உலகக்கோப்பை யாருக்கு? அர்ஜென்டினாவை வீழ்த்த தனது மாறாத, தனி அணுகுமுறையை நம்பும் ஸ்பெயின்

இறுதித் தருணம் வந்துவிட்டது, ஸ்பெயின் தனது இரண்டாவது நட்சத்திரத்தை விரும்புகிறது.

இந்த உலகக் கோப்பையை வெல்ல நாம் அசாதாரணமான எதையும் செய்ய வேண்டியதில்லை - நாம் அமைதியாக இருந்து, அதே வழியில் தொடர்ந்து விளையாடினால் போதுமானது.

பிபிசிக்காக (BBC) இந்தத் தொடரில் பணியாற்றிய பிறகு நான் இப்போது மாட்ரிட் திரும்பியுள்ளேன். ஞாயிற்றுக்கிழமை நடக்கும் போட்டியில் அர்ஜென்டினாவை வீழ்த்தி, 2010-ல் செய்தது போலக் கோப்பையை நாட்டுக்கு எடுத்து வர முடியும் என்று ஒட்டுமொத்த நாடும் நம்புகிறது என்று என்னால் சொல்ல முடியும்.

அந்த நம்பிக்கை பல இடங்களிலிருந்து வருகிறது - யூரோ 2024ஐ வென்றதில் இருந்து, 37 போட்டிகள் கொண்ட நமது நீண்ட தோல்வியறியாத பயணத்தில் இருந்து மற்றும் நிச்சயமாக அரையிறுதியில் பிரான்ஸை நாம் வீழ்த்திய விதத்தில் இருந்து அது கிடைக்கிறது.

இந்த ஸ்பெயின் அணியின் பலம் அதன் கூட்டு ஒற்றுமையிலும் (group) அவர்களின் மனநிலையிலும் தான் உள்ளது. அனைவரும் ஒன்றிணைந்து விளையாடும் விதத்தில் ஒரு கூட்டமைப்பாகச் செயல்படுகிறார்கள்; அவர்கள் தங்களுக்கு என்று ஒரு தனித்துவமான அடையாளத்தை நம்புகிறார்கள், அதாவது அவர்கள் எப்போதும் ஒரே மாதிரியான விஷயங்களையே தொடர்ந்து செய்கிறார்கள் என்று அர்த்தம்.

இந்த உலகக் கோப்பையில் எங்களது முதல் போட்டி கேப் வெர்டே (Cape Verde) அணியுடன் 0-0 என்ற கணக்கில் டிராவில் முடிந்தது, இது நாங்கள் எதிர்பார்த்த முடிவு அல்ல - ஆனால் ஸ்பெயின் பதற்றமடையவில்லை, தங்களது அணுகுமுறையையும் மாற்றிக் கொள்ளவில்லை.

நாக் அவுட் சுற்றுகளில் போர்ச்சுகல் மற்றும் பெல்ஜியத்திற்கு எதிராகவும் இதே நிலைதான் நீடித்தது, அப்போது அவர்கள் வெற்றிக்கான கோலை அடிக்க கடைசி நிமிடம் வரை போராட வேண்டியிருந்தது. அதேபோல், முற்றிலும் மாறுபட்ட ஒரு சூழலில், அரையிறுதிப் போட்டியில் பிரான்ஸ் அணிக்கு எதிராக ஆரம்பத்திலேயே முன்னிலை பெற்றபோதும் அவர்கள் இதே அணுகுமுறையைத்தான் கடைப்பிடித்தனர்.

ஒட்டுமொத்த தொடரையும் வெல்வதற்குத் தகுதியான முதன்மையான அணிகளில் ஒன்றாக பிரான்ஸ் இருந்தது. அவர்கள் தங்களது மற்ற போட்டிகளில் நிறைய கோல்களையும் அடித்திருந்தனர். இருந்தபோதிலும், ஸ்பெயின் அணி நேர்மறையான எண்ணத்துடன் இருந்தது. தங்களது முன்னிலையைத் தக்கவைத்துக் கொள்வதற்காக அவர்கள் தங்களின் விளையாட்டு அணுகுமுறையை மாற்றிக் கொள்ளவில்லை.

அத்தகைய தெளிவான அணுகுமுறையை கொண்டிருப்பதும், அதைத் தொடர்ந்து பின்பற்றுவதும் தான் மிக முக்கியமான விஷயம், குறிப்பாக இப்போது அது மிகவும் தேவை.

ஸ்பெயின் அணி தனது அணியில் உள்ள சில வீரர்களை மாற்றலாம், ஆனால் அவர்கள் எப்போதும் தங்களது ஆட்டத்தின் வடிவத்தை மாற்றுவதில்லை; அவர்களின் மனநிலையும் எப்போதும் ஒரே மாதிரியாகத்தான் இருக்கும் - அது பந்தைத் தன் வசம் வைத்திருப்பது மற்றும் ஆட்டத்தை முடிந்தவரை தன் கட்டுப்பாட்டிற்குள் வைத்திருப்பது பற்றியதாகும்.

நிச்சயமாக சில நேரங்களில் ஒரு போட்டி உங்களுக்கு வெவ்வேறு சூழ்நிலைகளை ஏற்படுத்தலாம், ஆனால் இதுவரை இந்த உலகக் கோப்பையில் விளையாடிய ஏழு போட்டிகளில் ஒன்றில் கூட ஸ்பெயின் அணி பின்தங்கிய நிலைக்குச் செல்லவில்லை, இது ஒரு குறிப்பிடத்தக்க விஷயமாகும்.

ஒருவேளை இறுதிப்போட்டியில் அப்படி நடந்து, அர்ஜென்டினா அணிக்கு எதிராக நாங்கள் பின்தங்கிய நிலைக்குச் சென்றாலும், நாங்கள் மாற மாட்டோம். ஆரம்பத்தில் இருந்தே எங்களிடம் காணப்பட்ட அதே அமைதியை, இறுதிவரை நாங்கள் தொடர்ந்து கடைப்பிடிப்போம்.

மெஸ்ஸி போல ஆல்வரெஸும் ஆட்டத்தின் போக்கை மாற்ற முடியும்

ஸ்பெயினில் உள்ள அனைவரும் இறுதிப்போட்டியைப் பற்றி மிகுந்த நம்பிக்கையுடன் இருக்கிறார்கள். நிச்சயமாக அர்ஜென்டினாவும் இதே உணர்வைத்தான் கொண்டிருக்கும். அவர்கள்தான் தற்போதைய சாம்பியன் என்பதுடன் தாங்கள் மீண்டும் உலக சாம்பியனாவதற்குத் தகுதியானவர்கள் என்பதைப் போதுமான அளவு நிரூபித்தும் காட்டியுள்ளனர்.

இறுதிப்போட்டி மிகவும் கடினமாக இருக்கப் போகிறது, குறிப்பாக லியோனல் மெஸ்ஸி மிகச் சிறந்த ஃபார்மில் இருப்பதாலும், தனது லட்சியத்தையும் வேட்கையையும் அனைவருக்கும் வெளிப்படுத்தியிருப்பதாலும் இது இன்னும் சவாலானது.

ஆட்டத்தின் எந்தவொரு தருணத்திலும் அவரால் எவ்வாறு பெரிய மாற்றத்தை ஏற்படுத்த முடியும் என்பதை ஸ்பெயினில் உள்ள நாம் நன்றாகவே அறிவோம்; இங்கிலாந்து அணிக்கு எதிரான போட்டியில் அவர் தனது இடத்தை சற்றே மாற்றிக் கொண்டு, அதிக இடவசதியைப் பெறுவதற்காக வலது பக்கத்திற்குச் சென்று ஆட்டத்தின் போக்கை மாற்றியதை இதற்கு உதாரணமாகச் சொல்லலாம்.

அர்ஜென்டினா அணியின் மற்ற வீரர்களைப் பற்றியும் நாம் நிறைய அறிந்து வைத்துள்ளோம். அவர்கள் எவ்வளவு ஆபத்தானவர்கள் மற்றும் கோப்பையைத் தங்களது நாட்டிற்கு எடுத்துச் செல்வதற்காக அவர்கள் எப்படித் தங்களின் முழுத் திறனையும் கொடுத்துப் போராடுவார்கள் என்பதும் நமக்குத் தெரியும்.

நான் 2023 முதல் 2025 வரை அட்லெட்டிகோ மாட்ரிட் அணியில் இருந்தபோது, அவர்களின் அணியைச் சேர்ந்த சில வீரர்களுடன் விளையாடியுள்ளேன்; எனவே அவர்களின் மனநிலை மற்றும் தரம் ஆகியவற்றைப் பற்றி நான் முழுமையாக அறிவேன்.

அவர்களில் ஒருவர் தான் ஜூலியன் ஆல்வரெஸ். அவரை நான் ஒரு முழுமையான ஆட்டக்காரர் என்று விவரிப்பேன். அவர் ஒரு அக்மார்க் ஒன்பதாம் எண் முன்கள ஆட்டக்காரரைப் போன்றவரோ அல்லது சற்றுப் பின்னே விளையாடும் பத்தாம் எண் ஆட்டக்காரரைப் போன்றவரோ அல்ல.

அவரால் பக்கவாட்டுப் பகுதியிலும் சிறப்பாகச் செயல்பட முடியும், அதே நேரத்தில் மைதானத்தின் அனைத்துப் பகுதியிலும் இருக்க வேண்டும் என்று அவர் விரும்புவார். சில நேரங்களில் அவர் பின்வாங்கி வந்தாலும், அவர் ஒரு மிகச்சிறந்த துல்லியமான முன்கள ஆட்டக்காரர் ஆவார். மைதானத்தின் எந்தப் பகுதியில் இருந்தாலும், எப்போதும் எதிரணியின் பாக்ஸிற்குள் நுழைந்து ஆட்டத்தை தங்களுக்குச் சாதகமாக முடித்து வைக்கவே அவர் முயற்சிப்பார்.

ஜூலியன் தனது வலது அல்லது இடது கால் என இரண்டின் மூலமும் பாக்ஸிற்கு வெளியிலிருந்தும் பந்துகளை உதைக்கக் கூடியவர். அவரது கிளப் மற்றும் நாட்டிற்காக அவர் அடித்த பல அற்புதமான கோல்களை நாம் பார்த்திருக்கிறோம்.

அவரோடு இணைந்து விளையாடியது போலவே, அவருக்கு எதிராகவும் நான் களமிறங்கியிருக்கிறேன் - அவரை ஒரே இடத்தில் கட்டிப்போடுவது மிகவும் கடினம். ஏனெனில் அவர் எப்போதும் நகர்ந்து கொண்டே இருப்பார். தனக்காகவும், தனது அணிக்காகவும் திறந்தவெளியை கண்டறிய அவர் எப்போதும் முயல்வார். பந்தை எப்போது தன் வசம் வைத்திருக்க வேண்டும், எப்போது அதை விரைவாக மற்ற வீரரிடம் அனுப்ப வேண்டும் என்பதை அவர் நன்கு அறிவார்.

அவருக்கு எதிராக ஒரு எதிராளியாக விளையாடியபோது என்னால் அவரது தரத்தை பார்க்க முடிந்தது, ஆனால் அதன் பிறகு அட்லெட்டிகோ அணியில் நாங்கள் ஒரே அறையைப் பகிர்ந்து கொண்டு, அவரோடு இணைந்து பயிற்சி செய்தபோதுதான், அவர் எவ்வளவு சிறந்தவர் என்பதை நான் நேரடியாகக் கண்டேன்.

மெஸ்ஸியைப் போலவே, அவரும் ஆட்டத்தின் போக்கை மாற்றக்கூடியவர், எந்தவொரு கணத்திலும் ஒரு போட்டியின் போக்கை மாற்றக்கூடிய தரம், திறமை மற்றும் புத்திசாலித்தனம் கொண்ட ஒரு வீரர் அவர். ஸ்பெயின் அணி அவரை மிகவும் உன்னிப்பாகக் கண்காணிக்க வேண்டும்.

'ஸ்பெயின் வீரர்கள் அனைவரும் அணிக்கே முதலிடம் தருகிறார்கள்'

அர்ஜென்டினாவை அமைதியாக வைத்திருப்பது மிகவும் கடினமாக இருக்கும். ஆனால் ஸ்பெயினுக்கு உதவப் போவது நமது அணியின் கட்டமைப்பு மற்றும் தற்காப்பு ரீதியாக நமது ஒருங்கிணைப்பு எவ்வளவு வலுவாக உள்ளது என்பதுதான். இதுவரை நாம் ஒரே ஒரு கோல் மட்டுமே வாங்கியுள்ளோம்.

ஸ்பெயின் பொதுவாக எதிரணியின் பகுதியில் விளையாடவும், முன்கள வீரர்களை நோக்கி அழுத்தத்தை செலுத்தவும் விரும்புகிறது. ஆனால் இந்த உலகக் கோப்பையில் அவர்கள் கடினமான தருணங்களை எதிர்கொண்டபோது - அதாவது மிகவும் சுருங்கி, நடுத்தர அல்லது குறைந்த அளவிலான தடுப்பு அரணாக ஒன்றிணைந்து செயல்பட வேண்டியிருந்த போது அவர்களால் அதைச் செய்ய முடிந்தது.

இது கூட்டு முயற்சிக்குக் கிடைத்த வெற்றியாகும். ஒட்டுமொத்தமாக அவர்கள் ஒரு சிறந்த வேலையைச் செய்துள்ளனர்.

ரோத்ரி மற்றும் ஃபேபியன் ரூயிஸ் ஆகியோர் பின்வரிசை நான்கு தற்காப்பு வீரர்களுக்கு அரணாக இருப்பதில் மிகவும் சிறப்பாக செயல்படுகிறார்கள். பிரான்ஸ் அணிக்கு எந்தவொரு தெளிவான வாய்ப்புகளும் கிடைக்காமல் நாம் தடுத்தபோது, லமின் யமால் கூட தற்காப்பு ஆட்டத்தில் அற்புதமாக விளையாடினார். அலெக்சும் இடது பக்கத்தில் அதையே செய்து வருகிறார்.

லாமின் யமால் இந்தத் தொடரில் தொடர்ந்து சிறப்பாக ஆடி வருகிறார். பந்து அவரிடம் இல்லாத போதும் அவர் மைதானத்தில் உழைக்கும் விதம் அவரது சிறப்பான மனநிலையைக் காட்டுகிறது. இது ஒரு மிக முக்கியமான விஷயமாகும்.

அவரது செயல்பாடுகள் அவருக்குப் பல கோல்களைப் பெற்றுத் தராமல் இருந்திருக்கலாம். இதுவரை அவர் குரூப் சுற்றில் செளதி அரேபியாவுக்கு எதிரான 4-0 என்ற வெற்றியின் போது ஒரே ஒரு கோல் மட்டுமே அடித்துள்ளார். கோல் அடிப்பதற்கான நேரடி அசிஸ்ட் எதையும் அவர் வழங்காமல் இருந்திருக்கலாம்.

ஆனால் அவர் வெவ்வேறு வழிகளில் ஆட்டத்தின் போக்கை மாற்றி, அணிக்கு உதவ விரும்பும் விதத்தை பார்க்க முடிகிறது. சில நேரங்களில் அவருக்குப் பந்து கிடைக்காதபோது கூட, தனது சக அணி வீரர்களுக்கு இடம் ஏற்படுத்திக் கொடுப்பதற்காக அவர் எதிரணி தடுப்பாட்டக்காரர்களை தன் பக்கம் ஈர்க்கிறார்.

இந்த ஸ்பெயின் அணி ஒரு உண்மையான கூட்டுமுயற்சி கொண்ட அணியாகும். அவர்கள் அனைவருக்கும் அந்த மனநிலை இருக்கிறது - அதாவது சில நேரங்களில் தங்களை தியாகம் செய்து அணிக்கு முதலிடம் கொடுப்பது.

எனவே, விங்கில் யார் விளையாடினாலும், எங்களது விங்கர்கள் மிகவும் ஆக்ரோஷமாகத் தாக்கக்கூடிய மனநிலை கொண்டவர்களாக இருக்கிறார்கள். அதே நேரத்தில் பந்தை இழக்கும்போது அவர்கள் ஃபுல்-பேக் வீரர்களுக்கும் உதவுகிறார்கள். எங்களது நம்பர் 9 வீரரான மைக்கேல் ஓயர்சாபலும் ஒரு மிட்ஃபீல்டர் வீரரைப் பிடிக்க இறங்கி வருகிறார்.

"அதேபோலவே, நமது ஃபுல்-பேக் வீரர்களான பெட்ரோ போரோ மற்றும் மார்க் குகுரெல்லா ஆகியோர் தடுப்பு ஆட்டத்தில் வலுவாக இருப்பது மட்டுமின்றி, தாக்குதல் ஆட்டத்திலும் தங்களை ஈடுபடுத்திக் கொள்கிறார்கள்; பந்தை நகர்த்திச் செல்லும் பில்ட்-அப் ஆட்டத்திலும், கோல் அடிக்க உதவுவதிலும், கோல்கள் அடிப்பதிலும் அவர்கள் பங்களித்துள்ளனர்.

ஸ்பெயின் போன்ற ஆக்ரோஷமான தாக்குதல் ஆட்டத்தை வெளிப்படுத்தும் அணியில், ஃபுல்-பேக் வீரர்கள் மைதானத்தில் மிக முன்களத்திற்கு செல்ல முனைகிறார்கள். இதனால் தற்காப்பில் பலவீனமடையும் அபாயம் ஏற்படும். ஆனால் போரோ மற்றும் குகுரெல்லா ஆகிய இருவருமே மிகவும் வலிமையான விங்கர்களுக்கு எதிராகவும் கூட, மைதானத்தின் இரு முனைகளிலும் (முன்னோக்கியும் பின்னோக்கியும்) தங்களது பணிகளைச் சிறப்பாகச் செய்ய முடியும் என்பதை நிரூபித்துள்ளனர்.

அணிக்காகக் கூடுதல் உழைப்பை வழங்க அனைவரும் தயாராக இருப்பதைப் பார்ப்பது மகிழ்ச்சி அளிக்கிறது, இப்போது நாம் பார்க்க விரும்புவதெல்லாம் இதேபோன்றதொரு சிறப்பான ஆட்டத்தைத்தான்.

தொடரின் தொடக்கத்தில் ஸ்பெயின் வீரர்களில் சிலர் 100% உடற்தகுதியுடன் இல்லை என்பது நமக்குத் தெரியும், ஆனால் இது ஒரு நீண்ட உலகக்கோப்பை தொடர் என்பதால், அது தொடங்கும்போது பயிற்சியாளர் லூயிஸ் டி லா ஃபுயெண்டே அதை மனதில் வைத்திருந்தார் என்றே நான் நினைக்கிறேன்.

அன்றிலிருந்து, வீரர்களின் நம்பிக்கையும், உடற்தகுதியும், ஆட்டத்தின் வேகமும் தொடர்ந்து அதிகரித்துள்ளன.

இப்போது ஒட்டுமொத்த நாட்டையும் மகிழ்ச்சியடையச் செய்வதற்கான வாய்ப்பு வீரர்களுக்குக் கிடைத்துள்ளது. அர்ஜென்டினாவுக்கு எதிராக விளையாடுவது எளிதானதாக இருக்காது, ஆனால் இந்த உலகக் கோப்பையிலேயே தங்களுக்குக் கிடைத்த மிகச் சிறந்த மற்றும் சரியானதொரு தருணத்தில் அவர்கள் இறுதிப் போட்டிக்குள் நுழைகிறார்கள்."

செசார் அஸ்பிலிகுவெட்டா, பிபிசி ஸ்போர்ட்டில் கிரிஸ் பெவனிடம் பேசியதிலிருந்து)

- இது, பிபிசிக்காக கலெக்டிவ் நியூஸ்ரூம் வெளியீடு