லமின் யமால் ஜாம்பவானாக மாறுவாரா? இறுதிப்போட்டி சொல்லப்போகும் பதில்

ஸ்பெயின் உலகக் கோப்பையை வெல்லுமா என்று கேட்டபோது, லமின் யமால் புன்னகைத்தபடியே "ஆம்" என்று பதிலளித்தார்.

உலகக் கோப்பை தொடங்குவதற்கு முன் அமெரிக்க ஒளிபரப்பாளரான சிபிஎஸ்க்கு அவர் அளித்த இந்த பதில், அவரை உலகின் சிறந்த இளம் வீரர்களில் ஒருவராக உருவெடுத்ததைப் பார்த்தவர்களுக்கு ஆச்சரியமாக இருக்கவில்லை.

ஆனால் பலரின் பார்வையில், அந்தக் கணிப்பு நனவாக வேண்டுமெனில், தனது முதல் உலகக் கோப்பை தொடரிலேயே லமின் யமால் அதிரடியான தாக்கத்தை ஏற்படுத்த வேண்டியிருந்தது.

இதுவரை அப்படி நடக்கவில்லை.

19 வயதான அவர், இந்தத் தொடரில் ஒரு கோல் மட்டுமே அடித்துள்ளார். ஒரு அசிஸ்ட்கூட வழங்கவில்லை. இருந்தபோதிலும், ஸ்பெயின் அணி எளிதாக இறுதிப்போட்டிக்கு முன்னேறி, ஞாயிற்றுக்கிழமை அர்ஜென்டினாவை எதிர்கொள்ள உள்ளது.

லியோனல் மெஸ்ஸி, கிலியன் எம்பாப்பே, ஹாரி கேன், ஜூட் பெல்லிங்ஹாம், எர்லிங் ஹாலண்ட் போன்ற நட்சத்திர வீரர்கள் இந்த உலகக் கோப்பையில் முக்கிய பங்காற்றியுள்ள நிலையில், லமின் யமாலின் பங்களிப்பு எதிர்பார்த்த அளவுக்கு கவனத்தை ஈர்க்கவில்லை.

ஆனால், இறுதிப்போட்டியே அவரது தருணமாக அமையுமா?

ஸ்பெயினுக்காக லமின் யமால் பதிவு செய்துள்ள புள்ளிவிவரங்கள் அசாதாரணமானவை. ஸ்பெயின் அணிக்காக லமின் யமால் களமிறங்கிய 27 தொடர் ஆட்டங்களிலும் அந்த அணி தோல்வியடைந்ததில்லை. போட்டி தொடங்கும்போதே முதல் 11 வீரர்களில் ஒருவராக அவர் களமிறங்கிய 12 போட்டிகளிலும் அணி வெற்றி பெற்றுள்ளது.

ஞாயிற்றுக்கிழமை நியூயார்க்கில் நடைபெறும் இறுதிப்போட்டியில் அவர் கோல் அடித்தால், உலகக் கோப்பை இறுதிப்போட்டியில் கோல் அடித்த மூன்றாவது பதின்ம வயது வீரர் என்ற பெருமையைப் பெறுவார். இதற்கு முன் 1950-இல் பீலேவும், 2018-இல் கிலியன் எம்பாப்பேவும் மட்டுமே இந்தச் சாதனையை நிகழ்த்தியுள்ளனர்.

ஸ்பெயின் கோப்பையை வென்றால், உலகக் கோப்பை இறுதிப்போட்டியில் போட்டி ஆரம்பிக்கும்போத முதல் 11 வீரர்களில் ஒருவராக களமிறங்கி கோப்பையை வென்ற நான்காவது பதின்ம வயது வீரராக லமின் யமால் மாறுவார். இதற்கு முன் பீலே, எம்பாப்பே மற்றும் 1982-இல் இத்தாலியின் ஜூசெப்பே பெர்கோமி ஆகியோர் மட்டுமே இந்தச் சாதனையை படைத்துள்ளனர்.

அவரது 19 வயது அணித்தோழர் பாவ் குபார்சியும் ஐந்தாவது வீரராக மாறலாம்.

"லமின் யமால் நிறைய கோல்கள் அடித்தாரா, நிறைய வாய்ப்புகளை உருவாக்கினாரா என்பதை யாரும் நினைவில் வைத்துக்கொள்ள மாட்டார்கள்," என்று ஒரு ஸ்பெயின் ரசிகர் கூறினார்.

"அவர் ஸ்பெயினுடன் உலகக் கோப்பையை வென்றால், என்றென்றும் ஒரு ஜாம்பவானாக நினைவுகூரப்படுவார். நாங்கள் அர்ஜென்டினாவிடம் தோற்றுவிட்டால், அவரது முதல் உலகக் கோப்பையை யாரும் நினைவில் வைத்துக்கொள்ள மாட்டார்கள். அவருக்கு இன்னும் பல உலகக் கோப்பைகளில் விளையாடும் வாய்ப்பு கிடைக்கும். அவர் எதிர்காலத்தில் எல்லாக் காலத்திலும் சிறந்த வீரராக மாறுவார் என்று நாங்கள் நம்புகிறோம். ஆனால், உலகக் கோப்பையை வெல்லும் வாய்ப்பு எல்லா பதின்ம வயது வீரர்களுக்கும் கிடைப்பதில்லை. இது அவரது வாய்ப்பு. நாங்கள் தோற்றுவிட்டால், தனது சிறந்த ஆட்டத்தை வெளிப்படுத்த முடியவில்லை என்ற வருத்தம் அவருக்கு நிச்சயமாக இருக்கும்."

உலகக் கோப்பையில் அதிக டிரிபிள்கள்

அப்படியானால், பார்சிலோனா இளம் நட்சத்திரமான லமின் யமாலின் உலகக் கோப்பை தொடர் உண்மையிலேயே ஏமாற்றமளிப்பதாக இருந்ததா? இல்லை.

காயத்துடன் இந்தத் தொடரில் களமிறங்கிய லமின் யமால், முதல் போட்டியில் மாற்று வீரராக மட்டுமே பயன்படுத்தப்பட்டார். கோல் இன்றி முடிந்த கேப் வெர்டேக்கு எதிரான தொடக்க ஆட்டத்தில், அவர் களமிறங்கிய பிறகும் ஸ்பெயினால் எதிரணியின் தற்காப்பை உடைக்க முடியவில்லை.

அடுத்த போட்டியில் தனது முதல் முழுமையான உலகக் கோப்பை ஆட்டத்தின் 10-ஆவது நிமிடத்திலேயே கோல் அடித்தார். ஆனால் காயத்திலிருந்து முழுமையாக மீண்டு வரச் செய்வதற்காக, போட்டி ஸ்பெயின் கட்டுப்பாட்டில் இருந்த நிலையில் இடைவேளையிலேயே அவர் வெளியேற்றப்பட்டார்.

அதன்பிறகு, ஸ்பெயின் அணி எளிதாக அடுத்தடுத்த சுற்றுகளை கடந்ததுடன், பலரால் கோப்பைக்கான முன்னணி அணியாகக் கருதப்பட்ட பிரான்ஸையும் வீழ்த்தி தனது இரண்டாவது உலகக் கோப்பை இறுதிப்போட்டியை எட்டியது. அந்தப் பயணத்தில் லமின் யமால் அனைத்து போட்டிகளிலும் தொடக்க வீரராக விளையாடியுள்ளார்.

"நிச்சயமாக நான் கோல் அடிக்க விரும்புகிறேன். ஆனால் அதைப் பற்றியே நினைத்து நான் களமிறங்குவதில்லை. அணிக்கு உதவ வேண்டும் என்பதற்காகத்தான் விளையாடுகிறேன்," என்று லமின் யமால் கூறினார்.

"நாங்கள் உலகக் கோப்பையை வென்றுவிட்டால், நான் கோல் அடித்தேனா இல்லையா என்பதை யாரும் நினைவில் வைத்திருக்க மாட்டார்கள். முக்கியமானது வெற்றிதான். நான் கோல் அடிக்காவிட்டாலும் அணிக்குப் பங்களிக்க முடியும் என்பது எனக்குத் தெரியும். எனது நகர்வுகள் பல எதிரணி வீரர்களை என்னை நோக்கி ஈர்க்கின்றன. எனவே அணிக்கு உதவ முடிந்த அனைத்தையும் செய்கிறேன்," என்றார்.

அவர் இன்னும் எதிரணிக்கு அச்சுறுத்தலாகவே இருந்து வருகிறார்.

இந்த உலகக் கோப்பையில் லமின் யமால் 49 முறை டிரிபிள் முயற்சிகளை மேற்கொண்டுள்ளார். இது வேறு எந்த வீரரையும் விட குறைந்தது ஏழு முயற்சிகள் அதிகம்.

அவற்றில் 22 டிரிபிள்கள் வெற்றிகரமாக அமைந்துள்ளன. உலகக் கோப்பையில் மெஸ்ஸி (25) மட்டுமே அவரைவிட அதிக வெற்றிகரமான டிரிபிள்களை செய்துள்ளார். மற்ற எல்லா வீரர்களையும் விட லமின் யமால் குறைந்தது ஆறு டிரிபிள்கள் அதிகமாக வெற்றிகரமாக முடித்துள்ளார்.

பிரான்ஸுக்கு எதிரான அரையிறுதி வெற்றிக்கு முன்பு, ஸ்பெயின் நடுகள வீரர் ரோட்ரி, லமின் யமால் தன்னை நிரூபிக்க வேண்டும் என்ற பதற்றத்துடன் விளையாடுவதாகக் கூறினார்.

"அவர் கொஞ்சம் அமைதியாக இருக்க வேண்டும் என்று நினைக்கிறேன். சில நேரங்களில் தன்னை நிரூபிக்க வேண்டும் என்ற அவசரம் அவரிடம் இருக்கிறது. பந்துடன் இருந்தாலும் இல்லாவிட்டாலும் அவர் செய்யும் விஷயங்கள் காரணமாக எங்களுக்கு மிகவும் முக்கியமான வீரர். மேலும், அவர் மிகவும் புத்திசாலியான இளைஞர். அவருக்கு இன்னும் 19 வயதுதான். எனவே போட்டியின் சில தருணங்களில் அவரை அமைதிப்படுத்த வேண்டியுள்ளது," என்று ரோட்ரி கூறினார்.

மெஸ்ஸியின் வாரிசு யமால்?

லமின் யமாலைப் பற்றி பேசும்போது மெஸ்ஸியை குறிப்பிடாமல் இருக்க முடியாது. குறிப்பாக ஞாயிற்றுக்கிழமை நடைபெறும் உலகக் கோப்பை இறுதிப்போட்டியில் இருவரும் நேருக்கு நேர் மோதவுள்ள நிலையில் அது சாத்தியமில்லை.

ஏறக்குறைய 20 ஆண்டுகளுக்கு முன்பு இருவரும் முதன்முதலாக சந்தித்த கதை அனைவருக்கும் தெரிந்ததே. ஒரு போட்டிக்கான புகைப்படப் படப்பிடிப்பின்போது, ஐந்து மாதக் குழந்தையான லமின் யமாலுக்கு 20 வயதான மெஸ்ஸி குளிப்பாட்டும் புகைப்படம் வெளியாகி பெரும் கவனம் பெற்றது.

மெஸ்ஸியுடன் லமின் யமாலை ஒப்பிடுவது தவிர்க்க முடியாத ஒன்றாக மாறியுள்ளது. மேலும், புள்ளிவிவரங்கள் பார்க்கும்போது, உலகின் தலைசிறந்த வீரர்களில் ஒருவராகக் கருதப்படும் மெஸ்ஸியின் வாரிசாக உருவாகும் பாதையில் லமின் யமால் இருப்பது போலத் தெரிகிறது.

அவர் ஏற்கனவே சாம்பியன்ஸ் லீக் அரையிறுதியில் விளையாடியுள்ளார். ஐரோப்பிய சாம்பியன்ஷிப் பட்டத்தையும் வென்றுள்ளார். மேலும், மெஸ்ஸி கிட்டத்தட்ட 15 ஆண்டுகள் அணிந்திருந்த பார்சிலோனாவின் புகழ்பெற்ற 10-ஆம் எண் ஜெர்சியும் அவரிடம் ஒப்படைக்கப்பட்டுள்ளது.

19 வயதிலேயே லமின் யமால் பார்சிலோனாவுக்காக 151 போட்டிகளில் விளையாடியுள்ளார். அதே வயதில், 2006 ஜூன் 24 அன்று தனது 19-ஆவது பிறந்தநாளை எட்டியபோது, மெஸ்ஸி பார்சிலோனாவுக்காக வெறும் 41 முதல்தர போட்டிகளில் மட்டுமே விளையாடியிருந்தார்.

லமின் யமால் இனி ஒரு வளர்ந்து வரும் திறமையாளராக மட்டும் கருதப்படுவதில்லை. கடந்த நான்கு ஆண்டுகளாக கால்பந்து உலகில் தனது முத்திரையைப் பதித்து வரும் அவர், ஏற்கனவே ஒரு நிலையான நட்சத்திரமாக மாறியுள்ளார்.

அவரது மகத்துவத்தை நிரூபிக்க உலகக் கோப்பை வெற்றி அவசியமில்லை. ஏனெனில், மெஸ்ஸியின் முதல் உலகக் கோப்பை வெற்றி அவருக்கு 35 வயதில் தான் கிடைத்தது. இருந்தாலும், லமின் யமால் அந்தக் கோப்பையை வெல்ல விரும்புவார்.

ஆனால் ஸ்பெயின் பயிற்சியாளர் லூயிஸ் டி லா ஃபுவென்டே, மெஸ்ஸியுடனான ஒப்பீடுகளைத் தவிர்க்க முயல்கிறார்.

"அவரை மெஸ்ஸி அல்லது மரடோனாவுடன் ஒப்பிடுவது மிகப் பெரிய தவறு. அவர் இன்னும் தனது வளர்ச்சிப் பயணத்தில் இருக்கிறார்." என்று அவர் கூறினார்.

ஞாயிற்றுக்கிழமை நடைபெறும் இறுதிப்போட்டியைச் சுற்றிய பெரும்பாலான விவாதங்கள், 39 வயதில் மெஸ்ஸி தனது இரண்டாவது உலகக் கோப்பையை வெல்வாரா என்பதையே மையமாகக் கொண்டுள்ளன.

ஆனால் ஸ்பெயின் வெற்றி பெற்றால், அது வெறும் ஒரு உலகக் கோப்பை வெற்றியாக மட்டுமல்லாமல், கால்பந்தின் அடுத்த தலைமுறை நட்சத்திரமாக லமின் யமாலுக்கு பொறுப்பு மாற்றப்படும் தருணமாகவும் பார்க்கப்படலாம்.

இது பிபிசிக்காக கலெக்டிவ் நியூஸ்ரூம் வெளியீடு