آپ اس وقت اس ویب سائٹ کا ٹیکسٹ پر مبنی ورژن دیکھ رہے ہیں جو کم ڈیٹا استعمال کرتا ہے۔ مرکزی ویب سائٹ جہاں تمام تصاویر اور ویڈیوز موجود ہیں دیکھیے
آسٹریلوی کرکٹ بورڈ نے کہا ہے کہ اگر طالبان کی حکومت نے خواتین کو اس کھیل سے دور رکھا تو وہ ایک طے شدہ ٹیسٹ میچ کے لیے افغانستان کی میزبانی نہیں کریں گے۔ ادھر سعودی وزیر خارجہ نے یہ امید ظاہر کی ہے کہ عبوری حکومت کے قیام سے افغانستان میں استحکام لایا جاسکے گا۔
کابل میں منگل کے روز سینکڑوں لوگ سڑکوں پر خواتین کے حقوق اور طالبان کی حکومت کے خلاف احتجاج کرنے نکلے۔ مظاہرین پاکستان کے خلاف نعرے بھی لگا رہے تھے کیونکہ ان کا خیال ہے کہ پاکستان طالبان کی حمایت کرتا ہے۔
جائے وقوعہ کی ویڈیو فوٹیج میں دیکھا جا سکتا ہے کہ طالبان نے اس بڑے احتجاجی مظاہرے کو منتشر کرنے کے لیے شدید فائرنگ کی۔ ویڈیو: سکندر کرمانی، ملک مدثر
ایران میں اعلی سکیورٹی حکام نے کہا ہے کہ ایران میں طالبان کی جانب سے جامع حکومت کی تشکیل میں ناکامی اور بیرونی مداخلت تشویش کا باعث ہیں۔
ایران میں سپریم نیشنل سکیورٹی کونسل کے سیکریٹری علی شامخانی نے اپنی ایک ٹوئٹ میں کہا ہے کہ افغان حکام کو امن اور استحکام کو ہر چیز سے بالا رکھنا چاہیے۔
انھوں نے لکھا کہ افغان عوام کے دوستوں کے بنیادی تحفظات یہ ہیں کہ وہاں جامع حکومت کی ضرورت کو نظر انداز کیا تپا، بیرونی مداخلت اور بہت سے سماجی اور نسلی گروہوں کی جنب سے مذاکرات کے ذریعے مطالبات کو پورا کرنے کے بجائے ہتیھاروں کا استعمال کیا گیا۔
ان کی جانب سے یہ بیان طالبان کی نئی عبوری حکومت کے اعلان کے بعد سامنے آیا ہے۔
شامخانی بظاہر طالبان کے پنجشیر میں قبضے پر بھی تنقید کرتے دکھائی دیے۔
یاشد رہے کہ طالبان کا دعویٰ ہے کہ پنجشیر پر انھوں نے مکمل کنٹرول حاصل کر لیا ہے جب مزاحمتی فورسز جن کی قیادت احمد مسعود کر رہے ہیں نے طالبان کے اس دعوے کی تردید کی ہے۔
اس سے قبل ایران نے کہا تھا کہ وہ پاکستان کی جانب سے طالبان کی مدد سے متعلق رپورٹس پر نظر رکھے ہوئے ہے تاہم طالبان نے ان رپورٹس کو مسترد کیا ہے۔
چین نے کہا ہے کہ افغانستان میں عبوری حکومت امن و امان اور جنگ کے بعد تعمیر نو کے لیے ایک ضروری قدم ہے اور وہ افغانستان کی نئی حکومت کے ساتھ رابطے برقرار رکھنے کے لیے تیار ہے۔
خبر رساں ادارے روئٹرز کے مطابق چینی وزارتِ خارجہ کے ترجمان نے وانگ وینبن نے یہ بات بیجنگ میں معمول کی پریس کانفرنس کے دوران پوچھے جانے والے ایک سوال کے جواب میں کہی۔
ان سے پوچھا گیا تھا کہ کیا چین افغانستان میں نئی حکومت کو تسلیم کرے گا۔
خیال رہے کہ نئی افغان حکومت میں ایسے افغان رہنما بھی شامل ہیں جو امریکہ کی دہشت گردوں سے متعلق فہرشت میں موجود ہیں۔
چینی وزیر خارجہ نے کہا کہ ان کا ملک افغانستان کی سالمیت، خودمختاری اور علاقائی سالمیت کا احترام کرتا ہے۔
جب طالبان نے اگست میں افغانستان پر قبضہ کیا تو اس نے کہا تھا کہ وہاں کھلی اور جامع حکومت کا قیام ہونا چاہیے۔
وانگ وینبن نے کہا کہ ہم امید کرتے ہیں کہ افغانستان کے نئے حکام تمام نسلوں اور گروہوں کے لوگوں کی بات سنیں گے تاکہ اپنے لوگوں کی خواہشات اور بین الاقوامی برادری کی توقعات پر پورے اتر سکیں۔
درجنوں خواتین بدھ کابل کی گلیوں میں احتجاج کرتی دکھائی دے رہی ہیں۔ وہ اپنے حقوق کا مطالبہ کر رہی ہیں۔
یہ احتجاج کابل میں گذشتہ شام طالبان کی جانب سے عبوری حکومت کے اعلان کے بعد کیا جا رہا ہے جس میں خواتین کو نمائیندگی نہیں دی گئی۔
کُ خواتین نے اس حاملہ خاتون پولیس اہلکار کی تصویر اٹھا رکھی تھی جسے گذشتہ ہفتے صوبہ گور می ہلاک کیا گیا تھا۔
اطلاعات ہیں کہ ہرات میں ہونے والے مظاہرے میں تین افراد ہلاک ہوئے۔ جبکہ کابل میں ایتلا اطروز نامی خبر رساں ادارے کا کہنا ہے کہ ان کے ان رپورٹرز کو گرفتار کیا گیا جو مظاہرے کی کوریج کر رہے تھے۔
صحافی سید حسن نے ٹویٹ پر اپنی پوسٹ میں خواتین کے اس گروہ کی تصویر لی ہے جنھوں نے آج پھر کابل میں اپنے احتجاج کا آغاز کیا ہے۔
وہ کہتے ہیں کہ کابل کی گلیوں میں شروع ہونے والے اس احتجاج میں خواتین نے جو پے کارڈ اٹھا رکھے تھے ان میں سے ایک پر لکھا تھا میں پھر آزادی کے نغمے گاؤں گی ، بار بار۔
اس کے علاوہ اس عبوری کابینہ میں ’طالبان فائیو‘ کے نام سے ایسے رہنما شامل ہیں جو بدنام زمانہ جیل گوانتانامو بے میں قید رہ چکے ہیں۔
ان میں ملا محمد فاضل، خیراللہ خیر خواہ، ملا نور اللہ نوری، ملا عبدالحق واثق، اور محمد نبی عمری شامل ہیں۔ اگرچہ اس کابینہ کے علاوہ بھی ایسے طالبان رہنما موجود ہیں جو گوانتانامو یا افغانستان کی مختلف جیلوں میں قید رہ چکے ہیں۔
ان میں ملا خیر اللہ خیر خواہ کو وزارت اطلاعات اور براڈکاسٹ، نوراللہ نوری کو سرحد اور قبائلی علاقہ جات، عبدالحق واثق انٹیلیجنس کے سربراہ، ملا محمد فاضل وزارت دفاع میں نائب وزیر ہوں گے۔
گذشتہ روز طالبان کی جانب سے عبوری حکومت کا اعلان کیا گیا تھا اور کابینہ کے 27 عہدیداروں کی فہرست بھی جاری کی گئی تھی۔
اقوامِ متحدہ کی سکیورٹی کونسل کی جانب سے دہشتگردوں کی ایک بلیک لسٹ موجود ہے جس میں ایسے افراد شامل ہیں جو عالمی طور پر مطلوب ہیں۔ اس فہرست میں ان ناموں کو ڈھونڈنے پر معلوم ہوا کہ 27 میں سے نئی افغان کابینہ کے کم سے کم 14 اراکین اقوامِ متحدہ کی دہشتگردوں کی بلیک لسٹ میں شامل ہیں۔ تاہم یہ تعداد اس سے زیادہ بھی ہو سکتی ہے۔
ذیل فہرست میں ان 14 افراد اور موجودہ عبوری حکومت میں ان کے عہدے درج ہیں:
خیال رہے کہ دیگر 13 افراد میں سے اکثر مختلف عرفیت سے بھی جانے جاتے ہیں اور اس فہرست کے ذریعے ان ناموں کے حوالے سے تصدیق کرنا فی الحال ممکن نہیں ہے۔
افغانستان میں طالبان کی عبوری کابینہ میں ایسے اراکین شامل ہیں جو پاکستان کے دینی مدرسہ حقانیہ اکوڑہ خٹک سے تعلیم حاصل کر چکے ہیں۔
افغان طالبان ہوں یا کالعدم تنظیم تحریک طالبان پاکستان ان میں موجود بیشتر ایسے اراکین ہیں جو صوبہ خیبر پختونخوا کے شہر نوشہرہ میں اکوڑہ خٹک کے مقام پر قائم تاریخی مدرسے ’دارالعلوم حقانیہ‘ سے فارغ التحصیل ہیں۔
دارالعلوم حقانیہ اکوڑہ خٹک کو عالمی سطح پر طالبان کی یورنیورسٹی یا ’یورنیورسٹی آف جہاد‘ کے نام بھی دیا گیا ہے۔ ان طالبان رہنماؤں میں ملا عبدالطیف منصور شامل ہیں جو زیادہ تر پاکستان میں مقیم رہے ہیں۔
ذرائع نے بتایا ہے کہ ملا عبدالطیف منصور نے دارالعلوم حقانیہ سے تعلیم حاصل کی ہے۔ انھیں وزارتِ پانی و بجلی کا قلمدان دیا گیا ہے۔
ذرائع کا کہنا ہے کہ مولانا عبدالباقی بھی دارالعلوم حقاینہ میں زیر تعلیم رہے ہیں۔ وہ وزیرِ تعلیم مقرر ہوئے ہیں جبکہ نجیب اللہ حقانی اس مدرسے سے فارغ التحصیل ہیں اور انھیں مواصلات کا قلمدان دیا گیا ہے۔
اس کے علاوہ افغان طالبان کے ترجمان محمد نعیم بھی دارالعلوم حقانیہ سے فارغ التحصیل ہیں اور اس کے علاوہ انھوں نے انٹرنیشنل اسلامک یونیورسٹی اسلام آباد سے پی ایچ ڈی کر رکھی ہے۔
افغان طالبان کے ترجمان سہیل شاہین بھی انٹرنیشنل اسلامک یونیورسٹی اسلام آباد میں زیر تعلیم رہے ہیں۔ محمد نعیم اور سہیل شاہین کو کابینہ میں شامل نہیں کیا گیا ہے۔
طالبان کے ترجمان سہیل شاہین کا کہنا ہے کہ جو افراد کابل میں پرامن احتجاج کرنا چاہتے ہیں اب اس کے لیے انھیں حکام سے باضابطہ اجازت لینی ہو گی اور یہ بتانا ہو گا کہ وہ کس مخصوص جگہ پر احتجاج کرنا چاہتے ہیں۔
انھوں نے یہ بات صحافیوں کے ساتھ واٹس ایپ پر قائم ایک گروپ میں کہی۔
انھوں نے کہا کہ ’ایسے نہیں جیسے اس وقت ہو رہا ہے، امارت اسلامی افغانستان کے رہنماؤں کے لیے نازیبا زبان کا استعمال کیا جا رہا ہے اور آپس کی دشمنیوں کو ہوا دینے کی کوشش کی جا رہی ہے اور ایسے لمحات کو فلم بند کر کے سوشل میڈیا پر شائع کیا جا رہا ہے۔‘
بی بی سی نیوز کے سکندر کرمانی نے ایک ٹویٹ میں کہا کہ ’پڑھی لکھی اور اختلاف کرنے والی شہری آبادی‘ طالبان کے لیے ایک چیلنج ثابت ہو سکتی ہے۔
افغانستان سے امریکی انخلا کے بعد جب طالبان نے نئی حکومت کا اعلان کیا ہے تو دنیا بھر کے اکثر ممالک کی نظریں افغانستان میں آئندہ کے لائحہ عمل سے متعلق ہیں۔ امریکی وزیرِ خارجہ اینتھونی بلنکن بدھ کو جرمنی کے ساتھ بات چیت کا آغاز کریں گے۔
امریکی وزیرِ خارجہ قطر سے جرمنی پہنچ چکے ہیں۔ قطر افغانستان سے ایئرلفٹ کے دوران سب سے بڑی گزرگاہ ثابت ہوا تھا جبکہ جرمنی ان ہزاروں افغانوں کے لیے پناہ کی جگہ بن چکا ہے، جرمنی میں امریکہ کا ریمسٹین فوجی اڈہ اس کے لیے استعمال کیا گیا ہے۔
بلنکن اس فوجی اڈے میں جرمنی کے وزیرِ خارجہ ہیکو ماس سے ملاقات کریں گے اور 20 ممالک کے وزیروں سے آن لائن میٹنگ کریں گے جس میں افغانستان میں آئندہ کے لائحہ عمل کے حوالے سے بات کی جائے گی۔
امریکہ طالبان پر بین الاقوامی دباؤ بڑھانے کی کوشش کرے گا تاکہ افغانوں کے ملک سے نکلنے کے وعدوں پر پورا اترنے پر مجبور کیا جا سکے۔
امریکہ کا کہنا تھا کہ انھیں موجودہ عبوری حکومت کے بارے میں خدشات ہیں لیکن وہ اس کے فیصلوں سے اسے پرکھیں گے۔ امریکی حکام نے زور دیا ہے کہ باضابطہ طور پر طالبان حکومت کو تسلیم کرنے میں ابھی بہت وقت ہے۔
ایک ایسی تحریک جو ایک عرصے تک غائب رہی اور اس کے عہدیداروں کے نام صرف دہشتگروں کی واچ لسٹ میں دیکھنے کو ملتے تھے اب ایسے عہدوں کا اعلان کر رہے ہیں جو دنیا بھر میں حکومتوں کی جانب سے استعمال کیے جاتے ہیں۔
اس وقت قائم مقام وزیرِ اعظم ملا حسن اخوند کی اپنی سربراہی میں کام کرنے والے اہم عسکری اور سیاسی رہنماؤں کے ساتھ دشمنیاں ہیں جو ان کے لیے آئندہ مسائل کا باعث بن سکتی ہیں۔
اس عبوری حکومت کے ذریعے طالبان کو بندوقوں سے حکومت کرنے کی طرف بڑھنے کا موقع بھی ملے گا۔
اس سے اس بات کے بارے میں بھی علم ہوتا ہے کہ طالبان کی جیت کا مطلب طالبان کی حکومت ہے۔ ذرائع کا کہنا ہے کہ انھوں نے ایسی حکومت کے قیام سے انکار کیا جس میں سب کی شمولیت ہو۔
انھوں نے سابقہ سیاسی رہنماؤں اور حکام کو حکومت میں شامل کرنے سے انکار کیا خاص طور پر وہ جن پر اس سے قبل بدعنوانی کے الزامات لگائے گئے تھے۔
اس بارے میں سوال کا ایک جواب یہ تھا کہ ’ہم دوسروں کو اپنی کابینہ کیوں نامزد کرنے دیں جب دوسرے ممالک یہ کام خود کرتے ہیں؟‘
جہاں تک بات خواتین کی ہے تو اس بات کا کبھی بھی کوئی امکان نہیں تھا کہ انھیں کوئی وزارت دی جائے گی۔ خواتین کے معاملات کی وزارت کو مکمل طور پر ختم کر دیا گیا ہے۔
خبر رساں ادارے روئٹرز کے مطابق امریکی صدر جو بائیڈن نے منگل کو کہا کہ انھیں یقین ہے چین طالبان کے ساتھ کام کرنے کے لیے انتظامات کی کوشش کرے گا۔
جب ان سے پوچھا گیا کہ آیا انھیں اس بات کی فکر ہے کہ چین طالبان کی مالی مدد کرے گا، بائیڈن نے کہا کہ ’چین کو طالبان سے بڑا مسئلہ درپیش ہے۔ تو وہ طالبان کے ساتھ کام کرنے کے لیے انتظامات کریں گے۔‘
’مجھے یقین ہے ایسا پاکستان، روس اور ایران بھی کریں گے۔ یہ سب سمجھنے کی کوشش کر رہے ہیں کہ اب انھیں کیا کرنا ہے۔‘
امریکہ اور اس کے اتحادیوں نے ایک ساتھ مل کر طالبان سے متعلق حکمت عملی بنانے پر اتفاق کیا ہے اور فی الحال ان کی حکومت کو تسلیم نہ کرنے کا فیصلہ کیا ہے۔
امریکہ نے کہا ہے کہ اسے طالبان کی عبوری حکومت میں شامل کیے گئے ناموں پر تشویش ہے مگر وہ انھیں اقدامات پر جانچیں گے جن میں افغانوں کی آزادی شامل ہے۔
امریکہ کے دفتر خارجہ کے ترجمان نے یہ بیان ایسے وقت میں جاری کیا ہے کہ جب امریکی وزیر خارجہ انٹونی بلنکن افغانستان پر بات چیت کے لیے قطر کے دورے پر ہیں۔
امریکہ کے اس بیان میں کہا گیا ہے کہ ’ہم نے دیکھا ہے کہ اس فہرست میں ایسے نام شامل ہیں جو طالبان کے رکن ہیں یا ان کے قریبی ساتھی ہیں اور ان میں خواتین شامل نہیں۔ ہمیں کچھ لوگوں کے ماضی اور وابستگیوں پر تشویش ہے۔‘
خیال رہے کہ نئی افغان حکومت کے سربراہ ملا محمد حسن اخوند، جو کہ تحریک طالبان کے بانیوں میں سے ہیں، کا شمار اقوام متحدہ کی بلیک لسٹ میں ہوتا ہے۔ جبکہ نئے وزیر داخلہ سراج الدین حقانی مسلح گروہ حقانی نیٹ ورک کے رہنما رہ چکے ہیں اور ایف بی آئی کو مطلوب ہیں۔
تاہم امریکی دفتر خارجہ کے اس بیان میں کہا گیا ہے کہ ’ہم سمجھتے ہیں طالبان نے ایک عبوری کابینہ پیش کی ہے۔ لیکن ہم طالبان کو ان کے اقدامات پر جانچیں گے، نہ کہ ان کی باتوں پر۔۔۔ ہمیں امید ہے طالبان یہ یقینی بنائیں گے کہ ان کی سرزمین دوسرے ممالک کے خلاف استعمال نہ کی جائے۔‘
امریکہ نے ایک بار پھر طالبان سے مطالبہ کیا ہے کہ ایسے افغانوں اور امریکی شہریوں کو افغانستان چھوڑنے کی اجازت دی جائے جو وہاں سے نکلنا چاہتے ہیں۔
وائٹ ہاؤس کی ترجمان نے کہا ہے کہ فی الحال امریکہ طالبان کی حکومت کو تسلیم نہیں کرے گا۔
اس سے قبل بلنکن نے قطر میں کہا کہ طالبان اس وقت تک تعاون کر رہے ہیں جب تک مسافروں کے پاس سفری دستاویزات ہیں۔ ریپبلکن جماعت کے پارلیمانی رہنماؤں اور کارکنوں نے الزام لگایا ہے کہ کابل میں کچھ چارٹر طیارے پھنسے ہوئے ہیں۔
افغان شہر ہرات میں میڈیکل ورکرز کا کہنا ہے کہ طالبان کی جانب سے ایک احتجاجی مظاہرے پر فائرنگ سے تین افراد ہلاک ہوگئے ہیں جبکہ کئی لوگ زخمی ہوئے ہیں۔ طالبان نے تاحال اس پر کوئی ردعمل نہیں دیا۔
دوسری طرف کابل میں ایک پاکستان مخالف مظاہرہ دیکھا گیا جہاں طالبان کے مسلح جنگجوؤں نے ہوائی فائرنگ کے ذریعے سینکڑوں لوگوں کو منتشر کرنے کی کوشش کی۔
یہ مظاہرے طالبان کے اقتدار میں آنے کے بعد سے مزاحمت کے لیے بڑے اجتماع رہے ہیں۔
کابل سے موصول ہونے والی ویڈیوز میں دیکھا جاسکتا ہے کہ مظاہرین اپنی حفاظت کے لیے بھاگ رہے ہیں۔
کئی مظاہرین نے براہ راست طالبان پر تنقید سے گریز کیا اور اپنے غم و غصے کا اظہار ہمسایہ ملک پاکستان کے حوالے سے کیا۔ وہ پاکستان پر طالبان کی حمایت کا الزام لگا رہے تھے۔ پاکستانی حکام اس الزام کو مسترد کرتے ہیں۔
بلوچستان کے دارالحکومت کوئٹہ میں افغانستان کے علاقے قندوز سے پہنچنے والے اندازاً تین سو افغان شہریوں کو واپس افغانستان ڈی پورٹ کر دیا گیا ہے۔
یہ لوگ افغانستان سے بلوچستان کے سرحدی شہر چمن آئے تھے، وہاں سے وہ دوروز قبل کوئٹہ آئے اور بلیلی کے علاقے میں پڑاﺅ ڈالا تھا۔
یہ لوگ مجموعی طور پر 50 خاندانوں پر مشتمل تھے۔
یہ لوگ کسپمرسی کی حالت میں تھے اور ان کے ساتھ جو بچے تھے ان میں سے بعض بیمار بھی تھے۔
ان لوگوں کے پاس کھانے پینے کی اشیاء بھی نہیں تھیں۔
ان لوگوں نے صحافیوں کو بتایا کہ افغانستان میں خراب صورتحال کی وجہ سے وہ پناہ کی تلاش میں یہاں پہنچے ہیں۔
ان کا کہنا تھا کہ وہ چاہتے ہیں کہ اُنھیں یہاں پناہ لینے کی اجازت دی جائے اور مردوں کو محنت مزدوری کی اجازت دی جائے تاکہ وہ ان کے لیے کھانے پینے کا انتظام کریں۔
منگل کے روز جب میڈیا کے نمائندے اس علاقے میں گئے تو وہاں ان میں سے کوئی نہیں تھا۔
جب ان کی عدم موجودگی کے بارے میں کمشنر کوئٹہ ڈویژن سہیل الرحمان بلوچ سے رابطہ کیا گیا تو ان کا کہنا تھا کہ یہ لوگ غیر قانونی طور پر پاکستان آئے تھے اس لیے ان کو واپس افغانستان ڈی پورٹ کردیا گیا۔
اُنھوں نے بتایا کہ جب تک حکومت کی جانب سے اجازت نہیں ہوگی اس وقت تک جو بھی افغان شہری غیر قانونی طور پر پاکستان آئیں گے ان کو واپس افغانستان بھیجا جائے گا۔
افغانستان میں طالبان کی طرف سے اپنی حکومت کے اعلان کے بعد ’امارت اسلامیہ افغانستان‘ کے مشن کے بارے میں پہلے تفصیلی بیان میں کہا گیا ہے کہ وہ ملک کو جلد از جلد ترقی کی راہ پر ڈالنا چاہتے ہیں اور تمام عوام کے لیے چاہے وہ کسی بھی طبقے سے تعلق رکھتے ہوں بنیادی سہولیات کی فراہمی یقینی بنانا چاہتے ہیں۔
افغانستان کی نئی حکومت کا کہنا ہے کہ اس مقصد کے حصول کے لیے انھیں ملک کے تمام کاروباری حضرات، سرمایہ کاروں اور ’سمجھ دار افغانوں‘ کی ضرورت ہے جو ملک کو غربت سے نکالنے، معیشت کو مضبوط کرنے، قومی دولت کو محفوظ کرنے اور سرکاری خزانے کو قومی مفاد میں استعمال کرنے میں مدد کر سکتے ہیں۔
بیان میں کہا گیا ہے کہ میڈیا ملک کا اہم حصہ ہے۔ ’ہم میڈیا کی آزادی، اس کے فنکشن اور اس کے معیار کی بہتری کے لیے کام کریں گے۔‘
’ہم اپنا فرض سمجھتے ہیں کہ ہماری نشریات میں اسلامی اصولوں، قومی مفاد اور غیرجانبداری کا خیال رکھا جائے۔‘
بیان میں افغانستان کے پڑوسیوں، خطے کے ممالک اور پوری دنیا کے لیے پیغام میں کہا گیا کہ ’افغانستان کی سرزمین کسی دوسرے ملک کی سکیورٹی کے خلاف استعمال نہیں ہو گی۔‘ نئی حکومت کی طرف سے کہا گیا کہ افغانستان کی طرف سے کسی کو تشویش نہیں ہونی چاہیے اور یہ کہ وہ دوسروں سے بھی ایسے رویے کی توقع کرتی ہے۔
طالبان کی نئی کابینہ میں رئیس الوزرا یا وزیرِ اعظم کا عہدہ ملّا محمد حسن اخوند کو دیا گیا ہے جن کے نائبین میں ملّا عبدالغنی برادر اور مولوی عبدالسلام حنفی شامل ہوں گے۔
ملّا محمد حسن اخوند کے بارے میں ہم کیا جانتے ہیں؟
ملّا عبدالغنی برادر کون ہیں؟
سراج الدین حقانی کون ہیں؟
طالبان نے سراج الدین حقانی کو بطور وزیرِ داخلہ نامزد کیا ہے
طالبان کا کہنا ہے کہ موجودہ سیٹ اپ نگراں ہے اور ملکی معاملات کو فی الوقت چلانے کے لیے قائم کیا گیا ہے۔ اُن کا مزید کہنا ہے کہ جلد ہی مکمل انتظام کا اعلان کیا جائے گا۔
طالبان کے بارے میں مزید آپ ہمارے ان خصوصی فیچرز میں جان سکتے ہیں:
کایبنہ کی مکمل فہرست ساتھ منسلک تصاویر میں موجود ہے تاہم طالبان کا کہنا ہے کہ یہ ایک عبوری سیٹ اپ ہے جسے فی الوقت ملکی معاملات چلانے کے لیے قائم کیا گیا ہے۔
کابل میں طالبان کی نئی کابینہ کے اعلان کے موقع پر ہمارے نمائندے سکندر کرمانی اور ملک مدثر میڈیا سینٹر میں موجود تھے جن کی بدولت تازہ ترین اطلاعات آپ تک پہنچ سکیں۔