لوگوں کو 31 اگست کے بعد بھی افغانستان چھوڑنے کی اجازت ہوگی، طالبان کی سو سے زائد ممالک کو یقین دہانی

لائیو کوریج

1. 25 اگست 2021طالبان: کام کرنے والی خواتین ’وقتی طور پر گھروں میں رکیں‘

   طالبان نے کہا ہے کہ کام کرنے والی خواتین کو اس وقت تک گھروں میں بیٹھنا چاہیے جب تک ان کی حفاظت کو یقینی نہیں بنایا جاتا۔

   طالبان کے ترجمان ذبیح اللہ مجاہد کے مطابق ’یہ ایک عارضی اقدام ہے‘ اور افغان خواتین پر پابندیاں بہت تھوڑے عرصے کے لیے ہوں گی۔

   انھوں نے کہا کہ ’ہماری سیکیورٹی فورسز کو پتا نہیں ہے کہ خواتین کے ساتھ معاملات کیسے کرنے ہیں، خواتین سے بات کیسے کرنی ہے۔ جب تک ہمارے پاس مکمل سیکیورٹی نہیں ہے، ہم خواتین سے کہیں گے کہ وہ گھروں میں رکیں۔‘

   کابل کا کنٹرول حاصل کرنے کے بعد سے طالبان نے اپنا قدرے اعتدال پسند تاثر دینے کی کوشش کی ہے اور خواتین اور لڑکیوں کی آزادی اور کسی حد تک آزادیِ اظہار رائے کی یقین دہانی کروائی ہے۔

   تاہم اقوام متحدہ نے طالبان جنگجوؤں کی جانب سے خواتین کے حقوق کی خلاف ورزیوں کی ’صدقہ اطلاعات‘ کی نشاندہی کی ہے۔

2. 25 اگست 2021’افغان پیرالمپک کھلاڑیوں کو ملک سے بحفاظت نکال لیا گیا‘

   بدھ کے روز انٹرنیشنل پیرا اولمپک کمیٹی (آئی پی سی) نے بتایا کہ افغانستان کے دو پیرا اولمپک کھلاڑیوں کو بحفاظت ملک سے نکال لیا گیا ہے۔

   دونوں ٹائیکوانڈو کھلاڑیوں زکیہ خدادادی اور حسین رسولی کو ٹوکیو پیرالمپکس میں اپنے ملک کی نمائندگی کرنا تھی۔

   مگر افغانستان میں طالبان کی کامیابی کے بعد دونوں ان ہزاروں لوگوں میں سے تھے جو کہ ملک سے باہر نہیں جا پا رہے تھے۔

   ان کھیلوں کے آغاز سے قبل انٹرنیشنل پیرا اولمپک کمیٹی نے کھلاڑیوں کو یہ کہہ دیا تھا کہ وہ مقابلوں میں شرکت نہیں کر سکیں گے اور کھیلوں کے آغاز میں افغان پرچم صرف علامتی طور پر لہرایا گیا اور ایک رضاکار اسے لے کر گراؤنڈ میں اترا۔

   آئی پی سی کے ترجمان کریگ سپینس نے بدھ کے روز کہا کہ ’انھیں افغانستان سے نکال لیا گیا ہے اور اب وہ ایک محفوظ مقام پر ہیں۔ میں آپ کو یہ نہیں بتاؤں گا کہ وہ کہاں ہیں کیونکہ یہ کھیلوں کا نہیں بلکہ انسانی جان کو محفوظ رکھنے کا معاملہ ہے۔‘

   اگر ان کا خواب پورا ہو جاتا تو 23 سالہ زکیہ خدادادی ان کھیلوں میں افغانستان کی نمائندگی کرنے والی پہلی خاتون ہوتیں۔

3. 25 اگست 2021بریکنگ, امریکی فوجیوں کا پہلا دستہ افغانستان سے روانہ

   اگرچہ دیگر اتحادی اس پر ڈیڈ لائن میں توسیع کے لیے وباؤ ڈال رہے ہیں، امریکی صر جو بائیڈن کے بیان کے مطابق امریکہ 31 اگست تک افغانستان سے اپنے تمام اہلکار نکالنے کی کوشش کر رہا ہے۔

   امریکی میڈیا کے مطابق سینکڑوں امریکی فوجی افغانستان سے روانہ ہو چکے ہیں تاہم سی این این سے بات کرتے ہوئے ایک امریکی دفاعی اہلکار نے کہا کہ ان کے جانے سے افغانستان میں امریکی صلاحیتوں پر کوئی اثر نہیں پڑے گا۔

   طالبان نے 31 اگست کی ڈیڈ لائن میں کسی قسم کی توسیع سے انکار کیا ہے۔

   وائٹ ہاؤس کے مطابق کابل سے لوگوں کو نکالنے کا کام رفتار پکڑ رہا ہے اور منگل کو 12 گھنٹوں میں وہ 12 ہزار افراد کو نکالنے میں کامیاب ہوئے۔ان میں سے 6400 افراد کو امریکی فوجی طیاروں پر جبکہ دیگر کو اتحادی ممالک کے جہازوں میں بھیجا گیا۔

   امریکہ نے 14 اگست سے اب تک 70 ہزار سے زیادہ افراد کو افغانستان سے نکالا ہے۔

   تاہم دیگر ممالک کا ماننا ہے کہ 31 اگست تک تمام شہریوں، اہلکاروں اور ان کے افغان اتحادیوں کو ملک سے بحفاظت نکالنا ممکن نہیں ہوگا اور امریکی صدر سے ڈیڈ لائن میں توسیع کی اپیل کی ہے۔

4. 25 اگست 2021نیٹو سفارت کار: ہمسایہ ممالک کو افغان پناہ گزین کے لیے سرحدیں کھول دینی چاہییں

   افغانستان میں نیٹو کے ایک سفارت کار نے کہا ہے کہ ہمسایہ ممالک کو اپنی افغان شہریوں کے لیے اپنی سرحدیں کھول دینی چاہییں تاکہ زیادہ سے زیادہ پناہ گزین وہاں سے نکل سکیں۔

   کابل میں موجود سفارت کار نے روئٹرز کو بتایا: ’ایران، پاکستان اور تاجکستان کو پروازوں کے ذریعے یا زمینی راستوں سے اور لوگوں کو نکالنا چاہیے۔‘

   فلاحی اداروں کے مطابق افغانستان کو طالبان کے قبضے کے دوران انسانی بحران کا سامنا کرنا ہو سکتا ہے۔

   نیٹو کے سفارت کار کے مطابق کئی بین الاقوامی امدادی ادارے اپنے افغان کارکنوں کو ہمسایہ ممالک پہنچانے کی کوششیں کر رہے ہیں۔

   اقوامِ متحدہ کے انسانی حقوق کے سربراہ کے مطابق ان کے پاس ایسی اطلاعات ہیں کہ طالبان افغانستان میں سنگین جرائم کے مرتکب ہوئے ہیں جن میں ہتھیار ڈالنے والے افغان شہریوں اور فوجیوں کا قتل بھی شامل ہے۔

   طالبان نے کہا ہے کہ وہ ایسے کسی بھی واقعے کی تحقیقات کریں گے۔

5. 25 اگست 2021وادی پنجشیر: طالبان سمیت بیرونی حملہ آوروں کے خلاف مزاحمت کا آخری گڑھ

6. 25 اگست 2021منی سکرٹ سے برقعے تک: افغان خواتین کی زندگیاں کیسے بدلیں

7. 25 اگست 2021تجزیہ: کابل میں کئی لوگ مایوس ہوں گے, ٹارا میک کلوی، بی بی سی وائٹ ہاؤس رپورٹر

   عملہ بالکل وقت پر آیا اور وائٹ ہاؤس کے روزویلٹ روم میں مقررہ وقت پر سب تیاریاں مکمل تھیں۔

   لیکن جب ان کی تقریر کا وقت آیا تو صدر خود وہاں موجود نہیں تھے۔ وہ اوول آفس میں اپنے مشیروں کے ساتھ اپنے تقریر پر کام کر رہے تھے۔

   جوں جوں وقت گزرتا گیا، مجھے نیوزروم میں اپنے ساتھیوں کی جانب سے ٹیکسٹ آنا شرو ہوگئے۔

   جب تقریر کا وقت بار بار ملتوی ہوتا رہا تو ایک ساتھی نے پوچھا ’وہاں کیا ہو رہا ہے؟‘

   وہ ہی نہیں، کابل میں کئی ہزاروں لوگ صدر کی یہ تقریر سننے کے لیے بیتاب تھے۔

   تاہم جب صدر بائیڈن نے آخرکار شام پانچ بجے اپنا خطاب شروع کیا تو اس میں ان کے لیے کوئی خوشخبری نہیں تھی۔

   صدر نے کہا کہ وہ 31 گست کی ڈیڈ لائن پر قائم ہیں۔ یہ خبر یقیناً کابل میں کئی لوگوں کے لیے دکھ کا باعث ہوگی کیونکہ اس کا یہ مطلب ہے کہ وہ افغانستان سے شاید کبھی نہ نکل سکیں۔

   پسِ پردہ، وائٹ ہاؤس میں تقریر سے پہلے کہرام برپا تھا اور کوئی چیز وقت پر نہیں ہو پا رہی تھی، کچھ کے خیال میں بالکل ان کی افغان پالیسی کی طرح۔

8. 25 اگست 2021امریکی کانگریس اراکین کے دورہ کابل پر واشنگٹن میں تنقید

   امریکی ایوانِ نمائندگان کے دو اراکین نے منگل کو افغانستان کا دورہ کیا ہے۔

   ڈیموکریٹ پارٹی کے سیٹھ مولٹن اور ریپبلکن جماعت کے پیٹر میجیئر دونوں سابق امریکی فوجی ہیں اور عراق کی جنگ میں حصہ لے چکے ہیں۔

   ایک بیان میں ان کا کہنا تھا کہ وہ کانگریس کے نمائندوں کی حیثیت سے معلومات حاصل کرنے کابل گئے تھے۔

   ’امریکہ پر اپنے شہریوں اور وفادار اتحادیوں کی اخلاقی ذمہ داری ہے اور ہمیں اس بات کو یقینی بنانا چاہیے کہ یہ ذمہ داری نبھائی جا رہی ہے۔‘

   اپنے دورے کی دوران انھوں نے کابل ایئرپورٹ پر انتظامات کا جائزہ لیا۔ اپنے بیان میں انھوں نے کہا: کہ وہ ایک ایسے طیارے پر کابل گئے جس میں خالی نشستیں موجود تھیں تاکہ ان کی موجودگی سے کسی کا حق نہ مارا جائے۔

   انھوں نے کہا افغانستان جانے سے پہلے وہ انخلا کی ڈیڈ لائن میں توسیع کی حمایت کر رہے تھے تاہم کابل کی صورتحال دیکھ کر اور وہاں موجود کمانڈروں سے بات کرنے کے بعد ’یہ بات واضح ہے کہ ہم نے انخلا کا عمل شروع کرنے میں تاخیر کی کہ ہم جتنی بھی کوشش کر لیں، ہم 11 ستمبر تک بھی یہ کام مکمل نہیں کر سکیں گے۔

   تاہم ان کانگریس اراکین کو اپنے دورے پر تنقید کا سامنہ بھی کرنا پڑ رہا ہے۔

   دورے کے بعد اراکین کو بھیجے گئے ایک خط میں ایوانِ نمائندگان کی سپیکر نینسی پیلوسی نے سیٹھ مولٹن اور پیٹر میجیئر کا نام لیے بغیر کہا کہ ایسے دورے امریکیوں کو نکالنے کے کام میں خلل پیدا کر سکتے ہیں اور ان سے قیمتی وسائل ضائع ہوتے ہیں۔

   انھوں نے بعد میں رپورٹروں سے بات کرتے ہوئے کہا کہ ایوان کے کئی اراکین افغانستان جانا چاہتے ہیں تاہم ان کا خیال تھا اس وقت ایسا کرنا نادانی ہوگی۔

9. 25 اگست 2021امریکہ کے بغیر کابل ایئرپورٹ کیوں نہیں چل سکتا؟

10. 25 اگست 2021بریکنگ, عالمی بینک کا افغانستان کو دی جانے والی امداد معطل کرنے کا اعلان

    طالبان کی جانب سے ملک کے کنٹرول سنبھالنے کے بعد عالمی بینک نے افغانستان کو دی جانے والی امداد معطل کر دی ہے۔

    عالمی بینک کے ترجمان کا کہنا تھا کہ ’ہمیں افغانستان کی صورت حال اور ملک کی ترقی کے امکانات بالخصوص خواتین پر اثرات کے حوالے سے گہری تشویش ہے۔‘

    ترجمان نے کہا کہ بینک افغانستان میں ’مشکل سے حاصل ہونے والی بہتری‘ کو محفوظ بنانے اور ان سے وابستہ رہنے کے طریقے ڈھونڈ رہا ہے۔

    بینک کی ویب سائٹ کے مطابق عالمی بینک کے اس وقت افغانستان میں دو درجن سے زائد ترقیاتی منصوبے ہیں اور انھوں نے 2002 کے بعد سے 5.3 ارب ڈالر فراہم کیے ہیں۔

11. 25 اگست 2021بریکنگ, جتنی جلدی ہم ختم کریں گے اتنا ہی بہتر ہے: جو بائیڈن

    امریکہ کے صدر جو بائیڈن کا کہنا ہے کہ انہوں نے جی سیون رہنماؤں کے ساتھ ساتھ نیٹو اور اقوام متحدہ کے رہنما سے بھی بات کی۔

    ان کا کہنا تھا ’میں نے اظہار یکجہتی کے لیے ان کا شکریہ ادا کیا۔‘

    انھوں نے مزید کہا کہ 14 اگست سے اب تک 70،700 افراد کو کابل سے نکالا جا چکا ہے۔

    جو بائیڈن کا کہنا تھا ’ہم فی الحال 31 اگست تک انخلا مکمل کر رہے ہیں۔ جتنی جلدی ہم ختم کریں گے اتنا ہی بہتر ہے۔‘

    امریکی صدر جو بائیڈن کا کہنا تھا کہ ’طالبان ہمارے لوگوں کو نکالنے میں مدد کے لیے اقدامات کر رہے ہیں۔‘

    انھوں نے کہا ، ’ہم سب نے آج اتفاق کیا کہ ہم اپنے موجودہ حلیفوں کے ساتھ کندھے سے کندھا ملا کر افغانستان میں چیلنجوں کا مقابلہ کریں گے، جیسا کہ ہم نے برسوں سے کیا ہے۔‘

    انھوں نے مزید کہا کہ ’ہم متحد رہیں گے۔‘

    کچھ امریکی اتحادی امریکہ پر زور دے رہے ہیں کہ وہ فوجیوں کے انخلا کی آخری تاریخ میں توسیع کرے لیکن بائیڈن 31 اگست کی ڈیڈ لائن پر قائم ہیں۔

12. 25 اگست 20214000 امریکیوں کو کابل سے کامیاب انخلا

    امریکی محکمہ خارجہ کے ایک سینیئر عہدیدار کے مطابق امریکہ نے 4،000 سے زیادہ امریکی پاسپورٹ رکھنے والوں اور ن کے اہل خانہ کو کابل سے نکال لیا ہے۔

    عہدیدار نے نام ظاہر نہ کرنے کی شرط پر صحافیوں سے بات کرتے ہوئے کہا کہ لوگوں کو جلد از جلد کابل سے نکالنے کی کوشش کی وجہ سے رپورٹنگ میں ابتدائی تاخیر ہوئی۔

    عہدیدار نے مزید کہا، ’ہم توقع کرتے ہیں کہ آنے والے دنوں میں یہ تعداد بڑھتی رہے گی۔‘

    دریں اثنا، سابق صدر ڈونلڈ ٹرمپ امریکیوں کے انخلا کے ساتھ ساتھ افغان باشندوں کو امریکہ لانے کے فیصلہ کی وجہ سے صدر بائیڈن پر تنقید کرتے رہے ہیں۔

    انھوں نے ایک بیان میں کہا ’بائیڈن نے افغانستان کو دہشت گردوں کے حوالے کر دیا اور شہریوں سے پہلی فوج کو نکال کر ہزاروں امریکیوں کو مرنے کے چھوڑ دیا۔ اب تک صرف 4000 امریکیوں کو نکالا گیا۔

    انھوں نے کہا ، ’آپ یقین کر سکتے ہیں کہ طالبان، جو اب مکمل کنٹرول میں ہیں انھوں نے انخلاء کی ان پروازوں میں بہترین اور ذہین ترین افراد کو سوار نہیں ہونے دیا۔‘

    انھوں نے ثبوت دیے بغیر دعویٰ کیا کہ ’ہزاروں دہشت گردوں کو افغانستان سے دنیا بھر میں بذریعہ ہوائی جہاز منتقل کیا گیا ہے۔‘

13. 24 اگست 2021کابل کے ایئرپورٹ پر کس ملک کی کتنی فوج موجود ہے؟

    کابل کے بین الاقوامی حامد کرزئی ایئرپورٹ پر اس وقت سب سے زیادہ فوجی امریکہ کے ہی تعینات ہیں۔

    ان امریکی فوجیوں کی تعداد تقریباً چھ ہزار بنتی ہے۔

    اس وقت کابل کی فضا میں بڑی تعداد میں امریکی طیارے اور لڑاکا ہیلی کاپٹرز دیکھے جا سکتے ہیں۔

    جبکہ کابل کے ہوائی اڈے پر ایک ہزار سے زائد برطانوی فوجی موجود ہیں، جس میں فوجی 16 ایئر اسالٹ بریگیڈ بھی شامل ہے۔

    محدود تعداد میں نیٹو اتحاد میں شامل فرانس، جرمنی اور ترکی کی افواج بھی افغانستان میں موجود ہیں جبکہ ایئربیس پر ناروے نے ایک ہسپتال بھی قائم کر رکھا ہے۔

    نیٹو کے مطابق اس وقت اس کے آٹھ سو سے زائد سویلین کنٹریکٹر افغانستان میں موجود ہیں جن کی بڑی تعداد ایئرپورٹ پر اپنے فرائض سر انجام دے رہی ہے۔

14. 24 اگست 2021برطانوی وزیر اعظم مزید افراد کو افغانستان سے نکالنے کے لیے ’پراعتماد‘

    برطانوی وزیر اعظم بورس جانسن کا کہنا ہے کہ برطانیہ نے اب تک 57 پروازوں کے ذریعے نو ہزار افراد کو کابل سے نکالا ہے۔

    ان کا کہنا تھا کہ ’ہم آخری حد تک جائیں گے۔‘

    انھوں نے مزید کہا کہ وہ ’پراعتماد ہیں‘ کہ برطانیہ ’افغانستان سے مزید ہزاروں افراد کو نکالنے میں کامیاب ہو جائے گا۔‘

    تاہم ان کا کہنا تھا کہ ’کابل ایئرپورٹ پر صورتحال میں بہتری نہیں آ رہی ہے۔

    ’وہاں سے باہر نکلنے کی کوشش کرنے والوں کے بہت دلخراش اور افسوسناک مناظر سامنے آ رہے ہیں۔‘

    برطانوی وزیر اعظم کا کہنا تھا کہ جی سیون نے افغانستان سے انخلا کے لیے ’مشترکہ حکمت عملی‘ اپنانے پر نہ صرف اتفاق کیا ہے بلکہ طالبان کے ساتھ رابطے کے لیے ایک ’روڈ میپ‘ بھی بنایا ہے۔

15. 24 اگست 2021بریکنگ, برطانیہ کا 31 اگست کے بعد بھی افغانستان سے محفوظ انخلا کا پر اصرار

    برطانیہ کے وزیر اعظم نے جی سیون ممالک کے افغانستان کی صورتحال اور انخلا کی تاریخ میں توسیع پر مشاورتی اجلاس کے بعد افغانستان سے 31 اگست کے بعد بھی محفوظ انخلا پر زور دیا ہے۔

    جی سیون ممالک کے اجلاس کے بعد، برطانیہ کے وزیر اعظم جانسن کا کہنا ہے کہ:’ جس پہلی شرط پر ہم اصرار کر رہے ہیں وہ یہ کہ 31 اگست تک انخلا کے ابتدائی مرحلے کے بعد ان افراد کو محفوظ راستہ دینا چاہیے جو افغانستان چھوڑنا چاہتے ہیں۔‘

    جی سیون ممالک کا افغانستان کی صورتحال اور انخلا کی تاریخ میں توسیع پر مشاورت کے بارے میں ورچوئل اجلاس ہوا جس میں برطانیہ سمیت رکن یورپی ممالک نے امریکہ سے افغانستان سے محفوظ انخلا کی تاریخ میں ممکنہ توسیع کا مطالبہ کیا۔

    اس اجلاس میں امریکی صدر جو بائیڈن نے سات منٹ تک رکن ممالک کے رہنماؤں سے بات کی۔ جبکہ برطانوی وزیر اعظم بورس جانسن اس اجلاس کی سربراہی کی۔

16. 24 اگست 2021بریکنگ, امریکی صدر 31 اگست تک انخلا کے فیصلے پر قائم

    امریکی انتظامیہ کے ایک عہدیدار کا کہنا ہے کہ صدر بائیڈن 31 اگست تک انخلا کے فیصلے پر قائم ہیں۔

    ان کا مزید کہنا تھا کہ پینٹاگون کی سفارش پر 31 اگست تک انخلا کا فیصلہ امریکی افواج کو افعانستان میں درپیش سکیورٹی خطرات و خدشات کی بنیاد پر سوموار کو کیا گیا ہے۔

17. 24 اگست 2021جی سیون ممالک کا ورچوئل اجلاس جاری

    جی سیون ممالک کا افغانستان کی صورتحال اور انخلا کی تاریخ میں توسیع پر مشاورت کے بارے میں ورچوئل اجلاس جاری ہے۔

    اس اجلاس میں برطانیہ سمیت رکن یورپی ممالک امریکہ سے افغانستان سے محفوظ انخلا کی تاریخ میں ممکنہ توسیع کا مطالبہ کر رہے ہیں۔

    برطانوی وزیر اعظم بورس جانسن اس اجلاس کی سربراہی کر رہے ہیں۔

    ورچوئل اجلاس کی تصاویر جاری کی گئیں ہیں جس میں جرمن چانسلر انگیلا مرکل اور فرانسیسی صدر ایمانوئل میکخواں دکھائی دے رہے ہیں۔

    اس اجلاس میں رکن ممالک کے سربراہان افغانستان سے انخلا کی 31 اگست کت تاریخ میں توسیع پر زور دے رہے ہیں۔

    اس اجلاس کے فیصلوں اور تازہ ترین معلومات ہم آپ تک پہنچاتے رہے گے۔

18. 24 اگست 2021اب تک افغانستان سے تقریباً 64 ہزار افراد کا انخلا ہو چکا ہے: پینٹاگون

    امریکی فوج کے میجر جنرل ولیم ہانک ٹیلر کے مطابق جولائی سے لے کر اب تک امریکہ نے افغانستان سے 63900 افراد کا انخلا ممکن بنایا ہے، جن میں امریکی اور نیٹو کے افراد سمیت افغانستان کے عام شہری بھی شامل ہیں۔

    ان کے مطابق افغانستان سے نکالے گئے یہ لوگ اب ایک بہتر زندگی گزارنے کی راہ پر گامزن ہیں۔

    امریکی فوجی افسر کے مطابق کابل ایئر پورٹ سے ہر 45 منٹ بعد ایک طیارہ پرواز بھر رہا ہے۔ ان کے مطابق ہم مزید افراد کے انخلا کو بھی یقینی بنا رہے ہیں۔

    اس سے قبل وائٹ ہاؤس نے کہا تھا کہ صرف سوموار کو 24 گھنٹوں کے دوران امریکہ نے 21600 افراد کو افغانستان سے نکالا ہے۔

19. 24 اگست 2021طالبان کے الفاظ نہیں بلکہ طرز عمل اہمیت کا حامل ہے:‘ سابق برطانوی سفیر

    افغانستان کے لیے برطانیہ کے سابق سفیر سٹیفن ایونز نے بی بی سی نیوز کو بتایا ہے کہ طالبان کے صرف الفاظ پر یقین نہیں کرنا چائیے کہ جیسا کہ طالبان کے ترجمان نے پریس کانفرنس میں کہا ہے کہ ان کے پاس ان افراد کی ایسی کوئی فہرست نہیں ہے جن کے خلاف انتقامی کارروائی کرنی ہے۔

    ان کے مطابق ہمیں یہ بہت محتاط انداز میں دیکھنے کی ضرورت ہے کہ حقیقت میں طالبان کا طرز عمل کیا ہوگا۔

    سابق برطانوی سفیر کے مطابق ’الفاظ نہیں بلکہ طالبان کا طرز عمل اہمیت کا حامل ہے۔‘

    سٹیفن ایونز کے مطابق طالبان کی پریس کانفرنس میں کچھ باتیں بہت پریشان کن تھیں۔ ان کے مطابق طالبان کے ترجمان نے اس بات کی یقین دہانی نہیں کرائی ہے کہ ایسے افغان شہری جن کے پاس کسی مغربی ممالک کا ویزہ ہے کیا وہ ایئرپورٹ جا سکیں گے۔

    سابق برطانوی سفیر کے مطابق اب دنیا کو طالبان کی باتوں کے بجائے ان کے طرز عمل پر نظر رکھنا ہو گی۔

20. 24 اگست 2021طالبان جنگجو نے پوچھا ’کیا آپ افغانستان واپس آئیں گی؟ میں نے کہا نہیں، ہم آپ سے ڈرتے ہیں‘