Sojojin Amurka uku sun mutu a kwana biyu sanadiyyar yaƙin Iran
Rundunar sojin Amurka ta CENTCOM ta ce sojojinta uku sun mutu cikin kwanaki biyu sakamakon hare-haren Iran a rikicin da ke ƙara tsananta tsakanin ƙasar da Iran.
Rundunar ta ce, gaga cikin sojojin, biyu sun mutu ne bayan wani hari da aka kai kan sansanin sojin Amurka a Jordan ranar Juma’a, sannan wani soja ɗaya ya ɓace.
Ɗayan sojan da ya mutu kuma ya mutu ne a arewacin Iraq ranar Asabar bayan wani hari da ake dangantawa da Iran.
Rundunar ta kuma ce sojan da ya mutu a Iraq ya rasa ransa ne yayin wani aikin lalata ragowar wani jirgin yaƙi mara matuƙi na Iran da aka harbo.
Haka kuma wani sojan Amurka guda ɗaya ya samu raunuka a lokacin
A wani sabon bayani, CENTCOM ta ce an gano wasu gawarwaki da ba a tantance ko su waye ba a wurin harin da aka kai a Jordan, kuma ana ci gaba da bincike.
Lamarin na zuwa ne yayin da Amurka da Iran ke ci gaba da musayar hare-hare a rana ta takwas a jere.
A cikin kwanakin baya-bayan nan, ɓangarorin biyu sun zargi juna da kai hare-hare kan muhimman cibiyoyin more rayuwa. Amurka ta ce hare-harenta na baya-bayan nan na da nufin rage ƙarfin Iran wajen barazana ga zirga-zirgar jiragen ruwa a mashigar Hormuz tare da hukunta rundunar IRGC da take zargi da hannu a harin da aka kai Jordan.