Spòrs

Coinnichidh na seann nàimhdean A' Mhanachainn is Lòbhat sa chairteal chuairt dheireannaich de Chupa MhicThàmhais.

Chaidh an taghadh a dhèanamh Dimàirt.

Ged a tha A' Mhanachainn is Lòbhat san Lìog Nàiseanta am-bliadhna, tha an-còmhnaidh spàirn ann nuair a thèid iad an aghaidh a chèile.

Bidh na Sgitheanaich aig an taigh an aghaidh Chinn a' Ghiùthsaich, ma 's e is gum faigh iad seachad air Cill Mhàilidh an toiseach, is bidh Cabar Fèidh aig an taigh an aghaidh a' Ghearasdain.

Sa gheama eile, cuiridh Gleann Urchadain fàilte air Bàile Ùr an t-Slèibh, a' ciallachadh gun coinnich na sgiobaidhean a tha an-dràsta aig mullach na Lìge Nàiseanta agus na Prìomh Lìge.

Tha an taghadh gu lèir mar a leanas:

• An t-Eilean Sgitheanach/Cill Mhàilidh - Ceann a' Ghiùthsaich

• A' Mhanachainn - Lòbhat

• Gleann Urchadain - Baile Ùr an t-Slèibh

• Cabar Fèidh - An Gearasdan

Bidh na geamaichean ann Disathairne 25mh den Ghiblean.

Tha iomairt a' dol ann am Muile gus talla ùr spòrs a thogail san eilean.

Ged a thathar a' cluich spòrs ann an cuid de na tallaichean baile ann am Muile, tha iad seo ro bheag airson cuid de gheamannan.

Tha na Muilich ag ràdh gur e an aon eilean mòr a th' ann aig nach eil goireas den t-seòrsa seo.

Tùs an deilbh, SNS

Thuirt manaidsear Chaley Thistle gun do leig an sgioba iad fhèin agus an luchd-taic aca sìos ann an cuairt dheireannach Chupa Dùbhlain na h-Alba.

Bha Scott Kellacher a' bruidhinn is ICT air call 4-1 an aghaidh Raith Rovers Didòmhnaich.

Chaidh sgioba Chair Chaladain air thoiseach sa chiad leth le tadhal bho Innes Camshron is Alfie Stiùbhart aig ICT air am ball a thoirt dha.

Bha Inbhir Nis co-ionnan goirid às dèidh sin le breab-saor fìor mhath bhon Stiùbhartach.

'S ann a bha Raith ro làidir san dàrna leth ge-tà, an Camshronach le tadhal eile is an uairsin a dhà bho Dylan Easton.

"Briseadh-dùil mòr," thuirt Kellacher às dèidh a' gheama.

"Cha do chluich sinn mar as urrainn dhuinn is leig sinn an luchd-taic sìos agus sinn fhin sìos.

"'S e mearachdan bhuainn a thug dhaibh na tadhail is chan fhaigh thu às le sin an aghaidh sgiobaidhean bhon Championship."

• Cuairt Dheireannach Chupa Dùbhlain na h-Alba air BBC ALBA

Thuirt Kellacher gu bheil e a-nise a' sùileachadh freagairt bho na cluicheadairean aige Disathairne seo tighinn nuair a chluicheas iad Stenhousemuir.

Leum Stenny os cionn ICT gu mullach Lìog 1 Disathairne nuair a rinn iad an gnothach 3-0 air Hamaltan.

"Geama fìor mhòr is ma tha sinn gus a dhol far a bheil sinn 'son a dhol, feumaidh sinn a bhith nas làidire," thuirt Kellacher.

Bha fìor dhroch là aig sgioba eile na Gàidhealtachd Disathairne is Ross County a' call 4-0 aig an taigh an aghaidh Airdrieonians.

'S e "an call as miosa ann an eachdraidh Ross County" a bh' ann a rèir a' mhanaidseir aca Stuart Kettlewell agus dh'fhàg e na Staggies aig bonn na Championship.

Chan eil air fhàgail aca ach ceithir geamaichean lìge is iad a-nise ann an cunnart mòr a dhol sìos dà sheusan ann an sreath.

Tha an ath gheama aca ann oidhche Haoine an aghaidh Queen's Park ann an Glaschu.

Tha Baile Ùr an t-Slèibh a-nise sia puingean air thoiseach aig bàrr na Prìomh Liog ann an iomain nam fear is iad air an gnothach a dhèanamh air Camanachd an Òbain 2-0.

'S e Iain Robinson a-rithist a chuir na tadhail dhan Bhaile Ùr is seachd aige-san mar-thà am-bliadhna.

Bidh am Baile Ùr glè thoilichte gu bheil na geamaichean aca-san thuige seo uile air a dhol air adhart a dh'aindeoin na droch shìde a th' air a bhith ann, a' fàgail gu bheil cothrom air a bhith aca beàrn fhosgladh aig a' mhullach.

Chuir an aimsir às dhan gheama eile a bha gu bhith ann sa Phrìomh Lìog Disathairne eadar Caol-Gleann is Caol Bhòid.

Bha geamaichean gu lèor ann an Cupa MhicThàmhais ge-ta.

Rinn Ceann a' Ghiùthsaich adhartas, ged a bha feum aca air tadhal bho Dylan Borthwick le deich mionaidean air fhàgail gus a' chùis a dhèanamh air Ceann Loch Seile 2-1.

Bha là math eile aig a' Ghearasdan is iad troimhe 3-1 an aghaidh nan nàbaidhean aca, Loch Abar.

Rinn iad an obair chruaidh sa chiad leth is iad 3-0 air thoiseach aig lethach slighe.

Faochadh airson na Manachainn

San dà gheama eile sa chupa rinn Gleann Urchadain an gnothach 5-0 san darbaidh aca-san an aghaidh Shrath Ghlais agus bha Cabar Fèidh cus ro mhath do dh'Inbhir Nis aig a' Bhucht, far an do shoirbhich iad 8-0.

Bha aona gheama san Lìog Nàiseanta agus 's e clach-mhìle a bh' ann don Mhanachainn, a rinn a' chùis air Glaschu Meadhan Earra-Ghàidheal 3-2.

Creid e no nach creid, 's e seo a' chiad turas a bhuannaich a' Mhanachainn geama lìge bhon t-Sultain 2024.

Bha iad air 21 geama lìge a chluich bhon uairsin gun buannachadh.

Thug Stoirm Dave buaidh mhòr air iomain nam ban is dìreach aona gheama a' dol air adhart Didòmhnaich.

Chrìochnaich an geama sin sa Phrìomh Lìog eadar Ceann Loch Seile is GMA co-ionnan 1-1.

'S i Lorna NicRath a bha air an targaid 'son Chinn Loch Seile is Katie Drain a fhuair tadhal sgioba Ghlaschu.

Tùs an deilbh, SNS

Thuirt manaidsear Chaley Thistle gu bheil seachdain fìor chudromach air thoiseach air a' chluba is gur e sin direach mar a dh'iarradh e.

Cluichidh Inbhir Nis an aghaidh Raith Rovers ann an Glaschu Didòmhnaich sa chuairt dheireannaich de Chupa Dùbhlain na h-Alba.

Bidh iad an uairsin air falbh an aghaidh Stenhousemuir air an ath dheireadh-seachdain is an dà sgioba a' farpais airson tiotal Lìog 1.

"Seo as coireach gu bheil sinn an sas ann am ball-coise," thuirt Scott Kellacher.

"Tha thu 'son a bhith an sàs ann an geamaichean mòra aig deireadh an t-seusain a tha a' cunntadh.

"Tha cothrom againn cupa a bhuannachadh Didòmhnaich is an uairsin an ath-sheachdain Stenhousemuir - geama a tha cho mòr 's a ghabhas dhuinn".

Chìthear a' chuairt dheireannach Didòmhnaich beò air BBC ALBA bho 4f.

Aig an dearbh àm tha geama fìor chudromach aig Ross County Disathairne is iad aig an taigh an aghaidh an Àrd-Rèidh.

Tha County an-dràsta san 9mh àite, puing air thoiseach air na Daoimeanan, is cruaidh fheum aig an dà sgioba air puingean ma tha iad 'son fuireach san Championship.

Tùs an deilbh, Getty Images

Thàinig dearbhadh gun tig Inbhir Ghòrdain a-steach gu Lìog na Gàidhealtachd an ath-sheusan is nach bi feum air geama play-off a chluich.

Bhuannaich Inbhir Ghòrdain Lìog Chailleannach a' Chinn a Tuath bho chionn beagan sheachdainean is thàinig e am bàrr às dèidh sin gun robh iad air na ceumanan a tha a dhìth a choileanadh gus Cead SFA aig Ìre Entry fhaighinn.

Tha feum air Cead Ìre Entry 'son cluich ann an Lìog na Gàidhealtachd.

Cha robh e cinnteach aig an àm sin am biodh feum aig Inbhir Ghòrdain air geama play-off a chluich an aghaidh na sgioba aig bonn Lìog na Gàidhealtachd.

Ann am brath, tha Lìog na Gàidhealtachd a-nise air dearbhadh nach bi feum air sin is gum bi ballrachd aig Inbhir Ghòrdain ann an 2026/27.

• Cead SFA do dh'Inbhir Ghòrdain

Bha fios mar-thà gum biodh Brechin City a' fàgail Lìog na Gàidhealtachd aig deireadh an t-seusain seo, gu Lìog 2 air neo gu Lìog ùr na Galldachd an Ear.

Tha e cuideachd cinnteach a-nise nach tig Elgin City sìos bho Lìog 2.

Thuirt Lìog na Gàidhealtachd mar sin gun tig Inbhir Ghòrdain a-steach is gum bi 17 no 18 sgiobaidhean anns an fharpais.

Bidh seo a rèir am faigh Brùra suas gu Lìog 2 anns na seachdainean ri thighinn.

A thuilleadh air eachdraidh do dh'Inbhir Ghòrdain fhèin, bidh an naidheachd cuideachd na faochadh do Rathais.

'S iadsan a bhiodh air cluich ann am play-off an aghaidh Inbhir Ghòrdain is cunnart ann gun tuiteadh iad a-mach à Lìog na Gàidhealtachd.

Tha ball-coise ionadail a' tilleadh aig tuath agus 's e an cuspair a tha fon phrosbaig san Spòrscast as ùire.

Tha Javen Houston a' còmhradh ri Colin George Moireasdan is Ruairidh MacCarmaig mu ùrachadh is atharrachaidhean am measg nan sgiobaidhean an dà chuid ann an Leòdhas agus na Hearadh agus ann an Lìog Taobh Siar na Gàidhealtachd.

Gheibhear an Spòrscast gu lèir an seo.

Thòisich seusan ùr Lìog Taobh Siar na Gàidhealtachd oidhche Chiadain is rinn Port Rìgh a' chùis air Caol Acainn 2-1 gus cùisean fhaighinn gu dol.

Tha aona gheama sa chlàr Disathairne is Iar Thuath an Eilein Sgitheanaich gus fàilte a chur air a' Ghearasdan.

Cluichidh sgioba ùr Loch Aillse a' chiad gheama acasan oidhche Mhàirt is Slèite is an Srath gus tadhal orra.

Tha Baile Ùr an t-Slèibh ceithir puingean air thoiseach aig mullach na Prìomh Lìge ann an iomain nam fear is iad air a' chiad darbaidh Bhàideanach den t-seusan a bhuannachadh.

Rinn aona thadhal a' chùis dhaibh aig an Eilean an aghaidh Chinn a' Ghiùthsaich - brag bho astar bho Declan Brannan aig fìor thoiseach a' gheama.

Tràth 's ged a tha e san t-seusan ùr, 's e buille chudromach a bha seo bhon Bhaile Ùr is iad a' dèanamh a' ghnothaich air na nàbaidhean aca a-rithist, mar a rinn iad ann an cuairt dheireannach Chupa na Camanachd aig deireadh seusan 2025.

Cha robh ach aona gheama eile sa Phrìomh Lìog is an aimsir a' toirt buaidh.

'S iad Cabar Fèidh a bhuannaich an geama sin 2-1 an aghaidh Loch Abair gus na ciad phuingean acasan den t-seusan a thogail.

'S e dìreach aona gheama a bh' ann san Lìog Nàiseanta cuideachd is Lòbhat is Gleann Urchadain a' crìochnachadh 2-2, a' fàgail gu bheil cùisean mar a bha iad aig mullach na lìge.

Ann an geamaichean eile a chaidh air adhart leum Camanachd Leòdhais gu mullach Lìog Tuath 2 nuair a rinn iad an gnothach 5-1 air Inbhir Nis aig a' Bhucht.

Sin sia puingean à trì geamaichean aig na Leòdhasaich gu seo is iad air toiseach-tòiseachaidh iongantach math a dhèanamh.

Rinn an droch shìde milleadh air clàr iomain nam ban ach san aona gheama a bh' ann sa Phrìomh Lìog rinn Gleann Urchadain a' chùis air Inbhir Nis 6-4.

Thàinig trì de thadhail a' Ghlinne à Hazel Hunter.

Ged a bha briseadh-dùil aig a' Chuimrigh, Èirinn a Tuath is Poblachd na h-Èireann is uile iad a' call Diardaoin anns na geamaichean play-off aca gus Cupa na Cruinne a ruighinn, tha sùilean Steve Clarke is sgioba na h-Alba gu mòr air na Stàitean Aonaichte.

Tha dà ghèama càirdeil aca a-nise anns na làithean ri tighinn is Alba gus cluich an aghaidh Iapan agus Côte d'Ivoire.

Bidh Dòmhnall MacEunraig aig a' gheama an aghaidh Côte d'Ivoire.

Tha esan ag ràdh gur e cothrom air leth a tha seo do Chlarke diofar rudan fheuchainn air thoiseach air Cupa na Cruinne.

San Spòrscast as ùire shuidh Javen Houston sìos le Calum MacNeacail agus Jamie Kieran gus bruidhinn mu iomairt sgioba rugbaidh na h-Alba ann am Farpais nan Sia Dùthchannan.

Às dèidh do dh' Alba crìochnachadh san treas àite tha ceistean fhathast ann mu Ghriogair Townsend agus a dhreuchd os cionn na sgioba.

Fhuair Calum agus Jamie cothrom bruidhinn air na clubaichean aca Warriors Ghlaschu agus Dùn Èideann cuideachd is astar mòr eadar an dà sgioba anns an URC.

Cluinnear an Spòrscast gu lèir an seo.

Tùs an deilbh, SNS

Tha Caley Thistle Inbhir Nis air fear de na ciad chlubaichean ball-coise san dùthaich a tha air a dhol an sàs ann am pròiseact ùr feuch fireannaich a bhrosnachadh a dhol gu deuchainn airson aillse a' phròstata.

Bidh tachartas sònraichte aca aig Pàirc Chaledonian Diciadain an 29mh den Ghiblean is cothrom aig fir eadar 40 is 80 bliadhna a dh'aois a dhol fo dheuchainn.

'S e Iomairt Aillse Phròstata na h-Alba tha air cùl an sgrùdaidh is iad a' coimhead air mar a ghabhadh an siostam dheuchainnean is sgrìonaidh a th' ann a leasachadh.

Cha bhi aig na fir ach ri sampall fala a thoirt seachad.

Thèid toraidhean an sgrùdaidh a thoirt do NHS na h-Alba.

• 'Bu chòir a dhol dhan dotair 's teast fhaighinn air a shon'

Tha Caley Thistle ag ràdh gu bheil iad an dòchas gun tig tòrr fhireannach air adhart.

Tha iad a' gealltainn cuideachd ticeadan airson an sgioba fhaicinn dhan a h-uile duine a nì deuchainn.

"Chan e dìreach cluba ball-coise a tha seo - tha sinn mar phàirt mhòr den choimhearsnachd," thuirt Stiùiriche Coimeirsealta ICT, Anndra Benjamin.

"Nuair a chunnaic sinn gun robh seo a' tachairt, shaoil sinn gun robh e air leth freagarrach dhuinn.

"Tha iad ag amas air 25,000 fear a ruighinn agus mas urrainn dhuinne cuideachadh le dìreach pàirt bheag den sin bidh e na buannachd an dà chuid dhan phròiseact agus an luchd-taic a nì deuchainn."

Faodar deuchainn a chur air dòigh an seo, taobh a-muigh.

Tùs an deilbh, Cupa Amaitearach na Gàidhealtachd

Chaidh na geamaichean a tharraing airson ìrean tràtha Chupa Amaitearach na Gàidhealtachd.

A' bruidhinn air Aithris na Maidne Diluain, thog Coinneach MacLeòid air a' gheama eadar na nàbaidhean Càrlabhagh is An Taobh Siar mar an fhear as tarraingiche a thàinig às an ad.

Tha na geamaichean aig sgiobaidhean nan Eilean Siar is sgiobaidhean Lìog Taobh Siar na Gàidhealtadhd mar a leanas:

Roinn nan Eilean Siar: Ro-chuairt

• Càrlabhagh - An Taobh Siar

• Athletic Steòrnabhaigh - Èirisgeigh

• Barraigh - Nis

Roinn nan Eilean Siar: A' chiad chuairt

• Uibhist a Tuath - Càrlabhagh/An Taobh Siar

• Na Hearadh - Athletic Steòrnabhaigh/Èirisgeigh

• An Rubha - Na Lochan

• South End - United Steòrnabhaigh

• Saints an Ìochdair - Am Bac

• Barraigh/Nis - Beinn na Faoghla

Lìog Taobh Siar na Gàidhealtachd: Ro-chuairt

• An Slag Buidhe - Malaig

• Graham Academicals - An Gearasdan

Lìog Taobh Siar na Gàidhealtachd: A' chiad chuairt

• An Slag Buidhe/Malaig - Iar-Thuath an Eilein Sgitheanaich

• Caol Àcain - An Ràthaig Mhòr

• Slèite is an Srath - An Tom Aiteann

• A' Chananaich/Ferry United - Port Rìgh

• Blackrock Rovers - Graham Academicals/An Gearasdan

• Àird nan Saor/Gellions - GA United

Gheibhear an taghadh gu lèir an seo, taobh a-muigh.

Neartaich Baile Ùr an t-Slèibh an suidheachadh aca aig mullach na Prìomh Lìge ann an iomain nam fear air an deireadh-sheachdain nuair a rinn iad a' chùis air na Sgitheanaich 3-0 ann am Port Rìgh.

Chuir Iain Robinson na trì dhiubh is còig aige mar-tha air an t-seusan seo: toiseach-tòiseachaidh math gu ruige an 40 tadhal a dh'iarr Peadar Ros bhuaithe mus deach ball a bhualadh.

Tha am Baile Ùr aig bàrr na lìge le sia puingean is An Gearasdan, Ceann a' Ghiùthsaich is Ceann Loch Seile uile air an cùlaibh le ceithir, is iad cuideachd air geama nas lugha a chluich.

Rinn An Gearasdan a' chùis air Caol Bhòid 2-1 Disathairne is 's e 2-1 a bh' ann cuideachd do Cheann a' Ghiùthsaich an aghaidh Chabar Fèidh.

Bha ceist air cuid mun cho-dhùnadh gus buille-peanais a thoirt do Kings anmoch sa gheama.

Faodaidh sibh fhèin co-dhùnadh às dèidh sùil a thoirt air a' bhideo gu h-àrd.

'S e 2-1 a bh' ann do Cheann Loch Seile cuideachd an aghaidh Loch Abair, is am manaidsear aca Uilleam MacRath ag aideachadh gun robh glè bheag eadar na sgiobaidhean.

Sa gheama eile rinn Camanachd an Òbain a' chùis 3-1 air Caol-Gleann.

Ann an Lìog Tuath 2 bha fìor dheagh là a-rithist aig Camanachd Leòdhais, a thill bho a bhith 3-1 air dheireadh gus a' chùis a dhèanamh air Cill Mhàilidh 4-3.

Tha ceithir puingean aig na Leòdhasaich bhon dà gheama aca gu seo is iad air tòiseachadh gu làidir fo stiùir Donnie MhicRath is Connor Chalmers.

Bha sgiobaidhean na Prìomh Lìge nan tàmh ann an iomain nam ban ach bha trì geamaichean san Lìog Nàiseanta.

Rinn Bàideanach an gnothach 6-0 air Gleann Garadh, 's e 5-2 a bh' ann do dh'Inbhir Aora an aghaidh Obar Dobhair, is 4-2 do Shrath Ghlais an aghaidh Shrath Spè.

Dh'innis Club Ball-Coise Inbhir Ghòrdain gu bheil iad air na ceumanan a choileanadh gus Cead SFA aig Ìre Entry fhaighinn.

Bhiodh seo a' ciallachadh gum biodh cead aca cluich ann an Lìog na Gàidhealtachd.

Bhuannaich an cluba Lìog Chailleannach a' Chinn a Tuath, taobh a-muigh bho chionn grunn sheachdainean.

Gu seo cha robh Cead Entry ach aig Golspie Sutherland ann an Lìog Chailleannach a' Chinn a Tuath.

Chan eil Cead Entry aig gin de na clubaichean ann an Lìog Cheann a Tuath na h-Alba, an lìog eile a fo Lìog na Gàidhealtachd.

Tha Inbhir Ghòrdain air sreath de leasachaidhean a dhèanamh aig an dachaigh aca, na Recreation Grounds, anns na mìosan mu dheireadh ann an oidhirp Cead Entry fhaighinn.

Bha oifigich bhon SFA ann an Inbhir Ghòrdain an t-seachdain seo gus sgrùdadh a dhèanamh is thuirt an cluba gun deach innse dhaibh gu bheil iad air a h-uile ceum a choileanadh.

Ma tha Cead Entry aig a' chluba a bhuannaicheas Lìog Chailleannach a' Chinn a Tuath, fo na riaghailtean, bhiodh geamaichean play-off ann airson cothrom a thoirt dhaibh a dhol suas gu Lìog na Gàidhealtachd.

Leis nach eil Cead Entry aig clubaichean Lìog Cheann a Tuath na h-Alba, rachadh Inbhir Ghòrdain dìreach gu play-off an aghaidh na sgioba a chrìochnaicheas aig bonn Lìog na Gàidhealtachd.

An-dràsta 's e Rathais a tha sin.

Tha mì-chinnt ann ge-tà, a thaobh cò mheud sgioba a bhios ann an Lìog na Gàidhealtachd an ath-sheusan is Brora Rangers is Brechin City ann an rèis airson a dhol suas gu Lìog na h-Alba, agus Brechin gu bhith a' gluasad gu Lìog ùr na Galldachd an Ear mura faigh iad suas.

Dh'fhaodadh fhathast mar sin gum faigh Inbhir Ghòrdain àite ann an Lìog na Gàidhealtachd às aonais play-off a chluiche.

San Spòrscast as ùire tha Somhairle MacDhòmhnaill agus Eòghan MacAoidh Stiùbhart a' beachdachadh air seusan ùr na h-iomain. Am measg a' chòmhraidh aca, thog iad air cò bhios làidir aig ceann Prìomh Lìog nam Fear, Loch Abar agus Caol-Gleann a tha air gluasad suas bhon Lìog Nàiseanta, agus cò dh'fhaodadh a bhith an an cunnart aig bonn chùisean!

Cluinnear an Spòrscast gu lèir an seo.

Ghluais Caley Thistle Inbhir Nis trì puingean air thoiseach aig mullach Lìog 1 às dèidh dhaibh a' chùis a dhèanamh air Ceann Phàdraig 3-1 oidhche Mhàirt.

Chuir Chanka Zimba Caley Thistle air thoiseach aig Pàirce Caledonian mus d' fhuair Jordan Alonge an dàrna tadhail aca ro leth-ùine.

Fhuair Zimba tadhal eile tràth san dàrna leth airson ICT a chur ann an suidheachadh nas comhurtaile buileach.

Fhuair Kieran Shanks tadhal air ais do Cheann Phàdraig ach cha d' fhuair iad càil nas fhaisge agus 's iad Caley Thistle a thog na puingean.

Tha sin gam fàgail a-niste trì puingean air thoiseach air Stenhousemuir aig a' mhullach is seachad geamaichean den t-seusan air fhàgail.

Cluichidh ICT Disathairne air falbh bhon taigh an aghaidh Alloa, a tha an-dràsta san treasa àite san lìog.

Thuirt cluicheadair Chaley Thistle Inbhir Nis, Alfie Stiùbhart, gum feum iad a bhith nas fheàrr ann a bhith a' cur crìoch air na cothroman aca às dèidh dhaibh puingean a leigeil às anmoch Disathairne an aghaidh Cove Rangers.

Fhuair am fear-glèidhidh aig Cove, Balint Demus, tadhal bho chornair ann an ùine a bharrachd aig deireadh a' gheam airson puing a thogail dhan sgioba.

Bha Stiùbhart air Caley Thistle a chur air thoiseach sa chiad leth le tadhal eireachdail bho thaobh a-muigh a' bhocsa.

A' bruidhinn às dèidh a' gheam ge-tà, thuirt Stiùbhart gum feum iad barrachd chothroman a chruthachadh aig an taigh airson geamaichean a chur às an t-sealladh.

"Bha cothrom neo dhà againn sa chiad leth - na tadhail nach robh mi a' smaoineachadh a bha dheth, ach fiù 's aig an sin bu chòir dhuinn a bhith cruthachadh barrachd chothroman airson an geam a bhuannachadh.

"Mar sgioba tha fios againn nach eil sin math gu leòr aig an taigh.

"Bu chòir dhuinn a bhith a' cur a' gheam dhan leabaidh sa chiad leth.

"Ach chan eil sinn a' gabhail nan cothroman againn air an t-seusan sa. Tha sinn a' strì anmoch ann an geamaichean airson fuireach air thoiseach 1-0.

"Tha an sgioba air fad den bheachd gum feum sinn an dàrna tadhal fhaighinn, agus bhiodh sin na chuideachadh mhòr dhuinn," thuirt e.

County air ais aig a' bhonn

Cha robh deireadh-seachdain ro mhath nas motha aig Ross County a tha e air ais aig bonn Championship na h-Alba.

Chaill na Staggies 1-0 ri St Johnstone ann am Peairt, gam fàgail co-ionnann leis an An Àrd-Rèidh air puingean ach air an cùlaibh air sgaradh thadhal, às dèidh dha na Daoimeanan crìochnachadh 0-0 le Obar Bhrothaig.

An aon thogail do Chounty 's e gun do chaill an dà sgioba eile as fhaisge orra, Raith Rovers agus Greenock Morton, a' ciallachadh gu bheil an dà sgioba sin le chèile fhathast dìreach trì puingean os an cionn.

Chaidh an taghadh a dhèanamh oidhche Dhòmhnaich airson farpais ùr ann an iomain nam ban.

Bidh dusan cluicheadair air gach sgioba ann an Cupa na Prìomh Lìge.

Tha na geamaichean sa chiad chuairt mar a leanas:

• An t-Eilean Sgitheanach - Loch Abar

• Glaschu Meadhan Earra-Ghàidheal - Ceann Loch Seile

Tha Bàideanach is Inbhir Nis a' dol dìreach dhan ath chuairt.

Bidh na geamaichean ann deireadh-seachdain an 18mh is 19mh den Ghiblean.

Rinneadh an taghadh às dèidh a' gheama mhòir eadar Bàideanach is Loch Abar sa Phrìomh Lìog, geama a bhuannaich Bàideanach 1-0.

Tùs an deilbh, Comann Ball-Coise Amaitearach na h-Alba

Chaill sgioba thaghte Leòdhais is na Hearadh ann am Fìobha air an deireadh-sheachdain is iad a' cluich ann am farpais ùr an Inter League Trophy aig Comann Ball-Coise Amaitearach na h-Alba.

Rinn Rìoghachd Fìobha an gnothach 2-0 air na h-eileanaich aig Bayview, dachaigh East Fife.

• Dùbhlan ùr ro sgioba Leòdhais is na Hearadh

Thuirt manaidsear Leòdhais is na Hearadh, Colin George Moireasdan, gur e sgioba làidir a bha ann am Fìobha ach gun do chluich Leòdhas is na Hearadh deagh bhall-coise.

Thuirt Colin George gun robh na h-eileanaich mì-fhortanach an geama a chall 2-0.

Thuirt Iain Robinson gun robh e a' faireachdainn gun robh Baile Ùr an t-Slèibh gu math airidh air an dà phuing a chuir iad air thoiseach air càch aig mullach na Prìomh Lìog ann an iomain nam fear.

Air là nuair a rinn droch aimsir sgrios air clàr nan geamaichean, 's e am Baile Ùr an aghaidh Loch Abair an aona gheama a chaidh air adhart sa Phrìomh Lìog Disathairne.

Cha robh ann ach aon tadhal is 'e Robinson a fhuair e, a' fàgail a' Bhaile Ùir aig a' mhullach le ceithir puingean bhon dà gheama a chluich iad.

Cha robh ach aona gheama san Lìog Nàiseanta cuideachd far an do chuir Gleann Urchadain deich tadhal seachad air Ceiltich an Òbain.

Tha sgioba a' Ghlinne aig bàrr na lìge ach tha a h-uile coltas ann gu bheil seusan fada ro Cheiltich an Òbain, a tha a-nise air call 9-0 is 10-0 san dà gheama aca gu seo.

Rinn an t-uisge trom milleadh cuideachd air iomain nam ban ach chaidh aona gheama air adhart sa Phrìomh Lìog Didòmhnaich agus 's e fear mòr a bh' ann: Bàideanach an aghaidh Loch Abair.

An turas seo 's iad Bàideanach a rinn a' chùis sa bhlàr eadar an dà sgioba as làidire san spòrs is Hope Borthwick air an targaid ann an Ceann a' Ghiùthsaich.

Làmh an uachdair aig sgioba Bhàideanach ma-tha aig an ìre thràth seo den t-seusan.