القاعدہ کا افغانستان میں وجود نہیں ہے اور ہمارا اس سے کوئی تعلق نہیں ہے: ترجمان طالبان

طالبان کے سیاسی دفتر کے ترجمان کا کہنا ہے کہ ’القاعدہ کا افغانستان میں وجود نہیں ہے اور ہمارا اس سے کوئی تعلق نہیں ہے۔‘ دوسری جانب احمد مسعود نے پنجشیر میں نو ہزار جنگجو جمع کر لیے ہیں اور ان کا کہنا ہے کہ ان کی تحریک مذاکرات پر راضی ہے لیکن ’آخری آدمی تک دفاع کے لیے تیار ہے۔‘

لائیو کوریج

20 اگست 2021بورس جانسن: طالبان کے ساتھ کام کرنا ضروری ہوا تو کریں گے
،تصویر کا ذریعہPA Media
وزیرِ اعظم برطانیہ بورس جانسن نے کہا ہے کہ اگر ضرورت پڑی تو برطانیہ طالبان کے ساتھ مل کر بھی کام کرے گا۔
خبر رساں ادارے روئٹرز کے مطابق اُنھوں نے اس موقع پر اپنے وزیرِ خارجہ ڈومینیک راب کا دفاع بھی کیا جو افغان صورتحال سے نمٹنے کے معاملے پر تنقید کی زد میں ہیں۔
بورس جانسن نے میڈیا کو بتایا: ’میں اپنے لوگوں کو یقین دلانا چاہتا ہوں کہ افغانستان کا حل تلاش کرنے کے لیے ہماری سیاسی اور سفارتی کوششیں جاری رہیں گی، جس میں ضرورت پڑنے پر طالبان کے ساتھ کام کرنا بھی ہے۔‘
اس سے قبل بورس جانسن کہہ چکے ہیں کہ وہ طالبان کو اُن کے الفاظ نہیں بلکہ اقدامات سے پرکھیں گے۔
جب اُن سے پوچھا گیا کہ کیا اُنھیں اب بھی وزیرِ خارجہ ڈومینیک راب پر اعتماد ہے تو اُنھوں نے کہا: بالکل
واضح رہے کہ اس سے قبل برطانیہ کے چیف آف ڈیفینس سٹاف جنرل سر نک کارٹر بھی طالبان کے لیے بظاہر نرم مؤقف اختیار کرتے ہوئے نظر آئے ہیں۔
بی بی سی ریڈیو فور کے ایک پروگرام میں بات کرتے ہوئے اُنھوں نے کہا تھا کہ ہو سکتا ہے کہ طالبان اب بدل گئے ہوں۔
20 اگست 2021افغانستان کی ہزارہ برادری خوف میں مبتلا
،تصویر کا ذریعہAFP
افغانستان میں ہزارہ برادری تیسرا بڑا نسلی گروہ ہے۔ یہ لوگ اکثریتی طور پر شیعہ مسلمان ہیں اور انھیں عمومی طور پر سنی طالبان کے ہاتھوں تفریق اور تشدد کا سامنا کرنا پڑا ہے۔
اب ان میں سے بہت سے لوگوں کو وہی دور واپس آنے کا خدشہ ہے۔ جمعے کو یہ اطلاعات سامنے آئیں کہ جولائی کے مہینے میں طالبان جنگجوؤں نے غزنی صوبے میں کئی ہزارہ افراد کو تشدد کر کے قتل کر دیا تھا۔
غزنی میں رہنے والے علی (فرضی نام) نے کہا کہ طالبان در در جا کر اُن لوگوں کو تلاش کر رہے ہیں جو پچھلی حکومت یا افغان پولیس کے لیے کام کرتے رہے ہیں۔
علی نے بی بی سی کو بتایا: ’میں اور میرے گھر والے باہر نہیں جا رہے کیونکہ ہم محفوظ نہیں محسوس کر رہے۔ میرے دوستوں کو بھی نشانہ بنایا گیا ہے، طالبان نے میرے ایک دوست پر تشدد کیا۔‘
فاطمہ (فرضی نام) کابل میں ایک سماجی کارکن ہیں۔ اُنھوں نے کہا کہ اُنھیں اپنی برادری اور دیگر نسلی اقلیتوں کے تحفظ کے لیے خوف محسوس ہو رہا ہے۔
20 اگست 2021بریکنگ, دوسرے ممالک کو افغانستان پر اپنی مرضی مسلّط نہیں کرنی چاہیے، ولادیمیر پوتن
،تصویر کا ذریعہReuters
روس کے صدر ولادیمیر پوتن نے جمعے کو کہا ہے کہ دوسرے ممالک کو افغانستان پر اپنی مرضی مسلّط نہیں کرنی چاہیے اور حقیقت یہ ہے کہ طالبان نے افغانستان کے بڑے حصے پر کنٹرول حاصل کر لیا ہے۔
خبر رساں ادارے اے ایف پی کے مطابق وہ ماسکو میں جرمن چانسلر اینگلا مرکل کے ساتھ مذاکرات کے بعد میڈیا سے بات کر رہے تھے۔
صدر پوتن نے اُمید کا اظہار کیا کہ طالبان اپنے وعدے پورے کریں گے اور یہ اہم ہے کہ دہشتگردوں کو افغانستان سے نکل کر خطے کے دوسرے ممالک میں پھیلنے سے روکا جائے۔
ولادیمیر پوتن نے کہا کہ ’باہر سے بیٹھ کر اجنبی اقدار مسلّط کرنے اور اُن ممالک کے لیے اجنبی ماڈل کی جمہوریت تیار کرنے کی غیر ذمہ دارانہ پالیسی کو رکنا چاہیے جس میں تاریخی، قومی اور مذہبی روایات کو مدِنظر نہیں رکھا جاتا۔‘
’ہم افغانستان کو جانتے ہیں، ہم اُن لوگوں کو اچھی طرح جانتے ہیں، اور ہم نے سیکھا ہے کہ یہ ملک کیسے کام کرتا ہے، اور اس کی روایات کے برعکس سیاسی اور سماجی نظام اس پر نافذ کرنا کتنا نقصاندہ ہو سکتا ہے۔‘
اُنھوں نے مزید کہا: ’ایسے کوئی بھی سیاسی اور سماجی تجربے ماضی میں کامیاب نہیں ہوئے ہیں اور اس سے صرف ریاستوں کی بربادی اور اُن کے اپنے سیاسی اور سماجی نظام کی تباہی ہوئی ہے۔‘
اُنھوں نے کہا کہ طالبان نے جنگ کے خاتمے کا اعلان کرتے ہوئے شہریوں اور سفارتکاروں کی سلامتی کی یقین دہانی کروائی ہے اور اُنھیں اُمید ہے کہ اس سب پر عمل ہوگا۔
،تصویر کا ذریعہGetty Images
واضح رہے کہ روس اور افغانستان کا تعلق نہایت پیچیدہ اور تلخ رہا ہے۔ سنہ 1978 میں سرد جنگ کے دوران افغانستان میں کمیونسٹ بغاوت ہوئی اور اس انقلاب کے خلاف ہونے والی مزاحمت کو کچلنے کے لیے سوویت یونین نے اگلے ہی سال افغانستان پر حملہ کر دیا۔
سوویت فورسز نے مجاہدین کہلانے والے مقامی جنگجوؤں کے خلاف جنگ چھیڑ دی۔ ان جنگجوؤں کو پاکستان اور امریکہ کی مدد حاصل تھی۔ سوویت افغان جنگ 10 سال تک جاری رہی اور افغانستان کے لیے نہایت ہلاکت خیز ثابت ہوئی۔
دس لاکھ کے قریب افغان مارے گئے۔ جنگ کے بعد مجاہدین میں آپسی لڑائیوں کے بعد طالبان ابھر کر سامنے آئے۔
سنہ 1992 میں سوویت یونین ٹوٹ پھوٹ کا شکار ہو کر مختلف ملکوں میں بٹ گیا۔ عام خیال یہی ہے کہ افغانستان کی جنگ نے براہِ راست سوویت یونین کے ٹوٹنے میں کردار ادا کیا۔
20 اگست 2021جامعہ حفصہ پر امارتِ اسلامیہ کے پرچم حکام نے اتروا دیے, سحر بلوچ، بی بی سی
،تصویر کا ذریعہTwitter/@ghulamabbasshah
پاکستان کے وفاقی دارالحکومت اسلام آباد کے علاقے جی سیون تھری میں لال مسجد سے منسلک جامعہ سیدہ حفصہ پر لہرایا گیا اماراتِ اسلامیہ افغانستان کا پرچم اسلام آباد انتظامیہ نے اتروا دیا ہے۔
جامعہ حفصہ پر 19 اگست کی صبح اماراتِ اسلامیہ کے چار سے پانچ پرچم لگائے گئے تھے۔ لال مسجد شہدا فاؤنڈیشن کے ترجمان کے مطابق، پرچم لگنے کے کچھ دیر بعد اسلام آباد کی انتظامیہ کے افسران بمع ڈپٹی کمشنر جامعہ حفصہ مذاکرات کرنے پہنچے اور ’درخواست‘ کی کہ یہ جھنڈے ہٹا دیے جائیں۔
ڈپٹی کمشنر اسلام آباد حمزہ شفقات سے جب اس بارے میں پوچھا گیا تو انھوں نے کہا کہ اطلاع ملنے پر اسلام آباد پولیس و ضلعی انتظامیہ کی ٹیم نے جھنڈا اتروا دیا ہے۔
لال مسجد میں مبینہ عسکریت پسندوں کی موجودگی کے خلاف سنہ 2007 میں فوجی آپریشن کیا جا چکا ہے۔
واضح رہے کہ ایک روز پہلے پشاور کے علاقے حیات آباد میں افغانستان کا پرچم لہرانے پر نو افراد کے خلاف ایف آئی آر درج کی گئی تھی۔
پولیس کے مطابق کارروائی میں حیات آباد فیز تھری سے نو افراد کو گرفتار کیا گیا جبکہ افغانستان کے دو پرچم بھی ضبط کر لیے گئے لیکن اسلام آباد میں جامعہ حفصہ کی مسجد پر طالبان کا جھنڈا لہرانے پر تاحال نہ کوئی پرچہ کاٹا گیا ہے اور نہ ہی کوئی کارروائی کی جا رہی ہے۔
لال مسجد کے ترجمان ہارون غازی نے بی بی سی کو بتایا ہے کہ خطیب لال مسجد مولانا عبدالعزیز نے جمعے کو فتحِ مبین کے نام سے کانفرنس رکھی گئی تھی اور اس کی تیاری کے لیے پرچم لگائے گئے تھے۔
اُنھوں نے بتایا کہ اس کانفرنس کا مقصد افغان طالبان سے یکجہتی کا اظہار کرنا تھا۔ تاہم اُنھوں نے الزام عائد کیا کہ یہ کانفرنس سیکیورٹی محاصرے کے باعث نہیں ہو سکی۔
20 اگست 2021’کرکٹ کو طالبان سے خطرہ نہیں، ٹیم میں جوش موجود ہے‘
،تصویر کا ذریعہGetty Images
افغانستان کے کرکٹ بورڈ کے سربراہ حامد شنواری نے کہا ہے کہ اُن کی ٹیم ایک مرتبہ پھر پاکستان کے خلاف ون ڈے سیریز کی تیاری کر رہی ہے جو دو ہفتے بعد سری لنکا میں ہونی ہے۔
اُنھوں نے کہا کہ افغان قومی ٹیم کابل میں اپنی پریکٹس دوبارہ شروع کر کے ’پرجوش‘ محسوس کر رہی ہے۔ اُنھوں نے اے ایف پی سے بات کرتے ہوئے کہا کہ کیمپ میں ماحول بہت پرجوش ہے اور جیسے ہی فلائٹ آپریشن بحال ہوتا ہے تو ٹیم کو سری لنکا بھیج دیا جائے گا۔
اُنھوں نے کہا کہ اس حوالے سے وہ حکام سے رابطے میں ہیں۔
حامد شنواری نے مزید کہا کہ کرکٹ کو طالبان سے کوئی خطرہ نہیں ہے۔ ’کرکٹ طالبان کی پچھلی حکومت میں بھی مسئلہ نہیں تھا اور اس مرتبہ بھی نہیں ہوگا۔
مجھے نہیں یاد کہ طالبان نے کبھی کرکٹ کے معاملے پر کوئی مسائل پیدا کیے ہوں۔‘ شنواری نے کہا کہ وہ اس وقت ویمنز کرکٹ پر تبصرہ نہیں کر سکتے مگر آئندہ چند ہفتوں میں اس حوالے سے صورتحال واضح ہو جائے گی۔
اس کے علاوہ افغانستان کرکٹ بورڈ نے 10 ستمبر سے کابل میں اپنی ٹی 20 لیگ کے آغاز کا اعلان بھی کیا ہے۔ ’ہم افغانستان میں کرکٹ کی بحالی کے لیے پرعزم ہیں۔
ہمارے انڈین اور پاکستانی کرکٹ بورڈز کے ساتھ زبردست تعلقات ہیں اور ہم بین الاقوامی کرکٹ برادری کا حصہ ہیں۔‘
20 اگست 2021افغانستان کی تعمیرِ نو کے لیے ترکی کی ضرورت ہے: سہیل شاہین
،تصویر کا ذریعہReuters
طالبان نے کہا ہے کہ اُنھیں افغانستان کی تعمیرِ نو کے لیے ترکی کی سب سے زیادہ ضرورت ہے۔
طالبان ترجمان سہیل شاہین نے ترکی کے ایک حکومت نواز اخبار سے بات کرتے ہوئے کہا: ’ہمارا پورا انفراسٹرکچر تباہ ہو گیا ہے۔
ہم افغانستان کی تعمیرِ نو کریں گے اور ہر علاقے کو نئے سرے سے استوار کریں گے۔ ہمیں اس معاملے میں ترکی کی سب سے زیادہ ضرورت ہے۔‘
اُنھوں نے مزید کہا کہ ’ترکی ہمارے لیے بہت اہم ہے۔ یہ ایک باعزت اور مضبوط عالمی ملک ہے اور اسلامی برادری میں ایک اہم مقام رکھتا ہے۔ ترکی اور افغانستان کے تعلقات کا موازنہ کسی اور ملک سے نہیں کیا جا سکتا۔‘
اس سے قبل سہیل شاہین ایک اور ترک حکومت نواز نیوز چینل پر ترکی کو ایک ’برادر اسلامی ملک‘ قرار دے چکے ہیں۔ کابل پر قبضے کے صرف ایک دن بعد سولہ اگست کو اس گفتگو میں اُنھوں نے کہا تھا کہ وہ مستقبل میں ترکی کے ساتھ اچھے تعلقات چاہتے ہیں۔
جمعے کو ترک صدر رجب طیب اردوگان نے میڈیا نمائندوں سے بات کرتے ہوئے کہا کہ ترکی طالبان سے بات کر سکتا ہے۔
’اگر ضرورت پڑی تو ہم طالبان سے بات کر سکتے ہیں۔ ہمارا دروازہ جب بھی بجایا گیا، ہم دروازہ کھولیں گے۔‘
20 اگست 2021افغان مترجمین کو تنہا چھوڑنے کا الزام، برطانوی وزیرِ خارجہ تنقید کی زد میں
،تصویر کا ذریعہPA Media
برطانوی وزیرِ خارجہ ڈومینیک راب کو افغانستان میں پیدا ہونے والے بحران کے معاملے پر کڑی تنقید کا سامنا ہے کیونکہ جمعے کو یہ بات سامنے آئی کہ برطانوی فوج کی مدد کرنے والے مترجمین کی مدد کے لیے جو فون کال اُنھوں نے گذشتہ ہفتے کرنی تھی، وہ نہیں کی۔
ایک جونیئر وزیر کو افغانستان میں حکام سے بات کرنے کا ٹاسک دیا گیا تھا تاہم دفترِ خارجہ نے بی بی سی کو بتایا ہے کہ ’تیزی سے بدلتی ہوئی صورتحال کے باعث افغان حکومت کے ختم ہونے سے قبل فون کال کرنا ممکن نہیں ہو سکا۔‘
اس دوران وزیرِ خارجہ یونان میں چھٹیوں پر تھے۔ جب یہ بات سامنے آئی کہ ڈومینیک راب افغان وزیرِ خارجہ حنیف اتمر کو گذشتہ ہفتے کال کرنے کے لیے موجود نہیں تھے تو اپوزیشن جماعتوں نے ان کے استعفے کا مطالبہ کیا۔
اپوزیشن کی جانب سے الزام عائد کیا جا رہا ہے کہ برطانوی حکومت نے افغانستان پر طالبان کے قبضے کے دوران اُن افراد کو بے یار و مددگار چھوڑ دیا ہے جنھوں نے برطانوی فوج کے لیے مترجم کے طور پر خدمات انجام دی تھیں۔
کابینہ میں اُن کے ساتھیوں نے وزیرِ خارجہ کی حمایت کی ہے جو استعفے کے مطالبے مسترد کر رہے ہیں تاہم اُن کی اپنی جماعت کے کچھ ارکانِ پارلیمنٹ بھی ان سے خوش نہیں ہیں۔
20 اگست 2021طالبان کے آنے سے ’مستقبل میں خطرات میں اضافہ ہوگا‘
،تصویر کا ذریعہPA Media
برطانوی خفیہ ایجنسی ایم آئی فائیو کے سابق سربراہ لارڈ جوناتھن ایوانز نے کہا ہے کہ برطانیہ اور اس کے اتحادیوں کی جانب سے افغانستان مں انسداد دہشت گردی کی کارروائیوں پر توجہ دینے کے بجائے تعمیر نو پر توجہ دینا اس ’بڑی ناکامی‘ کا سبب بنا ہے۔
بی بی سی ریڈیو فور سے گفتگو کرتے ہوئے انھوں نے کہا کہ ان کی ذاتی رائے ہے کہ ’ہمیں چاہیے تھا کہ ہم انسداد دہشت گردی کے مقاصد پر کام کرتے۔‘
انھوں نے مزید کہا کہ اب آنے والے وقتوں میں افغانستان سے دو مختلف نوعیت کے خطرات سامنے آئیں گے۔
’میرے خیال میں دو مسئلے ہیں۔ اب وہاں پر القاعدہ جیسے گروہ کو مزید جگہ ملے گی اور پھر یہ بھی خبریں ہیں کہ دولت اسلامیہ کے عناصر وہاں موجود ہیں۔ اگر ان گروہوں کو موقع مل گیا کہ وہ اپنی موجودگی مستحکم کر لیں تو یہ مغربی ممالک کے لیے دوبارہ خطرہ بن سکتے ہیں۔‘
’دوسرا نفسیاتی اثر جو لوگوں پر آئے گا یہ دیکھتے ہوئے کہ مغربی ممالک افغانستان میں شکست کھا گئے تو یہ ان کو مزید راغب کرے گا اور اس کی وجہ سے وہ گروپ جو برطانیہ اور دیگر مغربی ممالک میں ہیں انھیں مزید حوصلہ ملے گا۔ تو میرے خیال میں نہ صرف عملی طور پر بلکہ نفسیاتی طور پر بھی آنے والے مہینوں اور سالوں میں خطرات میں اضافہ ہوگا۔ ‘
20 اگست 2021کابل ایئرپورٹ: آزادی کی منزل یا خطرات سے بھرا راستہ
گذشتہ اتوار کو طالبان کے قبضے کے بعد سے کابل کا حامد کرزئی انٹرنیشنل ایئرپورٹ ہزاروں افراد کے لیے امید کی آخری کرن کے طور پر ابھرا ہے جہاں وہ تمام افراد جو ملک چھوڑنے کے لیے بیتاب ہیں وہ وہاں کا رخ کر رہے ہیں۔
افغان شہری ہوں یا غیرملکی، تمام افراد کی ساری امید اب اس بات سے وابستہ ہے کہ وہ کس طرح کابل ایئرپورٹ میں داخل ہو جائیں۔
لیکن طالبان نے کہا ہے کہ وہ نہیں چاہتے کہ افغان افراد ملک چھوڑ کر جائیں۔ انھوں نے ایئرپورٹ جانے والے مرکزی راستے میں جگہ جگہ رکاوٹیں قائم کر دی ہیں اور ان افراد پر کہیں کہیں حملے بھی کیے ہیں۔
خبر رساں ادارے روئٹرز سے بات کرتے ہوئے ایک طالبان ترجمان نے کہا ہے کہ ان واقعات میں کم از کم 12 افراد ہلاک ہوئے ہیں۔
دوسری جانب ایئرپورٹ کے کمپاؤنڈ اندر چار ہزار امریکی فوجی تعینات ہیں جنھوں نے ایئرپورٹ کا کنٹرول سنبھالا ہوا ہے۔
واضح رہے کہ اتوار کے بعد سے کمپاؤنڈ کے اندر کم از کم دس افراد ہلاک ہوئے ہیں جن میں سے چار افراد وہ تھے جو ملک چھوڑنے کی کوشش میں امریکی طیارے سے لپٹ گئے لیکن پرواز کے بعد گر کر ہلاک ہو گئے۔
ان ہلاک ہونے والوں میں سے ایک افغانستان کی یوتھ فٹبال ٹیم کا ایک کھلاڑی بھی شامل ہے۔
20 اگست 2021افغانستان کے پڑوسی ممالک سے پناہ گزینوں کے لیے سرحدیں کھولنے کی اپیل
،تصویر کا ذریعہEPA
اقوام متحدہ کا ادارہ برائے پناہ گزین یو این ایچ سی آر نے جمعہ کو کہا کہ وہ افغان جو ملک چھوڑے نے کے خواہشمند ہیں ان کی بڑی تعداد ایسا کرنے سے قاصر ہے اور ان کی زندگیاں خطرے میں ہیں اگر انھیں ’باہر جانے کا راستہ نہ ملا۔‘
یو این ایچ سی آر کی ترجمان شبیہ منتو نے اس بات پر زور دیا کہ افغانستان کے تمام پڑوسی ممالک اپنی سرحدیں کھولیں تاکہ پناہ حاصل کرنے والے افغان افراد وہاں جا سکیں۔
جنیوا میں ایک پریس کانفرنس سے بات کرتے ہوئے ان کا کہنا تھا کہ ’یو این ایچ سی آر کو افغانستان میں انسانی حقوق کی پامالی کے حوالے سے خدشات ہیں، بالخصوص خواتین اور بچوں کے ساتھ ہونے والے سلوک کے بارے میں۔‘
20 اگست 2021برطانوی وزیر دفاع: امید ہے طالبان بدل گئے ہوں گے
،تصویر کا ذریعہGetty Images
،تصویر کا کیپشنبرطانوی وزیر دفاع جیمز ہیپی (دائیں)
برطانیہ کے وزیر دفاع جیمز ہیپی کو امید ہے کہ یہ طالبان وہ نہیں جو پہلے افغانستان پر قابض ہوئے تھے۔
’مجھے امید ہے کہ طالبان بدل گئے ہوں گے۔ توقع ہے کہ وہ بین الاقوامی بدنامی نہیں چاہیں گے اور اس بار ان کا رویہ مختلف ہوگا۔‘
برطانوی چینل آئی ٹی وی کے پروگرام ’گڈ مارننگ بریٹین‘ میں بات چیت کرتے ہوئے وزیر دفاع کا کہنا تھا: ’ہم نے طالبان کی اصلیت سے منھ نہیں موڑا لیکن یہ بھی ممکن ہے کہ وہ ویسے نہیں ہوں گے۔ ہمیں امید ہے کہ وہ ویسے نہیں ہوں گے۔‘
انھوں نے اعتراف کیا کہ انھیں اس بات پر دکھ ہے کہ برطانیہ افغانستان میں ان کے ساتھ کام کرنے والے ہر شخص کو نہیں نکال پائیں گے تاہم ان کی افواو کی کوشش ہوگی کہ وہ زیادہ سے زیادہ لوگوں کو نکالنے کی کوشش کریں گے
20 اگست 2021بریکنگ, نام نہاد دولت اسلامیہ: طالبان نے کچھ فتح نہیں کیا، امریکہ ملک ان کے حوالے کر گیا ہے, بی بی سی مانیٹرنگ
،تصویر کا ذریعہGetty Images
افغانستان میں طالبان کے غلبے کے بعد جاری ہونے والے اپنے پہلے تبصرے میں نام نہاد شدت پسند تنظیم دولت اسلامیہ نے کہا ہے کہ اس کے جہادی حریف نے افغانستان میں کوئی فتح حاصل نہیں کی بلکہ امریکہ نے ملک ان کے حوالے کر دیا ہے۔
دولت اسلامیہ نے 19 اگست کو اپنے ہفتہ وار اخبار النبا کے اداریے میں لکھا ہے ’یہ امن کی فتح ہے، اسلام کی فتح نہیں۔۔ مذاکرات کی فتح ہے، جہاد کی نہیں‘۔
دولت اسلامیہ نے ’نئے طالبان‘ کو ’اسلام کی آڑ میں ایک آلے کے طور پر‘ پیش کیا، جسے امریکہ مسلمانوں کو گمراہ کرنے اور خطے میں دولت اسلامیہ سے لڑنے کے لیے استعمال کرتا ہے۔
شدت پسند تنظیم کے حامیوں نے پہلے کہا تھا کہ افغان طالبان اب واشنگٹن کا ’گند صاف‘ کریں گے۔
طالبان اور دولت اسلامیہ ایک دوسرے کے سخت حریف ہیں۔
واضح رہے کہ طالبان نے افغانستان میں دولت اسلامیہ کی موجودگی کو نمایاں طور پر کمزور کرنے میں کلیدی کردار ادا کیا ہے، خاص طور پر 2019 میں جب طالبان کے حملوں اور امریکی اور افغان فورسز کی بیک وقت کارروائیوں کی وجہ سے دولت اسلامیہ مشرقی افغانستان میں اپنے گڑھ سے نکلنے پر مجبور ہو گئی تھی۔
اس کے بعد سے دولت اسلامیہ نے طالبان پر امریکہ کے ساتھ ملی بھگت کا الزام لگایا۔ اپنے تازہ ترین اداریے میں دولت اسلامیہ نے کہا ہے کہ اس کے عسکریت پسند جہاد کے ایک نئے مرحلے کی تیاری کر رہے ہیں۔
طالبان نے فروری 2020 میں امریکہ کے ساتھ امن معاہدے پر دستخط کیے اور افغانستان کو بین الاقوامی جہادی گروپوں کے ہاتھوں استعمال نہ ہونے دینے کے عزم کے بعد، آئی ایس نے کہا کہ وہ کسی معاہدے کا پابند نہیں ہے اور ملک میں اپنی جہادی مہم جاری رکھے گا۔
اداریے میں دولت اسلامیہ نے اس شک کا اظہار کیا ہے کہ طالبان ’اصل‘ شریعت لاگو نہیں کریں گے بلکہ وہ ’قدرے نرم‘ نوعیت کی شریعت نافذ کریں گے۔
20 اگست 2021جرمن خبر رساں ادارے کے صحافی کی تلاش میں طالبان نے ’ایک رشتہ دار کو قتل، دوسرے کو گولی مار دی‘
جرمنی کے خبر رساں ادارے ڈوئچے ویلے کے مطابق طالبان عسکریت پسندوں نے ان کے ایک صحافی کی تلاش کے دوران اس کے رشتہ دار کو قتل کر دیا ہے جبکہ ایک اور شخص کو گوی مار کر شدید زخمی کیا گیا ہے۔
ڈوئچے ویلے کے صحافی کو ڈھونڈنے کے لیے طالبان کے جنگجو مغربی شہر ہرات میں گھر گھر تلاشی لے رہے تھے۔
اطلاعات کے مطابق صحافی کے دیگر رشتہ دار طالبان سے بچ کر فرار ہو گئے ہیں۔
ڈوئچے ویلے کے ڈائریکٹر جنرل پیٹر لمبرگ کا کہنا ہے ’کل ہرات میں طالبان کے ہاتھوں ہمارے ایک ایڈیٹر کے قریبی رشتہ دار کا قتل ایک افسوسناک سانحہ ہے اور یہ ہمارے تمام ملازمین اور ان کے خاندانوں کو لاحق خطرات کا ثبوت ہے۔‘
’یہ واضح ہے کہ طالبان نے کابل اور دیگر صوبوں میں صحافیوں کو ڈھونڈنے کے لیے منظم تلاش شروع کر دی ہے۔ وقت ختم ہو رہا ہے۔‘
طالبان نے حالیہ ہفتوں میں ڈوئچے ویلے کے کم از کم تین صحافیوں کے گھروں پر حملے کیے ہیں۔
اقوام متحدہ کی ایک دستاویز بتاتی ہے کہ طالبان نیٹو اور امریکی افواج کے لیے کام کرنے والوں کی تلاش کے لیے سرچ آپریشن تیز کر رہے ہیں۔
20 اگست 2021’میرے نہیں پوری قوم کے ساتھ دھوکہ ہوا ہے‘
’مجھے صدمہ پہنچا ہے اور یقین نہیں آ رہا۔‘
اشرف غنی کی حکومت کی وزیرِ تعلیم رنگینہ حمیدی کا کہنا ہے کہ انھیں صدر غنی سے ایسے ملک چھوڑ جانے کی توقع نہیں تھی۔
دیکھیے بی بی سی کے ساتھ ان کی خصوصی گفتگو۔
20 اگست 2021پانچ سالہ افغان بچہ جنگ سے بچ نکلا مگر برطانیہ پہنچ کر زندگی کی بازی ہار گیا
،تصویر کا ذریعہPRESS ASSOCIATION
پانچ سالہ افغان پناہ گزین محمد منیب مجیدی کا خاندان برطانیہ میں اپنی جان بچانے کے لیے آیا تھا، وہ یہاں نئی زندگی شروع کرنے آئے تھے لیکن قسمت کو ایسا منظور نہ تھا۔
محمد کے والد افغانستان میں برطانوی سفارت خانے کے لیے کام کرتے تھے اور حکومت کی سکیم کے تحت برطانیہ پہنچے تھے تاکہ ان ترجمانوں اور معاون عملے کو دوبارہ آباد کیا جا سکے جن کی جانوں کو طالبان سے خطرہ ہو۔
محمد منیب مجیدی کا خاندان افغانستان کی جنگ سے تو بچ کر نکل آیا مگر برطانیہ پہنچنے کے بعد اپنے بیٹے کو کھو دیا۔
گذشتہ روز پولیس نے شیفیلڈ ہوٹل کی کھڑکی سے گر کر ہلاک ہونے والے اس پانچ سالہ لڑکے کی شناخت کر لی ہے جن کا نام محمد منیب مجیدی بتایا گیا ہے۔
مجیدی نویں منزل کے کمرے سے گر گیا جہاں وہ اپنی والدہ کے ساتھ رہ رہا تھا۔
ہوٹل میں محمد کے خاندان کے ساتھ رہنے والے ایک ساتھی افغان نے بتایا کہ مجیدی کا خاندان 15 دن پہلے برطانیہ پہنچا تھا۔
انھیں افغانی شہریوں کی نقل مکانی اور امدادی پالیسی (اے آر اے پی) سکیم کے تحت برطانیہ منتقل کیا گیا تھا۔
افغانستان میں برطانوی فوج کے مترجم کے طور پر کام کرنے والے اس شخص نے بتایا کہ ان کے بیٹے نے انھیں لڑکے کے گرنے کے بارے میں بتایا اور وہ مدد کے لیے باہر گئے۔
انھوں نے بتایا کہ ہوٹل میں موجود ہر شخص اس واقعے کے بعد سے پریشان ہے۔
20 اگست 2021پاکستانی سفیر: اسلام آباد افغان طالبان سے رابطے میں ہے
افغانستان میں پاکستان کے سفیر منصور احمد خان کا کہنا ہے کہ اسلام آباد افغان طالبان کے ساتھ رابطے میں ہے اور کابل پر طالبان کے قبضے کے بعد عالمی برادری کو سہولت فراہم کر رہا ہے۔
کابل میں پاکستان کے نجی چینل جیو نیوز سے بات کرتے ہوئے منصور احمد خان کا کہنا تھا کہ ’طالبان سے رابطہ ہوا ہے، ہم ان کے ساتھ دوحہ امن عمل میں بھی شامل تھے، قطرمیں ملا عبدالغنی برادر اور دیگر سے بات چیت ہوئی تھی اور عبداللہ عبداللہ کی سربراہی میں افغان وفد سے بھی ہماری بات ہوئی ہے۔‘
ان کا کہنا تھا کہ وہ ’دونوں فریقوں سے رابطے میں ہیں‘ لیکن ان لوگوں کے نام بتانے سے گریز کیا جن سے وہ بات چیت کر رہے ہیں۔ انھوں نے کہا کہ پاکستان افغانستان میں شراکت داری پر مبنی حکومت دیکھنا چاہتا ہے تاکہ وہ خطے میں پائیدار امن کی طرف بڑھ سکے۔
پاکستانی سفیر نے کہا کہ اسلام آباد پہلے جب بھی کابل سے مذاکرات کرتا رہا ہے، اس نے ہمیشہ افغانستان سے کہا ہے کہ وہ اپنی سرزمین کو عسکریت پسند گروہوں جیسے تحریک طالبان پاکستان، نام نہاد دولت اسلامیہ، القاعدہ یا ای ٹی آئی ایم (جس سے چین کو خطرہ ہے) کے لیے استعمال نہ ہونے دے۔
چند روز قبل طالبان کے دارالحکومت پر قبضے کے بعد افغانستان میں سفارتی بحران کے بارے میں بات کرتے ہوئے سفیر نے کہا کہ وزیر اعظم عمران خان کی حکومت نے اس نازک موڑ پر عالمی برادری اور افغانیوں کو سہولت فراہم کرنے کا فیصلہ کیا ہے۔
X پوسٹ نظرانداز کریں
X کا مواد دکھانے کی اجازت دی جائے؟?
اس تحریر میں ایسا مواد ہے جو X کی جانب سے دیا گیا ہے۔ کسی بھی چیز کے لوڈ ہونے سے قبل ہم آپ سے اجازت چاہتے ہیں کیونکہ یہ ممکن ہے کہ وہ کوئی مخصوص کوکیز یا ٹیکنالوجیز کا استعمال کر رہے ہوں۔ آپ اسے تسلیم کرنے سے پہلے X ککی پالیسی اور پرائیویسی پالیسی پڑھنا چاہیں گے۔ اس مواد کو دیکھنے کے لیے ’تسلیم کریں، جاری رکھیں‘ پر کلک کریں۔
تنبیہ: بی بی سی دیگر ویب سائٹس کے مواد کی ذمہ دار نہیں ہے۔
X پوسٹ کا اختتام
20 اگست 2021افغانستان کا بحران: امریکی سیکریٹری آف سٹیٹ انتھونی بلنکن اور برطانوی وزیرِ خارجہ ڈومینک راب پر شدید تنقید
امریکی جریدے وال سٹریٹ جرنل کی ایک خبر کے مطابق افغانستان میں تقریباً 25 امریکی سفارت کاروں نے گذشتہ ماہ ایک خط میں سیکریٹری آف سٹیٹ انتھونی بلنکن کو کابل پر طالبان کی جانب سے قبضے کے خدشے کے حوالے سے آگاہ کیا تھا۔
خبر میں کہا گیا ہے کہ یہ خط و کتابت 13 جولائی کو ایک خفیہ ذریعے کے راستے بھیجی گئی جس کا مقصد احتجاج ریکارڈ کرنا تھا اور اس میں بحران کے خاتمے اور انخلا کو تیز کرنے کے طریقوں پر سفارشات موجود تھیں۔
بائیڈن حکومت پر تنقید کی جاری ہے کہ اس نے سفارت کاروں اور دیگر شہریوں کے ساتھ معاونوں اور مترجموں کو بھی ملک سے نکالنے کی کوششوں میں تاخیر کی ہے۔
امریکی حکام نے تفصیلات کی تصدیق کرنے یا خط و کتابت کے مندرجات کو شیئر کرنے سے انکار کر دیا ہے۔
،تصویر کا ذریعہafp
دوسری جانب افغانستان کے بحران سے نمٹنے کے حوالے سے برطانوی سیکریٹری خارجہ ڈومینک راب بھی شدید تنقید کی زد میں ہیں۔
بتایا جا رہا کہ حکومت نے سیکرٹری راب سے کہا تھا کہ وہ افغانستان سے مترجموں کو نکالنے میں مدد حاصل کرنے کے لیے ایک فون کال کریں، لیکن سیکرٹری دیگر کالوں میں مصروف تھے لہذا ایک جونیئر وزیر کو یہ کام سونپا گیا۔
تاہم اب بتایا جا رہا ہے کہ یہ فون کال ممکن نہیں ہو سکی۔
جب یہ انکشاف ہوا کہ گذشتہ جمعہ کو جب طالبان کابل کی جانب پیش قدمی کر رہے تھے، سیکرٹری راب چھٹیوں پر تھے اور یہ اہم فون کال کرنے کے لیے دستیاب نہیں تھے
اپوزیشن جماعتوں نے ان سے مستعفی ہونے کا مطالبہ کیا ہے۔
20 اگست 2021طالبان کا افغانستان: 23 برس قبل جب طالبان نے مزارِ شریف فتح کیا
15 اگست 2021 کو طالبان نے افغانستان کے دارالحکومت کابل پر قبضہ کر لیا اور ملک کے صدر اشرف غنی افغانستان چھوڑ کر چلے گئے۔
طالبان اس سے قبل نوے کی دہائی میں افغانستان میں برسراقتدار رہ چکے ہیں۔ جانیے اس وقت کا آنکھوں دیکھا حال اس آڈیو سٹوری میں جس کے مصنف ہیں افغان صحافی مرتضیٰ بلخی۔
YouTube پوسٹ نظرانداز کریں
Google YouTube کا مواد دکھانے کی اجازت دی جائے؟?
اس تحریر میں ایسا مواد ہے جو Google YouTube کی جانب سے دیا گیا ہے۔ کسی بھی چیز کے لوڈ ہونے سے قبل ہم آپ سے اجازت چاہتے ہیں کیونکہ یہ ممکن ہے کہ وہ کوئی مخصوص کوکیز یا ٹیکنالوجیز کا استعمال کر رہے ہوں۔ آپ اسے تسلیم کرنے سے پہلے Google YouTube ککی پالیسی اور پرائیویسی پالیسی پڑھنا چاہیں گے۔ اس مواد کو دیکھنے کے لیے ’تسلیم کریں، جاری رکھیں‘ پر کلک کریں۔
تنبیہ: بی بی سی دیگر ویب سائٹس کے مواد کی ذمہ دار نہیں ہے۔ YouTube کے مواد میں اشتہارات ہو سکتے ہیں۔
YouTube پوسٹ کا اختتام
20 اگست 2021جنرل ٹیلر: موسم اجازت دے تو امریکہ کابل سے یومیہ 9000 افراد کو نکالنے کی صلاحیت رکھتا ہے
X پوسٹ نظرانداز کریں
X کا مواد دکھانے کی اجازت دی جائے؟?
اس تحریر میں ایسا مواد ہے جو X کی جانب سے دیا گیا ہے۔ کسی بھی چیز کے لوڈ ہونے سے قبل ہم آپ سے اجازت چاہتے ہیں کیونکہ یہ ممکن ہے کہ وہ کوئی مخصوص کوکیز یا ٹیکنالوجیز کا استعمال کر رہے ہوں۔ آپ اسے تسلیم کرنے سے پہلے X ککی پالیسی اور پرائیویسی پالیسی پڑھنا چاہیں گے۔ اس مواد کو دیکھنے کے لیے ’تسلیم کریں، جاری رکھیں‘ پر کلک کریں۔
تنبیہ: بی بی سی دیگر ویب سائٹس کے مواد کی ذمہ دار نہیں ہے۔
X پوسٹ کا اختتام
افغان بحران پر جو بائیڈن کی حکومت پر تنقید بڑھنے کے بعد، پینٹاگون نے کابل کے بین الاقوامی ہوائی اڈے سے افغان شہریوں کے باقاعدہ انخلا کی تصاویر جاری کی ہیں۔
نیٹو کے ایک عہدیدار اور ایک طالبان عہدیدار نے روئٹرز کو بتایا کہ طالبان عسکریت پسندوں سے فرار ہونے کے لیے حال ہی میں کابل ایئرپورٹ پر حملے میں کم از کم 12 افراد ہلاک ہوئے تھے۔
امریکی فوج نے جمعرات کو کہا کہ اس کی افواج کابل ہوائی اڈے کی حفاظت کر رہی ہیں۔
پینٹاگون نے ٹوئٹر پر تصاویر شائع کی ہیں جن میں امریکی فوجی لوگوں کو کھانا پہنچا رہے ہیں اور افغان شہری طیاروں میں سوار ہونے کے لیے قطار میں کھڑے ہیں۔
پینٹاگون نے کہا ہے کہ وہ افغانستان سے انخلا کے عمل کو تیز کرے گا۔ پینٹاگون کا یہ بھی کہنا ہے کہ پچھلے پانچ دنوں میں 7000 شہری ان پروازوں کے ذریعے ملک سے نکلے ہیں۔
جنرل ہینک ٹیلر نے نامہ نگاروں کو بتایا کہ صرف گذشتہ 24 گھنٹوں میں 2 ہزار افراد کو نکالا گیا ہے۔
جنرل ٹیلر نے کہا کہ اگر اب موسم اجازت دے تو امریکہ کابل سے روزانہ 9000 افراد کو نکالنے کی صلاحیت رکھتا ہے۔
20 اگست 2021ایمنسٹی انٹرنیشنل: جولائی میں طالبان نے ہزارہ افراد کا قتل عام کیا
،تصویر کا ذریعہGetty Images
انسانی حقوق کے گروپ ایمنسٹی انٹرنیشنل کا کہنا ہے کہ طالبان نے حال ہی میں افغانستان میں ہزارہ اقلیت کے کئی افراد کا ’قتل عام‘ کیا اور ان پر وحشیانہ تشدد کیا۔
صوبہ غزنی میں جولائی کے اوائل میں ہونے والی ہلاکتوں کے متعلق عینی شاہدین نے دل دہلا دینے والے بیانات دیے ہیں۔
حالیہ ہفتوں میں افغانستان پر قبضہ کرنے کے بعد سے طالبان نے اپنا ایک بدلا ہوا روپ پیش کرنے کی کوشش کی ہے۔ لیکن ایمنسٹی انٹرنیشنل کا کہنا ہے کہ یہ واقعہ طالبان کی خوفناک طرزِ حکمرانی کی جانب اشارہ کرتا ہے۔
ہزارہ برادری افغانستان کا تیسرا بڑا نسلی گروہ ہے جو مذہبی لحاظ سے شیعہ مسلک سے تعلق رکھتے ہیں اور سنی اکثریت والے افغانستان میں طویل مدت سے امتیازی سلوک اور ظلم و ستم کا سامنا کرتے آئے ہیں۔
جمعرات کو شائع ہونے والی رپورٹ میں ایمنسٹی نے کہا کہ مشرقی صوبے غزنی کے ضلع مالستان میں 4 اور 6 جولائی کے درمیان نو ہزارہ افراد کو قتل کیا گیا۔
گروپ نے عینی شاہدین کے انٹرویو کیے اور قتل کے بعد فوٹو گرافی کے شواہد کا جائزہ لیا۔
گاؤں والوس نے بتایا کہ وہ حکومتی فورسز اور طالبان جنگجوؤں کے درمیان لڑائی میں شدت آنے پر پہاڑوں کی طرف بھاگ گئے تھے۔
جب ان میں سے کچھ کھانا لینے کے لیے منڈارخت گاؤں واپس آئے تو طالبان نے ان کے گھر لوٹ لیے ہیں اور ان کا انتظار کر رہے ہیں۔ اس کے علاوہ کچھ مرد جو اپنے گھروں کی طرف جاتے ہوئے منڈارکھٹ سے گزرے تھے ان پر بھی حملہ کیا گیا۔
مبینہ طور پر کُل چھ افراد کو گولیاں ماری گئیں، کچھ کو سر میں بھی گولیاں ماری گئیں جبکہ تین کو تشدد کا نشانہ بنایا گیا۔
عینی شاہدین کے مطابق ایک شخص کا اس کے اپنے رومال سے گلا گھونٹا گیا اور اس کے بازو کے پٹھوں کو کاٹ کر الگ کر دیا گیا۔ دوسرے کے جسم کو ٹکڑے ٹکڑے کر دیا گیا۔
ایک عینی شاہد نے بتایا کہ انھوں نے جنگجوؤں سے پوچھا کہ ان کی برادری کے افراد پر ایسا ظلم کیوں کیا؟
مبینہ طور پر ایک جنگجو نے جواب دیا ’لڑائی میں ہر کسی کو مرنا پڑتا ہے، اس سے کوئی فرق نہیں پڑتا کہ آپ کے پاس بندوقیں ہیں یا نہیں۔ یہ جنگ کا وقت ہے۔‘