ژوندۍ پاڼه, د امریکا د بریدونو شپږمه پرلپسې شپه؛ د بندر عباس ښار څو مهمې لارې په نښه شوې

ژوندی پوښښ

1. ۲۲ چنګاښ ۱۴۰۵ - ۱۳ جولای ۲۰۲۶وروستی, سپاه پاسداران: په بحرین، کویت او اردون کې مو د امریکا پر اډو بریدونه کړي

   

   د عکس سرچینه، EPA/Shutterstock

   د ایران سپاه پاسداران ځواکونه وايي چې په بحرین، کویت او اردن کې یې د امریکا پر پوځي اډو متقابل بریدونه کړي او دا چې ځینې اهداف یې پکې لمنځه وړي دي.

   سپاه پاسداران دوشنبه سهار په یوه اعلامیه کې ویلي د اردن په پرنس حسن هوايي اډه کې یې د توغندیو پر سیستمونو او د تېلو پر زېرمو د توغندیو او ډرونونو برید کړی چې پایله کې یې اور لګېدلی دی.‌

   دغو ځواکونو ادعا کړې چې د بریدونو دویمه څپه کې یې په بحرین کې او درېیم پړاو کې بیا د کویت په علي سالم او احمد الجابر نظامي اډو کې د امریکا اړوند پوځي اهداف په نښه او له منځه وړي دي.

   تهران وايي، دغه بریدونه پر ایران د امریکا د تېرې شپې د بریدونو په ځواب کې شوي.

2. ۲۲ چنګاښ ۱۴۰۵ - ۱۳ جولای ۲۰۲۶وروستی, سېنټکام: ایران کې مو د بریدونو تازه څپه پای ته رسېدلې

   د امریکا پوځ مرکزي قومندانۍ سېنټکام د یکشنبې او دوشنبې ترمنځ پر شپه ایران کې د هوايي بریدونو د پیلېدو له اعلان شاوخوا ۵ ساعته وروسته ویلي، چې د یرغلیزو بریدونو دا څپه اوس پای ته رسېدلې ده.

   سېنټکام ادعا کړې چې په دغو بریدونو کې یې د دې لپاره په ایران کې لسګونه اهداف په نښه کړي،‌ چې د دوی په وینا هرمز تنګي‌ کې یې پر سوداګریزو کښتیو د بریدونو وړتیا کمزورې کړي.

   د امریکا پوځ ادعا کړې چې په دغو تازه بریدونو کې یې د ایران د هوايي دفاع سیستمونه، د ساحلي رادار سایټونه، د توغندیو او ډرونونو وړتیاوې او همدا راز کوچنۍ پوځي بېړۍ هدف ګرځولې ‌دي.

   د سېنټکام اعلامیه کې راغلي چې "هرمز تنګی د نړیوالې سوداګرۍ لپاره یوه مهمه سمندري لار ده او ایران پرې کنټرول نه لري."

   د امریکا پوځ مرکزي قومندانۍ پر دې هم ټینګار کړی، چې امریکايي ځواکونه سیمه کې د بشپړ چمتووالي‌ په حال کې دي چې سوداګریزې بېړۍ د دوی په وینا د ایران "له یرغلیزو ګامونو، ځورونې، ګواښونو او خپلسره اعلامیو" خوندي وساتل شي.

3. ۲۲ چنګاښ ۱۴۰۵ - ۱۳ جولای ۲۰۲۶وروستی, د سیمې هېوادونو ته د تهران ګواښ: د ایران خلاف پوځي تېري کې همکاري مو موږ لپاره مشروع هدف ګرځوي

   

   د عکس سرچینه، Reuters

   د ایران بهرنیو چارو وزارت په یوه تازه بیان کې د فارس خلیج هېوادونو ته ګواښ کړی چې که "د ایران پر وړاندې پوځي یرغل" کې همکاري وکړي، نو د ایران وسله‌والو ځواکونو لپاره به مشروع هدف وګرځي.

   دغه اعلامیه پر ایران د امریکا د تازه بریدونو په غبرګون کې خپره شوې ده.

   په بیان کې راغلي، په داسې حال کې چې د جګړې د‌ پای ته رسېدو هوکړې پر لاسلیکېدو یوازې ۲۵ ورځې اوړي، "د امریکا رژیم د دغه تړون له نږدې ټولو اجزاوو په ښکاره سر غړولی" او د ایران د مالونو د لېږد رالېږد پر زېربناوو، د کب نیونې پر بېړیو، پر کوچنیو باري کښتیو او د هواپېژندنې په ودانیو او تاسیساتو بریدونو سره یې "تر ټولو ناوړه جنګي جنایتونه" ترسره کړي دي.

   د ایران بهرنیو چارو وزارت ټینګار کړی چې ګاونډي هېوادونه د نړیوالو حقوقو له مخې دنده لري چې "د یرغلګرو خواو له اړخه د ایران خلاف پوځي تېري لپاره د دوی د قلمرو او امکاناتو د کارېدو" مخه ونیسي.

   په بیان کې زیاته شوې چې "د ایران پر واندې د بریدونو منشا او مبدا به د ایران اسلامي جمهوریت د زړورو وسله‌والو ځواکونو د دفاعي ګوزارونو مشروع هدف واوسي."

4. ۲۲ چنګاښ ۱۴۰۵ - ۱۳ جولای ۲۰۲۶وروستی, ایراني چارواکي: د خوزستان په اهواز، بهبهان، دزفول، امیدیه، ماهشهر، ابادان او شادګان کې بریدونه شوي

   

   د عکس سرچینه، Reuters

   د ایران په سویل کې د خوزستان سیمه‌ییزو چارواکو د دغه ولایت په څو ښارونو کې د امریکا د بریدونو خبر ورکړی دی.

   د ایران دولتي خبري اژانسونو د ځايي چارواکو په حواله ویلي، چې دوشنبه سهار وختي د اهواز ښار په شاوخوا کې دوه سیمې په نښه شوې.

   دوی همدا راز په بهبهان او دزفول او ورپسې په امیدیه او ماهشهر ولسوالیو کې هم د بریدونو خبر ورکړی دی.

   هممهاله فارس خبري‌ اژانس د خوزستان د چارواکو په حواله لیکلي چې په ابادان او شادګان کې هم پر څو ځایونو هوايي بریدونه شوي.

   خو د خوزستان د والي مرستیال دا رد کړې چې په خمیر بندر باندې هم برید شوی یا هلته د چاودنې غږ اورېدل شوی دی.

5. ۲۲ چنګاښ ۱۴۰۵ - ۱۳ جولای ۲۰۲۶ګوتېرېش له امریکا او ایران غوښتي چې نښتې ودروي

   پر ایران د دغو تازه بریدونو خبر داسې مهال ورکړ شوی، چې لږ ورمخکې د ملګرو ملتونو سرمنشي انتونیو ګوتېرېش له واشنګټن او تهران غوښتي وو چې تازه نښتې ودروي او د جګړې پای ته رسېدو لپاره بېرته خبرې پیل کړي.

   ښاغلي ګوتېرېش مشخصآ پر ایران د امریکا بریدونو او همدا راز د ایران لخوا په فارس خلیج او هرمز تنګي کې پر کښتیو او پوځي اډو بریدونو ته اشاره کړې ده.

   د هغه ویاند سټیفن دوجارېک یوه بیان کې ویلي: "دا بریدونه باید ودرول شي."

6. ۲۲ چنګاښ ۱۴۰۵ - ۱۳ جولای ۲۰۲۶د ایران په سیریک، بندرعباس، قشم او جاسک کې چاودنې

   په ایران کې پوځي سرچینو ته نږدې رسنیو په سیریک، بندرعباس او جاسک کې د چاودنو د غږونو د اورېدل کېدو خبر ورکړی دی.

   هممهاله د امریکا پوځ مرکزي قومندانۍ (سېنټکام) اعلان کړی چې په ایران کې یې تازه بریدونه کړي دي.

   د سېنټکام په اعلامیه کې ویل شوي دا بریدونو د دې لپاره کېږي چې په هرمز تنګي کې د ازاد تګ راتګ پر مهال پر سوداګریزو بېړیو او ملکي ماڼوګانو بریدونو لپاره د ایران وړتیاوې کمزوري کړي.

   د امریکا پوځ مرکزي قومندانۍ زیاته کړې چې دغه بریدونه د ولسمشر ډونلډ ټرمپ په امر ترسره کېږي.

7. ۲۱ چنګاښ ۱۴۰۵ - ۱۲ جولای ۲۰۲۶عمان د سپاه د بریدونو په غبرګون کې د ایران سفیر احضار کړ

   عمان پر خپلې خاورې د ایران د بریدونو په اعتراض کې په مسقط کې د ایران د اسلامي جمهوریت سفیر، موسی فرهنګ، احضار کړی دی.

   د عمان د بهرنیو چارو وزارت په یوه خبرپاڼه کې ویلي چې د ''مسندم او باطنه ولایتونو پر ضد د بې‌پیلوټه الوتکو د برید'' له امله د اعتراض رسمي یادښت د ایران سفیر ته سپارل شوی دی.

   د خبرپاڼې له مخې، عمان د دغو ''غیرمسؤلانه اقداماتو'' په اړه خپله ''ناخوښي او اندېښنه'' د ایران سفیر ته څرګنده کړې او ټینګار یې کړی چې باید د هېوادونو ملي حاکمیت، ښه ګاونډیتوب، په کورنیو چارو کې نه لاسوهنه، او د دواړو ګاونډیو هېوادونو او ملتونو ترمنځ اخلاقي ارزښتونو او دودونو ته درناوی وشي.

   عمان تر دې وړاندې هم پر خپلې خاورې د ایران بریدونه غندلي وو.

   د ایران سپاه پاسداران او پوځ ویلي چې د امریکا د بریدونو په غبرګون کې یې په قطر، کویت، بحرین، عمان او اردن کې د امریکا پوځي اډې په نښه کړې دي.

8. ۲۱ چنګاښ ۱۴۰۵ - ۱۲ جولای ۲۰۲۶د عراق لومړی وزیر واشنګټن ته په رسمي سفر ځي

   د عراق حکومت ویاند، حیدر عبودي په یوه خبري غونډه کې وویل، لومړی وزیر علي زیدي د یوې رسمي بلنې په ترڅ کې سبا د لوړپوړي پلاوي په مشرۍ واشنګټن ته سفر کوي.

   هغه وویل، ټاکل شوې ده د دې سفر پر مهال عراق او امریکا د نفتو او ګازو په سکټور کې څو د تفاهم یادداشتونه لاسلیک کړي.

   عراق هڅه کوي چې امریکايي شرکتونه دې سکټور ته راجلب کړي. ویل کېږي چې دغه شرکتونه کولای شي د عراق د نفتو د تولید د ظرفیت په زیاتولو کې مرسته وکړي.

   بلخوا، د عراق لومړي وزیر په ځانګړي ډول د نفتو په صنعت کې د مالي فساد پر ضد پراخ کمپاین پیل کړی او لسګونه دولتي چارواکي یې نیولي دي.

9. ۲۱ چنګاښ ۱۴۰۵ - ۱۲ جولای ۲۰۲۶قطر د ایران بریدونه وغندل

   قطر چارواکو پر خپله خاوره او ګاونډیو هېوادونو د ایران بریدونه ''د تاوتریخوالي خطرناک زیاتوالی'' بللی او غندلی یې دی.

   د قطر بهرنیو چارو وزارت په یوه اعلامیه کې د اردن، متحده عرب اماراتو، بحرین، عمان او کویت نومونه د هغو هېوادونو په توګه یاد شوي، چې بریدونه پرې شوي دي. په اعلامیه کې ویل شوي:

   ''قطر په خورا سخته سره د ایران اسلامي جمهوریت بریدونه غندي.''

   که څه هم قطر د متحده عربي اماراتو نوم هم یاد کړی، خو د ایران د پوځ او سپاه پاسداران ځواک په اعلامیو کې پر اماراتو د برید یادونه نه وه شوې.

   د اماراتو د دفاع وزارت هم په یوه خبرپاڼه کې ویلي چې ''هغه توغندیز ګواښونه چې نن سهار پېژندل شوي، د هېواد له پولو بهر وو.''

   عمان هم پر خپلې خاورې د ایران بریدونه غندلي دي.

   د ایران سپاه پاسداران او پوځ ویلي چې د امریکا د بریدونو په غبرګون کې یې په قطر، کویت، بحرین، عمان او اردن کې د امریکا پوځي اډې په نښه کړې دي.

10. ۲۱ چنګاښ ۱۴۰۵ - ۱۲ جولای ۲۰۲۶عمان ساحل ته نژدې پر یوه بېړۍ له برید وروسته هند وايي، یو کس یې بې درکه دی

    د هند بهرنیو چارو وزارت وايي، د عمان ساحل ته نژدې د یکشنبې ورځې په لومړیو کې پر یوې بېړۍ (جي ایف ګلکسي) له برید وروسته یو هندی وګړی تری تم دی.

    یاد وزارت دا پېښه غندلې او په اعلامیه کې زیاتوي: ''په بېړیو کې د ټولټال ۱۱ هندي وګړو له ډلې تر اوسه پورې ۱۰ کسان ژغورل شوي دي او یو هندی وګړی لا هم بې درکه دی.''

    د هند بهرنیو چارو وزارت دغه راز ویلي، چې په عمان کې د دوی سفارت چارواکي له عماني چارواکو سره په همکارۍ د ژغورنې عملیاتو هڅې کوي.

    له دې څو ساعته مخکې د ایران سپاه پاسداران ځواک ویلي و، چې هغه یوه بېړۍ چې ''له غیر قانوني لارې یې سفر کاوه، اخطارونو او یادونې ته یې توجه نه کوله، د خبرداري ډزو هدف شوه او له حرکته وغورځېده.''

11. ۲۱ چنګاښ ۱۴۰۵ - ۱۲ جولای ۲۰۲۶بقائي مسقط ته د عراقچي د سفر په اړه وايي: ایران او عمان د هرمز تنګي کې د تګ راتګ مدیریت په اړه بحث وکړ

    د ايران د بهرنيو چارو وزارت وياند اسماعيل بقايي د عباس عراقچي او د عماني چارواکو ترمنځ د پرونيو خبرو په اړه وويل چې د دې خبرو موخه په هرمز تنګي کې د دواړو هېوادونو ترمنځ د دې مهمې سمندري لارې په اوږدو کې بېړیو تګ راتګ د څرنګوالي په اړه همغږي رامنځته کول وو.

    هغه دې ته په اشارې سره چې د دواړو هېوادونو حقوقي او تخنيکي پلاویو هم په دې مذاکراتو کې ګډون کړی و، وويل، ''هرمز تنګي کې د بېړۍ چلونې د امنيت او خونديتوب د تامين، د دواړو ساحلي هېوادونو د حاکميتي حقونو او نړيوالو قوانينو د درناوي، او دغه راز د اسلام‌ اباد د تفاهم‌ ليک د پنځم بند د احکامو په پام کې نيولو سره، بحث او د نظرونو تبادله وشوه.''

    ښاغلي بقايي دغه راز وويل، ايران اعلان کړی چې د هرمز تنګي د تګ راتګ د مديريت لپاره د نويو ترتيباتو جوړول بايد د دواړو ساحلي هېوادونو ترمنځ د مشورو په چوکاټ کې او د تېرو څو مياشتو د تحولاتو، په ځانګړي ډول د جګړې او د دې سمندري لارې پر بېړۍ چلوونه د هغې د امنيتي اغېزو په پام کې نيولو سره، ترسره شي.

12. ۲۱ چنګاښ ۱۴۰۵ - ۱۲ جولای ۲۰۲۶سېنټکام‌: ایران کې مو شاوخوا ۱۴۰ پوځي اهداف په نښه کړي

    د امریکا پوځ مرکزي قومندانۍ اعلان کړی چې پر ایران یې تازه بریدونو کې شاوخوا ۱۴۰ پوځي اهداف په نښه کړي دي.

    د سېنټکام اعلامیه کې راغلي چې دغه بریدونه په وچه او اوبو کې د ځای پر ځای جنګي الوتکو، ډرونونو او کښتیو په مټ ترسره او دا چې د ایران د توغندیو او ډرونونو سایټونه، سمندري وړتیاوې، د مهماتو زېرمې او د ساحلي سیمو د څار او اړیکو شبکې پکې په نښه شوي دي.

    د امریکا پوځ وايي، د یوې اوونۍ په لړ کې د بریدونو په دغو درېیو جوپو کې یې، چې د ولسمشر ډونلډ ټرمپ په امر هرمز تنګي کې پر کښتیو د ایران د بریدونو د وړتیاو کمولو په موخه شوې، تر ۳۰۰ ډېر اهداف په نښه کړي.

    د سېنټکام اعلامېه کې راغلي چې د هرمز تګي له لارې د سوداګریزو کښتیو تګ راتګ دوام لري او دا چې د دوی ځواکونو د می میاشتې له لومړیو راهیسې له دې سمندري لارې له ۸۰۰ د زیاتو سوداګریزو بېړیو او ۴۰۰ میلیون بېرله اومه تېلو په تېرېدو کې مرسته کړې ده.

13. ۲۱ چنګاښ ۱۴۰۵ - ۱۲ جولای ۲۰۲۶سپاه پاسداران: اردن او عمان کې مو د امریکا پر پوځي اډو بریدونه کړي

    د ایران سپاه پاسداران وايي، هوايي ځواکونو یې د "د امریکا د تېري" د ځوابولو په درېیم پړاو کې د عمان په دُقم بندر کې د امریکا د سمندري ځواکونو اړوند د جنګي کښتیو د تېلو او لوجستیکي ملاتړ مرکزونه په نښه کړي دي.

    سپاه پاسداران همدا راز زیاته کړې چې د اردن په پرنس حسن هوايي اډه کې یې هم مهم پوځي تاسیسات او زېربناوې د بالیستیک توغندیو هدف ګرځولي دي.

14. ۲۱ چنګاښ ۱۴۰۵ - ۱۲ جولای ۲۰۲۶وروستی, سپاه پاسداران وايي په قطر، عمان، اردن کې یې هم پر امریکايي اهدافو بریدونه کړي

    سپاه پاسداران ځواکونه وايي، د ایران په څو سویلي ښارونو کې یې د امریکا د تېرې شپې د بریدونو په ځواب کې په هرمز تنګي کې یوه بله کښتۍ هم په نښه کړې او له حرکت غورځولې ده.

    په دې تړاو خپاره شوي بیان کې راغلي: "د بل مثله مقابلې دویم پړاو کې په قطر کې د امریکا العدید هوايي اډه د بالیستیک توغندیو هدف وګرځېده چې د جنګي الوتکو د ترمیم او ساتنې مرکز او همدارنګه د دې اډې د قوماندې او کنټرول مرکز یې ویجاړ کړي دي."

15. ۲۱ چنګاښ ۱۴۰۵ - ۱۲ جولای ۲۰۲۶وروستی, د ایران پوځ: کویت او بحرین کې مو د امریکا پوځي اډې او تجهیزات په نښه کړي

    د ایران د پوځ د عامه اړیکو څانګې اعلان کړی چې د امریکا د تېرې شپې د بریدونو په ځواب کې یې د چاودېدونکو ډرونونو په مټ "کویت کې د امریکا پوځ یو پاټریوټ دفاعي سیستم، د مهماتو یو زېرمتون او د رادار یو سایټ" هدف ګرځولي دي.

    د ایران پوځ زیاته کړې چې په بحرین کې یې هم د ډرون بریدونو په تازه څپه کې د امریکا اړوند د اړیکو سیستم او د رادار یو سایټ په نښه کړي دي.

    په دې تړاو خپاره شوي بیان کې ګواښ شوی چې که امریکا پر ایران خپلو بریدونو ته دوام ورکړي، نو تر دې لا سخت ځواب به وګوري.

    کویت، بحرین او امریکا تر اوسه د ایران د دغو ادعاو په اړه څه نه دي ویلي.

16. ۲۱ چنګاښ ۱۴۰۵ - ۱۲ جولای ۲۰۲۶وروستی, له قطر، بحرین او اماراتو د ایران د توغندیو او ډرونونو د مقابلې خبر ورکړ شوی

    د متحدو عرب اماراتو دفاع وزارت اعلان کړی چې د هوايي دفاع سیستمونه یې د ایراني توغندیو او ډرونونو په مقابله بوخت دي.

    تر اوسه مالومه نه ده چې دغو بریدونو مرګژوبله او زیان هم اړولی که څنګه.

    د قطر له پلازمېنې دوحې هم د چاودنو غږونو د اورېدل کېدو رپوټونه ورکړل شوي دي.

    د فرانسې خبري اژانس وايي، دغلته هم د هوايي دفاع سیستمونه فعال شوي او د توغندیو مقابله کوي.

    د دوحې اوسېدونکو ته په استول شویو پیغامونو کې سپارښتنه شوې چې په کورونو او خوندي ځایونو کې پاتې شي.

    هممهاله په بحرین کې هم د هوايي بریدونو د خطر زنګ وهل شوی دی.

    دغه هېواد کې خلکو ته ویل شوي چې وارخطا نه شي او نږدې خوندي ودانیو ته پناه یوسي.

    ایران دغه بریدونه تر هغې وروسته کوي چې د امریکا د پوځ مرکزي قوماندانۍ (سېنټکام) اعلان وکړ چې هرمز تنګي کې یې پر یوې بېړۍ له برید وروسته په ایران کې ځوابي‌ بریدونه کړي دي.

17. ۲۱ چنګاښ ۱۴۰۵ - ۱۲ جولای ۲۰۲۶وروستی, د امریکا بریدونو کې کوم اهداف په نښه شوي؟

    ایرانۍ رسنۍ وايي د امریکا پوځ په تازه بریدونو کې په بندر عباس، سیریک، جاسک، چابهار، کنګان، دیر او عسلویه بندرونو کې ځینې اهداف په نښه شوي دي.

    د ایران صداوسیما خبري اژانس د خوزستان سویل کې په شاه‌عبدالله کلي او د بوشهر دیلم ولسوالۍ کې هم د چاودنو د اورېدل کېدو خبر ورکړی، خو وايي مرګ‌ژوبله یې نه ده اړولې.

    بوشهر کې یوه چارواکي ویلي، د دغه ولایت له عسلویه هم تر اوسه د تلفاتو رپوټ نه دی ترلاسه شوی.

    صداوسیما په بندرعباس، سیریک او جاسک کې هم وضعیت ارام بللی دی.

    په خوزستان کې چارواکو ویلي، چې په هندیجان، ماهشهر او ابادان کې بریدونه شوي خو دقیق جزییات یې لا نشته.

18. ۲۱ چنګاښ ۱۴۰۵ - ۱۲ جولای ۲۰۲۶سپاه پاسداران: هرمز تنګی تړل شوی

    

    د عکس سرچینه، Getty Images

    د ایران د سپاه پاسداران سمندري ځواکونو اعلان کړی چې هرمز تنګی یې تړلی او دا چې کښتۍ د دوی "تر بلې اطلاع او د امریکا د مداخلو تر پای ته رسېدو پورې" له دې لارې د تېرېدو اجازه نه لري.

    په دې تړاو خپاره شوي بیان کې ویل شوي، چې څو کښتیو "د پردیو په لمسون" هڅه وکړه چې هرمز تنګي کې له هغه مسیره تېرې شي، چې دوی یې غیر قانوني ګڼي. سپاه پاسداران ویلي، دغو کښتیو د خپل لوري بدلون لپاره د دوی د خبرداريو پروا ونه ساتله.

    ایراني ځواکونو زیاته کړې، یوه کښتۍ چې د څارنې سیستم یې بند او د دوی په وینا په دې توګه سمندري امنیت له خطر سره مخامخ کړی و، د "خبرداري ډزو" سره ودرول شوه.

    سپاه سداران په خپله اعلامیه کې دا ګواښ هم کړی و چې که امریکا او متحدان یې دا پېښه د بل پوځي اقدام لپاره پلمه کړي، نو "سخت ځواب" به وګوري او په سیمه کې به نورې پوځي اډې هدف وګرځول شي.

    ایراني ځواکونو ویلي و، چې د هر ډول احتمالي مداخلې د ناوړه پایلو پړه به د امریکا، اسرائيل او هغو هېوادونو پر غاړه وي، چې امریکا ته یې پوځي اډې په واک کې ورکړې دي.

19. ۲۱ چنګاښ ۱۴۰۵ - ۱۲ جولای ۲۰۲۶پیت هګسېټ: ایران بد انتخاب کړی، اوس یې تاوان پرې کوي

    د امریکا متحدو ایالتونو دفاع وزیر پیت هګسېټ پر اېکس خواله رسنۍ پر ایران د درېیم پړاو بریدونو په تړاو د سېنټکام د علامیې له شریکولو سره ویلي، "ایران بد انتخاب کړی، اوس یې بیه پرې کوي."

    سېنټکام خپله اعلامیه کې لیکلي، چې پر ایران یې له دې کبله یوه اوونۍ کې درېیم پړاو بریدونه پیل کړل، چې هرمز تنګي کې یې پر یوې سوداګریزه کښتۍ برید کړی و.

    هممهاله د ایران سپاه پاسداران اعلان کړی، چې هرمز تنګی به "تر بلې اطلاع او د امریکا د مداخلو تر پای ته رسېدو" پورې تړلی وي.

    سپاه پاسداران زیاته کړې، چې هېڅ کښتۍ له دې لارې د تېرېدو اجازه نه لري.

20. ۲۱ چنګاښ ۱۴۰۵ - ۱۲ جولای ۲۰۲۶وروستی, سېنټکام وايي پر ایران یې درېیم پړاو بریدونه پیل کړي

    د امریکا د پوځ مرکزي قومنداني سېنټکام ووايي، هوايي ځواکونو یې روانه اوونۍ کې پر ایران د بریدونو درېیمه جوپه پیل کړې ده.

    د سېنټکام اعلامیه کې راغلي، چې دغه بریدونه یې د ایران د سپاه پاسداران لخوا په هرمز تنګي کې پر یوې قبرسۍ کښتۍ "جي‌اېف‌اېس ګلکسي" د برید په ځواب کې کړي.

    د سېنټکام په وینا د ایران له برید وروسته د دې کښتۍ د عملې یو ملکي غړی بې‌درکه شوی او دا چې کښتۍ اور اخیستی، له حرکت پاتې ده.

    د سېنټکام بیانیه کې راغلي چې ایران پر سوداګریزو کښتیو له مخکینیو بریدونو وروسته د دې فرصت درلود چې د اوربند هوکړې ته ژمن پاتې شي، خو بیا یې سرغړونه وکړه.

    سېنټکام ویلي، امریکا هڅه کوي هرمز تنګي پر سوداګریزو کښتیو او ملکي ماڼوګانو د ایران د بریدونو وړتیا راکمه کړي.

    دغه بریدونه د امریکا د ولسمشر ډونلډ ټرمپ په امر ترسره کېږي.