ਫੀਫਾ ਵਰਲਡ ਕੱਪ: ਮੇਸੀ ਨੇ ਆਖ਼ਰੀ ਮਿੰਟਾਂ ਵਿੱਚ ਇੰਗਲੈਂਡ ਦੇ ਸੁਪਨਿਆਂ 'ਤੇ ਕਿਵੇਂ ਪਾਣੀ ਫੇਰਿਆ
ਤਸਵੀਰ ਸਰੋਤ, Getty Images
"ਅਰਜਨਟੀਨਾ, ਲਿਓ ਦੇ ਆਖ਼ਰੀ ਗੋਲ ਲਈ, ਮੈਂ ਤੈਨੂੰ ਲਗਾਤਾਰ ਦੂਜੀ ਵਾਰ ਵਿਸ਼ਵ ਚੈਂਪੀਅਨ ਬਣਦਾ ਦੇਖਣਾ ਚਾਹੁੰਦਾ ਹਾਂ।"
2026 ਦੇ ਫੀਫਾ ਵਰਲਡ ਕੱਪ ਦੌਰਾਨ ਅਰਜਨਟੀਨਾ ਦੇ ਪ੍ਰਸ਼ੰਸਕਾਂ ਦਾ ਇਹ ਗੀਤ ਹਰ ਜਗ੍ਹਾ ਅਤੇ ਹਰ ਵੇਲੇ ਗੂੰਜਦਾ ਰਿਹਾ ਹੈ। ਸਭ ਤੋਂ ਮੁਸ਼ਕਿਲ ਪਲਾਂ ਵਿੱਚ ਵੀ ਉਨ੍ਹਾਂ ਨੇ ਇਸੇ ਗੀਤ ਨਾਲ ਆਪਣੀ ਟੀਮ ਦਾ ਹੌਸਲਾ ਵਧਾਇਆ।
ਅਤੇ ਇਸ ਵਰਲਡ ਕੱਪ ਵਿੱਚ ਅਰਜਨਟੀਨਾ ਨੂੰ ਕਈ ਵਾਰ ਮੁਸ਼ਕਿਲ ਦੌਰ ਵਿੱਚੋਂ ਲੰਘਣਾ ਪਿਆ ਹੈ।
ਤਾਜ਼ਾ ਮਿਸਾਲ ਬੁੱਧਵਾਰ ਦਾ ਸੈਮੀਫਾਈਨਲ ਹੈ। ਟੀਮ 85ਵੇਂ ਮਿੰਟ ਤੱਕ 0-1 ਨਾਲ ਪਿੱਛੇ ਸੀ, ਉਸੇ ਵੇਲੇ ਐਂਜ਼ੋ ਫਰਨਾਂਦੇਜ਼ ਨੇ ਸ਼ਾਨਦਾਰ ਗੋਲ ਕਰਕੇ ਸਕੋਰ ਬਰਾਬਰ ਕਰ ਦਿੱਤਾ।
ਐਟਲਾਂਟਾ ਸਟੇਡੀਅਮ ਵਿੱਚ ਮੌਜੂਦ ਅਰਜਨਟੀਨਾ ਦੇ ਪ੍ਰਸ਼ੰਸਕਾਂ ਦਾ ਜੋਸ਼ ਦੇਖਣ ਵਾਲਾ ਸੀ।
ਉਹੀ ਜੋਸ਼ ਮੈਦਾਨ 'ਤੇ ਅਰਜਨਟੀਨਾ ਦੇ ਖਿਡਾਰੀਆਂ ਵਿੱਚ ਵੀ ਨਜ਼ਰ ਆਇਆ। ਲਗਾਤਾਰ ਹਮਲਿਆਂ ਦੇ ਦਰਮਿਆਨ 92ਵੇਂ ਮਿੰਟ (ਇੰਜਰੀ ਟਾਈਮ) ਵਿੱਚ ਲੌਤਾਰੋ ਮਾਰਟੀਨੇਜ਼ ਨੇ ਜੇਤੂ ਗੋਲ ਕਰਕੇ ਅਰਜਨਟੀਨਾ ਨੂੰ ਫਾਈਨਲ ਵਿੱਚ ਪਹੁੰਚਾ ਦਿੱਤਾ।
ਇਸ ਨਾਟਕੀ ਜਿੱਤ ਨਾਲ ਅਰਜਨਟੀਨਾ ਨੇ ਫਾਈਨਲ ਵਿੱਚ ਜਗ੍ਹਾ ਬਣਾ ਲਈ, ਜਿੱਥੇ ਅਗਲੇ ਐਤਵਾਰ ਉਸ ਦਾ ਸਾਹਮਣਾ ਸਪੇਨ ਨਾਲ ਹੋਵੇਗਾ। ਅਰਜਨਟੀਨਾ ਦੀ ਟੀਮ ਲਗਾਤਾਰ ਦੂਜੀ ਵਾਰ ਵਰਲਡ ਕੱਪ ਜਿੱਤਣ ਦੀ ਕੋਸ਼ਿਸ਼ ਕਰੇਗੀ।
ਮੈਚ ਤੋਂ ਬਾਅਦ ਕੋਚ ਲਿਓਨੇਲ ਸਕਾਲੋਨੀ ਨੇ ਕਿਹਾ, "ਅਸੀਂ ਵੱਖਰੇ ਹਾਂ। ਇਹ ਹੰਕਾਰ ਨਹੀਂ, ਦਿਲ ਦੀ ਤਾਕਤ ਹੈ। ਇਨ੍ਹਾਂ ਖਿਡਾਰੀਆਂ ਨੇ ਜੋ ਕੀਤਾ, ਉਹ ਗਜ਼ਬ ਹੈ।"
ਲਿਓਨੇਲ ਮੇਸੀ ਦੀ ਅਗਵਾਈ ਵਾਲੀ ਅਰਜਨਟੀਨਾ ਦੀ ਇਹ ਟੀਮ, ਜਿਸ ਦੇ ਕਪਤਾਨ ਹੁਣ ਤੱਕ ਅੱਠ ਗੋਲ ਕਰ ਚੁੱਕੇ ਹਨ, ਹਰ ਵਾਰ ਮੁਸ਼ਕਲ ਹਾਲਾਤਾਂ ਵਿੱਚ ਵਾਪਸੀ ਕਰਨ ਦਾ ਰਾਹ ਲੱਭਣ ਵਿੱਚ ਕਾਮਯਾਬ ਰਹੀ ਹੈ।
ਅਜਿਹੇ ਹੀ ਮੌਕਿਆਂ 'ਤੇ ਅਰਜਨਟੀਨਾ ਵਿੱਚ ਫੁੱਟਬਾਲ ਦਾ ਜਨੂੰਨ ਸਭ ਤੋਂ ਵੱਧ ਨਜ਼ਰ ਆਉਂਦਾ ਹੈ। ਨਾਲ ਹੀ ਇਹ ਵੀ ਸਪਸ਼ਟ ਹੁੰਦਾ ਹੈ ਕਿ ਬਾਕੀ 25 ਖਿਡਾਰੀ ਮੇਸੀ ਨੂੰ ਉਨ੍ਹਾਂ ਦੇ ਸੰਭਾਵੀ ਤੌਰ 'ਤੇ ਆਖ਼ਰੀ ਵਰਲਡ ਕੱਪ ਵਿੱਚ ਚੈਂਪੀਅਨ ਬਣਾਉਣ ਲਈ ਕਿਸ ਹੱਦ ਤੱਕ ਵਚਨਬੱਧ ਹਨ।
ਕਹਾਣੀ ਅਜੇ ਖ਼ਤਮ ਨਹੀਂ ਹੋਈ ਹੈ
ਤਸਵੀਰ ਸਰੋਤ, Getty Images
ਚਾਰ ਸਾਲ ਪਹਿਲਾਂ ਅਜਿਹਾ ਲੱਗ ਰਿਹਾ ਸੀ ਕਿ ਲਿਓਨੇਲ ਮੇਸੀ ਦੀ ਕਹਾਣੀ ਪੂਰੀ ਹੋ ਚੁੱਕੀ ਹੈ।
35 ਸਾਲ ਦੀ ਉਮਰ ਵਿੱਚ ਉਨ੍ਹਾਂ ਨੇ ਆਖ਼ਿਰਕਾਰ ਵਰਲਡ ਕੱਪ ਜਿੱਤ ਲਿਆ ਸੀ। ਉਨ੍ਹਾਂ ਨੇ ਉਸ ਵੇਲੇ ਕਿਹਾ ਸੀ ਕਿ ਇਹ ਟੂਰਨਾਮੈਂਟ ਵਿੱਚ ਉਨ੍ਹਾਂ ਦਾ ਆਖ਼ਰੀ ਮੈਚ ਹੋਵੇਗਾ। ਕਈ ਲੋਕਾਂ ਦੀ ਨਜ਼ਰ ਵਿੱਚ ਉਸੇ ਜਿੱਤ ਨਾਲ ਉਨ੍ਹਾਂ ਨੇ ਖੁਦ ਨੂੰ ਫੁੱਟਬਾਲ ਇਤਿਹਾਸ ਦਾ ਸਭ ਤੋਂ ਮਹਾਨ ਖਿਡਾਰੀ ਸਾਬਿਤ ਕਰ ਦਿੱਤਾ ਸੀ।
ਪਰ ਇਸ ਤੋਂ ਵੀ ਚਾਰ ਸਾਲ ਪਹਿਲਾਂ, ਜਦੋਂ ਉਨ੍ਹਾਂ ਦੀ ਉਮਰ 31 ਸਾਲ ਸੀ, ਉਦੋਂ ਬਹੁਤ ਸਾਰੇ ਲੋਕਾਂ ਨੂੰ, ਇੱਥੋਂ ਤੱਕ ਕਿ ਉਨ੍ਹਾਂ ਦੇ ਕਰੀਬੀਆਂ ਨੂੰ ਵੀ ਇਹ ਲੱਗਦਾ ਸੀ ਕਿ ਉਹ ਆਪਣਾ ਆਖ਼ਰੀ ਵਰਲਡ ਕੱਪ ਖੇਡ ਚੁੱਕੇ ਹਨ ਅਤੇ ਵਰਲਡ ਚੈਂਪੀਅਨ ਬਣੇ ਬਿਨਾਂ ਹੀ ਕਰੀਅਰ ਖ਼ਤਮ ਕਰ ਦੇਣਗੇ।
ਪਰ ਹੁਣ 39 ਸਾਲ ਦੀ ਉਮਰ ਵਿੱਚ ਮੇਸੀ ਇੱਕ ਵਾਰ ਫਿਰ ਅਰਜਨਟੀਨਾ ਨੂੰ ਲਗਾਤਾਰ ਦੂਜੇ ਵਰਲਡ ਕੱਪ ਫਾਈਨਲ ਵਿੱਚ ਪਹੁੰਚਾਉਣ ਵਾਲੇ ਸਭ ਤੋਂ ਵੱਡੇ ਨਾਇਕ ਬਣ ਕੇ ਸਾਹਮਣੇ ਆਏ ਹਨ। ਇਸ ਵਾਰ ਉਨ੍ਹਾਂ ਨੇ ਇੰਗਲੈਂਡ ਦੀਆਂ ਉਮੀਦਾਂ 'ਤੇ ਪਾਣੀ ਫੇਰ ਦਿੱਤਾ ਹੈ।
ਇੰਗਲੈਂਡ 'ਤੇ 2-1 ਦੀ ਜਿੱਤ ਵਿੱਚ ਮੇਸੀ ਨੇ ਦੋਵੇਂ ਗੋਲ ਦਾਗਣ ਵਿੱਚ ਮਦਦ ਕੀਤੀ। ਇਸ ਨਾਲ ਹੀ 2026 ਵਰਲਡ ਕੱਪ ਵਿੱਚ ਉਨ੍ਹਾਂ ਦੇ ਅੱਠ ਗੋਲ ਅਤੇ ਚਾਰ ਅਸਿਸਟ ਹੋ ਚੁੱਕੇ ਹਨ।
ਉਹ ਇਸ ਵਰਲਡ ਕੱਪ ਵਿੱਚ ਸਾਂਝੇ ਤੌਰ 'ਤੇ ਸਭ ਤੋਂ ਵੱਧ ਗੋਲ ਕਰਨ ਵਾਲੇ ਖਿਡਾਰੀ ਹਨ ਅਤੇ ਸਭ ਤੋਂ ਵੱਧ ਅਸਿਸਟ ਦੇਣ ਵਾਲੇ ਖਿਡਾਰੀਆਂ ਦੀ ਸੂਚੀ ਵਿੱਚ ਦੂਜੇ ਸਥਾਨ 'ਤੇ ਹਨ।
ਹੁਣ ਐਤਵਾਰ ਨੂੰ ਨਿਊ ਜਰਸੀ ਵਿੱਚ ਹੋਣ ਵਾਲੇ ਫਾਈਨਲ ਵਿੱਚ ਅਰਜਨਟੀਨਾ ਦਾ ਸਾਹਮਣਾ ਸਪੇਨ ਨਾਲ ਹੋਵੇਗਾ। ਸਪੇਨ ਉਹੀ ਦੇਸ਼ ਹੈ, ਜਿੱਥੇ ਮੇਸੀ ਨੇ ਬਾਰਸਿਲੋਨਾ ਲਈ ਆਪਣੇ ਕਰੀਅਰ ਦਾ ਸਭ ਤੋਂ ਵੱਡਾ ਹਿੱਸਾ ਖੇਡਿਆ।
ਅਰਜਨਟੀਨਾ ਦੇ ਕੋਚ ਲਿਓਨੇਲ ਸਕਾਲੋਨੀ ਨੇ ਕਿਹਾ, "ਉਹ ਇਤਿਹਾਸ ਦੇ ਸਭ ਤੋਂ ਮਹਾਨ ਖਿਡਾਰੀ ਹਨ। ਮੈਨੂੰ ਨਹੀਂ ਪਤਾ ਕਿ ਇਹ ਸਾਬਤ ਕਰਨ ਲਈ ਉਨ੍ਹਾਂ ਨੂੰ ਹੋਰ ਕੀ ਕਰਨਾ ਪਵੇਗਾ। ਸਪੇਨ ਦੇ ਜ਼ਿਆਦਾਤਰ ਲੋਕ ਵੀ ਉਨ੍ਹਾਂ ਨੂੰ ਪਿਆਰ ਕਰਦੇ ਹਨ।"
ਬੀਬੀਸੀ ਦੇ ਫੁੱਟਬਾਲ ਵਿਸ਼ਲੇਸ਼ਕ ਮੀਕਾ ਰਿਚਰਡਜ਼ ਨੇ ਕਿਹਾ, "ਅਰਜਨਟੀਨਾ ਕੋਲ ਲਿਓਨੇਲ ਮੇਸੀ ਹਨ। ਉਨ੍ਹਾਂ ਕੋਲ 'ਗ੍ਰੇਟੈਸਟ ਆਫ ਆਲ ਟਾਈਮ' ਹੈ। ਫੁੱਟਬਾਲ ਇਤਿਹਾਸ ਦਾ ਸਭ ਤੋਂ ਮਹਾਨ ਖਿਡਾਰੀ।"
ਉਨ੍ਹਾਂ ਕਿਹਾ, "ਅਜਿਹੇ ਮੁਕਾਬਲੇ ਖ਼ਾਸ ਪਲਾਂ ਨਾਲ ਤੈਅ ਹੁੰਦੇ ਹਨ। ਸਾਨੂੰ ਲੱਗਿਆ ਸੀ ਕਿ ਇਹ ਕੰਮ ਜੂਡ ਬੇਲਿੰਗਹੈਮ ਜਾਂ ਹੈਰੀ ਕੇਨ ਕਰਨਗੇ, ਪਰ ਇਹੀ ਕਾਰਨ ਹੈ ਕਿ ਮੇਸੀ ਅੱਜ ਵੀ ਬਾਦਸ਼ਾਹ ਹਨ।"
ਮੇਸੀ ਨੇ ਇੰਗਲੈਂਡ ਦੀਆਂ ਉਮੀਦਾਂ ਕਿਵੇਂ ਤੋੜੀਆਂ
ਤਸਵੀਰ ਸਰੋਤ, Getty Images
ਬਾਰਸਿਲੋਨਾ ਅਤੇ ਪੈਰਿਸ ਸੈਂਟ-ਜਰਮੇਨ ਦੇ ਸਾਬਕਾ ਖਿਡਾਰੀ ਮੇਸੀ ਨੇ ਆਪਣੇ ਲੰਬੇ ਕਰੀਅਰ ਵਿੱਚ ਇਸ ਤੋਂ ਪਹਿਲਾਂ ਕਦੇ ਵੀ ਇੰਗਲੈਂਡ ਖ਼ਿਲਾਫ਼ ਨਹੀਂ ਖੇਡਿਆ ਸੀ। ਹੁਣ ਇੰਗਲੈਂਡ ਦੇ ਕੋਚ ਥੋਮਸ ਟਸ਼ੇਲ ਅਤੇ ਉਨ੍ਹਾਂ ਦੇ ਪ੍ਰਸ਼ੰਸਕ ਸ਼ਾਇਦ ਇਹੀ ਚਾਹੁਣਗੇ ਕਿ ਅਜਿਹਾ ਕਦੇ ਹੋਇਆ ਹੀ ਨਾ ਹੁੰਦਾ।
ਪਹਿਲੇ ਹਾਫ ਵਿੱਚ ਮੇਸੀ ਨੇ ਵਿਚਕਾਰਲੇ ਹਿੱਸੇ ਵਿੱਚ ਖੇਡਦੇ ਹੋਏ ਆਪਣੀ ਤਕਨੀਕ ਦੀਆਂ ਕੁਝ ਝਲਕਾਂ ਦਿਖਾਈਆਂ, ਪਰ ਅਸਲ ਕਹਾਣੀ ਉਦੋਂ ਸ਼ੁਰੂ ਹੋਈ ਜਦੋਂ 55ਵੇਂ ਮਿੰਟ ਵਿੱਚ ਐਂਥਨੀ ਗੋਰਡਨ ਨੇ ਇੰਗਲੈਂਡ ਨੂੰ ਲੀਡ ਦਿਵਾਈ।
ਇਸ ਤੋਂ ਬਾਅਦ ਟੂਖੇਲ ਨੇ ਵਾਧੂ ਡਿਫੈਂਸਿਵ ਖਿਡਾਰੀ ਮੈਦਾਨ ਵਿੱਚ ਉਤਾਰ ਦਿੱਤੇ ਅਤੇ ਇੰਗਲੈਂਡ ਪਿੱਛੇ ਹਟ ਕੇ ਬਚਾਅ ਕਰਨ ਲੱਗ ਪਿਆ। ਅਗਲੇ 37 ਮਿੰਟਾਂ ਵਿੱਚ ਅਰਜਨਟੀਨਾ ਕੋਲ 88 ਫ਼ੀਸਦੀ ਗੇਂਦ 'ਤੇ ਕਬਜ਼ਾ ਰਿਹਾ।
ਇਸੇ ਦੌਰਾਨ ਮੇਸੀ ਸੱਜੇ ਵਿੰਗ 'ਤੇ ਚਲੇ ਗਏ ਅਤੇ ਉੱਥੋਂ ਹੀ ਪੂਰੇ ਮੈਚ ਦੀ ਦਿਸ਼ਾ ਬਦਲ ਦਿੱਤੀ।
ਮੈਚ ਤੋਂ ਬਾਅਦ ਗੋਲਕੀਪਰ ਐਮਿਲਿਆਨੋ ਮਾਰਟੀਨੇਜ਼ ਨੇ ਕਿਹਾ, "ਮੇਸੀ ਨੂੰ ਵਿੰਗ 'ਤੇ ਲਿਜਾਣਾ ਸਾਡੇ ਲਈ ਸਭ ਤੋਂ ਅਹਿਮ ਫ਼ੈਸਲਾ ਸਾਬਿਤ ਹੋਇਆ।"
ਮੇਸੀ ਨੇ ਇੰਗਲੈਂਡ ਦੇ ਖ਼ਿਲਾਫ਼ ਨੌਂ ਸਫ਼ਲ ਡ੍ਰਿਬਲਿੰਗ ਕੀਤੀਆਂ ਅਤੇ ਦੋ ਗੋਲਾਂ ਵਿੱਚ ਅਸਿਸਟ ਦਿੱਤਾ। 1966 ਤੋਂ ਉਪਲੱਬਧ ਅੰਕੜਿਆਂ ਅਨੁਸਾਰ, ਵਰਲਡ ਕੱਪ ਦੇ ਕਿਸੇ ਨਾਕਆਊਟ ਮੁਕਾਬਲੇ ਵਿੱਚ ਅਜਿਹਾ ਕਰਨ ਵਾਲੇ ਉਹ ਪਹਿਲੇ ਖਿਡਾਰੀ ਬਣ ਗਏ ਹਨ।
ਪੂਰੀ ਇੰਗਲੈਂਡ ਟੀਮ ਨੇ ਮਿਲ ਕੇ ਸਿਰਫ਼ ਸੱਤ ਸਫ਼ਲ ਡ੍ਰਿਬਲਿੰਗ ਕੀਤੀਆਂ।
ਮੇਸੀ ਨੇ ਵਿਰੋਧੀ ਟੀਮ ਦੇ ਪੈਨਲਟੀ ਬਾਕਸ ਵਿੱਚ ਸੱਤ ਵਾਰ ਗੇਂਦ ਨੂੰ ਛੂਹਿਆ। ਇਹ ਗਿਣਤੀ ਪੂਰੀ ਇੰਗਲੈਂਡ ਟੀਮ ਦੇ ਕੁੱਲ ਟੱਚ ਦੇ ਬਰਾਬਰ ਸੀ।
ਉਨ੍ਹਾਂ ਨੇ ਚਾਰ ਵਾਰ ਗੋਲ ਦੇ ਮੌਕੇ ਵੀ ਬਣਾਏ, ਜੋ ਇੰਗਲੈਂਡ ਦੀ ਪੂਰੀ ਟੀਮ ਦੇ ਬਰਾਬਰ ਸਨ।
ਇਸ ਤੋਂ ਇਲਾਵਾ, ਉਨ੍ਹਾਂ ਨੇ ਮੈਚ ਵਿੱਚ ਸਭ ਤੋਂ ਵੱਧ ਨੌ ਕ੍ਰਾਸ ਲਗਾਏ।
ਪਰ ਸਭ ਤੋਂ ਅਹਿਮ ਗੱਲ ਇਹ ਰਹੀ ਕਿ ਅਰਜਨਟੀਨਾ ਦੇ ਦੋਵੇਂ ਗੋਲ ਮੇਸੀ ਦੀ ਮਦਦ ਨਾਲ ਆਏ।
ਪਹਿਲਾਂ ਉਨ੍ਹਾਂ ਨੇ ਕਾਰਨਰ ਦੀ ਰਣਨੀਤੀ ਦੇ ਤਹਿਤ ਐਂਜ਼ੋ ਫਰਨਾਂਦੇਜ਼ ਨੂੰ ਪਾਸ ਦਿੱਤਾ, ਜਿਨ੍ਹਾਂ ਨੇ 85ਵੇਂ ਮਿੰਟ ਵਿੱਚ ਬਾਕਸ ਦੇ ਬਾਹਰੋਂ ਬਰਾਬਰੀ ਦਾ ਸ਼ਾਨਦਾਰ ਗੋਲ ਕੀਤਾ।
ਇਸ ਤੋਂ ਬਾਅਦ ਇੰਜਰੀ ਟਾਈਮ ਵਿੱਚ ਮੇਸੀ ਦੇ ਸ਼ਾਨਦਾਰ ਕ੍ਰਾਸ 'ਤੇ ਲੌਤਾਰੋ ਮਾਰਟੀਨੇਜ਼ ਨੇ ਹੈਡਰ ਰਾਹੀਂ ਜੇਤੂ ਗੋਲ ਕਰ ਦਿੱਤਾ।
ਸਾਬਕਾ ਇੰਗਲੈਂਡ ਡਿਫੈਂਡਰ ਮਿਕਾ ਰਿਚਰਡਜ਼ ਨੇ ਕਿਹਾ, "ਉਹ ਪੂਰੇ ਮੈਚ ਦੌਰਾਨ ਮੈਦਾਨ 'ਤੇ ਆਰਾਮ ਨਾਲ ਤੁਰਦੇ ਹੋਏ ਨਜ਼ਰ ਆਉਂਦੇ ਹਨ, ਪਰ ਜਿਵੇਂ ਹੀ ਗੇਂਦ ਉਨ੍ਹਾਂ ਦੇ ਪੈਰਾਂ ਵਿੱਚ ਆਉਂਦੀ ਹੈ, ਉਹ ਅਚਾਨਕ ਜੀਵੰਤ ਹੋ ਉੱਠਦੇ ਹਨ।"
ਉਨ੍ਹਾਂ ਕਿਹਾ, "ਇਹੀ ਉਨ੍ਹਾਂ ਦਾ ਹੁਨਰ ਹੈ ਅਤੇ ਕਈ ਵਾਰ ਉਹੀ ਮੁਕਾਬਲੇ ਦਾ ਸਭ ਤੋਂ ਵੱਡਾ ਫ਼ਰਕ ਬਣ ਜਾਂਦਾ ਹੈ।"
ਇੰਗਲੈਂਡ ਦੇ ਸਾਬਕਾ ਗੋਲਕੀਪਰ ਜੋ ਹਾਰਟ ਨੇ ਕਿਹਾ, "ਇੰਗਲੈਂਡ ਨੇ ਉਹੀ ਗ਼ਲਤੀ ਦੁਹਰਾਈ ਜੋ ਉਸ ਨੇ ਮੈਕਸੀਕੋ ਅਤੇ ਨਾਰਵੇ ਦੇ ਖ਼ਿਲਾਫ਼ ਕੀਤੀ ਸੀ। ਟੀਮ ਪੂਰੀ ਤਰ੍ਹਾਂ ਡਿਫੈਂਸਿਵ ਹੋ ਗਈ।"
ਉਨ੍ਹਾਂ ਕਿਹਾ, "ਇਸ ਦਾ ਫ਼ਾਇਦਾ ਮੇਸੀ ਨੂੰ ਮਿਲਿਆ। ਉਨ੍ਹਾਂ ਕੋਲ ਹਰ ਤਾਲੇ ਦੀ ਚਾਬੀ ਸੀ। ਆਖ਼ਰੀ 15 ਮਿੰਟਾਂ ਵਿੱਚ ਉਨ੍ਹਾਂ ਨੇ ਇਕੱਲੇ ਹੀ ਪੂਰੇ ਮੈਚ 'ਤੇ ਕਾਬੂ ਕਰ ਲਿਆ।"
ਇੰਗਲੈਂਡ ਦੇ ਕਪਤਾਨ ਹੈਰੀ ਕੇਨ ਨੇ ਕਿਹਾ, "ਮੈਚ ਦੇ ਵੱਡੇ ਹਿੱਸੇ ਵਿੱਚ ਅਸੀਂ ਉਨ੍ਹਾਂ ਨੂੰ ਚੰਗੀ ਤਰ੍ਹਾਂ ਰੋਕ ਕੇ ਰੱਖਿਆ। ਪਰ ਦੁਨੀਆ ਦੇ ਸਭ ਤੋਂ ਖ਼ਤਰਨਾਕ ਖਿਡਾਰੀਆਂ ਨਾਲ ਇਹੀ ਹੁੰਦਾ ਹੈ। ਜਿਵੇਂ ਹੀ ਉਨ੍ਹਾਂ ਦੇ ਕੋਲ ਗੇਂਦ ਆਉਂਦੀ ਹੈ, ਉਹ ਕੁਝ ਵੀ ਕਰ ਸਕਦੇ ਹਨ। ਆਖ਼ਿਰ ਉਹ ਇਤਿਹਾਸ ਦੇ ਮਹਾਨਤਮ ਖਿਡਾਰੀਆਂ ਵਿੱਚੋਂ ਇੱਕ ਹਨ।"
2016 ਵਿੱਚ ਹੀ ਮੇਸੀ ਨੇ ਸੰਨਿਆਸ ਦਾ ਐਲਾਨ ਕਰ ਦਿੱਤਾ ਸੀ
ਤਸਵੀਰ ਸਰੋਤ, Getty Images
ਇਹ ਭੁੱਲ ਜਾਣਾ ਸੌਖਾ ਹੈ ਕਿ ਸਾਲ 2016 ਵਿੱਚ ਜਦੋਂ ਲਿਓਨੇਲ ਮੇਸੀ 29 ਸਾਲ ਦੇ ਸਨ ਅਤੇ ਬਾਰਸਿਲੋਨਾ ਲਈ ਖੇਡ ਰਹੇ ਸਨ, ਉਦੋਂ ਉਨ੍ਹਾਂ ਨੇ ਅੰਤਰਰਾਸ਼ਟਰੀ ਫੁੱਟਬਾਲ ਤੋਂ ਸੰਨਿਆਸ ਲੈਣ ਦਾ ਐਲਾਨ ਕਰ ਦਿੱਤਾ ਸੀ।
ਇਸ ਤੋਂ ਪਹਿਲਾਂ ਉਹ 2014 ਵਰਲਡ ਕੱਪ ਫਾਈਨਲ ਵਿੱਚ ਜਰਮਨੀ ਤੋਂ ਹਾਰ ਚੁੱਕੇ ਸਨ ਅਤੇ ਲਗਾਤਾਰ ਤਿੰਨ ਕੋਪਾ ਅਮਰੀਕਾ ਫਾਈਨਲ ਵੀ ਗੁਆ ਚੁੱਕੇ ਸਨ।
ਪਰ ਸੰਨਿਆਸ ਦਾ ਫ਼ੈਸਲਾ ਵਾਪਸ ਲੈਣ ਤੋਂ ਬਾਅਦ ਉਨ੍ਹਾਂ ਨੇ ਅਰਜਨਟੀਨਾ ਨੂੰ ਦੋ ਵਾਰ ਕੋਪਾ ਅਮਰੀਕਾ ਦਾ ਚੈਂਪੀਅਨ ਬਣਾਇਆ।
ਸਾਲ 2022 ਵਿੱਚ, ਜਦੋਂ ਪੈਰਿਸ ਸੈਂਟ-ਜਰਮੇਨ (ਪੀਐਸਜੀ) ਦੇ ਖਿਡਾਰੀ ਵਜੋਂ ਮੇਸੀ ਨੇ ਕਤਰ ਵਿੱਚ ਵਰਲਡ ਕੱਪ ਟਰਾਫ਼ੀ ਚੁੱਕੀ, ਤਾਂ ਲੱਗਿਆ ਕਿ ਉਨ੍ਹਾਂ ਦੇ ਸ਼ਾਨਦਾਰ ਕਰੀਅਰ ਦੀ ਆਖ਼ਰੀ ਅਧੂਰੀ ਕੜੀ ਵੀ ਪੂਰੀ ਹੋ ਗਈ।
ਬਹੁਤ ਸਾਰੇ ਲੋਕਾਂ ਦਾ ਮੰਨਣਾ ਸੀ ਕਿ ਵਰਲਡ ਕੱਪ ਜਿੱਤਣਾ ਹੀ ਉਹ ਉਪਲੱਬਧੀ ਸੀ, ਜਿਸ ਦੀ ਕਮੀ ਕਾਰਨ ਪੇਲੇ ਅਤੇ ਡੀਏਗੋ ਮਾਰਾਡੋਨਾ ਵਰਗੇ ਵਿਸ਼ਵ ਜੇਤੂਆਂ ਨਾਲ ਉਨ੍ਹਾਂ ਦੀ ਤੁਲਨਾ ਅਧੂਰੀ ਮੰਨੀ ਜਾਂਦੀ ਸੀ।
2022 ਵਰਲਡ ਕੱਪ ਫਾਈਨਲ ਤੋਂ ਪਹਿਲਾਂ ਮੇਸੀ ਨੇ ਕਿਹਾ ਸੀ, "ਮੈਂ ਬਹੁਤ ਖੁਸ਼ ਹਾਂ ਕਿ ਵਰਲਡ ਕੱਪ ਵਿੱਚ ਮੇਰਾ ਸਫ਼ਰ ਫਾਈਨਲ ਤੱਕ ਪਹੁੰਚਿਆ ਅਤੇ ਆਖ਼ਰੀ ਮੈਚ ਫਾਈਨਲ ਵਿੱਚ ਖੇਡਣ ਦਾ ਮੌਕਾ ਮਿਲਿਆ। ਇਸ ਤੋਂ ਵੱਡੀ ਤਸੱਲੀ ਹੋਰ ਕੀ ਹੋ ਸਕਦੀ ਹੈ।"
ਉਨ੍ਹਾਂ ਕਿਹਾ ਸੀ, "ਅਗਲੇ ਵਰਲਡ ਕੱਪ ਤੱਕ ਕਾਫ਼ੀ ਸਮਾਂ ਹੈ। ਮੈਨੂੰ ਨਹੀਂ ਲੱਗਦਾ ਕਿ ਮੈਂ ਉੱਥੇ ਤੱਕ ਖੇਡ ਸਕਾਂਗਾ। ਇਸ ਲਈ, ਇਸ ਤਰ੍ਹਾਂ ਆਪਣੇ ਸਫ਼ਰ ਦਾ ਅੰਤ ਕਰਨਾ ਸ਼ਾਨਦਾਰ ਹੋਵੇਗਾ।"
2023 ਵਿੱਚ ਜਦੋਂ ਉਨ੍ਹਾਂ ਨੇ ਯੂਰਪ ਛੱਡ ਕੇ ਮੇਜਰ ਲੀਗ ਸਾਕਰ (ਐਮਐਲਐਸ) ਦੀ ਟੀਮ ਇੰਟਰ ਮਿਆਮੀ ਦਾ ਰੁਖ਼ ਕੀਤਾ, ਤਾਂ ਲੱਗਿਆ ਕਿ ਹੁਣ ਉਹ ਆਪਣੇ ਕਰੀਅਰ ਦੇ ਆਖ਼ਰੀ ਦੌਰ ਵਿੱਚ ਹਨ।
ਪਿਛਲੇ ਸਾਲ ਫੀਫਾ ਕਲੱਬ ਵਰਲਡ ਕੱਪ ਵਿੱਚ ਖੇਡਣ ਦੇ ਬਾਵਜੂਦ ਇਹ ਬਿਲਕੁਲ ਤੈਅ ਨਹੀਂ ਸੀ ਕਿ ਉਹ ਇਸ ਸਾਲ ਵਰਲਡ ਕੱਪ ਵਿੱਚ ਵੀ ਨਜ਼ਰ ਆਉਣਗੇ।
ਪਰ 39 ਸਾਲ ਦੀ ਉਮਰ ਵਿੱਚ ਵੀ ਮੇਸੀ ਦਾ ਸਫ਼ਰ ਰੁਕਦਾ ਨਹੀਂ ਦਿਖ ਰਿਹਾ, ਭਾਵੇਂ ਉਨ੍ਹਾਂ ਦੇ ਖੇਡਣ ਦਾ ਅੰਦਾਜ਼ ਪਹਿਲਾਂ ਨਾਲੋਂ ਬਦਲ ਚੁੱਕਾ ਹੋਵੇ।
ਸਪੈਨਿਸ਼ ਪੱਤਰਕਾਰ ਗੁਈਯੇਮ ਬਲਾਗੇ, ਜਿਨ੍ਹਾਂ ਨੇ ਮੇਸੀ ਦੀ ਜੀਵਨੀ ਲਿਖੀ ਹੈ, ਕਹਿੰਦੇ ਹਨ ਕਿ ਮੇਸੀ ਨੇ ਆਪਣੇ ਕਰੀਅਰ ਵਿੱਚ ਘੱਟੋ-ਘੱਟ ਪੰਜ ਵਾਰ ਆਪਣੇ ਖੇਡ ਨੂੰ ਨਵੇਂ ਤਰੀਕੇ ਨਾਲ ਢਾਲਿਆ ਹੈ।
ਇੰਟਰ ਮਿਆਮੀ ਅਤੇ ਅਰਜਨਟੀਨਾ ਲਈ ਮੇਸੀ ਹੁਣ ਲਗਾਤਾਰ 13 ਮੈਚਾਂ ਵਿੱਚ ਜਾਂ ਤਾਂ ਗੋਲ ਕਰ ਚੁੱਕੇ ਹਨ ਜਾਂ ਗੋਲ ਕਰਵਾਉਣ ਵਿੱਚ ਮਦਦ ਕਰ ਚੁੱਕੇ ਹਨ।
ਜੇਕਰ ਉਹ ਐਤਵਾਰ ਨੂੰ ਸਪੇਨ ਦੇ ਖ਼ਿਲਾਫ਼ ਫਾਈਨਲ ਵਿੱਚ ਵੀ ਕਿਸੇ ਗੋਲ ਵਿੱਚ ਯੋਗਦਾਨ ਪਾਉਂਦੇ ਹਨ, ਤਾਂ 2011 ਵਿੱਚ ਬਣਾਏ ਗਏ ਲਗਾਤਾਰ 14 ਮੈਚਾਂ ਦੇ ਆਪਣੇ ਰਿਕਾਰਡ ਦੀ ਬਰਾਬਰੀ ਕਰ ਲੈਣਗੇ।
ਇਸ ਤੋਂ ਇਲਾਵਾ, ਉਹ ਬ੍ਰਾਜ਼ੀਲ ਦੇ ਮਹਾਨ ਖਿਡਾਰੀ ਕਾਫੂ ਤੋਂ ਬਾਅਦ ਵਰਲਡ ਕੱਪ ਦੇ ਤਿੰਨ ਫਾਈਨਲ ਖੇਡਣ ਵਾਲੇ ਇਤਿਹਾਸ ਦੇ ਸਿਰਫ਼ ਦੂਜੇ ਖਿਡਾਰੀ ਬਣ ਜਾਣਗੇ।
ਕੀ ਇਹੀ ਉਨ੍ਹਾਂ ਦਾ ਆਖ਼ਰੀ ਵਰਲਡ ਕੱਪ ਮੁਕਾਬਲਾ ਹੋਵੇਗਾ? ਆਖ਼ਿਰ 2030 ਵਿੱਚ ਉਨ੍ਹਾਂ ਦੀ ਉਮਰ 43 ਸਾਲ ਹੋ ਜਾਵੇਗੀ।
ਪਰ ਸ਼ਾਇਦ ਹੁਣ ਅੱਠ ਵਾਰ ਦੇ ਬੈਲਨ ਡੀ'ਓਰ ਜੇਤੂ ਮੇਸੀ ਬਾਰੇ ਕੋਈ ਵੀ ਪੱਕਾ ਅੰਦਾਜ਼ਾ ਲਗਾਉਣਾ ਠੀਕ ਨਹੀਂ ਹੋਵੇਗਾ।
ਇਸ ਵਰਲਡ ਕੱਪ ਵਿੱਚ ਅਰਜਨਟੀਨਾ ਫੁੱਟਬਾਲ ਦੇ ਚਾਰ ਯਾਦਗਾਰ ਪਲ
ਤਸਵੀਰ ਸਰੋਤ, Getty Images
ਗਰੁੱਪ ਸਟੇਜ ਵਿੱਚ ਤਿੰਨ ਤੁਲਨਾਤਮਕ ਤੌਰ 'ਤੇ ਆਸਾਨ ਜਿੱਤਾਂ ਤੋਂ ਬਾਅਦ ਸਕਾਲੋਨੀ ਦੀ ਟੀਮ ਦੀ ਅਸਲੀ ਪਰਖ ਸ਼ੁਰੂ ਹੋਈ।
ਸਭ ਤੋਂ ਪਹਿਲਾਂ ਪ੍ਰੀ-ਕੁਆਰਟਰ ਫਾਈਨਲ ਵਿੱਚ ਇਸ ਵਰਲਡ ਕੱਪ ਦੀ ਸਭ ਤੋਂ ਵੱਡੀ ਸਰਪ੍ਰਾਈਜ਼ ਟੀਮ ਕੇਪ ਵਰਡੇ ਨਾਲ ਮੁਕਾਬਲਾ ਹੋਇਆ। ਨਿਰਧਾਰਿਤ ਸਮੇਂ ਤੱਕ ਮੈਚ 1-1 ਨਾਲ ਬਰਾਬਰੀ 'ਤੇ ਰਿਹਾ।
ਵਾਧੂ ਸਮੇਂ ਦੇ ਪਹਿਲੇ ਹਾਫ਼ ਦੀ ਸ਼ੁਰੂਆਤ ਵਿੱਚ ਲਿਸਾਂਦਰੋ ਮਾਰਟੀਨੇਜ਼ ਨੇ ਅਰਜਨਟੀਨਾ ਨੂੰ ਲੀਡ ਦਿਵਾਈ, ਪਰ ਲਗਭਗ 10 ਮਿੰਟ ਬਾਅਦ ਕੇਪ ਵਰਡੇ ਨੇ ਬਾਕਸ ਦੇ ਬਾਹਰੋਂ ਸ਼ਾਨਦਾਰ ਗੋਲ ਕਰਕੇ ਫਿਰ ਬਰਾਬਰੀ ਕਰ ਲਈ।
ਇਸ ਤੋਂ ਬਾਅਦ ਅਰਜਨਟੀਨਾ ਦਾ ਦਬਾਅ ਰੰਗ ਲਿਆਇਆ। ਕਾਰਨਰ ਤੋਂ ਆਏ ਹੈਡਰ ਨੂੰ ਕੇਪ ਵਰਡੇ ਦੇ ਇੱਕ ਖਿਡਾਰੀ ਨੇ ਅਣਜਾਣੇ ਵਿੱਚ ਆਪਣੇ ਹੀ ਗੋਲ ਵਿੱਚ ਪਹੁੰਚਾ ਦਿੱਤਾ ਅਤੇ ਅਰਜਨਟੀਨਾ ਨੇ ਜਿੱਤ ਦਰਜ ਕਰ ਲਈ।
ਇਸ ਤੋਂ ਬਾਅਦ ਮਿਸਰ ਦੇ ਖ਼ਿਲਾਫ਼ ਰੋਮਾਂਚਕ ਵਾਪਸੀ ਦੇਖਣ ਨੂੰ ਮਿਲੀ। 79ਵੇਂ ਮਿੰਟ ਤੱਕ ਮਿਸਰ 2-0 ਨਾਲ ਅੱਗੇ ਸੀ, ਉਸੇ ਸਮੇਂ ਕ੍ਰਿਸਟੀਅਨ "ਕੂਟੀ" ਰੋਮੇਰੋ ਨੇ ਗੋਲ ਕਰਕੇ ਅਰਜਨਟੀਨਾ ਦੀਆਂ ਉਮੀਦਾਂ ਜਗਾ ਦਿੱਤੀਆਂ।
ਇੱਕ ਵਾਰ ਫਿਰ ਅਰਜਨਟੀਨਾ ਦੀ ਹਮਲਾਵਰ ਖੇਡ ਨੇ ਅਸਰ ਦਿਖਾਇਆ ਅਤੇ 83ਵੇਂ ਮਿੰਟ ਵਿੱਚ ਮੇਸੀ ਨੇ ਬਰਾਬਰੀ ਦਾ ਸ਼ਾਨਦਾਰ ਗੋਲ ਕਰ ਦਿੱਤਾ।
ਜਦੋਂ ਮੁਕਾਬਲਾ ਵਾਧੂ ਸਮੇਂ (ਐਕਸਟਰਾ ਟਾਈਮ) ਵਿੱਚ ਜਾਂਦਾ ਦਿਖਾਈ ਦੇ ਰਿਹਾ ਸੀ, ਓਦੋਂ 93ਵੇਂ ਮਿੰਟ ਵਿੱਚ ਐਂਜ਼ੋ ਫਰਨਾਂਦੇਜ਼ ਨੇ ਜੇਤੂ ਗੋਲ ਕਰਕੇ ਅਰਜਨਟੀਨਾ ਨੂੰ ਯਾਦਗਾਰ ਜਿੱਤ ਦਿਵਾ ਦਿੱਤੀ। ਹਾਲਾਂਕਿ ਇਸ ਮੁਕਾਬਲੇ ਵਿੱਚ ਰੈਫਰਿੰਗ ਨੂੰ ਲੈ ਕੇ ਵਿਵਾਦ ਵੀ ਰਿਹਾ।
ਕੁਆਰਟਰ ਫਾਈਨਲ ਵੀ ਅਰਜਨਟੀਨਾ ਨੇ ਵਾਧੂ ਸਮੇਂ ਵਿੱਚ ਜਿੱਤਿਆ। ਟੀਮ ਨੇ 10ਵੇਂ ਮਿੰਟ ਤੋਂ ਲੀਡ ਬਣਾਈ ਹੋਈ ਸੀ, ਪਰ ਸਵਿਟਜ਼ਰਲੈਂਡ ਦੇ ਡੈਨ ਨਦੋਏ ਨੇ 67ਵੇਂ ਮਿੰਟ ਵਿੱਚ ਸਕੋਰ ਬਰਾਬਰ ਕਰ ਦਿੱਤਾ।
ਪੂਰਾ ਸਟੇਡੀਅਮ ਅਰਜਨਟੀਨਾ ਦੇ ਸਮਰਥਨ ਵਿੱਚ ਗੂੰਜ ਰਿਹਾ ਸੀ। 112ਵੇਂ ਮਿੰਟ ਵਿੱਚ ਜੂਲੀਅਨ ਅਲਵਾਰੇਜ਼ ਨੇ ਸ਼ਾਨਦਾਰ ਗੋਲ ਕਰਕੇ ਗਤੀਰੋਧ ਤੋੜਿਆ ਅਤੇ ਨੌਂ ਮਿੰਟ ਬਾਅਦ ਲੌਤਾਰੋ ਮਾਰਟੀਨੇਜ਼ ਨੇ ਇੱਕ ਹੋਰ ਗੋਲ ਕਰਕੇ ਜਿੱਤ ਪੱਕੀ ਕਰ ਦਿੱਤੀ।
ਅਰਜਨਟੀਨਾ ਦੀ ਚੌਥੀ ਯਾਦਗਾਰ ਰਾਤ ਸੈਮੀਫਾਈਨਲ ਵਿੱਚ ਆਈ, ਜਦੋਂ ਇੰਜਰੀ ਟਾਈਮ ਵਿੱਚ ਲੌਤਾਰੋ ਮਾਰਟੀਨੇਜ਼ ਦੇ ਗੋਲ ਨੇ ਟੀਮ ਨੂੰ ਫਾਈਨਲ ਵਿੱਚ ਪਹੁੰਚਾ ਦਿੱਤਾ।
ਇਨ੍ਹਾਂ ਸਾਰੇ ਮੁਕਾਬਲਿਆਂ ਵਿੱਚ ਖਿਡਾਰੀਆਂ ਦੇ ਜਸ਼ਨ ਦਾ ਇੱਕ ਖ਼ਾਸ ਦ੍ਰਿਸ਼ ਵਾਰ-ਵਾਰ ਦੇਖਣ ਨੂੰ ਮਿਲਿਆ। ਹਰ ਵੱਡੀ ਜਿੱਤ ਤੋਂ ਬਾਅਦ ਪੂਰੀ ਟੀਮ ਲਿਓਨੇਲ ਮੇਸੀ ਨੂੰ ਆਪਣੇ ਮੋਢਿਆਂ 'ਤੇ ਚੁੱਕ ਕੇ ਜਸ਼ਨ ਮਨਾਉਂਦੀ ਰਹੀ।
ਬੀਬੀਸੀ ਲਈ ਕਲੈਕਟਿਵ ਨਿਊਜ਼ਰੂਮ ਵੱਲੋਂ ਪ੍ਰਕਾਸ਼ਿਤ
