ఊహాగానాలను బీసీసీఐ కొట్టిపారేసింది.

అసలు అలాంటి చర్చ ఏదీ జరగడం లేదని బీసీసీఐ కార్యదర్శి దేవజీత్ సైకియా పీటీఐతో చెప్పారు.

అంతేకాదు, శనివారం లార్డ్స్‌లో రోహిత్ శర్మ హావభావాలు చూస్తే, అతను రిటైర్ అవుతున్నట్లు ఎక్కడా అనిపించలేదు. సోషల్ మీడియాలో వైరల్ అవుతున్న వీడియోల్లో ప్రధాన కోచ్ గౌతమ్ గంభీర్, ఇతర కోచింగ్ స్టాఫ్ సభ్యులతో కలిసి రోహిత్ నవ్వుతూ కనిపించారు. మైదానంలోకి దిగిన తర్వాత, లార్డ్స్ నర్సరీ గ్రౌండ్‌లో జట్టులోని ఇతర ఆటగాళ్లతో కలిసి బ్యాటింగ్ ప్రాక్టీస్ కూడా చేశాడు.

రోహిత్ ఫామ్‌పై ప్రశ్నలు

జులై 14న ఎడ్జ్‌బాస్టన్‌లో ఇంగ్లండ్‌తో జరిగిన మొదటి వన్డేలో రోహిత్ శర్మ 21 బంతుల్లో 11 పరుగులు మాత్రమే చేసి ఔటయ్యాడు. ఈ 21 బంతుల్లో 15 డాట్ బాల్స్ ఉన్నాయి.

ఇక రెండో వన్డేలో సైతం రోహిత్ పిచ్‌పై ఇబ్బంది పడుతూ కనిపించాడు. 47 బంతుల్లో 26 పరుగులు చేశాడు. ఈసారి 47 బంతుల్లో 31 డాట్ బాల్స్ ఉన్నాయి.

ఈ రెండు మ్యాచ్‌ల తర్వాత, ఆదివారం లార్డ్స్‌లో జరిగే మ్యాచ్, అతని క్రికెట్ కెరీర్‌లో చివరి అంతర్జాతీయ మ్యాచ్ కాబోతోందనే వార్తలు మీడియాలో రావడం మొదలయ్యాయి.

అసలు ఇలాంటి వార్తలు ఎలా వచ్చాయి?

రోహిత్ శర్మకు కోచ్ గౌతమ్ గంభీర్, చీఫ్ సెలెక్టర్ అజిత్ అగార్కర్‌తో సంబంధాలు సరిగ్గా లేవనే ఊహాగానాలే రోహిత్ శర్మ రిటైర్‌మెంట్‌కు కారణమనే ప్రచారం జరిగింది. బీసీసీఐ సీనియర్ సెలెక్షన్ కమిటీ తమ ప్రణాళికల గురించి రోహిత్‌కు ముందే తెలియజేసిందని 'ఇండియన్ ఎక్స్‌ప్రెస్' తన కథనంలో రాసింది. 'టైమ్స్ ఆఫ్ ఇండియా' పత్రికలోనూ ఇలాంటి వార్తలే వచ్చాయి.

దీంతో అనేక మీడియా సంస్థల్లో అతని రిటైర్మెంట్‌ వార్తలు ఊపందుకున్నాయి. అయితే, ఆ తర్వాత రోహిత్ శర్మకు మద్దతుగా ప్రకటనలు రావడం ప్రారంభమైంది.

రోహిత్ శర్మ ఫామ్ గురించి లార్డ్స్‌ మ్యాచ్‌కు ముందు మీడియా సమావేశంలో భారత బౌలింగ్ కోచ్ మోర్నీ మోర్కెల్ మాట్లాడుతూ, "కొత్త బంతితో బ్యాటింగ్ చేయడం అంత సులభం కాదు. ఈ సిరీస్ పొడవునా బంతి బాగా స్వింగ్ అవ్వడం చూశాం. ఇలాంటి పరిస్థితుల్లో ఇన్నింగ్స్ ప్రారంభించడం సవాలుతో కూడుకున్నది. అయితే రోహిత్ కచ్చితంగా దీనికి పరిష్కారం కనుగొంటారనడంలో సందేహం లేదు" అన్నారు.

"రోహిత్ గతంలోనూ ఇలాంటి పరిస్థితులను ఎదుర్కొన్నాడు. అతను అనుభవజ్ఞుడైన ఆటగాడు. బ్యాటింగ్ ఆర్డర్‌లో ఒక రకమైన ఓర్పును, సమతుల్యతను తీసుకువస్తాడు. కాబట్టి అతని ఆట గురించి ఆందోళన చెందాల్సిన పని లేదు" అని మోర్కెల్ పేర్కొన్నారు.

రోహిత్ రిటైర్మెంట్ వార్తలపై ప్రముఖ క్రికెట్ వ్యాఖ్యాత, విశ్లేషకులు హర్షా భోగ్లే 'ఎక్స్' లో స్పందిస్తూ, "రోహిత్ శర్మ గురించి మొదట బాధ్యతారాహిత్యంగా లీకులు రావడం, ఆపై ఉన్నత స్థాయి నుంచి వివరణలు చూశాం. ఈ మొత్తం వ్యవహారం భారత క్రికెట్‌కు, జట్టు అంతర్గత వాతావరణానికి తీవ్ర నష్టం చేకూరుస్తుంది" అని తెలిపారు.

బీసీసీఐ కార్యదర్శి దేవజీత్ సైకియా పీటీఐతో మాట్లాడుతూ "మీడియాలో రోహిత్ శర్మ భవిష్యత్తు గురించి రకరకాల ఊహాగానాలు నడుస్తున్నాయి. ఆదివారం లార్డ్స్‌లో రోహిత్ తన చివరి అంతర్జాతీయ మ్యాచ్ ఆడతారనే చర్చ ఏదీ జరగలేదు" అని తెలిపారు.

రోహిత్ రిటైర్మెంట్ వార్తలపై మాజీ కెప్టెన్ కపిల్ దేవ్‌ను ఏఎన్‌ఐ అడిగినప్పుడు, రోహిత్ శర్మ ఎప్పుడు రిటైర్ అయినా దానిని బాధగా చూడకూడదన్నారు.

"లేదు. దానిని ఆనందంగా చూడండి. బాధపడటం ఎందుకు? అతను ఇన్నేళ్లుగా మనకు ఎన్నో సంతోషాలను ఇచ్చాడు. ప్రతి ఒక్కరూ ఒకరోజు వెళ్లాల్సిందే. సునీల్ గవాస్కర్ వెళ్లాడు, రాహుల్ వెళ్లాడు, అనిల్ కుంబ్లే వెళ్లాడు, సచిన్ వెళ్లాడు. ఎవరైనా సరే ఒకరోజు వెళ్లక తప్పదు" అని తెలిపారు..

రోహిత్ ఎప్పుడు క్రికెట్‌కు గుడ్‌బై చెప్పినా, అతని కెరీర్‌ను ఒక పండుగలా జరుపుకోవాలే తప్ప వెళ్ళిపోతున్నాడని బాధపడకూడదని కపిల్ దేవ్ చెప్పారు.

అసలు కథ ఎక్కడ మొదలైంది?

రోహిత్ శర్మ రిటైర్మెంట్ ఊహాగానాలకు ఎక్కడ బీజం పడింది?

కొన్నిమీడియా కథనాల ప్రకారం, "గౌతమ్ గంభీర్‌ను భారత క్రికెట్ జట్టు కోచ్‌గా బాధ్యతలు చేపట్టాలని స్వయంగా రోహిత్ శర్మే కోరారు. కానీ, సమయం గడిచేకొద్దీ వీరిద్దరి మధ్య సంబంధాలు దెబ్బతిన్నాయి"

రోహిత్ శర్మ వన్డేల్లో బ్యాటర్‌గా రాణించాడు, అనేక రికార్డులు నెలకొల్పాడు. 287 వన్డే అంతర్జాతీయ మ్యాచ్‌లలో 11,757 పరుగులు చేశాడు. 'హిట్‌మ్యాన్'గా గుర్తింపు పొందిన రోహిత్.. వన్డేల్లో మూడు డబుల్ సెంచరీలు కొట్టిన ఏకైక బ్యాటర్‌. అతని పేరిట 33 సెంచరీలు, 62 అర్ధసెంచరీలు ఉన్నాయి. వన్డేల్లో రోహిత్ స్ట్రైక్ రేట్ దాదాపు 93 కాగా, 48 పైగా సగటుతో పరుగులు సాధించాడు.

రోహిత్ శర్మ వర్సెస్ యశస్వి జైస్వాల్

రోహిత్ శర్మను పక్కన పెట్టి ముందుకు సాగాలనే వాదనకు యశస్వి జైస్వాల్ వేగంగా దూసుకురావడమే బలమైన కారణమని ఆంగ్ల పత్రిక 'బిజినెస్ స్టాండర్డ్' తన కథనంలో రాసింది.

"ఈ యువ ఎడమచేతి వాటం బ్యాటర్ తనకు అవకాశం వచ్చినప్పుడల్లా ఆకట్టుకున్నాడు. ఇటీవల మూడు ఇన్నింగ్స్‌ల్లో రెండు సెంచరీలు సాధించడంతో, ఇతనికి అప్పుడప్పుడు కాకుండా వరుసగా అవకాశాలు ఇవ్వాలనే సెలెక్టర్ల నమ్మకం మరింత బలపడింది. ఒకవేళ జైస్వాల్‌ను జట్టులోకి తీసుకోవడంలో ఇంకా ఆలస్యం చేస్తే, 2027 వన్డే వరల్డ్ కప్ సమయానికి అతను పూర్తిస్థాయిలో సిద్ధం కాలేడని భారత జట్టు యాజమాన్యం భావిస్తోంది" అని పేర్కొంది.

'టైమ్స్ ఆఫ్ ఇండియా' పత్రిక తన కథనంలో, "ఛాంపియన్స్ ట్రోఫీ తర్వాత రోహిత్ శర్మ బ్యాటింగ్ శైలి పూర్తిగా మారిపోయింది. ఇప్పుడు అతను చాలా నెమ్మదిగా, అవసరానికి మించి అప్రమత్తంగా బ్యాటింగ్ చేస్తున్నాడు. ఏదైనా సిరీస్‌లో లయ అందుకోవడానికి ఆయనకు కనీసం మూడు మ్యాచ్‌లు అవసరమవుతాయని జట్టు యాజమాన్యం నమ్ముతోంది" అని రాసింది.

"రోహిత్ మిగతా రెండు ఫార్మాట్ల నుంచి ఇప్పటికే రిటైర్ అయినందున ఈ సవాలు అతనికి ముందే ఎదురైంది. రోహిత్ దేశవాళీ క్రికెట్ కూడా చాలా తక్కువగా ఆడుతున్నాడు. గత సీజన్‌లో విజయ్ హజారే ట్రోఫీలో కేవలం రెండు మ్యాచ్‌లు మాత్రమే ఆడాడు, అందులో ఒకటి సిక్కింపై జరిగింది. రోహిత్ ఫామ్ అందుకోవడానికి ఎక్కువ సమయం పడుతుంది. సెలెక్టర్లు తమ అభిప్రాయాన్ని అతనితో పంచుకున్నారు. ఇకపై ఏం చేయాలనేది రోహిత్, బోర్డు కలిసి నిర్ణయించుకోవాల్సి ఉంటుంది" అని ఆ కథనం తెలిపింది.

(బీబీసీ కోసం కలెక్టివ్ న్యూస్‌రూమ్ ప్రచురణ)

(బీబీసీ తెలుగును వాట్సాప్‌,  ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)