Askar la sheegay in ay lacag baad ka qaateen madaxa la dagaalanka musuqmaasuqa oo xabsiga la dhigay - Nigeria

Afar sarkaal oo booliska Nigeria ka tirsan, kuwaas oo lagu eedeeyay inay sameysteen bar-koontarool oo sharci-darro ah si ay lacag uga qaataan darawallada, ayaa qalad weyn sameeyay markii ay bartilmaameedsadeen qof aanay filayn: madaxa mid ka mid ah hay'adaha dalka u qaabilsan la-dagaallanka musuqmaasuqa.

Musa Aliyu, oo ah madaxa Guddiga Madaxa-bannaan ee La-dagaallanka Musuqmaasuqa iyo Dambiyada la xiriira, ayaa sheegay in la joojiyay xilli uu baabuur ku waday caasimadda Abuja maalintii Sabtida, lagu qasbayna inuu mashiinka lacagta laga qaato (ATM) kala soo baxo lacag dhan 53,000 oo Naira ($38).

Taliyaha Booliska Ahmed Sanusi ayaa raggan ku eedeeyay inay ka tageen goobihii shaqada ee rasmiga ahaa si ay u sameystaan ​​bar-koontaroolka aan fasaxa loo siin.

Hadda waxaa wajahaya tallaabooyin anshax-marin ah oo dhanka booliska ah, kuwaas oo horseedi kara in shaqada laga eryo. Waa dhacdo naadir ah in kiisaska noocan oo kale ah in ay maxkamad gaaraan.

Warbixintii Aliyu uu ka gudbiyay dhacdadaas ayaa keentay hawlgal uu taliyuhu ku tilmaamay mid ku salaysan xog sirdoon. Taasi waxay horseedday in la xiro qofkii loo haystay inuu ahaa madaxa kooxda, kadibna la xiro dadkii kale ee lagu tuhunsanaa arrinta.

Wareysi uu siiyay BBC Hausa, ayuu Aliyu ku sharraxay wixii dhacay ka dib markii lagu amray inuu gaarigiisa joojiyo waddo mashquul badan.

"Markii aan istaagay, askari boolis ah ayaa u yimid albaabka gaarigeyga. Waxaan hoos u dajiyay muraayadda daaqadda, wuxuuna igu amray inaan gaariga furo; sidaas ayaanan sameeyay."

Kadibna askarigii ayaa gaariga soo galay.

"Wuxuu markaas iga codsaday shatiga darawalnimada. Waan soo saaray, wuxuuna iga codsaday inaan u dhiibo; sidaas ayaanan sameeyay. Kadibna wuxuu sheegay inuu maxkamad ii geyn doono sababo la xiriira jebinta xeerarka taraafikada. Waxaan ku iri: 'Aan maxkamadda tagno.'"

Laakiin taa beddelkeeda, sida uu Aliyu sheegay, askarigii ayaa lacag ka dalbaday isagoo ku leh: "Waxaad tahay nin weyn; ma doonaysid in waqtigaaga la lumiyo, laakiin xitaa haddii aan maxkamad tagno, waxaa lagu ganaaxi doonaa 52,000 oo naira."

"Waxaan ka codsaday inuu i siiyo lambarka akoonkiisa bangiga si aan lacagta ugu wareejiyo, laakiin wuu diiday." Taa beddelkeeda, sida uu Aliyu sheegay, wuxuu aaday mashiinka lacagta laga qaato (ATM-ka) oo uu lacagtii ka soo saaray.

Taliyaha guud ee booliska dalka ayaa si adag u cambaareeyay dhaqanka lagu eedeeyay saraakiisha, isagoo uga digay in talisku uusan mar dambe dulqaad u yeelan doonin ku-tagri-fal awoodeed.

"Waa inaad doorataa: inaad noqoto askari boolis ah ama tuug," ayuu yiri Sanusi. "Ma noqon kartid labadaba. Haddii aad dooran weydo, ficilladaada ayaa go'aamin doona meesha aad ka tirsan tahay."

Warbixin dheeraad ah waxaa diyaarisay Badariyya Kalarawi.