Faransiiska oo wajahaya hubanti la'aan siyaasadeed kadib markii doorashadii baarlamaanka aaney cidna helin aqlabiyad

Tebin toos ah

1. 11 Luulyo 2026War deg deg ah, Degdeg: Trump oo ka walaacsan in Iran ay disho iyo waxa dhici kara

   

   Xigashada Sawirka, Aqalka Cad

   Madaxweynaha Maraykanka, Donald Trump, ayaa u hanjabay dowladda Iran, isagoo sheegay in Maraykanku uu qaadi doono weerarro ballaaran oo ka dhan ah Iran haddii ay isku daydo ama ay fuliso qorshe lagu doonayo in lagu khaarijiyo isaga.

   Qoraal uu ku daabacay bartiisa bulshada ee Truth Social, ayuu Trump ku yiri:

   "Kun gantaal ayaa loo diyaariyey, laguna beegsaday Jamhuuriyadda Islaamiga ah ee Iran. Haddii hanjabaadda dowladda Iran ee lagu doonayo in lagu dilo madaxweynaha Maraykanka la fuliyo, kumannaan gantaal oo kale ayaa isla markiiba la ridi doonaa."

   Trump ayaa sidoo kale sheegay in amaradii lagama maarmaanka ahaa hore loo bixiyay, isla markaana ciidamada Maraykanku ay diyaar u yihiin inay "si buuxda u burburiyaan dhammaan goobaha Iran" muddo hal sano ah, iyadoo ay jirto suurtagalnimada in muddadaas la kordhiyo.

   Wuxuu farriintiisa ku soo gabagabeeyay:

   "Mahad oo dhan waxaa iska leh Alle."

   Hanjabaaddan ayaa timid kadib markii ay soo baxeen warar sirdoonka Israa’iil ay sheegeen oo ku saabsan qorshe cusub oo la sheegay in Iran ay ku doonayso inay ku disho Trump, iyo sidoo kale sawirro iyo halku-dhegyo lagu soo bandhigay intii lagu jiray aaska Ayatollah Cali Khamenei.

   Mas’uuliyiinta Jamhuuriyadda Islaamiga ah ee Iran ayaa hore u beeniyay eedeymaha sheegaya inay qorsheynayeen in la khaarijiyo Donald Trump.

2. 11 Luulyo 2026War deg deg ah, Muxuu yahay codsiga Iran Trump u dirtay

   

   Xigashada Sawirka, Getty Images

   Madaxweynaha Maraykanka, Donald Trump, ayaa sheegay in Iran ay codsatay in la sii wado wadaxaajoodyada.

   Qoraal uu ku baahiyay bartiisa bulshada ee Truth Social, ayuu Trump ku yiri:

   "Iran waxay naga codsatay inaan sii wadno wadaxaajoodyada. Waan aqbalnay codsigaas."

   Hase yeeshee, madaxweynaha Maraykanka ayaa sheegay inuu si cad ugu sheegay Iran in xabbad-joojintii ay dhammaatay.

   Mar sii horeysay wakaaladda wararka caalamiga ah ee Reuters ayaa sheegtay in wada-xaajoodayaal ka socda Qadar ay ku sugnaayeen Iran, halkaas oo ay kula kulmayeen mas’uuliyiin Iraniyiin ah.

   Reuters, oo soo xiganaysa ilo xog-ogaal ah, ayaa sheegtay in dadaalladaasi ay ujeeddadoodu tahay in la dejiyo xiisadda u dhexeysa Iran iyo Maraykanka iyo in loo gogol xaaro wadahadallo ballaaran oo u dhexeeya labada dhinac.

   Sii akhri:

   Qaar ka mid ah hoggaamiyaaasha NATO oo Turkiga kaga tegay bistooladihii hadiyadda loo siiyay

   Netanyahu oo Trump uga cawday Madaxweyne Erdogan

   Qaabka loo aasay Ayatollah Cali Khamenei ma waafaqsan tahay Shareecada Islaamka?

3. 11 Luulyo 2026War deg deg ah, Iran oo dusha u saarisay Mareykanka jabinta heshiiskii hore loo gaaray

   

   Xigashada Sawirka, Getty Images

   Wasiirka Arrimaha Dibadda Iran, Cabbaas Caraqji, ayaa ku eedeeyay Maraykanka inuu jebiyay is-afgaradkii ay labada dal gaareen, isagoo sheegay in Iran ay weli u hoggaansan tahay qodobada heshiiskaas.

   Qoraal uu ku baahiyay barta X, ayuu Caraqji ku sheegay in Xoghayaha Maaliyadda Maraykanka uu ku xadgudbay Qodobka 9-aad ee is-afgaradka.

   Wuxuu ku dooday in tallaabadaasi ay qayb ka tahay xadgudubyo iyo khaladaad isdaba joog ah oo uu Maraykanku ku kacay.

   Sida ku cad Qodobka 9-aad ee is-afgaradkii ay Maraykanka iyo Iran kala saxiixdeen bishii hore, Maraykanku wuxuu oggolaaday inuu bixiyo fasaxyo u saamaxaya Iran inay dhoofiso saliiddeeda, shidaalka iyo adeegyada la xiriira, sida adeegyada bangiyada iyo gaadiidka, isla markaana aanu soo rogin xayiraado cusub.

   Hase yeeshee, maalmo ka hor, kadib weerarradii lagu qaaday maraakiibta maraysa Marinka Hormuz, Wasaaradda Maaliyadda Maraykanka ayaa cunaqabateyn ku soo rogtay qaar ka mid ah xarumaha sarifka lacagaha iyo shirkado Iraniyiiin ah, tallaabadaas oo Tehran ay ku tilmaantay mid jebinaysa heshiiska labada dhinac.

4. 11 Luulyo 2026War deg deg ah, Iran oo qiratay in weerarrada Maraakiibta Marinka Hormuz ay tahay tallaabo "khalad ah"

   

   Xigashada Sawirka, Getty Images

   CBS News ayaa, iyadoo soo xiganaysa mas’uuliyiin sare oo Maraykan ah, sheegtay in mas’uuliyiin Iranian ah ay si gaar ah ugu sheegeen la-taliyeyaasha Madaxweyne Donald Trump in weerarradii lagu qaaday maraakiibta ganacsiga ee Marinka Hormuz ay ahaayeen “khalad”, isla markaana ay fuliyeen xubno ka tirsan garabka mayalka adag ee Iran, kuwaas oo doonayay inay carqaladeeyaan wadaxaajoodyada.

   Sida ay mas’uuliyiintu sheegeen, Iran waxay doonaysaa in wadaxaajoodyadu sii socdaan, balse Aqalka Cad wuxuu ka dalbanayaa Tehran inay si cad u qirato mas’uuliyadda weerarradaas, kuwaas oo maamulka Trump u arko inay jebiyeen heshiiskii xabbad-joojinta.

   Warbixintu waxay intaas ku dartay in Madaxweyne Donald Trump uu faray kooxdiisa wadaxaajoodka, oo ay ka mid yihiin J.D. Vance, Jared Kushner, Steve Witkoff, iyo Marco Rubio, inay sii wadaan wadaxaajoodyada. Wareegga xiga ee wada-hadallada ayaa la qorsheeyay inuu maanta uu ka dhaco Urdun.

   Mas’uuliyiinta Maraykanka ayaa sidoo kale sheegay in haddii Iran ay sii waddo tallaabooyinka ay Washington u aragto kuwo colaad ah, Maraykanku uu uga jawaabi doono tallaabooyin milatari iyo kuwo dhaqaale.

5. 11 Luulyo 2026War deg deg ah, Degdeg: Mareykanka oo Iran u qabtay saacado kooban in ay ku joojiso weerarrada maraakiibta Hormuz

   

   Xigashada Sawirka, Reuters

   Warbaahinta Axios ayaa, iyadoo soo xiganaysa saddex mas’uul oo Maraykan ah, sheegtay in maamulka Madaxweyne Donald Trump uu Iran ka dalbaday inay maanta oo Sabtida ah si rasmi ah ugu dhawaaqdo in Marinka Hormuz uu u furan yahay isu-socodka maraakiibta, isla markaana ay joojinayso weerarrada lagu hayo maraakiibta ganacsiga.

   Sida ay mas’uuliyiintu sheegeen, Washington ayaa farriintan si toos ah ugu gudbisay Tehran iyada oo adeegsanaysa dhexdhexaadiyeyaal gobolka ka socda. Maraykanku wuxuu ku doodayaa in weerarradii dhowaan lagu qaaday maraakiibta ganacsiga ay jebiyeen heshiis ay labada dhinac kala saxiixdeen saddex toddobaad ka hor, isla markaana ay xiisaddu gaarsiisay heshiiskaas jilicsanaa heer uu qarka u saaran yahay inuu burburo.

   Warbixintu waxay intaas ku dartay in Wasiirka Arrimaha Dibadda Iran, Cabbaas Caraqji, la filayo inuu maanta oo Sabtida ah magaalada Muscat kula kulmo Wasiirka Arrimaha Dibadda Cumaan, Badr Al Busaidi, si ay uga wada hadlaan qalalaasaha ka taagan Marinka Hormuz iyo amniga isu-socodka maraakiibta. Mas’uuliyiinta Maraykanka ayaa filaya in Iran ay kulanka kaddib si cad u shaacin doonto mowqifkeeda ku saabsan joojinta weerarrada iyo dib u furista marinnada maraakiibta.

   Mid ka mid ah mas’uuliyiinta Maraykanka ayaa ka digay in haddii Iran ay diido codsigan, ay la kulmi doonto cawaaqib culus.

   Dhanka kale, Afhayeenka Wasaaradda Arrimaha Dibadda Iran, Esmail Baghaei, ayaa sheegay in Tehran ay aqbashay inay qaadato mas’uuliyad gaar ah oo ku aaddan dib u soo celinta isu-socodka caadiga ah ee maraakiibta ee Marinka Hormuz, isla markaana ay arrintaas kala shaqayn doonto dowladda Cumaan. Hase yeeshee, wuxuu caddeeyay in Iran ay diidday codsiga ku saabsan inay wadahadal toos ah la yeelato Maraykanka.

6. 11 Luulyo 2026Tobanka dhimse ee ugu dheer 2026 Bariga Afrika

7. 10 Luulyo 2026War deg deg ah, Jarmalka oo ciidamadiisa kala baxaya Iraaq

   

   Xigashada Sawirka, AFP/Getty Images

   Wakaaladda wararka Reuters, oo soo xiganaysa wargeyska Jarmalka ee Der Spiegel, ayaa sheegtay in Jarmalku uu ciidamadiisa kala bixi doono magaalada Erbil ee Gobolka Kurdida ee waqooyiga Ciraaq, isla markaana uu xiri doono saldhiggiisa milatari ee ku yaalla magaaladaas.

   Go’aankan ayaa yimid kadib markii Maraykanku uu go’aansaday inuu kala baxo ciidamadii masuulka ka ahaa ilaalinta saldhigga, taasoo qayb ka ah qorshihiisa lagu dhimayo joogitaanka ciidamadiisa milatari ee gobolka.

   Der Spiegel ayaa, iyadoo soo xiganaysa kulan warbixin lagu siiyay Guddiga Difaaca ee Baarlamaanka Jarmalka, sheegtay in ciidamada Jarmalku ay ka bixi doonaan Erbil dhammaadka bisha Sebtembar, oo ay ka harsan tahay wax ka yar saddex bilood.

   Hadda waxaa saldhig ku leh qiyaastii 30 askari oo Jarmal ah xero ku taalla duleedka garoonka diyaaradaha ee Erbil.

   Jarmalku wuxuu hore u yareeyay joogitaankiisa milatari ee Bariga Dhexe sababo la xiriira khataraha amni ee ka dhashay dagaalka u dhexeeya Iran iyo Maraykanka.

8. 10 Luulyo 2026Maxaad ka taqaannaa dalalka Afrika ee Soomaaliya ay ku jirto ee lagu dhisay nidaamka kaligii-taliska?

9. 10 Luulyo 2026War deg deg ah, Dalal badan oo isku dayaya in ay kala dhex galaan Iiraan iyo Mareykanka

   Wasiirrada Arrimaha Dibadda ee Masar iyo Qadar ayaa maanta oo Jimce ah ku baaqay in Maraykanka iyo Iran ay dib u billaabaan wadaxaajoodyada.

   Arrintan ayaa timid kadib markii Madaxweynaha Maraykanka Donald Trump uu sheegay in Washington ay oggolaatay inay sii waddo wadahadallada ay la leedahay Tehran, hase yeeshee uu ku celceliyay in xabbad-joojintii u dhexeysay labada dal ay dhammaatay.

   Sida lagu sheegay war-saxaafadeed ka soo baxay Wasaaradda Arrimaha Dibadda ee Masar, intii lagu jiray wada-hadal dhanka taleefanka ah, Wasiirka Arrimaha Dibadda Masar Badr Abdel Aty iyo Ra’iisul Wasaaraha ahna Wasiirka Arrimaha Dibadda Qadar Sheekh Maxammed bin Abdulraxmaan Al Thani ayaa ugu baaqay dhammaan dhinacyada inay mudnaanta siiyaan diblomaasiyadda iyo wada-hadallada, isla markaana ay dib ugu soo laabtaan miiska wadaxaajoodka.

   Wasiirka Arrimaha Dibadda Masar ayaa sidoo kale maanta kala hadlay xaaladihii ugu dambeeyay ee gobolka dhiggiisa dalalka Kuwait, Baxrayn iyo Urdun.

   War-saxaafadeed gaar ah oo ay soo saartay Wasaaradda Arrimaha Dibadda Qadar ayaa lagu sheegay in Sheekh Maxamed uu carrabka ku adkeeyay baahida loo qabo in dhammaan dhinacyadu u hoggaansamaan wada-hadalka iyo diblomaasiyadda, isla markaana la fuliyo qodobadii lagu heshiiyay ee ku jiray is-afgaradka u dhexeeya Maraykanka iyo Iran, oo ay ku jirto dammaanad-qaadka xorriyadda maraakiibtu ugu kala gooshi karaan Marinka Hormuz, si loo ilaaliyo amniga iyo xasilloonida gobolka.

   Maanta, wakaalado warar ayaa sheegay in wafti wada-xaajoodayaal ah oo ka socda Qadar ay gaareen Iran, iyagoo ujeeddadoodu tahay in la gogol xaaro dib u billaabashada wadaxaajoodyada u dhexeeya Iran iyo Maraykanka iyo in la dejiyo xiisadda u dhexeysa labada dhinac.

10. 10 Luulyo 2026War deg deg ah, Kuuriyada Waqooyi oo xoojinaysa nukliyeerkeeda iyo ciidamadeeda

    

    Xigashada Sawirka, Portrait of President Kim Jong-Un

    Warbaahinta dowladda Kuuriyada Waqooyi ayaa sheegtay in dalkaasi uu qorsheynayo inuu si wadajir ah u xoojiyo awooddiisa nukliyeerka, isla markaana uu xoojiyo hay’adihiisa sirdoonka iyo ciidamadiisa.

    Wakaaladda rasmiga ah ee wararka Kuuriyada Waqooyi, Korean Central News Agency, ayaa sheegtay in arrintan looga hadlay shir ay yeesheen Guddiga Dhexe ee Milateriga Xisbiga talada haya, kaas oo dhacay shalay.

    Kuuriyada Waqooyi waxay wajahaysaa cunaqabateynno caalami ah oo adag sababo la xiriira barnaamijkeeda nukliyeerka iyo tijaabooyinka hubka ee ay horay u samaysay.

11. 10 Luulyo 2026War deg deg ah, Waa sidee xaaladda Marinka Hormuz ee xilligaan

    

    Xigashada Sawirka, Reuters

    Tirada maraakiibta shidaalka qaada ee maalin kasta mara Marinka Hormuz ayaa u muuqatay inay hoos u dhacday maanta oo Jimce ah, kadib markii Maraykanka iyo Iran ay weerarro is dhaafsadeen, isla markaana uu sii socdo muranka ku saabsan cidda gacanta ku haysa marinkan muhiimka ah ee badda.

    Weerarradan ayaa mar kale sare u qaaday walaaca laga qabo in ay carqaladeeyaan sahayda shidaalka ee caalamka iyo isu-socodka maraakiibta ee marinnada badda.

    Xaaladdan ayaa muujinaysa in heshiiska ku-meelgaarka ah ee lagu joojiyay dagaalka uu yahay mid jilicsan, iyadoo Maraykanka iyo Iran ay weli wadaan wadaxaajoodyo lagu doonayo in lagu gaaro heshiis rasmi ah oo waara.

12. 10 Luulyo 2026War deg deg ah, Degdeg: Trump oo hadda ku dhawaaqay war cusub oo ku saabsan xaaladda Iiraan

    

    Xigashada Sawirka, Getty Images

    Madaxweynaha Maraykanka Donald Trump ayaa sheegay in Maraykanku uu weli wadahadallo la leeyahay Iran, hase yeeshee wuxuu ku adkaystay in xabbad-joojintii ay dhammaatay.

    Farriin uu ku daabacay baraha bulshada ayuu Trump ku yiri:

    "Jamhuuriyadda Islaamiga ah ee Iran waxay naga codsatay inaan sii wadno wadahadallada. Waan aqbalnay codsigaas, balse Maraykanku wuxuu si cad ugu sheegay in xabbad-joojintii ay soo afjarmatay."

    Hadalkan ayaa yimid kadib markii Maraykanku uu weeraray dhowr goobood oo ku yaalla shan gobol oo ku yaal koonfurta Iran, kaddib weerarro lagu qaaday maraakiib marayay gobolka, kuwaas oo Washington ay ku eedaysay Iran inay ka dambeysay.

    Dhanka kale, mas’uuliyiinta Iran ayaa sheegay in dalkoodu uu xaq u leeyahay inuu ka jawaabo weerar kasta oo lagu qaado kaabeyaashiisa iyo xarumihiisa muhiimka ah.

13. 10 Luulyo 2026Qaar ka mid ah hoggaamiyaaasha NATO oo Turkiga kaga tegay bistooladihii hadiyadda loo siiyay

14. 10 Luulyo 2026War deg deg ah, Qadar oo wadda dedaallo ay ku dhexdhexaadinayso Mareykanka iyo Iiraan

    Wakaaladda wararka Reuters ayaa, iyadoo soo xiganaysa ilo xog-ogaal ah, sheegtay in wada-xaajoodayaal ka socda Qadar ay ku sugan yihiin Iran, halkaas oo ay kula kulmayaan mas’uuliyiin ka tirsan dowladda Iran.

    Pakistan ayaa ah dhexdhexaadiyaha ugu weyn ee Iran iyo Maraykanka si loo gaaro heshiis nabadeed, hase yeeshee Qatar ayaa sidoo kale door firfircoon ka qaadanaysa dadaallada dhexdhexaadinta.

    Joogitaanka wada-xaajoodayaasha Qadar ee Iran ayaa imaanaysa kadib markii toddobaadkan ay is-weydaarsadeen weerarro Iran iyo Maraykanku. Kadib weerarradii lagu qaaday maraakiibta maraysa Marinka Hormuz, Maraykanka ayaa laba habeen oo isku xigta duqeeyay bartilmaameedyo ku yaalla gudaha dhulka Iran.

    Reuters ayaa sheegtay in dadaalladan looga gol leeyahay in la dejiyo xiisadda isla markaana loo gogol xaaro sii wadista wadahadallo ballaaran, iyadoo wadaxaajoodyadana lagu wado in la-tashi lala sameeyo Maraykanka.

15. 10 Luulyo 2026War deg deg ah, Trump iyo Netanyahu oo u tashanaya Iiraan

    

    Xigashada Sawirka, Reuters

    Warbaahinta Israa’iil ayaa ka soo xigatay xafiiska Ra’iisul Wasaaraha Israa’iil Benjamin Netanyahu, oo sheegay in Madaxweynaha Maraykanka Donald Trump uu Khamiistii khadka taleefanka kula hadlay Netanyahu si ay uga wada hadlaan xaaladihii ugu dambeeyay ee la xiriira Iran.

    Sida lagu sheegay war-saxaafadeedka xafiiska ra’iisul wasaaraha Israa’iil, labada dhinac waxay ka wada hadleen “tallaabooyin la isku dubbariday oo laga fulinayo jihooyin kala duwan,” waxaana Donald Trump uu Benjamin Netanyahu uga warbixiyay tallaabooyinka uu Maraykanku ka qaaday Iran.

    War-saxaafadeedka ayaa sidoo kale lagu sheegay in Netanyahu uu dhaleeceeyay Madaxweynaha Turkiga Recep Tayyip Erdoğan iyo xubno ka tirsan xulafadiisa, isagoo ku eedeeyay inay ka soo horjeedaan jiritaanka dowladda Israa’iil. Wuxuuna carrabka ku adkeeyay baahida loo qabo in la sii ilaaliyo aagagga amniga ee ku teedsan xadka u dhexeeya Israa’iil iyo Lubnaan.

    Turkiga ayaa maalmahan martigeliyay shir-madaxeedkii NATO.

    Mas’uuliyiinta Turkiga ayaa marar badan ku eedeeyay Israa’iil inay wiiqayso is-afgaradkii u dhexeeyay Maraykanka iyo Iran.

    Dhanka kale, Israa’iil ayaa si isdaba joog ah uga muujisay walaac ku saabsan suurtagalnimada in Turkiga laga iibiyo diyaaradaha dagaalka ee casriga ah ee F-35, arrin la sheegay inay sababtay in la baajiyo booqasho uu Wasiirka Difaaca Maraykanka Pete Hegseth ku tagi lahaa Israa’iil.

16. 10 Luulyo 2026War deg deg ah, Toogasho ka dhacday meel u dhow goobta lagu aasay hoggaamiyihii hore ee Iiraan

    

    Sida ay sheegtay Wakaaladda Wararka Jamhuuriyadda Islaamiga ah ee Iran (IRNA), ku-xigeenka amniga ee guddoomiyaha gobolka Khorasan Razavi ayaa xaqiijiyay in laba qof lagu dilay aagga Sarafrazan Boulevard ee galbeedka magaalada Mashhad.

    Amirullah Shamghadari ayaa u sheegay IRNA in weli aan la ogeyn sababta dhacdada iyo aqoonsiga labada qof ee dhintay.

    Goobta ay rasaastu ka dhacday waxay qiyaastii 17 kiiloomitir u jirtaa goobta barakeysan ee Imaamka siddeedaad ee Shiicada.

    Maanta ayaa lagu soo gabagabeeyay magaalada Mashhad maalintii ugu dambeysay ee aaska hoggaamiyihii hore ee Iran, Ayatollah Cali Khamenei, iyo xubno ka tirsan qoyskiisa.

    Munaasabadda aaska ayaa ka bilaabatay Jimcihii hore magaalada Tehran, waxaana ay sii martay magaalooyinka Qom, Najaf, Karbala, iyo ugu dambeyn Mashhad.

17. 10 Luulyo 2026Qaabka loo aasay Ayatollah Cali Khamenei ma waafaqsan tahay Shareecada Islaamka?

18. 10 Luulyo 2026Cumar Cartan oo tagay jigjiga oo ay ka dhacayso ciyaar u dhaxeeysa laba gobol

    

    Xigashada Sawirka, SRTV Somali

    Garsooraha heerka calami ee Cumar Cabdulqaadir Cartan ayaa maanta gaaray magaalada Jigjiga ee caasimadda dowlad deegaanka Soomaalida, halkaas oo si weyn loogu soo dhaweyay.

    Mas’uuliyiinta deegaanka iyo dadweyne ayaa garoonka diyaaradaha ku soo dhaweyay, waxaana galabta magaalada Jigjiga ka dhacaysa ciyaarta kama dambeysta ah ee goballada Siti iyo shabeelle ee dowlad deegaanka.

    Cumar oo ka mid noqday garsoorayaashii loo xushay inuu dhexdhexaadiyo sanadkaan Koobka Adduunka, ayaa dhawaan Mareykanku u diiday in uu dalkiisa galo, hase-yeeshee wixii intaa ka dambeyay waxaa uu noqday mid si weyn caalamka looga taageeray isla markaana dalal badan iyo ururo kala duwan garab istaageen.

    

    Xigashada Sawirka, SRTV Somali

19. 10 Luulyo 2026Nin diyaarad hawada ku jirta daaqadeeda madax kala baxay

    Mid ka mid ah rakaabkii saarnaa diyaarad ka duushay Thessaloniki oo Giriigga ah kuna socotay Memmingen oo Jarmalka ah ayaa loo fidiyay daryeel caafimaad kadib markii daaqad ka mid ah kuwa diyaaradaha ay furantay intii ay hawada ku jirtay.

    Wararku waxay sheegayaan in ninkaasi oo 61 jir ah kana soo jeeda Serbia uu qayb ahaan madaxa kala baxay daaqadda furantay ka hor inta aysan diyaaradda, oo ay maamulaysay Malta Air, aysan , si nabad ah u degin.

20. 10 Luulyo 2026Israa'iil ayaa duqeyn ku dishay qabanqaabiyihii daawashada Koobka Adduunka ee Qasa