ቀጥታ, ማእከላይ ምብራቕ፡ ንኢራን ንማዕበላዊ መጥቃቲ ኣመሪካ ምላሽ ብምሃብ ንወተሃደራዊ መዓስከራት ኣጥቂዓ

ቀጥታዊ ሸፈነ

1. 7 ሓምለ 2026325 ሚልዮን ዶላር ጉቦ ዝተቐበለ ቻይናዊ በዓል ስልጣን፡ ሞት ተፈሪዱ

   ኣብ ምብራቓዊ ቻይና ዝርከብ ቤት ፍርዲ፡ ኣብ ውሽጢ 30 ዓመታት ልዕሊ 2.2 ቢልዮን ዩዋን ወይ 325 ሚልዮን ዶላር ጉቦ ተቐቢሉ ብዝብል ክሲ፡ ሓደ በዓል ስልጣን መንግስቲ- ነበር፡ ብሞት ክቕፃዕ ፈሪዱ።

   ያንግ ዩሊን፡ ካብ 1993 ክሳብ 2023 ኣብ ናንጂንግ ዝተፈላለየ ጽፍሕታት ስልጣን ሒዙ ነይሩ።

   እቲ በዓል ስልጣን ነበር፡ ብምትላል፡ ስልጣን ብዘይግቡእ ምጥቃምን ዘይሕጋዊ ምስግጋር ገንዘብን ብምፍፃምን እዩ ተኸሲሱ።

   ካብዚ ንጥፈታት ተቐቢሊኡዎ ዝተብሃለ መጠን ገንዘብ፡ ኣብዚ ቀረባ እዋን ኣብ ዝቐረቡ ክስታት ተራእዩ ዘይፈልጥ እዩ።

   እዚ ወዲ 69 ዓመት በዓል ስልጣን ነበር፡ ካልእ ዘይግቡእ ናይ ምህንድስና ውዕላት፡ ዋንነት መሬት ንምዝውዋር ስልጣኑ ብዘይኣግባብ ከምዝተጠቕመ ይንገር።

   እቲ ብሞት ዝተፈርደ በዓል-ስልጣን ነበር፡ ብገንዘብን ብዓይነትን ከምዝተቐበለ ማዕከናት ዜና መንግስቲ ሓቢረን።

   ያንግ ኣብ ትሕቲ መርመራ ገበናት ጉቦ ዝአተወ፤ ፕረዚደንት ሺ ጂንፒንግ ወፍሪ ጸረ ግዕዝይና ምጅማሩ ስዒቡ እዩ።

   እቲ ወፍሪ ግዕዝይና፡ ላዕለዎት ሰበስልጣን መንግስቲ፣ ወተሃደራዊ ሓለፍቲ፣ ዓበይቲ ባንክታትን ካልኦት ዓውድታትን ዒላማ ዝገበረ እዩ።

2. 7 ሓምለ 2026ዘለንስኪ: ኔቶ ኣብ ምሕያል ስርዓታት ምክልኻል ኣየር ክሕግዞ ተማሕፂኑ

   ፕረዚደንት ዩክረይን፡ ኣብ ቱርኪ ኣብ ዝካይድ ዋዕላ ወተሃደራዊ ኪዳን ሰሜን ኣትላንቲክ [ኔቶ]፡ ኪቭ ካብ ዝገደደ መጥቃዕቲ ሩስያ ንምክልኻል ብህጹጽ ዘድልያ ስርዓተ ምክልኻል ኣየር ከቕርባ ተማሕፂኑ።

   ቮሎዲሚር ዘለንስኪ፡ ኣብ ዘርብኡ፡ "ካልእ ኩሉ ባዕልና ክንገብሮ ዓቕሚ ኣለና፡ ኣብ ምክልኻል ኣየር ክመጽእ ከሎ ግን ቆራጽነት መሓዙትና የድልየና'ዩ" ኢሉ።

   ሚሳይላት ሩስያ: ሓደ ሰሙን ኣብ ዘይመልእ ክልተ ግዜ ኣብ ርእሰ ከተማ ዩክረይን ድሕሪ ምዕላቦም፡ ልዕሊ 50 ሲቪላት ከምዝተቐትሉ ብምግላፅ እዩ ከምኡ ዓይነት ፃውዒት ኣቕሪቡ።

   እቲ ኣብ ኣንካራ ዝካየድ ዋዕላ ንዘለንስኪ ምስ ዶናልድ ትራምፕ ንምዝርራብን እቲ "ኣረሜናዊ" መጥቃዕቲ ሩስያ ንምርዳእ’ውን ከም ፅቡቕ ዕድል ከምዝጥቀመሉ ይግመት።

   ቭላድሚር ፑቲን ናብ ሰላም ዝወስድ ጸቕጢ ክግበረሉ ከረድእ’ውን ዕድል ክረክብ እዩ።

   ዩክረይን ናይ ገዛእ ርእሳ ናይ ነዊሕ ርሕቀት መጥቃዕቲ ሰብ ኣልቦ ነፈርቲ ብምሕያል፡ መጻረዪ ነዳዲን ወተሃደራዊ ዒላማታትን ሩስያ ብምህራም፡ ሕጽረት ነዳዲን ምቁራጽ ሓይሊ ኤሌክትሪክን ኣስዒባ ነይራ።

   ነዚ ስዒቡ እያ ሩስያ ከም ግበረ-መልሲ፡ መጥቃዕቲ ነፈርትን ሚሳኤልን ብምሕያል ኣብ ልዕሊ ኪቭ ልዑል ጉድኣት ተበፅሕ ዘላ።

   ነዚ ስግኣት ዘጉልሕ ከንቲባ ሞስኮ ሰርጌይ ሶብያኒን፡ ካብተን ዩክረይን ናብ ርእሰ ከተማ እታ ሃገር- ሞስካ ዝተተኰሳ 430 ሰብ ኣልቦ ነፈርቲ ኣየር "መብዛሕትአን" ከምዝዓገተን ገሊጹ።

   እቲ ኣብ ልዕሊ ሞስኮ ዝተፈፀመ መጥቃዕቲ ዘብፀሖ ሳዕቤን ንፁር ኣይገበረን።

   ኣብ ማሕበራዊ መራኸቢታት ሩስያ ግን፡ ሰባት ነዳዲ ንምግዛእ ንሰዓታት ሪጋ ክሕዙን ክገዝእዎ ዝኽእሉ ተመን ክወፅአሎምን፡ ክበኣሱን ዘርእዩ ቪድዮታት ተዘርጊሖም ለዉ።

3. 6 ሓምለ 2026ዙር ፈረንሳ፡ ደል ቶሮ መድረኽ ተዓዊቱ፡ ብንያም 14 ነጥቢ ረኺቡ

   ጆናስ ቪንገጋርድ ንመሪሕነት ብጫ ማልያ ዓቂቡ ኣብ ዝቐጸለሉ እዋን፡ንመጀመርታ ግዜኡ ዝሳተፍ ዘሎ ኣይዛክ ደል ቶሮ ኣብ ካልኣይ መድረኽ ዙር ፈረንሳ ዓወት ጨቢጡ።

   እቲ ወዲ 22 ዓመት ሜክሲካዊ ዴል ቶሮ፡ ኣብቲ ኣብ ሞንትጁይክ ስጳኛ ዝነበረ ሓጺርን ቍልቍልን ዓቐብ ፍጥነት ብምውሳኽ፡ ቅድሚ ወዲ ጋንታኡ ኣብ ዩኤኢ ቲም ኤሚሬትስ ታደይ ፖጋቻ መስመር ረጊጹ።

   ረምኮ ኢቨነፑል ሳልሳይ ክውድእ ከሎ፡ ቪንገጋርድ ድማ ምስቶም ቀዳሞት ክልተ ተቐዳደምቲ ብማዕረ ግዜ ራብዓይ ኰይኑ ዛዚሙ።

   "እዚ ብሓቂ ንዓይ ኵሉ ነገር እዩ። ቅድሚ ሕጂ ኣዝየ ዕድለኛ ከም ዝዀንኩ ተዛሪበ ነይረ እየ - ኣብዚ ንምብጻሕ ከም ጋንታ ክንደይ ዝኣክል ከም ዝዓየና ክትኣምኑ ኣይትኽእሉን ኢኹም፡" ክብል ደል ቶሮ ገሊጹ።

   "እዚ ፍረ ሓባራዊ ጻዕሪ እዩ - ናይ ስድራቤተይን ንእሽቶ ከለኹ ዘዕበዩኒ ኣዕሩኽተይን። ነዚ ፈተነ እዚ ምዕዋተይ ክኣምኖ ኣይከኣልኩን፣ ብሓቂ ዘገርም እዩ። ምስቲ ኣብ ዓለም ብሉጽ ዝዀነ ታደይ ኣብ ሓደ ጋንታ ምዃነይ ምርዳእ’ውን ኣዝዩ ፍሉይ ስምዒት ዘለዎ እዩ።

   "ኣብቲ ናይ መወዳእታ ዓቐብ ኣብ ቅድሚት ክስራዕ ኣይከኣልኩን ነይረ፣ እንተዀነ ሓሊፈ ንማትያስ ስኬልሞሰ ክሕዞ ክኢለ። ንታደይ ዝኸውን ትልሚ ነይሩና - ኣነ ከምኡ ገይረ፣ እንተዀነ፡እቲ ፍልልይ ዓቢ ስለ ዝነበረ ብቐጥታ ናብ ናይ መወዳእታ መስመር ኣምሪሐ።

   "ከምዚኦም ዝበሉ ዕድላት ዳርጋ ፈጺሞም ኣይርከቡን እዮም፣ ነዚ ኵነታት እዚ ብምቍጽጻረይ ድማ ኣዝየ ይዀርዕ።"

   እቲ እንኮ ኣፍሪቃዊ ኣብቲ ውድድር ዝሳተፍ ዘሎ ብንያም ግርማይ ኣብ ማእከል ኣብ ዝነበረት ናይ ነጥቢ ውድድር ንዓባይ ጕጅለ ብምስዓር 14 ነጥቢ ረኺቡ። ሰልስተ ተቐዳደምቲ ኣቐዲሞም ሃዲሞም ስለ ዝነበሩ ራብዓይ ብምዃን እዩ ሕንጻጽ ሰጊሩ።

   ብንያም መውደቕቲ ኣጋጢሙዎ እኳ እንተ ነበረ፡ ውድድሩ ክዛዝም ግን ክኢሉ እዩ።

4. 6 ሓምለ 2026ፍጹም ቅላዕ መቕጻዕቲ፡ ቀይሕ ካርድ ስለምንታይ ንእንግሊዝ ተዋሂቦም?

   እንግሊዝ ሎሚ ወጋሕታ ኣብ ዘካየደቶ ወሳኒ ግጥም ብ10 ዝተረፉ ተጻወትቲ ንኣአንጋዲት ሃገር ሜክሲኮ ብምስዓር ናብ ዝቕጽል ጸወታ ሓሊፋ።

   ሃገራዊት ጋንታ እንግሊዝ ጁድ በሊንግሃም ኣብ ውሑዳት ደቓይቕ ብዘመዝገበን ክልተ ሸቶታት ኣብ ቀዳማይ እብረ 2 ብ 0 መሪሕነት ሒዛ ድሕሪ ምጽናሕ፡ ጁሊያን ኩዊኖነስ ሓንቲ ሸቶ ኣመዝጊቡላ።

   እቲ ጸወታ ኣብ ካልኣይ እብረ ብኽልተ ዓበይቲ ፍጻመታት ደሚቑ።

   ፈለማ ተጻዋታይ ሃገራዊት ጋንታ እንግሊዝ ጃረል ኳንሳ ኣብ መበል 54 ደቒቕ፡ንጂሰስ ጋላርዶ ከም ዝሃረሞ ብቪድዮ ድሕሪ ምግምጋሙ ካብ ሜዳ ብቐይሕ ካርድ ተባሪሩ።

   እዚ ፍጻመ’ዚ ንግዜኡ ንደገፍቲ ሜክሲኮ ዘተባብዕ እኳ እንተ ነበረ፡እንግሊዝ ግን ሃሪኬን ብፍጹም ቅላዕ መቕጻዕቲ ሸቶ ምስ ኣመዝገበ ነዊሕ ከይጸንሐት 3-1 ክትመርሕ ክኢላ።

   "እዚ ንጹር ቀይሕ ካርድ እዩ፡" ክብል ኣብ ዋንጫ ዓለም 2010 ኣብ ግጥም ፍጻመ ተሓጋጋዚ ዳኛ ዝነበረ ዳረን ካን ኣብ ቢቢሲ ዋን ተዛሪቡ።

   "ኳንሳ ፈለማ ኩዕሶ ተጻዊቱ እዩ፣ እንተዀነ፡ እዚ ኣብ ሕጊ እቲ ጸወታ ዋጋ የብሉን፡” ድሕሪ ምባል በቲ ዝፈጸሞ በደል፡ “እቲ ዳኛ ቀይሕ ካርድ ካብ ምርኣይ ወጻኢ ካልእ ምርጫ ኣይነበሮን። 100% እያ፡" ኢሉ።

   እንግሊዝ ሃሪኬን ብፍጹም ቅላዕ መቕጻዕቲ ሸቶ ምስ ኣመዝገበ፡ ነቲ ጸብለልታ ክልተ ሸቶታት ክትመልሶ ክኢላ እኳ እንተ ነበረት፡ ሜክሲኮ ፍጹም ቅላዕ መቕጻዕቲ ረኺባ።

   ኬን ንብራያን ጉቲየረዝ ዝሓለፎ ይመስል ነይሩ፣ እቲ ዳኛ ዓሊረዛ ፋጋኒ ነቲ ፍጻመ ንምግምጋም ናብቲ ሞኒተር ድሕሪ ምኻዱ ፍጹም ቅላዕ መቕጻዕቲ ሂቡ፣ራውል ጂሜነዝ ድማ ናብ ሸቶ ቀይርዎ።

   "እዚ ፍጹም ቅላዕ መቕጻዕቲ እዩ፡" ክብል ካን ወሲኹ ገሊጹ።

   "ኬን ብኣጋጣሚ ንእግሪ ተጻዋታይ ሜክሲኮ ረጊጹዎ እዩ። እዚ ምስቲ እንግሊዝ ኣብ ቀዳማይ ናይ ምድብ ጸወታ ፍጹም ቅላዕ መቕጻዕቲ ዝረኸበትሉ ናይ ሉካ ሞድሪች ምትንኻፍ ቅሩብ ይመሳሰል እዩ። ኬን ብድሕሪኡ ይመጽእ ንዝነበረ ተጻዋታይ ኣየስተውዓለሉን።"

   እቲ ተጻዋታይ ሃገራዊት ጋንታ እንግሊዝ ዝነበረ ጆ ሃርት ኵሎም ዝተመሓላለፉ ውሳነታት ቅኑዓት ከም ዝነበሩ ይሕብር።

   "እቲ ዳኛ ኣብ ሰለስተኦም [ክልተኦም ፍጹም ቅላዕ መቕጻዕትታትን ቀይሕካርድን] ቅኑዕ ውሳነ ዝሃበ ይመስለኒ፡" ክብል ኣብ ቢቢሲ ዋን ገሊጹ።

   እዚ ከምዚ ኢሉ እንከሎ፡ ኣቐዲመን ካብ ዝገጠማ ነርወይን ብራዚልን፡ ሃገራዊት ጋንታ ነርወይ ኣብ ካልኣይ እብረ ብመንገዲ ኤርሊን ሃላንድ ክልተ ሸቶታት ብምምዝብ ናብ ዝቕጽል ዙር ሓሊፋ።

   ኣብ መወዳእታ ደቒቕ ብራዚል ንዝረኸበታ ፍጹም ቅላዕ መቕጻዕቲ ነይማር ኣመዝጊቡዋ። እንተዀነ፡ ነታ ኣብ ታሪኽ ዋንጫ ዓለም ዝለዓለ ዝና ዘለዋ ሃገር ከተድሕና ኣይከኣለትን። ብራዚል ኣብ ቀዳማይ እብረ ንዝረኸበታ ፍጹም ቅላዕ ናብ ሸቶ ክትቅይራ ኣይከኣለትን።

5. 5 ሓምለ 2026ኣብ ሓያል ረስኒ ዀይና መበል 250 ዓመተ ልደታ ዘኽበረት ኣመሪካ

   እቲ ናይ 4 ሓምለ ፈደራላዊ በዓል፡ 13 ግዝኣታት ኣመሪካ ኣብ 1776 ኣዋጅ ናጽነት ብምፍራም፡ ምብቃዕ መግዛእቲ እንግሊዝ ንምዝካር እዩ ብቐንዱ ዝበዓል።

   ኣብ ካፒቶል ሂል ዝነበሩ ዝተኣከቡ ብዝሒ ዘይብሎም ፀምበልቲ፡ ቅልል ዝበለ ዝናብ ስለዝሃረመ ክበታተኑን ናብቲ መውጽኢታት ክጓየዩን ተራእዮም።

   ኣብቲ ፅመብል፡ ምርኢት ሓንቲ ሓዳስ ጀት ኤር ፎርስ ዋን፡ ከምኡ'ውን መደረን ርችትን ዘጠቓለለ ዝነበረ ኰይኑ፡ ብሰንኪ ሓያል መብረቅን ነጎዳን ከምዝተቛረጸ ፀብፃባት ይሕብሩ።

   እዚ ከምዚ እንከሎ፡ ምሉእ መዓልቲ፡ እታ ርእሰ ከተማ ኣብ ትሕቲ 100F (37C) ረስኒ ዳርጋ ትነድድ ነይራ - እዚ ኣካል ናይቲ ንምብራቓዊ ኣመሪካ ዝሸፈነ ዝዓበየ ማዕበል ሙቐት እዩ።

   ኣስታት 400 ኣባላት ‘ፀዓዱ ሃገራዊ ጉጅለ ሓርበኛታት’ ድማ፡ ዘብረቕርቕ ባንዴራታት ኣመሪካ ተሰኪሞም ኣብ ጎደናታት እታ ርእሰ ከተማ ብሓደ ድምጺ እናተጓዕዙ ተራእዮም።

   እዚ ጉጅለ ኣብ 2017 ኣብ ቨርጂንያ ኣብ ዝተኻየደ ሰልፊ ‘ዩናይት ዘ ራይት’ ድሕሪ ዘጋጠመ ተቓውሞ ዝተመስረተ ኮይኑ፡ ካብ ካልእ ጉጅለ ተፈንጪሉ ዝወፅአ እዩ።

   ሕቡራት መንግስታት ኣመሪካ፡ መበል 250 ዓመት ልደታ ብድሙቕ ርችት፡ ብመርኢት ነፈርትን ካልኦት መደባትን ኣኽቢራ ውዒላ።

   እቲ መደባት ፅምብል ኣብ ትሕቲ ሓያል ማዕበል ሙቐት ኰይኑ እዩ ተፀምቢሉ።

   ነቲ ሰፊሕ ትርጉም ዝወሃቦ ታሪኻዊ በዓል እታ ሃገር ንፖለቲካዊ ረብሕኡ ይምዝምዞ ኣሎ ተባሂሉ ዝንቀፍ ፕረዚደንት ዶናልድ ትራምፕ፡ ኣብ ዋሽንግተን ኣብ ዝርከብ ናሽናል ሞል ኣብ ዝተኻየደ ፅምብል መደረ ኣስሚዑ።

   ንሱ ብዕልልታ ደገፍቱ ተዓጂቡ ኣብ ዝስመዖ መደረ፡ "ሕልሚ ኣመሪካ ዳግም ተመሊሱ ኣሎ" ክብል ተዛሪቡ።

   ንሱ፡ ኣብ መዕፀዊ መደርኡ፡ "እዚ ምጅማር ወርቃዊ ዘመን ኣመሪካ ጥራይ እዩ" ብምባል ‘ብኣምላኽ ዝተጻሕፈ ዕጫ" ከምዝዀነ ተዛሪቡ።

   እታ ሃገር ኣብ ኣዝዩ ዝተመቓቐለ ኩነታት እያ እትርከብ።

   ትራምፕ ንነብሱ ማእከል ናይቲ ምዕራፍ ብምግባርን ካብቲ ብኮንግረስ ዝተመደበ ፍጻመታት ኣመሪካ- 250፡ ዝተፈለየ “ጽምብል ሓርነት 250” ብምጅማርን ፖለቲካዊ ክገብሮ ፈቲና ተባሂሉ እዩ ዝንቀፍ ዘሎ።

6. 2 ሓምለ 2026ጋናን ደቡብ ኣፍሪቃን፡ ብሰንኪ ቅትለት ስደተኛ ኣብ ዲፕሎማስያዊ ምትፍናን ኣትየን

   ኣብ ደቡብ ኣፍሪቃ፡ ምስ ዝካየድ ዘሎ ተቓውሞ ኣንፃር ስደተኛታት ተኣሳሲሩ፡ ተቐቲሉ ዝተብሃለ ጋናዊ ኣብ መንጎ ክልቲኤን ሃገራት ዲፕሎማስያዊ ምትፍናን ኣስዒቡ።

   ሚኒስትሪ ጉዳያት ወጻኢ ጋና፡ ኣብ ኬፕታውን ብዝተፈጸመ ቅትለት እቲ ዜጋ፡ ተቓውሞኡ ብምግላጽ፡ ናብ ፖሊስ’ታ ሃገር ጥርዓን ኣቕሪቡ።

   ሚኒስተር ፍትሒ ደቡብ ኣፍሪቃ ብወገኑ፡ “ሰበስልጣን ጋና፡ ብዛዕባ’ቲ ምስ ዘይሕጋዊ ስደተኛታት ዘሎ ኩነታት፡ ናይ ሓሶት ሓበሬታ ይዝርግሑ ኣለው” ብምባል ተቓውሞ ኣስሚዑ።

   ፖሊስ ደቡብ ኣፍሪቃ: ብዛዕባ እቲ ዝተባህለ ቅትለት እቲ ጋናዊ ዝኾነ ሓበሬታ ከምዘይብሎም እኳ እንተገለፁ፡ ጉዳይ ናይ ሓደ ምስ ገበን ብዝተኣሳሰር ዝተቐትለ ካልእ ጋናዊ ግን ይምርምሩ ከምዘለዉ ገሊጾም።

   በዓል ስልጣን ሚኒስትሪ ጉዳያት ወጻኢ ደቡብ ኣፍሪቃ ክለይሰን ሞንየላ ንቢቢሲ ኣብ ዝሃቦ ቃል፡ እቲ ምስ ጸረ ስደተኛታት ዝተሓሓዝ ተቓውሞታት ተፈፂሙ ዝተብሃለ ቅትለት ሓደ ጋናዊ፡ “ዝተፈብረኸ ዛንታ’ዩ” ክብል ሓቢሩ።

   ጋና ኣብቲ ንቕትለት ዜጋኣ ዝዅንን መግለፂኣ፡ “ዝኾነ ህይወት ምጥፋእ ቅቡል ስለዘይኮነ፡ እቶም ተሓተትቲ ብዘይ ወዓል ሕደር ናብ ቤት ፍርዲ ክቐርቡ ኣለዎም” ክትብል ጠሊባ።

   ሓደ መደበር ሬድዮ ጋና፡ እቲ ዝተቐትለ ጋናዊ፡ ኣብ ደቡብ ኣፍሪቃ ን20 ዓመታት ዝነብር ዝነበረ ስፋዪ ክዳውንቲ ምዃኑን ብሰልፈኛታት ብጥይት ከምዝተቐትለን ሓቢሩ።

   ሬሳኡ ናብ ሃገሩ ንምምላስ ብሚኒስትሪ ጉዳያት ወጻኢ ጋና ጻዕርታት ይካየድ ኣሎ።

   ኣፍሪቃውያን ስደተኛታት ካብ ደቡብ ኣፍሪቃ ክወጹ ዝተዋህቦ ገደብ ግዜ ትማሊ ዘብቀዐ ዀይኑ፡ ኣብ ሓያሎ ከተማታት ተቓውሞታት ይካየድ ኣሎ።

   ጋና፣ ማላዊን ናይጀርያን፡ ቅድሚ እቲ ናይ ግዜ ገደብ ምብፅሑ፡ ዜጋታተን ካብ ደቡብ ኣፍሪቃ ዘውጽኣ ሃገራት እየን።

   ክሳብ ሕዚ ኣስታት 25 ሽሕ ሰባት ካብ ደቡብ ኣፍሪቃ ወጺኦም ኣለዉ።

7. 2 ሓምለ 2026“መጻብቦ ሆርሙዝ፡ ብዘየማትእ ኣካል ልኡላዊ ግዝኣት ኢራን’ዩ” - ሓይልታት ኢራን

   መጻብቦ ሆርሙዝ፡ ኣካል ልኡላውነት ኢራን ስለዝኾነ ንወረርቲ ቦታ ከምዘይብሉ ማእከላዊ እዚ- ዕጡቓት ሓይልታት ኢራን ኣብ ዘውጽኦ መግለጺ ሓቢሩ።

   “ካብ ኣመሪካውያን ኣብ መጻብቦ ሆርሙዝ ዝመፅእ ኢድ ኣእታውነት፡ ካብ ዕጡቓት ሓይልታት ኢራን ቅልጡፍን ወሳንን ምላሽ ከምዝወሃቦ” ኣጠንቂቑ።

   ማዕከናት ዜና ኢራን፡ ካብቲ ማእከል እዚ ዝወጸ መግለጺ ብምጥቃስ፡ “ጸጥታን ምሕደራን እቲ ኣገዳሲ መስመር ማይ፡ መጻብቦ ሆርሙዝ፡ ንእስላማዊ ዕጡቓት ሓይልታት ኢራን ዘይስገር ቀይሕ መስመር’ዩ” ክብላ ጸብጺበን።

   ኢራን፡ “መጻብቦ ሆርሙዝ ወራሪት ኣመሪካ እትቆጻጸሮ ግዝኣት ዘይኮነስ፡ ዘየማትእ ልኡላውነት እስላማዊት ሪፓብሊክ ኢራን እዩ” ብምባል፡ ኣብ ልዕሊ እቲ መስመር ማይ ዘለዋ መርገፂ ኣረጋጊፃ።

   ኩለን ንግዳዊ መራኽብ ብመጻብቦ ሆርሙዝ ብሰላም ንክሓልፋ፡ ነቲ ብኢራን ዝተሓንፀፀ መስመር ክኽተላ ከምዘለወን፡ እንተዘይኮይኑ ድማ ጉድኣት ከምዝገጥመን ኣጠንቂቑ።

   ኢራን፡ ኣመሪካን እስራኤልን ኣንጻራ ኲናት ካብ ዝጅምራ ንደሓር፡ በቲ ኣገዳሲ መስመር ማይ ዝሓልፋ መራኽብ ብምጥቃዕ ንዓለም ተዓጽያ ኣላ።

   ሆርሙዝ ልዕሊ 20 ሚእታዊት ነዳድን ጋዝን ዓለምና ዝሓልፈሉ ኣገዳሲ ማያዊ ኣፍደገ እዩ።

   ኣብቲ እዋን ኲናት ማእኸላይ ምብራቕ፡ መራኽብ ከይሓልፋ ኣብ ዝተዓገታሉ እዋን፡ ዋጋ ነዳዲ ዓለም ዓቢ ወሰኽ ኣርእዩን ቅልውላው ኣስዒቡን ምንባሩ ይዝከር።

8. 2 ሓምለ 2026ሩስያ፡ ኣብ ልዕሊ ኪቭ ብዝፈፀመቶ ሰፊሕ ደብዳብ 20 ሰባት ሞይቶም

   ሓይልታት ሩስያ: ሎሚ ለይቲ፡ ኣብ ልዕሊ ኪቭ ዓቢ ናይ ሰብ ኣልቦ ነፈርትን ሚሳይላትን መጥቃዕቲ ብምፍጻሞም 20 ሰባት ቀቲሎም።

   ከንቲባ እታ ከተማ፡ ኣብ ልዕሊ ርእሰከተማ ዩክረይን ዛጊድ "ዝዓበየ መጥቃዕቲ" ክብል ገሊጽዎ።

   ቪታሊ ክሊችኮ፡ ኣብ ልዕሊ‘ቶም ዝሞቱ፡ ኣስታት 90 ሰባት ከምዝቖሰሉ ወሲኹ ሓቢሩ።

   ሓደ ካብቶም ዝተሃርሙ ከባብታት፡ መደበር ኣምቡላንስ ምዃኑ ብምግላጽ፡ ፅባሕ ዓርበ መዓልቲ ሓዘን ምዃና ኣዊጁ።

   ቅድሚ ሕዚ ዝተፈጸሙ መጥቃዕትታት ዝያዳ ሰባት ዝቐተሉ እኳ እንተኾኑ፡ እዚ ዳሕረዋይ ደብዳብ ግን ዝበዝሐ ኣጽዋር ኣብ ሰፋሕቲ ከባብታት’ታ ርእሰከተማ ከምዝተፈፀመ ሓቢሩ።

   ፕረዚደንት ዩክረይን ቮሎዲሚር ዘለንስኪ፡ ሩስያ ንመጥቃዕቲ ትዳሎ ከምዘላ ድሕሪ ምጥንቃቑ፡ ድሕሪ ሒደት ሰዓታት ዝወረደ'ዚ ደብዳበ፡ ኣብ መላእ እታ ከተማ ብዙሓት ህንጻታት ኣዕንዩ።

   ሞስኮ፡ ምላሽ ነቲ፡ ዩክረይን ኣብ ልዕሊ ሲቪልያን መሰረተ-ልምዓት ዝተፈፀመ መጥቃዕቲ ከምዝዀነን፡ ወተሃደራዊ ማእከላት ዒላማ ዝገበረ ከምዝዀነን ኣፍሊጣ።

9. 1 ሓምለ 2026ሜክሲኮ፡ ሰለስተ ሰባት ህይወቶም ዝሰኣንሉ ጽምብል ዋንጫ ዓለም

   ኣብ ማእከል ርእሰከተማ ሜክሲኮ- ኣብ ከባቢ ሓወልቲ ‘መልኣኽ ናጽነት’ ልዕሊ ሓደ ሚልዮን ደገፍቱ ኲዕሶ እግሪ ናብ ጎደናታት ኣብዝወጽሉ ኣብ ሰለስተ ሰባት በቲ ፅቕጥቅጥን ዋህፅን ህይቶም ስኢኖም።

   እታ ሃገር ድሕሪ 1986 ንፈለማ እዋን እያ ኣብ ዋንጫ ዓለም ኣብ ኣውዲቕካ ምሕላፍ ብምዕዋት ናብ ዝቕጽል ​​መድረኽ ክትሓልፍ ክኢላ።

   ከንቲባ እታ ከተማ ክላራ ብሩጋዳ፡ ንስድራቤት ግዳያት ዝተሰመዓ "ልባዊ ሓዘን" ብምግላፅ፡ ኣብ ዝቕጽሉ መዓልታት ዝግበሩ ፅምብላት ከምኡ ከምዘይድገም ቃል ኣትያ።

   ሰብመዚ ጥዕና፡ ህጹጽ ኣገልግሎት፡ እቶም ሰለስተ ግዳያት ናብ ሆስፒታል ተወሲዶም ቀዳማይ ረድኤት ከምዝተገብረሎም ሓቢሮም።

   እንተዀነ፡ ሰለስቲኦም ብሰንኪ ዋህፅን ፅቕቅጥን ከምዝሞቱን ብስድራቤቶም ከምዝተለለዩን በዓል መዚ ጥዕና እታ ከተማ ወሲኹ ሓቢሩ።

   ከንቲባ ብሩጋዳ፡ እቲ ሞት ምስተገልጸ ኣብ ማሕበራዊ መራኸቢታት ኣብ ዝዘርግሐቶ ጽሑፍ፡ ደገፍቲ "ኩሉ ግዜ ሓላፍነት ብዝተመልኦ፣ ብምትሕልላይን ምጥሕስሳብን ክጽንብሉ" ኣተሓሳሲባ።

   ዓወት ሜክሲኮ ዘበስር ፊሽካ ምስተነፍሐ፡ ኣብ ስታድዮም ኣዝቴካን ኣብ መላእ ሰፊሕ ክፋል እታ ከተማን፡ ህዝባዊ ፅምብል ኣበጊሱ።

   ኣብ ከተማ ሜክሲኮ ልዕሊ 20 ሚልዮን ሰባት ዝነብሩ ዀይኖም፡ እዚ ድማ ሓደ ካብቶም ኣብዛ ፕላኔት ጽዑቕ ህዝቢ ዝነብረሎም ከባቢታት ይገብራ

   እዚ ናይ ሰሉስ ዓወት፡ ንሜክሲኮ ናብ ዙር 16 ዋንጫ ዓለም ዘሕልፋ ዀይኑ፡ ቶማስ ቱከል ዝመርሓ ጋንታ ሎሚ ረቡዕ ንዲ.ኣር ኮንጎ እንተድኣ ስዒራ፡ ምስ እንግሊዝ ክትገጥም ሰፊሕ ተኽእሎ ኣሎ።

10. 1 ሓምለ 2026ትራምፕ: ኣብ ዝሓለፈ ዓመት ካብ ንግዲ ክሪፕቶ ልዕሊ ሓደ ቢልዮን ዶላር ከሲቡ

    ፕረዚደንት ኣመሪካ ዶናልድ ትራምፕ፡ ኣብ ዝሓለፈ ዓመት ካብ ንግዳዊ ንጥፈታት ክሪፕቶካረንሲ፡ ልዕሊ ሓደ ቢልዮን ዶላር ከምዝረኸበ፡ ናይ 2025 ፋይናንሳዊ ጸብጻቡ ይሕብር።

    እቲ 927 ገጻት ዝሓዘ ፀብፃብ፡ ካብ ሓደ ‘ሴሌብሬሽን ኰይን’ ዝተባህለ ትካሉ ጥራይ፡ 635 ሚልዮን ዶላር ኣታዊ ከምዝረኸበ የመልክት።

    ብተወሳኺ፡ ካብቲ ብናይ ገዛእ ርእሱ፡ ደቁን፡ ደቂ ፍሉይ ልኡኹ- ስቲቭ ዊትኮፍን፡ ዝተመስረተ ትካል ክሪፕቶካረንሲ ‘ወርልድ ሊበርቲ ፋይናንሻል’ ልዕሊ 500 ሚልዮን ዶላር ኣታዊ ረኺቡ።

    ከምኡ’ውን፡ ካብ ብስም ትራምፕ ዝተሓተሙ ኣቑሑትን ካብ ሪልስቴትን (መሸጣ ኣባይቲ)፡ ተወሳኺ ሚልዮናት ኣታዊ ከምዝረኸበ እቲ ሓበሬታ ይጠቅስ።

    ዋይት ሃውስ ግን፡ ትራምፕ ካብ ናይ ፕዚደንትነት ስልጣኑ ተበሊፁ መኽሰብ ይረክብ ከምዘየለ'ዩ ዝምጉት።

    እቲ ዳሕረዋይ ፋይናንሳዊ ኣታዊኡ፡ ብውሑዱ 2.2 ቢልዮን ዶላር ዝበጽሐ - ካብቲ ቅድሚ ሕጂ ኣብ 2024 ዝነበረ ኣታዊ ኣዝዩ ዝዛይድ ኮይኑ፡ ትራምፕ ልዕሊ 600 ሚልዮን ዶላር ኣታዊ ከምዝረኸበ ገሊፁ ምንባሩ ዝዝከር እዩ።

    ንግዳዊ ንጥፈታቱ፡ ብደቁ ንዝመሓደር ትካል ከምዝገደፎ ብተደጋጋሚ ዘጉልሕ ዋይት ሃውስ፡ ዝኾነ ናይ ረብሓ ምግጫው ከም ዘየሎ ደጋጊሙ ከእምን'ዩ ዝፍትን።

    ምክትል ጸሓፊት ፕረስ ዋይት ሃውስ ኣና ኬሊ፡ እቲ ፕረዚደንት ንኣመሪካ “ማእከል- ክሪፕቶ ኣለም "ገይርዋ ብምባል፡ ክትኮርዕ ከምዝገበራ ገሊጻ።

    ንሳ ኣብ ዝሃበቶ ቃል፡ "ፕረዚደንት ይኹን ስድርኡ ኣብ ናይ ረብሓ ግጭት ተጸሚዶም ኣይፈልጡን፡ ንመፃኢ’ውን ኣብ ከምኡ ኣይክዋፈሩን'ዮም" ኢላ።

11. 30 ሰነ 2026ላዕለዎት ዳያኑ፡ ትራምፕ ደቂ ስደተኛታት ብቐጥታ-ዜግነት ከይረኽቡ ዘመሓላፎ ትእዛዝ ኣጊዶም

    ላዕለዋይ ቤት ፍርዲ ኣመሪካ፡ ዶናልድ ትራምፕ ካብ ሰነዳት ዘይብሎም ስደተኛታት ኣብ ምድሪ ኣመሪካ ዝወተወልዱ ብቐጥታ ዜግነት ከይረኽቡ ዝገበሮ ፈተነ ነጺግዎ።

    እቲ ፕረዚደንትን ናይ ሕጊ ጉጅለኡን፡ ኣብዚ ጉዳይ ዝሓዝዎ ቅዋም፡ ኣብታ ሃገር ዝለዓለ ኣካል ቤት ፍረዲ ክሳብ ቀረፅቲ ሕግን ክኢላታት ሕግን ብዙሕ ደገፍ ከይረኸበ ፀኒሑ።

    እዚ ንብዙሓት ኣብታ ሃገር ዝተወልዱ ኣሸሓት ደቂ ስደተኛታትት ዝፀሉ ውሳነ፡ በዚ መልክዑ ከብቅዕ ምኽኣሉ፡ ንተሓለቕቲ መሰላት ዘደንቕ ዓወት ከምዝዀነ እዩ ዝግለፅ።

    ዝበዝሑ፡ ካብቶም ትሸዓተ ዳያኑ ላዕለዋይ ቤት ፍርዲ ኣመሪካ፡ እዚ ቋንቋን ትርጉምን ሕገ-መንግስቲ ኣመሪካ ዝቕይርን፡ ን150- ዓመታት ዝፀንሐ ፅኑዕ ሕጊ ዳግማይ ዝኽልስን ትእዛዝ፡ ምእንቲ ዓወት ትራምፕ ክበሃል፡ ኣይነፀድቕን ክብሉ እዮም ወሲኖም።

    ብርግጽ እዚ ውሳነ እዚ፡ ነቲ ፕረዚደንት ከቘጠዖ ምዃኑን፡ ሰነዳት ዘይብሎም ስደተኛታት ናብ ኣመሪካ ክኣትዉ ዝኽእሉሉ መገድታት ኩሉ ንምድራት ሓድሽ ሜላታት ክእልሽ ክግደድ ምኳኑን ተዓዘብቲ ይዛረቡ።

    እቲ ናይ ሎሚ ውሳነ ላዕለዋይ ቤት ፍርዲ፡ ንመሰል ውልደት ዜግነት ንምኽባር 6ን 3 ድጋፍ ከምፀንዐ፡ ፀብፃባት ይሕብሩ።

    እቲ ብይን ብላዕለዋይ ዳኛ ጆን ሮበርትስ ዝተጻሕፈ ኮይኑ፡ ብዘይሕጋዊ መንገዲ ወይ ንግዚኡ ኣብ ኣመሪካ ካብ ዝነብሩ ወለዲ ዝተወልዱ ህጻናት፡ ብመሰረት ቅዋም ኣመሪካ፡ ብቐጥታ "ዜጋታት" ምዃኖም ይገልጽ።

    እቲ ውሳነ፡ ነቲ ድሕሪ ኲናት ሓድሕድ ኣመሪካ፡ ንሕቶ ዜግነት ናይቶም ሓራ ዝወጹ፡ ኣብ ኣመሪካ ዝተወልዱ ባሮት ነበር ንምፍታሕ: ዝተደንገገ መበል 14 መመሓየሺ ሕጊ ከም መርትዖ ይጠቅስ።

12. 29 ሰነ 2026ወከልቲ ኣመሪካን ኢራንን ኣብ ቐጠር ክራኸቡ'ዮም - ትራምፕ, ኣብ ቴክኒካዊ ኣካል'ቲ ስምምዕ ልዝብ ክቕጽላ እየን- ተባሂሉ

    ፕረዚደንት ኣመሪካ ኣብ ማሕበራዊ ገፁ ‘ትሩዝ ሶሻል’ ኣብ ዘስፈሮ ፅሑፍ ፡ "ኢራን ኣኼባ ክግበር ሓቲታ ኣላ፤ ፅባሕ ኣብ ዶሃ ክካየድ'ዩ" ኢሉ።

    እንተኾነ ግን ዶናልድ ትራሞፕ ብዛዕባ እቲ ጽባሕ ክካየድ መደብ ተታሒዝሉ ዘሎ ኣኼባ ተወሳኺ ዝርዝር ሓበሬታ ኣይሃበን።

    ወሃቢት ቃል ዋይት ሃውስ ካሮሊን ሌቪት ግን፡ ንፎክስ ኒውስ ኣብ ዝሃበቶ ሓበሬታ፡ ላዕለዎት ተደራደርቲ ኣመሪካ ጃረድ ኩሽነርን ስቲቭ ዊትኮፍን “ኣብዚ ሰሙን’ዚ ንላዕለዋይ ኣኼባ ሰበስልጣን፡ ናብ ዶሃ ክጓዓዙ እዮም” ኢላ።

    ብተወሳኺ ጎኒ ጎኒ እቲ ላዕለዋይ ኣኼባ ቴክኒካዊ ዝርርብ ከምዝካየድ'ውን ሓቢራ።

    ኢራንን ኣመሪካን ኣብ ቴክኒካዊ መዳያት እቲ ኣብ ስምምዕ ዝተበፅሓሉ ምቍራፅ ተኹሲ፡ ልዝብ ክቕጽላ ምዃነን፡ ሓደ በዓልስልጣን ዋሽንግተን ሓቢሩ ምንባሩ ቅድም ኢሉ ተገሊፁ ነይሩ።

    እቲ ስሙ ዘይተጠቕሰ በዓልስልጣን ንኤኤፍፒ ኣብ ዝሃቦ ቃል፡ “ኣብ ኩሉ ቴክኒካዊ መዳያት እቲ ስምምዕ ዝግበር ዘተ ክቕጽል እዩ” ክብል'ዩ ተዛሪቡ።

    "ንግዚኡ ክልቲኦም ወገናት ነቲ ግጭት ካብ ምግዳድ ክቑጠቡ እዮም፤ መራኽብ ብናጽነት ብሰላም ክጓዓዛ ክኽእላ እየን" ድማ ኢሉ።

    ምክትል ሚኒስትር ጉዳያት ወፃኢን ሓላፊ ጉጅለ ዘተ ኢራን፡ ካዘም ጋሪባባዲ ግና፡ ክልቲአን ሃገራት ኣብዚ ሰሙን ቴክኒካዊ ዝርርብ ንምክያድ መደብ ተታሒዙ ኣሎ ንዝብል ጸብጻባት ነፂጉ።

    ብሰንኪ ኣብ ኣተሓሕዛ ጉዳይ መጻብቦ ሆርሙዝ ዝተለዓለ ምስሕሓብ፡ ኣብ ዝሓለፈ መዓልታት ቴህራንን ዋሽንግተንን ተጋጭየን ነቲ ስምምዕ ሰላም ብምጥሓስ ነንሕድሕደን ክካሰሳ ከምዝቐነያ ዝዝከር እዩ።

13. 28 ሰነ 2026ሕብረት ኤውሮጳ፡ ኣብ ትግራይ እናኸረረ ዝኸይድ ዘሎ ወጥሪ ከምዘሻቐሎ ገሊጹ

    ሕብረት ኣውሮጳ ኣብ ትግራይ እናወሰኸ ብዝኸይድ ዘሎ ወጥሪ ሰኸፈት ከምዝሓደሮ ገሊጹ።

    ኣብ ቀረባ እዋን ዝተራእዩ ምዕባለታት፡ ነቲ ንኽልተ ዓመት ዝቐጸለ ኲናት ትግራይ ዘብቅዐ ስምምዕ ፕሪቶርያ ከዳኽም ከምዝኽእል ኣጠንቂቑ።

    ኣብ ኣዲስ ኣበባ ዝርከብ ቤት ጽሕፈት ልኡኽ ሕብረት ኤውሮጳ፡ ትማሊ 27 ሰነ 2026 ዘውጽኦ መግለጺ፡ ህዝባዊ ወያነ ሓርነት ትግራይ (ህወሓት)፡ ነባር ክልላዊ ቤት ምኽሪ ምቘሙን: ግዱድ ወተሃደራዊ ግፋን ብምጥቃስ፡ “ኣብ ሰሜን ኢትዮጵያ ዘሎ ወጥሪ ከምዘሻቐሎ” እዩ ዘመልክት።

    ሕብረት ኤውሮጳ፡ እዚ ስጉምትታት ንውዕላት ስምምዕ ሰላም ፕሪቶርያ ዝጥሕስ ምዃኑ እውን ኣስሚሩሉ ኣሎ።

    ፌደራል መንግስቲ ይኹን ህወሓት ምሉእ ኣተገባብራ ስምምዕ ፕሪቶርያ ብዝምልከት ብህጹጽ ዘተ ክጅምሩ ኣተሓሳሲቡ።

    ብተወሳኺ ብሕብረት ኣፍሪቃ ዝምራሕ ናይ ሽምግልና ጻዕርታት ከም ዝድግፍ እውን ኣረጋጊጹ።

    እዚ መግለጺ ሕብረት ኣውሮጳ፡ ነቲ ብ26 ሰነ ካብ ኤምባሲ ኣመሪካ ኣብ ኣዲስ ኣበባ ዝወጸ መግለጺ ስዒቡ ዝመጸ እዩ።

    እቲ ኤምባሲ፡ ስምምዕ ፕሪቶርያ “ምሉእ ብምሉእ ክትግበር” ጸዊዑ እዩ።

    ነዚ መግለጺ ዘውጽአ፡ ኣመሪካ ኣብ ልዕሊ "ኣኽረርቲ" ኣባላት ህወሓትን ናይ ቀረባ ስድራቤቶምን ናይ ቪዛ እገዳ ከም ዘንበረት ካብ እትገልጽ ድሕሪ ሓደ ሰሙን እዩ።

14. 28 ሰነ 2026ኣመሪካን ኢራንን ነቲ ውዕል ሰላም ብምጥሓስ ነንሕድሕደን ይካሰሳ

    ኣመሪካ፡ ኣብ መጻብቦ ሆርሙዝ ብቐዳም ኣብ ልዕሊ ባንዴራ ፓናማ እተምበልብል መርከብ መጥቃዕቲ ሰብ ኣልቦ ነፋሪት ድሕሪ ምፍፃሙ፡ ኣብ ልዕሊ ኢራን ሓድሽ መጥቃዕቲ ኣካይዳ።

    ማእከላይ እዚ ኣመሪካ (ሴንትኮም)፡ ኣብ ልዕሊ ንግዳዊ መራኽብ ንዝግበር "ቀጻሊ መጥቃዕቲ" ቀጥታዊ ምላሽ ንምሃብ፡ ኣብ መላእ ኢራን ዝተፈላለየ ዕላማታት ከምዝሃረመ ገሊጹ።

    ሕነ ንምፍዳይ፡ እስላማዊ ሓለዋ ሰውራ ኢራን (IRGC) ኣብ ኩዌትን ባሕሬንን ኣብ ዝርከብ ትሕተ ቅርጺ ኣመሪካ ሚሳይላትን ሰብ ኣልቦ ነፈርትን መጥቃዕቲ ከምዘውረደ ንመንግስታዊ ማዕከናት ዜና ኣብ ዘውጽኦ መግለጺ ኣፍሊጡ።

    ድሕሪ እቲ ምልውዋጥ ተኹሲ፡ ኣመሪካን ኢራንን ነቲ ስምምዕ ምቁራጽ ተኹሲ ብምጥሓስ ነንሕድሕደን ይካሰሳ ኣለዋ።

    ሴንትኮም ኣብ ዘውጽኦ መግለጺ፡ "ኢራን ነቲ ስምምዕ ምቁራጽ ተኹሲ ከተኽብር ዕድል ተዋሂብዋ'ኳ እንተነበረ፡ ሓይልታታ ግን ንባንዴራ ፓናማ እተምበልብል ታንከር ‘ኤምቲ ኪኩ’ መጥቃዕቲ ሰብ ኣልቦ ነፋሪት ከምፈፀመት’ ገሊፁ።

    ከም መልሲ ናይዚ ድማ፡ ነፈርቲ ውግእ ኣመሪካ ኣብ መጻብቦ ሆርሙዝን ከባቢኡን ኣብ ዝተፈላለየ ቦታታት ኣብ 10 ወተሃደራዊ ዒላማታት ኢራን መጥቃዕቲ ከምዘካየዳ እቲ መግለጺ ሓቢሩ።

    እዚ ድማ ወተሃደራዊ ናውቲ፣ ስርዓተ ርክብ፣ መከላኸሊ ኣየርን መኽዘን ሰብ ኣልቦ ነፈርትን ዘጠቓለለ እዩ።

    መግለጺ ኢራን፡ ኣመሪካ "ሓይሊ ባሕሪ እስላማዊ ሓለዋ ሰውራ ኢራን( IRGC) ኣብ ልዕሊ’ታ ገበነኛ መርከብ ንዝወሰዶ ስጉምቲ" ምላሽ ንምሃብ፡ ኣብ ኢራን ሓሙሽተ መደበራት ገማግም ባሕሪ መጥቃዕቲ ከምዝፈጸመት ገሊፁ።

    ነዚ ሕነ ንምፍዳይ፡ እስላማዊ ሓለዋ ሰውራ ኢራን፡ ኣብ ኩዌት ኣብ ዝርከብ መደበር ዓሊ ኣልሳለምን ኣብ ፖርት ሳልማን ባሕሬን ኣብ ዝርከብ ሓሙሻይ መርከብ ሓይሊ ባሕሪን ኣብ "ሸሞንተ ወሰንቲ ትሕተ ቅርጺ" ባሊስቲክ ሚሳይላትን ሰብ ኣልቦ ነፈርትን ከምዘዕነወ ገሊፁ።

    ኣመሪካ ኣብ ልዕሊ ኢራን ዘካየደቶ ዳሕረዋይ መጥቃዕቲ ምስ ተገልፀ ነዊሕ ከይጸንሐ፡ ትራምፕ ኣብ ትሩዝ ሶሻል፡ ቴህራን "ፈጺማ ከምዘይትመሃር ዘርኢ እዩ" እዩ ኢሉ።

    "ድሕሪ ደጊም ርትዓውያን ዘይንዀነሉ እዋን ክመፅእ ይኽእል'ዩ፡ ነቲ ኣዝዩ ብዓወት ዝጀመርናዮ ስራሕ ድማ ብወተሃደራዊ መንገዲ ክንዛዝሞ ክንግደድ ኢና" ክብል ትማሊ ቀዳም ምሸት ተሓንዩ።

    እቲ ጽሑፍ ኣስዒቡ፡ "ከምኡ እንተኾይኑ፡ እስላማዊት ሪፓብሊክ ኢራን ድሕሪ ደጊም ኣይክትህሉን እያ!" ይብል።

15. 27 ሰነ 2026ኣመሪካ ኣብ ልዕሊ ጽዕነት መርከብ ድሕሪ ዝተፈጸመ መጥቃዕቲ ኣብ ኢራን ደብዳብ ፈጺማ

    ፕረዚደንት ዶናልድ ትራምፕ፡ ኢራን ኣብ ሆርሙዝ ኣብ ልዕሊ መርከብ ጽዕነት ድሕሪ ዝተፈጸመ መጥቃዕቲ፡ ንስምምዕ ምቍራጽ ተዅሲ ጥሒሳ ብምባል፡ "ዕሽነት ዝመልኦ ግህሰት" ፈጺማ ክብል ከሲሱዋ።

    ነዚ ስዒቡ ድማ ሓይልታት ኣመሪካ ኣብ ልዕሊ ዒላማታት ኢራን መጥቃዕቲ ፈጺሞም።

    ማእከላይ እዚ ሓይልታት ኣመሪካ ብዓርቢ ኣብ ዝሃቦ መግለጺ፡ ኣብ መኽዘናት ሚሳይላትን ድሮናትን ከምኡ’ውን ኣብ ገማግም ባሕሪ ኣብ ዝርከቡ ናይ ራዳር መደበራት መጥቃዕቲ ከም ዝፈጸመ ገሊጹ።

    እዚ ስጕምቲ እዚ፡ ሓሙስ ኣብ ልዕሊ ሓንቲ ናይ ጽዕነት መርከብ ድሕሪ ዝተፈጸመ መጥቃዕቲ ድሮን ዝተዋህበ ምላሽ ምዃኑ እቲ እዚ ሓቢሩ። እቲ መጥቃዕቲ፡ ኣብቲ ዞባ ተዓጊቶም ንዘለዉ ኣሽሓት መርከበኛታት ንምውጻእ ተሓሲቡ ዝነበረ መደብ ክተዓናቐፍ ገይሩ እዩ።

    ኢራን ብወገና፡ እታ መጥቃዕቲ ዝወረዳ ብባንዴራ ሲንጋፖር እትጓዓዝ "ኤቨር ላቭሊ" ዝተሰምየ ናይ ጽዕነት መርከብ፡ ኣብቲ ዘይተፈቕደላ መስመር ባሕሪ ብምጓዓዛ መጥቃዕቲ ከም ዝተፈጸማ ገሊጻ።

    ዕጡቕ ሓይሊ ሓለዋ ሰውራ ኢራን ድማ ሓይልታት ኣመሪካ ብዝተፈላለየ ምስምስ ኣብ ልዕሊ ገማግም ባሕሩ መጥቃዕቲ ከም ዝፈጸሙ ብምኽሳስ፡ ሓይልታት ባሕሩ ኣብቲ ዞባ ኣብ ዝርከቡ ወተሃደራዊ መደበራት ኣመሪካ መጥቃዕቲ ብምፍጻም ሕነ ከም ዝፈደዩ ሓቢሩ።

    ቢቢሲ ነዚ ጉዳይ ኣመልኪቱ ምስ ምኒስትሪ ምክልኻል ኣመሪካ ርክብ እኳ እንተ ገበረ፡ ምላሽ ግን ኣይረኸበን።

    ኣብዚ ቀረባ መዓልታት ትራምፕን ካልኦት ሰበ-ስልጣን ኣመሪካን ምስ ኢራን ክግበር ዝጸንሐ ዘተ ጽቡቕ ይኸይድ ከም ዝነበረ ክገልጹ ጸኒሖም እዮም።

    ፕረዚደንት ዶናልድ ትራምፕ እቲ ስምምዕ ምቍራጽ ተዅሲ ገና ጸኒዑ ኣሎዶ የሎን ንዝብል ሕቶ ጋዜጠኛታት ክምልስ ከሎ፡ "እንታይ ይኸውን ከም ዘሎ ክትፈልጡ ኢኹም፡" ክብል ብምግላጽ ሰፊሕ ሓበሬታ ካብ ምሃብ ተቘጢቡ እዩ።

16. 26 ሰነ 2026ኣብ ቬነዙወላ ብሓደጋ ምንቅጥቃጥ ምድሪ ዝተጎድኡ ሰባት ምድላይ ይቕጽል

    ግዝያዊት ፕረዚደንት ቬነዙወላ ደልሲ ሮድሪገዝ ኣብዚ ሕጂ እዋን ቁጽሪ ናይቶም በቲ ትማሊ ረቡዕ ዘጋጠመ ምንቅጥቃጥ ምድሪ ዝሞቱ ሰባት 589 ከም ዝበጽሐን፡ 2,980 ድማ ከም ዝቘሰሉን ገሊጻ።

    ንወተሃደራዊ ሓይሊ ነታ ሓንቲ ካብተን ኣዝየን ዝተሃስያ ከባቢታት ዝዀነት ላ ጌይራ ክቋፐጻጸራ’ውን መምርሒ ሂባ ኣላ።

    ሆስፒታላት ድማ ተጨናኒቐን ከም ዘለዋ ይንገር።

    ሓካይም ንቢቢሲ ከም ዝሓበርዎ፡ ቅድሚ እቲ ምንቅጥቃጥ ምድሪ፡ ቀረብ ሕክምና ንህዝቢ እኹል ኣይነበረን።

    ሕቡራት ሃገራት፡ ጉጅለታት ዘሽትቱ ኣኽላባት ዝርከብዎም ልዕሊ 1000 ኣህጉራውያን ሰራሕተኛታት ምድላይን ምድሓንን ህወይት ከም ዝተዋፈሩ ገሊጹ።

    ሓላፊ ሰብኣዊ ሓገዝ ሕቡራት ሃገራት ቶም ፍሌቸር፡ "ሰባት ናብ ቬነዙወላ ሓገዝ ከም ዝመጽእ ክፈልጡ እደሊ፡" ኢሉ።

    ቬነዙወላ ድሮ ኣብ ዘይርጉጽነት ጥሒላ ዘላ ሃገር እያ - እቲ ካብ 2013 ጀሚሩ ነታ ሃገር ዝገዝእ ዝነበረ ኒኮላስ ማዱሮ ብሓይልታት ኣመሪካ ካብ ዝትሓዝ ኣስታት ሽዱሽተ ወርሒ ገይሩ ኣሎ።

17. 26 ሰነ 2026ኣብ ታሪኽ ዋንጫ ዓለም ንፈለማ እዋን ናብ ኣውዲቕኻ ምሕላፍ ዝሓለፈት ኣይቮሪኮስት

    ኣይቮሪኮስት ንኪዩሩሳው 2 ን0 ብምስዓር ኣብ ታሪኻ ንፈለማ እዋን ናብ ኣውዲቕኻ ምሕላፍ ዋንጫ ዓለም በጺሓ።

    ኣይቮርያውያን ናብ 32 ጉጅለ ንምሕላፍ ሓንቲ ነጥቢ ጥራይ'ኳ የድልዮም እንተነበረ፡ ንመጋጥምታ 2 ብ 0 ብምስዓር ንሳልሳይ ግዜ ኣብ ዋንጫ ዓለም ድሕሪ ምስታፍ ንፈለማ እዋን ናብ ኣውዲቕካ ምሕላፍ በጺሓ።

    ኒኮላስ ፔፔ ኣብ 7ይ ደቒቕ ሸቶ ብምምዝጋብ ናይ ምውዳቕ ስግኣቶም ክቕንጠጥ ገይሩ።

    ኣብዚ ናይ ሎሚ ዓመት ዋንጫ ኣፍሪቃ ንሃገራዊት ጋንታኡ ዘይተመርጸ ኣከፋፋሊ ኣርሰናል ነበር ፔፔ፡ ኣብ መበል 65 ደቒቕ ካልኣይቲ ሸቶኡ ኣመዝጊቡ።

    እዚ ማለት ኣይቮሪኮስት ኣብ ክልቲኡ ጸወታታት ምድብ 'E' ተዓዊታ ኣብ ዋንጫ ዓለም 6 ነጥቢ ኣመዝጊባ ማለት እዩ።

    ኣሰልጣኒ ኣይቮሪኮስት ኤመሪ ፋየ ድሕሪ ጸወታ ኣብ ዝሃቦ መግለጺ፡ “ንደገፍቲ ዘሕልፎ መልእኽተይ፡ ነዚ ታሪኻዊ ኣውዲቕካ ምሕላፍ ኣስተማቕርዎ፤ ጸንብሉዎ ዝብል'ዩ፡” ኢሉ።

    "ሓጎስና ምግላጽ ምስ ወዳእና፡ ኣብዚ ውድድር ኣብ ዝበጻሕናዮ ደረጃ ክንበጽሕ ሰናይ ትምኒትኩም ስደዱልና።"

    "በዚ ውጽኢት ኣዝየ ሕጉስ እየ። ኩሉ ፍጹም ኣይነበረን፤ ይኹን እምበር፡ ዘይምስዓርና ንስነ-ልቦናና ጽቡቕ'ዩ። ሕጂ ጋንታና ብዓወት ክትሕደስ'ያ። ድሕሪ ዓወት ከተዕርፍ ቀሊል'ዩ፡" ኢሉ።

18. 26 ሰነ 2026ደቡብ ኣፍሪቃ፡ ኤምባሲ ኢትዮጵያ ዜጋታቱ ጥንቃቐ ክገብሩ ኣተሓሳሲቡ

    ኣብ ፕሪቶርያ ዝርከብ ኤምባሲ ኢትዮጵያ፡ መራሕቲ ጸረ ኢሚግሬሽን ደቡብ ኣፍሪቃ ስደተኛታት ካብታ ሃገር ዝወጹሉ ናይ መወዳእታ ግዜ ገደብ ክውዳእ ኣብ ዝቐርበሉ ዘሎ እዋን፡ ኢትዮጵያውያን ስደተኛታት “ጥንቃቐ” ክገብሩ ኣተሓሳሲቡ።

    ኣብ ደቡብ ኣፍሪቃ መራሕቲ ጸረ ኢሚግሬሽን ዘቐመጥዎ ናይ መወዳእታ ግዜ ዝመጽእ ሰሙን ሰሉስ 23 ሰነ 2018 (ኣ.ግ) እዩ ከእክል።

    መራሒት ኣብ ልዕሊ ዘይሕጋውያን ስደተኛታት ጐስጓስ ዘካይድ ዘሎ 'ማርች ኤንድ ማርች' ዝተባህለ ምንቅስቓስ ጃሲንታ እንጎቤሴ ዙማ ኣብ ዝሃበቶ መግለጺ፡ እቲ ናይ ግዜ ገደብ ኣብ ቦታኡ ከም ዘሎ ገሊጻ።

    ኤምባሲ ኢትዮጵያ ኣብ ፕሪቶርያ ብሓሙስ 18 ሰነ ኣብ ዘውጽኦ መግለጺ፡ ኣብታ ሃገር ዝርከቡ ዜጋታት ኢትዮጵያ ብዝምልከት “ምስ መንግስቲ ኣድላዪ ርክባት ይገብር ኣሎ” ኢሉ።

    መንግስቲ ደቡብ ኣፍሪቃ ኣብ ልዕሊ “ስደተኛታት መጥቃዕቲ” ከይፍጸም ከም ዝከላኸለሎም ብተደጋጋሚ ምግላጹ ብምዝኽኻር፡ መንግስቲ "ኣብ ዝቕጽሉ መዓልታት ስጉምትታት ምኽባር ጸጥታ ከሐይል ትጽቢት ይግበር፡" ኢሉ።

    እንተዀነ ኣብ ልዕሊ ስደተኛታት መጥቃዕቲ ከጋጥም ከም ዝኽእል ስክፍታኡ ገሊጹ።

    "ሕጂ'ውን ኣብ ልዕሊ ስደተኛታት ዘይሕጋዊ ንጥፈታትን መጥቃዕትን ይፍጸም ከም ዘሎ ዘርእዩ ምልክታት ኣለዉ፡" ክብል ድማ ኣብ ዘውጽኦ መግለጺ ሓቢሩ።

    እቲ ኤምባሲ፡ "ግህሰት መሰላትን ስክፍታታት ጸጥታን" ከም ዘሎ ብምግላጽ፡ ኣብታ ሃገር ዝርከቡ ኢትዮጵያውያን ስደተኛታት "ኣብ መዓልታዊ ንጥፈታቶም ጥንቃቐ ክገብሩ፡" ኣተሓሳሲቡ።

    ኣብ ደቡብ ኣፍሪቃ ጸረ ስደተኛታት ተቓውሞታት እናበዝሐ መጺኡ ኣሎ። ስደተኛታት ዝተፈላለዩ ሃገራት'ዉን መጥቃዕቲ ከም ዝበጽሖም ዘርኢ ቪድዮታት ክዘዋወር ጸኒሑ'ዩ።

    ኣብ ልዕሊ እቶም ስደተኛታት ዝተፈጥረ ስግኣት ስዒቡ፡ ናይጀርያን ጋናን ዜጋታተን ካብ ደቡብ ኣፍሪቃ ከዉጽኣ ምኽንያት ኰይኑ ኣሎ።

    መራሕቲ እቲ ምንቅስቓስ፡ ሰነዳት ዘይብሎም ስደተኛታት ካብ ደቡብ ኣፍሪቃ ንክወጽኡ ኣብ ዝተቐመጠ ግዜ ገደብ (መጻኢ ሰሉስ) ሰልፊ ተቓውሞ ክካየድ ጸዊዖም ኣለዉ።

    "ንማንም ክንጎድእ ኣይንፍትንን ኢና። ዘይሕጋውያን ስደተኛታት ካብ ሃገርና ክወጽኡን መንግስቲ ነቲ ዘሎ ሕግታት ከኽብርን ጥራይ ኢና ንሓትት ዘለና፡" ይብሉ።

    እዚ ብክፍሊ ሰብኣዊ መሰላት ሕብረት ኣፍሪቃ፡ ኣካል፡ ኮሚሽን ሰብኣዊ መሰላት ሰብን ተነቒፉ’ሎ።

19. 26 ሰነ 2026ኣብ ጉዳይ ስደተኛታት ዝተመሓላለፈ ሓድሽ ውሳነ ቤት ፍርዲ ኣመሪካ

    ላዕለዋይ ቤት ፍርዲ ኣመሪካ፡ ነቲ ምምሕዳር ፕረዚደንት ዶናልድ ትራምፕ ንስደተኛታት ሄይቲን ሶርያያን ግዝያዊ ሓለዋ ሕጊ ዕቑር (TPS) ክረኽቡ ዝሕግዝ ዝነበረ ኣሰራርሓ ንምቁራጽ ዝወሰዶ ውሳነ ዝድግፍ ውሳነ ሂቡ።

    እቲ ላዕለዋይ ቤት ፍርዲ ዝሃቦ ውሳነ፡ ኣብ ኣመሪካ ናይ ምጽናሕ መሰሎም ንምሕላው ጥርዓን ኣቕሪቦም ውሳነ መንግስቲ ብግዝያውነት ክእገድ ንዝገበሩ ኢትዮጵያውያን ዝኸዱዎ መስርሕ ፍርዲ ጽልዋ ከም ዘሕድር ሓደ ጠበቓ ኢሚግሬሽን ንቢቢሲ ሓቢሩ።

    እዚ "ግዝያዊ ሓለዋ ዘለዎ ኩነታት" - "Temporary Protected Status" ዝተባህለ ኣሰራርሓ፡ካብ ግጭት፣ ተፈጥሮኣዊ ሓደጋታት ወይ ካልእ ጸጥታዊ ሓደጋታት ዘጋጥመን ሃገራት ዝመጽኡ ስደተኛታት ኣብ ኣመሪካ ክጸንሑ ዘኽእሎም ግዝያዊ ሕጋዊ ሓለዋ እዩ።

    ምምሕዳር ፕረዚደንት ኣመሪካ ነበር ጆ ባይደን ነዚ ሓለዋ ንኢትዮጵያውያን ድሕሪ ኲናት ትግራይ ሂቡዎም።

    በዚ ሓለዋ እዚ ንሰለስተ ዓመት ኣስታት 5 ሽሕ ኢትዮጵያውያን ተጠቀምቲ ከም ዝዀኑ ይንገር።

    እንተዀነ፡ ኣብ ልዕሊ ስደተኛታት ተሪር መርገጺ ክሕዝ ዝጸንሐ ምምሕዳር ትራምፕ፡ ነዚ መሰል ኣብ ልዕሊ ዜጋታት ኢትዮጵያ፡ ሄይቲን ሶርያን ሓዊሱ ካብ ሓያሎ ሃገራት ዝመጽኡ ስደተኛታት ዝረኽቡዎ ዝነበረ ኣገልግሎት ክግታእ ገይሩ ኣሎ።

    ኣብ ወርሒ ታሕሳስ ንኢትዮጵያውያን ዝወሃብ ዝነበረ ሓለዋታት ከብቅዕ ዝወሰነ ሚኒስትሪ ውሽጣዊ ጸጥታ ኣመሪካ’ውን እቶም ስደተኛታት ኣብ ውሽጢ 60 መዓልታት ማለት ክሳብ ለካቲት ካብ ኣመሪካ ክወጽኡ ኣዚዙ ነይሩ።

    ሰለስተ ኢትዮጵያውያን 'ኣፍሪካ ኮሚዩኒቲስ ቱጌዘር' ምስ ዝተባህለ ተሓላቒ ጉጅለ መሰላት ኣፍሪቃውያን ስደተኛታት ብምዃን ኣብ ቦስተን ንዝርከብ ቤት ፍርዲ ጥርዓን ኣቕሪቦም።

    ነዚ ጉዳይ ዝርኣየ ዳ ኛፌደራል ድማ፡ እቲ ጉዳይ ንምምርማር ነቲ ስጉምቲ ብምእጋድ ጻንሒት ኢትዮጵያውያን ክናዋሕ ዝገብር ውሳነ ሂቡ።

    ጠቕላይ ቤት ፍርዲ ኣመሪካ ብሓሙስ 25 ሰነ 2026 ኣብ ዘሕለፎ ውሳነ፡ ብተመሳሳሊ መልክዑ ግዝያዊ እግድ ተዋሂቡዎም ዝነበሩ ስደተኛታት ሄይትን ሶርያን ይምልከት።

    ኣብ ሚነሶታ ናይ ኢሚግሬሽን ጠበቓ ሙላለም ጌታቸው ንቢቢሲ ኣብ ዝሃቦ ቃል፡ እቲ ላዕለዋይ ቤት ፍርዲ ዝሃቦ ውሳነ፡ ነቲ ዝካየድ ዘሎ ናይ ኢትዮጵያ ይግባይ’ውን ክምልከት ከም ዝኽእል ሓቢሩ።

    ውሳነታት ላዕለዋይ ቤት ፍርዲ ኣመሪካ “ኣብ ውሽጢ ሓደ ጉዳይ” ከም ዘይውዳእ ዝገለጸ ሙላለም፡ ኣብ “ቐጻሊ ታሕተዎት ኣብያተ ፍርዲ ተመሳሳሊ ጉዳያት በዚ ኣገባብ'የን ክሕዝኦ ዝግባእ ዝብል መምርሒ’ዩ ዝፈጥር፡” ኢሉ።

    ጉዳይ ጌይቲን ሶርያን ናብ ላዕለዋይ ቤት ፍርዲ ዝወሰዶ ውሳነ፡ ኣብ ታሕተዋይ ብርኪ ዝርከቡ ኣብያተ ፍርዲ ዝኣገዱዎ ሚኒስትሪ ፍትሒ ኣመሪካ እዩ።

    "ሚኒስትሪ ፍትሒ ንጉዳያት ሄይቲን ሶርያን [ናብ ላዕለዋይ ቤት ፍርዲ] ጥራይ እዩ ወሲድዎም፡ [እቲ ውሳነ] ግን ንኹሉ ሰብ ዝምልከት'ዩ" ይብል ሙላለም።

    ብመሰረት እቲ ጠበቓ፡ ካብ ሽዑ ጀሚሩ ኣብያተ ፍርዲ ፌደራል ንኸምዚ ዝበለ ውሳነ ምምሕዳር ትራምፕ ንምዕጋት “ስልጣን ኣይነበረንን”።

    ነዚ ውሳነ ስዒቡ፡ ክፍሊ ድሕነት ሃገር ወሲኹ፡ ነቲ ብመሰረት እቲ ኣቐዲሙ ዝወሰዶ ውሳነ ንግዚኡ ዝተናውሐ ሕጋዊ ሓለዋታት ከም ዘቋርጾ ገሊጹ።

    ይኹን'ምበር በዚ ኣገባብ ሓለዋኦም ዝተቛረጸ ኢትዮጵያውያን ብናይ ስደተኛታት ሕቶ ዑቕባ፣ ኣብ ሓዳር ዝተመርኰሰ ቀዋሚ ነባሪ፣ ብ"ስፖንሰርሺፕ" ወይ ብስራሕ ኣብ ኣመሪካ ክጸንሑ "ውሱን ዕድል" ከም ዘሎ እቲ ጠበቓ ኣብሪሁ።

    እቲ ብሓደ መንገዲ ዝተረኽበ መከላኸሊታት ናብ ካልእ መንገዲ ናይ ምቕያር መስርሕ "ኣዝዩ ከቢድ'ዩ" ክብል ወሲኹ ገሊጹ።

20. 26 ሰነ 2026ንጻዕርታት ህይወት ኣድሕን ዝግበር ዘሎ ደገፍ

    ብዙሓት ሃገራት ንቬነዝወላ ኣብ ጻዕሪ ህይወት ኣድሕን ንምሕጋዝ ቃል ኣትየን ኣለዋ። ኣመሪካ 150 ሚልዮን ዶላር ዝግመት ሓገዝ ከም እትልእኽ ኣፍሊጣ። ወተሃደራዊ ሓይሊ ኣመሪካ ንጕጅለታት ረድኤት ንምድጋፍን ህጹጽ ስርሒታት ንምክያድን መጓዓዝያ መራኽብን ነፈርትን ናብታ ሃገር ይሰድድ ምህላዉ ወግዓዊ መግለጺ ኣውጺኡ ኣሎ።

    ጸሓፊ ጕዳያት ወጻኢ ኣመሪካ ማርኮ ሩቢዮ እታ ሃገር ጕጅለታት ህይወት ኣድሕን ሕክምናዊ ጸጋታትን ሰብኣዊ ሓገዛትን ብህጹጽ ተዋፍር ከም ዘላ ኣረጋጊጹ።

    እዚ ሓደጋ ንሓድሽ ዝምድና ኣመሪካን ቬኔዙዌላን ከም ቀዳማይ ፈተና ኰይኑ የገልግል ኣሎ። ፕረዚደንት ዶናልድ ትራምፕ ኣብ ጥሪ ንፕረዚደንት ኒኮላስ ማዱሮ ንምሓዝ ትእዛዝ ድሕሪ ምሃቡ ዝምድና ክልቲአን ሃገራት ተበላሽዩ እኳ እንተጸንሐ ትራምፕ መንግስቱ ብቕልጡፍ ስጕምቲ ክወስድ ከም ዝኣዘዘ ሓቢሩ ኣሎ።

    ትራምፕ ኣብ ማሕበራዊ መራኸቢ ትሩዝ ሶሻል ኣብ ዘውጽኦ ጽሑፍ እቲ ምንቅጥቃጥ ምድሪ ኣዝዩ ሰፊሕ ከም ዝዀነን ዘስካሕክሕ ቍጽሪ ምዉታት ከም ዘስዓበን ብምግላጽ ኣመሪካ ንምሕጋዝ ድልውቲ ምዃና ኣስሚሩሉ።

    ምምሕዳር ትራምፕ ንማዱሮ ካብ ስልጣን ንምእላይ ድሕሪ ምውሳኑ ምስ ግዝያዊት ፕረዚደንት ደልሲ ሮድሪገዝ ሓድሽ ዝምድና ንምህናጽ ይሰርሕ ኣሎ።

    እታ ግዝያዊት ፕረዚደንት ብወገና ኣመሪካ ሪፓብሊክ ዶሚኒካን ኤል ሳልቫዶር ሜክሲኮን ቐጠርን ንጻዕርታት ህይወት ኣድሕን ዝኸውን ደገፍ ይሰዳ ከም ዘለዋ ሓቢራ።

    መራሒት ተቓዋሚ ሰልፊ ማሪያ ኮሪና ማቻዶ እውን ኣብ ኤክስ ኣብ ዘውጽኣቶ ጽሑፍ ልባን ጸሎታን ኣብዚ ናይ ጭንቀት እዋን ምስ ነፍሲ ወከፍ ስድራቤት ቬነዝወላ ከም ዘሎ ገሊጻ ኣላ።

    እዚ ደገፍ ኣህጉራዊ ማሕበረሰብ ዓቢ ተስፋ ዝህብ እዩ። ህዝቢ ቬነዝወላ ኣብዚ እዋን ከቢድ ጸገማት የሕልፍ ኣሎ።