TOOS, Mareykanka oo weeraro fuliyay maalintii 11aad; difaacyada cirka ee qeybo badan oo Iran ah oo la hawlgeliyay

Tebin toos ah

1. Daqiiqad ka horDegdeg: Khaalid Kaamil oo xabsiga laga siidaayay

   Wararka ka imanaya magaalada Hargeysa ee Jamhuuriyadda gooni isutaageeda ku dhawaaqday ee Somaliland ayaa sheegaya in xabsiga laga siidaayay fannaanka Khaalid Kaamil.

   Maxkamad ayaa xoriyadiisa dib u siisay Khaa,id oo todobaadyadii u dambeeyay ku xirnaa xabsi ku yaala magaalada Hargeysa.

   Ehelkiisa ayaa BBC-da u xaqiijiyay siideynta fannaanka.

   Inkastoo hay'adaha ammaanka Somaliland aysan weli si rasmi ah u shaacin sababta Khaalid loo xiray, haddana ehellada fannaanku waxay BBC-da u sheegeen in uu eersaday hees uu u qaaday magaalada Barakeysan ee Qudus.

   Somaliland ayaa ka furtay safaarad magaalada Qudus (Jerusalem) bishii lasoo dhaafay, lix bilood ka dib markii Israa'iil noqotay dalkii ugu horreeyay ee si rasmi ah u aqoonsada Somaliland inay tahay dal madax-bannaan, taas oo keentay cambaareyn ballaaran.

   Waxaa xusid mudan in BBC ay isku dayday in ay xarigga fannaankan wax ka weydiiso mas'uuliyiinta Somaliland, balse weli nooma aysan suurtogelin inaan helno.

   Heesta fannaanka loo haysto oo aan weli si rasmi ah u soo bixin, balse maqal ahaan loo geliyey baraha bulshada, ayaa waxaa loogu qareemayaa magaalada barakeysan ee Qudus, halkaas oo uu ku yaallo masaajidka Al-Aqsa oo Muslimiintu aaminsan yihiin in uu barakeysan yahay.

   Sidoo kale akhri

   Maxay tahay heesta loo xiray fannaanka Khaalid Kaamil?

2. 22 Daqiiqadood ka horLix dawo oo lagu iibiyo farmashiyeyaasha Soomaalida oo hoos u dhiga awoodda raganimada

   Daraasado kala duwan ayaa lagu ogaaday dawooyin saamayn wayn ku yeesha awoodda ragannimada, si joogto ahna loo isticmaalo.

   Liiska hoos ku xusan waa dawooyinka ay habboon tahay in ay iska ilaaliyaan ragga, si aysan hoos ugu dhicin awooddooda ragannimo.

   Nolosha gogosha waa mid ka mid ah baahiyaha ugu waawayn ee bani'aadanka, hase yeeshee mararka qaar waxaa ku yimaada caqabado.

   Sababo kala duwan ayaa keeni kara caqabadahaas, balse qaarkood waxaa mas'uul ka ah lix nooc oo daawooyin ah, sida lagu shaaciyay Wakaaladda Wararka ee ANI, oo xog gaar ah kasoo diyaarisay mowduucan.

   Xanuun-baabi'iye

   Dad badan ayaan ka labolabayn inay isticmaalaan dawooyinka xanuun-baabi'iyaha, haddii xitaa xanuunka ay dareemayaan uu yahay mid yar.

   Laakiin, maka war qabtaa in isla dawooyinkaas aad xanuunka ku baabi'inayso ay saamaynayaan awooddaada ragannimada, hoosna ay u dhigayaan?

   Xanuun-babi'iyeyaashu waxay ka hor tagaan inay samaysmaan unugyada taranka, waxayna dhaawacaan hormoonno badan oo muhiim u ah gogosha dhex marta ragga iyo dumarka.

   Daawada walwalka

   Dad badan oo ka cawda xanuunka walwalka ayaa qaata dawooyin ay kula tacaalayaan walwalka.

   Hase ahaatee, isla dawooyinkaas ayaa hoos u dhiga hammiga galmada. Dawooyinkan waxay sababi karaan in qofka uusan danayn arrimaha xiriirka jinsiga.

   Xitaa qaarkood waxay ragga u sababaan in uu dareenka ka lumo gebi ahaanba.

   Sii akhri

3. 44 Daqiiqadood ka hor"Mareykanku wali wuxuu diyaar u yahay in uu wadahadallo la galo Iran si loo xalliyoxiisadda taagan."- Rubio

   Xoghayaha Arrimaha Dibadda Mareykanka Marco Rubio ayaa sheegay Arbacadii in Mareykanku weli diyaar u yahay inuu wadaxaajood ku dhammeeyo xiisadda Iran, balse Tehran aysan dhab ka ahayn wadahadallada, iyadoo colaadda sii fidaysa ay carqaladeysay laba ka mid ah marinnada tamarta ee ugu muhiimsan dunida.

   Rubio wuxuu hadalkan ka sheegay kulan ay yeesheen wasiirrada arrimaha dibadda ee Koonfur-bari Aasiya, maalin kadib markii saddex markab oo shidaal ah oo siday saliid ceyriin oo Sacuudi Carabiya ah kuna socday Aasiya ay dib ugu laabteen Badda Cas, taas oo u muuqata inay ka dhalatay hanjabaado uga yimid Xuutiyiinta Yemen ee taageera Iran.

   Xuutiyiinta, oo gacanta ku haya xeebta ku dhow afka laga galo Badda Cas, ayaa Isniintii ku dhawaaqay xannibaad dhinaca badda ah oo ka dhan ah Sacuudi Carabiya. Tani waxay abuuri kartaa furin cusub oo dagaalka ah, kaas oo kumannaan qof ku dilay gobolka Khaliijka tan iyo markii uu billowday 28-ka Febraayo, kadib weerarro ay Mareykanka iyo Israa’iil ku qaadeen Iran.

   Iyadoo Iran horey ugu hanjabtay maraakiibta isticmaasha marin-biyoodka Hormuz ee ka baxa Khaliijka, Badda Cas ayaa noqotay waddada ugu weyn ee kale ee laga dhoofiyo malaayiin foosto oo saliid Sacuudi ah maalin kasta.

   Sarkaal sare oo reer Iran ah ayaa Reuters u sheegay Isniintii in Tehran ay heshay soo jeedin ay soo gudbiyeen dhexdhexaadiyayaal oo ku saabsan xabbad-joojin 10 maalmood ah, taas oo qayb ka ah dadaallada lagu badbaadinayo heshiiskii ku-meel-gaarka ahaa ee xabbad-joojinta ee ay Mareykanka iyo Iran kala saxiixdeen bishii Juun, kaas oo beddelay xabbad-joojintii hore ee Abriil.

   Sidoo kale akhri

   Maxay Iiraan khatar weyn ugu gelaysaa Marinka Hormuz?

   Waa maxay sababta Mojtaba Khamenei loogu arkaynin masraxa dadweynaha Iraan?

   Trump oo xaqiijiyay in Iiraan si xooggan loo duqeynayo taas oo aargoosi u ah askarta Mareykanka ee la dilay

4. 2 Saacadood ka horKharashka Mareykanka uga baxay dagaalka Iiraan

   Dagaalka uu Maraykanku kula jiro Iran ayaa ilaa hadda ku kacay qiyaastii $37.5 bilyan (£28 bilyan), taas oo ah koror ku dhow $8 bilyan marka loo eego qiyaastii hore ee la sameeyay bishii May, sida uu sheegay Xoghayaha Difaaca Maraykanka, Pete Hegseth.

   Hegseth ayaa u sheegay Guddiga Qoondada Miisaaniyadda ee Aqalka Senate-ka in ay muhiim tahay in sharci-dejiyayaashu ansixiyaan $87 bilyan oo kale oo loo qoondeeyo Wasaaradda Difaaca iyadoo $67 bilyan oo ka mid ah loo adeegsan doono hawlgallada Bariga Dhexe.

   Kulanka ayaa dhowr jeer hakad galay sababo la xiriira dibadbaxayaal ka soo horjeeday dagaalka, waxaana uu ku dhammaaday muran iyo isku dhac dhex maray xoghayaha difaaca iyo senator. Tani waxay ahayd markii ugu horreysay ee Hegseth uu ka hor muuqdo Congress-ka tan iyo markii dagaallada u dhexeeya Maraykanka iyo Iran ay dib u bilaabmeen toddobaadkii hore, kaddib markii la xaqiijiyay in saddex askari oo Maraykan ah lagu dilay gobolka.

   Aqalka Cad ayaa bishii Abriil ka codsaday Congress-ka $1.5 tiriliyan oo loogu talagalay miisaaniyadda Pentagon-ka sannadka maaliyadeed ee soo socda, taas oo kordhin lahayd kharashaadka milatari ee Maraykanka heerkii ugu sarreeyay xilligii casriga ah.

   Sidoo kale akhri

   Maxay Iiraan khatar weyn ugu gelaysaa Marinka Hormuz?

   Waa maxay sababta Mojtaba Khamenei loogu arkaynin masraxa dadweynaha Iraan?

   Trump oo xaqiijiyay in Iiraan si xooggan loo duqeynayo taas oo aargoosi u ah askarta Mareykanka ee la dilay

5. 2 Saacadood ka horBooliska Itoobiya oo xiray 17 tuhmanayaal ah oo ku eedeysan tahriibinta dadka

   Booliska dowladda Federaalka ah ee Itoobiya ayaa ku dhawaaqay in la xiray 17 qof oo lagu tilmaamay dad "dadka tahriibiya oo halis ah", kuwaas oo lagu eedeeyay inay mas'uul ka yihiin dhimashada "in ka badan 60" muhaajiriin ah iyo kufsiga "dhowr haween ah."

   Sidoo kale wuxuu shaaciyay in dadkan laga shakisan yahay, oo lagu eedeeyay inay geysteen "falal bahal nimo ah oo ka dhan ah bini'aadantinimada" oo loo gaystay qaxootiga Itoobiya ee ku sugnaa Yemen, isla markaana ay dhibbanayaasha ka qaateen "in ka badan 1 bilyan oo birr."

   Booliska Itoobiya ayaa bayaan uu shalay soo saaray ku sheegay, in kooxdan ka ganacsiga dadka uu hoggaaminayo nin lagu magacaabo "Mohammed Tahir Aden", oo sidoo kale loo yaqaan "Werdi". Waxa kale oo uu baahiyay sawirrada 17-ka nin ee la xiray, oo uu ku jiro ninkan laga tuhunsan yahay.

   Boolisku wuxuu sheegay in dadkaasi lagu soo qabtay "kormeer iyo baaritaanno xooggan" oo ay iska kaashadeen Wasaaradda Cadaaladda, Hay'adda Sirdoonka iyo Amniga Qaranka, iyo hay'ado kale oo ay khusayso.

   Bayaanka Booliska Federaalka laguma caddeyn goorta ama goobta saxda ah ee dadkaasi lagu xiray.

   Jaylan Abdi, oo ah madaxa Waaxda Warbaahinta iyo Isgaarsiinta ee Booliska Federaalka, ayaa u sheegay BBC-da in "howlgalka" lagu qabtay dadkan laga tuhunsan yahay uu "socday 15-kii maalmood ee la soo dhaafay."

   Wuxuu intaas ku daray in dadkaasi laga soo qabtay meelo kala duwan oo dalka ah, oo ay ku jiraan magaalada Addis Ababa iyo deegaanka Harari.

   Bayaanka Booliska Federaalka ayaa sidoo kale lagu sheegay in, markii la xiray tuhmanayaasha kadib, la diyaariyay gal dacwadeed ku saleysan "caddeymo markhaatiyeed iyo dukumeenti", kadibna loo gudbiyay Wasaaradda Cadaaladda.

   Kooxdan, oo uu hoggaaminayo "tahriibiyaha halista ah" Maxmed Tahir Aden, ayaa lagu eedeeyay inay dadka u tahriibin jireen Boqortooyada Sacuudi Carabiya. Muhaajiriinta ayaa la sheegay in laga soo qaadi jiray bariga Itoobiya, iyagoo sii maraya Jabuuti iyo Yemen.

   Sidoo kale waxaa lagu sheegay in muhaajiriinta laga soo ururin jiray meelo kala duwan oo Itoobiya ah iyada oo loo marayo "dillaaliin". "Tuhmanayaashu waxay maamulayeen shabakad tahriibinta dadka ah, iyagoo ku qancinayay dhibbanayaasha inay Yemen sii maraan si ay u galaan Sacuudi Carabiya, iyagoo u ballanqaadaya nolol ka wanaagsan," ayaa lagu yiri bayaanka.

   Sida uu sheegay Booliska Federaalka, muhaajiriinta Itoobiya waxay la kulmeen " falal bahal nimo ah" markii ay xadka ka gudbeen. Waxaa lagu sheegay in loo qaaday Yemen, laguna hayay bakhaarro si gaar ah loogu dhisay, halkaas oo loogu geystay tacaddiyo aad u daran oo ka dhan ah bani'aadantinimada.

   Wuxuu sheegay in falalkan ay "si sharci darro ah ugu heleen in ka badan 1 bilyan oo birr", isla markaana ay "si sharci darro ah u tahriibiyeen in ka badan 40,000 oo qof."

   "Baaritaanku wuxuu muujiyay in in ka badan 60 qof la dilay, isla markaana haween dhowr ah la kufsaday," ayuu yiri, isagoo intaas ku daray in tuhmanayaashu ay mas'uul ka yihiin dhimashada muhaajiriintaas.

   Wuxuu sidoo kale sheegay in Booliska Federaalka ay heleen muuqaalloay soo direen markhaatiyaal ku sugan Sacuudi Carabiya iyo Itoobiya" kuwaas oo la xiriira falalkaas.

   Sidoo kale akhri

   Nin dadka tahriibiya, horena maxkamadi u xukuntay oo lagu arkay UK isagoo shaqaynaya, sidee bay ku dhacday?

   Maxkamadda Sare ee Mareykanka oo Trump ka diidday sharci saameyn lahaa dad ay Soomaalidu ka mid yihiin

   Mareykanka oo amar cusub kusoo rogay qaxootiga ay Soomaalida ka mid tahay ee heysta sharciga TPS

6. 3 Saacadood ka horTrump oo ku hanjabay inuu weerari doono xarumaha nukliyeerka ee dhulka hoostiisa ah

   Maraykanka ayaa weerarro ku qaaday Iiraan habeenkii 11-aad oo xiriir ah, iyadoo Tehran ay uga digtay Maraykanka inuusan bartilmaameedsan xarumaheeda nukliyeerka.

   Taliska Dhexe ee Ciidamada Maraykanka (CENTCOM) ayaa sheegay, in mowjadan weerarrada ah loo qorsheeyay "in lagu sii wiiqo awoodda Iiraan ee ay ku halis gelin karto maraakiibta ganacsiga" ee marinka Hormuz.

   Warbaahinta dowladda Iiraan ayaa sheegtay, in nidaamyada difaaca cirka la hawlgeliyay caasimadda Tehran. Qaraxyo ayaa sidoo kale laga soo sheegay Tabriz, Chabahar, Konarak, iyo Bushehr, oo ay ku taallo warshadda keliya ee tamarta nukliyeerka ee Iiraan.

   Iiraan, oo weerarro aargoosi ah ku qaaday Maraykanka iyo xulafadiisa Bariga Dhexe, ayaa ka digtay tallaabooyin jawaab celin ah kadib markii Donald Trump uu sheegay in Maraykanku dhawaan weerari doono xarun nukliyeer oo dhulka hoostiisa ku taalla oo u dhow Natanz.

   Iiraan iyo Maraykanku waxay bishii Abriil ku heshiiyeen xabbad-joojin, balse dagaalladu waxay dib u billowdeen toddobaadkii hore iyadoo labada dal ay ku loollamayeen gacan ku haynta marinka istaraatiijiga ah ee Hormuz.

   CENTCOM ayaa sheegtay in ciidamada Maraykanku ay beegsadeen xarumaha hawlgallada milatari ee Iiraan, awooddeeda badeed, garoomada diyaaradaha, bakhaarrada lagu kaydiyo diyaaradaha aan duuliyaha lahayn (drone-yada), iyo kaabeyaasha saadka milatariga.

   Waxay sidoo kale ku eedeysay Iiraan inay saddexdii bilood ee la soo dhaafay weerartay "in ka badan 30 markab oo ganacsi" oo marayay marinka Hormuz.

   "Weerarradan aan sababta lahayn waxay halis geliyeen boqolaal badmaax oo rayid ah waxayna wiiqeen xorriyadda maraakiibtu ugu kala goosho badda," ayay CENTCOM tiri, iyadoo intaas ku dartay in marinkaasi uu weli "u furan yahay maraakiibta ganacsiga."

   Sidoo kale akhri

   Maxay Iiraan khatar weyn ugu gelaysaa Marinka Hormuz?

   Waa maxay sababta Mojtaba Khamenei loogu arkaynin masraxa dadweynaha Iraan?

   Trump oo xaqiijiyay in Iiraan si xooggan loo duqeynayo taas oo aargoosi u ah askarta Mareykanka ee la dilay

7. 3 Saacadood ka horHeshiis la sheegay inuu Mareykanka la galay Sacuudiga oo walaac laga muujiyay

   Warbaahinta Mareykanka ayaa ku waramay in maamulka Trump uu gaaray heshiis ballaaran oo ku saabsan iskaashiga tamarta nukliyeerka la galay Sacuudiga, iyadoo lagu wado in si rasmi ah loo shaaciyo dhawaan.

   Heshiiskaasi wuxuu u oggolaan karaa Sacuudiga inuu kobciyo shidaalkiisa ee loo isticmaalo hawlgelinta warshadaha tamarta nukliyeerka.

   Labada dal ayaa muddo sanado ah ka wada hadlayay iskaashiga dhinaca tamarta nukliyeerka.

   Hase yeeshee, qaar ka mid ah sharci-dejiyeyaasha Mareykanka ayaa walaac ka muujiyay in Sacuudigu mustaqbalka uga faa'iideysan karo mashruucan sidii uu u horumarin lahaa hub nukliyeer ah.

   Haddii heshiiska la meel mariyo, waxaa la filayaa inuu hagaajiyo xiriirka u dhexeeya Mareykanka iyo Sacuudiga oo ay saameeyeen xiisadaha ka dhashay dagaalka Iiraan, isla markaana uu fursado ganacsi oo waaweyn u abuuro shirkadaha Mareykanka.

   Sidoo kale akhri

   Waa maxay sababta Mojtaba Khamenei loogu arkaynin masraxa dadweynaha Iraan?

   Waa kuma Khalil al-Xayya, ninka ay Xamaas u magacowday hoggaamiyaheeda guud?

8. 5 Saacadood ka horYay hoos tagaan ciidamada PSF?

   Mar la weydiiyay cidda ay PSF hoos tagto, Cabdikhaaliq Awil wuxuu sheegay in ciidanka uu hadda ka tirsan yahay Ciidanka Xoogga Dalka Soomaaliyeed ee dowladda federaalka.

   "PSF waa ciidan federaal ah oo hoos taga Ciidanka Xoogga Dalka Soomaaliyeed," ayuu u sheegay BBC.

   Hadalkan ayaa imanaya iyadoo Puntland ay hore ugu eedeysay dowladda federaalka inay ciidamo ka diiwaangelinayso gobollada Bari, Nugaal iyo Mudug.

   BBC ayaa sidoo kale weydiisay sida ay sharci ahaan uga hawlgeli karaan deegaanno ay maamusho Puntland, balse Awil wuxuu ku dooday "in dastuurka federaalka uu dowladda dhexe siinayo mas'uuliyadda ciidamada difaaca, halka dowlad-goboleedyaduna ay leeyihiin ciidamada booliiska".

   Markii BBC ay weydiisay in PSF ay ku lug lahayd diiwaangelintaas, Awil wuu beeniyay.

   "Shaqadayadu kuma salaysna diiwaangelin ciidan. Waxaan nahay ciidan loo aasaasay la dagaallanka argagixisada, mana wadno qorista ama diiwaangelinta ciidamo," ayuu yiri isaga oo la hadlayay BBC-da.

   Sida uu sheegaya Korneel Cabdiwaaxid Maxamuud Xasan oo ahaan jiray madaxii hore ee ciidammada Daraawiishta Puntland, PSF ayaa ka tirsanaan jirtay ciidan horey la isugu oran jiray PIS oo la aasaasay xilligii Cabdullaahi Yuusuf Axmed.

   Ciidamadani markii hore waxay isugu jiri jireen milatari iyo sirdoon loogu talagalay la dagaallanka argagaixisada balse markii dambe waa la kala saaray, oo milatariga waxaa ku haray PSF, halka sirdoonkuna uu noqday mid ka baxsan.

   "Ujeeddada loo aasaasay wuxuu ahaa la dagaalanka argagixisada maadaama argagixisadu ay wakhtigaasi Sebteembar 2001-dii wixii ka dambeeyay ay argagixisadu soo xoogeysatay, taliskanna muhiim uu u ahaa Geeska Afrika, Mareykankuna ay aad u daneynayeen." ayuu yiri Korneel Cabdiwaaxid oo sharraxaya ujeeddada loo aasaasay ciidamadan.

   Ma cadda waxa xiga ee ka dhalan doona khilaafka u dhexeeya Puntland iyo PSF ee haatan, iyadoo labada dhinac ay weli si weyn ugu kala aragti duwan yihiin sababta iska horimaadka.

   Ciidamada Dowlad goboleedka Puntland iyo PSF ayaa horay iska hor imaad dhawr maalmood socday waxa uu ku dhexmaray magaalada Boosaaso sanadkii 2021-kii, kaa oo uu ka dhashay qasaare nafeed iyo mid hantiyeed.

   Sarkaal ka tirsan ciidamada PSF, Cabdikhaaliq Awil, ahna xogahaya guud ee ciidankaan ayaa BBC-da u sheegay in ciidamo ka tirsan PSF oo watay siddeed gaari ay aroornimadii Isniinta, iyagoo ku jira "hawlgal amni oo caadi ah", lagu hor istaagay deegaanka Laag oo qiyaastii 30 kiiloomitir u jira magaalada Boosaaso.

   Faahfaahin dheeraad ah

   PSF oo sheegtay inay ka tirsan tahay Ciidanka Xoogga Dalka iyo Puntland oo war kasoo saartay hawlgalkeedii Laag

9. 5 Saacadood ka horWar deg deg ah, Qaraxyo laga maqlay gobo cusub oo Iiran ah

   Kadib markii CENTCOM ay ku dhawaaqday wajigii kow iyo tobnaad ee weerarrada lagu qaaday goobo ku yaalla Iiraan muddo saacad ah subaxnimadii Arbacada, isla markaana ay sheegtay in hawlgalku dhammaaday, wakaaladaha wararka ee gudaha Iiraan ayaa soo sheegay in qaraxyo laga maqlay dhowr meelood oo cusub, oo ay ku jirto Tehran.

   Marka laga soo tago magaalooyinka koonfureed ee Iiraan oo bartilmaameed u ahaa weerarrada cirka iyo gantaallada Maraykanka toddobaadyadii la soo dhaafay, warar laga helay Tehran iyo Tabriz ayaa sheegay, in subaxnimadii Arbacada maanta ah laga maqlay qaraxyo isla markaana la hawlgeliyay difaacyada cirka.

   Sidoo kale, weerarro cirka ah ayaa laga soo sheegay gobolka Kurdistan iyo nawaaxiga magaalada Baneh.

   Mas'uuliyiinta deegaanka Abdanan ee gobolka Ilam ayaa ku dhawaaqay in waaberigii Arbacada uu dhacay weerar cirka ah, oo ka dhacay agagaarka magaalada iyo meel u dhow Dinarkoh.

   Mas'uuliyiinta gobolka Hamedan ayaa iyaguna sheegay in weerarro lagu qaaday goobo ku dhow magaalada Kabudarahang.

   Khasaare weli lama soo werin.

   Sidoo kale akhri

   Waa maxay sababta Mojtaba Khamenei loogu arkaynin masraxa dadweynaha Iraan?

   Waa kuma Khalil al-Xayya, ninka ay Xamaas u magacowday hoggaamiyaheeda guud?

10. 22 Luulyo 2026Millateriga Iiraan oo sheegay in ay soo rideen diyaarad drone ah oo Maraykanku leeyahay

    Waxay sheegeen in ay fiidnimadii Talaadada soo rideen diyaarad drone ah oo Maraykanku leeyahay.

    Sida ay baahisay wakaaladda wararka ee IRNA, millateriga Iiraan ayaa sheegay in saacaddu markay ahayd 6:30 fiidnimo waqtiga maxalliga ah ee Talaadada la ogaaday diyaarad drone oo ismiidaamin ah oo cadow leeyahay, taas oo gashay hawada gobolka Bariga Azerbaijan.

    Waxay intaas ku dareen in diyaaraddaasi ay soo rideen cutubyo ka tirsan difaaca cirka ee ka hawlgala Nidaamka Qaran ee Isku-dhafan ee Difaaca Cirka ee Iiraan.

11. 22 Luulyo 2026War deg deg ah, Xoghayaha Difaaca Maraykanka: Dagaalka Iiraan wuxuu ku kacay qiyaastii $37.5 bilyan

    Xoghayaha Difaaca Maraykanka, Pete Hegseth, ayaa ka jawaabay su'aal uu weydiiyay senatarka Dimuqraadiga ah Dick Durbin, oo ku saabsan qiyaasta kharashka uu ilaa hadda ku kacay dagaalka Iiraan.

    Hegseth ayaa sheegay in dagaalku uu ku kacay qiyaastii 37.5 bilyan oo doollar (qiyaastii £28 bilyan).

    Tiradan ayaan hore loogu shaacin saraakiisha Wasaaradda Difaaca Maraykanka.

12. 22 Luulyo 2026Wasiirka Arrimaha Dibadda ee Iiraan oo ku tilmaamay hab-dhaqanka laba diblomaasi oo Faransiis ah oo jooga Tehran mid "aan la aqbali karin"

    Wasiirka Arrimaha Dibadda ee Iiraan, Cabbaas Araghchi, ayaa ku tilmaamay hab-dhaqanka laba diblomaasi oo Faransiis ah oo ka hawlgala Tehran mid "aan la aqbali karin", wuxuuna ugu baaqay Paris inay ka hortagto falal ka hor imanaya xeerarka diblomaasiyadda.

    Sida ay werisay BBC Persian, Wasaaradda Arrimaha Dibadda ee Iiraan ayaa sheegtay in Cabbaas Araghchi uu arrintan kala hadlay dhiggiisa Faransiiska, Jean-Noël Barrot, intii lagu jiray wada-hadal taleefan oo ay yeesheen maalintii Talaadada. Labada wasiir ayaa sidoo kale ka wada hadlay arrimo laba geesood ah iyo kuwo heer gobol iyo caalami ah.

    Araghchi ayaa ka cowday hab-dhaqanka labada diblomaasi ee Faransiiska, isagoo sheegay in ficilladoodu aysan waafaqsanayn heerarka iyo habraacyada la aqoonsan yahay ee diblomaasiyadda.

13. 22 Luulyo 2026IRGC oo sheegay weerarro cusub oo lagu beegsaday nidaamyada raadaarka ee Kuwait

    Saacadihii la soo dhaafay Ciidanka Ilaalada Kacaanka Islaamiga ah ee Iiraan ayaa soo saaray bayaan cusub oo ay ku shaaciyeen mowjad cusub oo weerarro ah oo lagu bartilmaameedsaday saldhigyo iyo goobo ay Maraykanku ku leeyahay gobolka, iyagoo ku andacoonaya in ay beegsadeen dhowr nidaam oo raadaar ah oo ku yaalla Kuwait.

14. 21 Luulyo 2026Qiimaha shidaalka adduunyada oo weli cirka ku takhlan

    Isku dhacyada ka sii socda Bariga Dhexe ayaa sii kordhiyay qiimaha shidaalka ee suuqyada caalamka.

    Maanta Salaasa ahayd, qiimaha shidaalka ayaa kor u kacay qiyaastii 2%, isagoo gaadhay heerkii ugu sarreeyay muddo shan toddobaad ah.

    Qiimaha shidaalka Brent ayaa kor u kacay ku dhowaad 92 doollar halkii foosto, halka nooca WTI uu kor u dhaafay 84 doollar halkii foosto.

    Korodhka qiimaha waxaa sababay walaaca laga qabo in khilaafka Bariga Dhexe uu carqaladeeyo sahayda tamarta, taas oo ka dhalatay weerarrada is-dhaafsiga ah ee u dhexeeya Maraykanka iyo Iiraan, iyo sidoo kale hanjabaadda kooxda Xuuthiyiinta Yemen ay ku sheegeen in ay ku go'doominayaan marin-badeedka muhiimka ah.

    Hay'adda Caalamiga ah ee Tamarta (IEA) ayaa sheegtay in colaadda dib uga soo cusboonaatay Bariga Dhexe ay kordhisay walaaca laga qabo amniga sahayda tamarta, hase yeeshee suuqyadu ay weli awood u leeyihiin in ay u adkaystaan cadaadiska, sababo la xidhiidha dhowr arrimood oo is taageeraya.

15. 21 Luulyo 2026Wasaaradda Arrimaha Dibadda ee Iiraan oo uga digtay Bulgaria in ay u oggolaanin Maraykanka in uu saldhigyadeeda u adeegsado hawlgallo millitari.

    Wasaaradda Arrimaha Dibadda ee Iiraan ayaa uga warning-bixisay dalka Bulgaariya adeegsiga uu Mareykanku u adeegsanayo fariisimaha ciidan ee ku yaalla dalkaas.

    "Iskaashi kasta oo lagu taageerayo weerarrada ka dhanka ah Iiraan waxaa loo tursan doonaa qayb ka qaadasho xadgudubyada iyo dambiyada dagaal marka loo eego sharciga caalamiga ah," ayuu yiri afhayeenka Wasaaradda Arrimaha Dibadda, Ismaaciil Baqaa'i.

    Wuxuu ku tilmaamay in dhul dowladeed loo baneeyo ficillo ciidan oo ka dhan ah dalka kale inay tahay "tusaale caadiga ah oo xadgudub ah."

16. 21 Luulyo 2026Maraykanka oo hanjabaad u diray Iiraan

    Donald Trump ayaa ku hanjabay in Mareykanku uu dhowaan bartilmaameedsan karo xarun dhulka hoostiisa ah oo ay Iiraan ku leedahay Buurta Kolang. Wuxuu sheegay in uu weerarkan ku dhawaaqayo sababtoo ah wuxuu og yahay in Iiraan aanay ka hortagi karin.

    Sidoo kale, Mr. Trump wuxuu sheegay in Iiraan ay aad u danaynayso in kulan balse Maraykanku aanu xiisaynayn ilaa wada-hadalladu ay noqdaan kuwa "micno leh".

    Hadallada Trump ayaa ku soo beegmaya xilli ay soo baxayaan warar sheegaya in dhexdhexaadiyayaashu ay soo jeediyeen xabad joojin 10 maalmood ah.

    Dhanka kale, Iiraan iyo Mareykanka ayaa sii wada is-dhaafsiga duqeymaha ee gobolka, iyadoo Baxrayn iyo Urdun ay iyaguna sheegeen in ay soo rideen gantaallo ay Iiraan soo banaysay.