'ሓላፍነት ዝጐደሎ ባህሪ ሩስያ ንኩላትና ሓደጋ'ዩ'- ወተሃደራዊ ኪዳን ሰሜን ኣትላንቲክ (ኔቶ)

ቀጥታዊ ሸፈነ

1. 4 ጉንቦት 2026ኢማራት ዒላማ ሚሳይላት ኢራን ትኸውን፡ ሰራዊት ኣመሪካ ንጃላቡ ኢራን የጥቅዕ

   ኣብ ሕቡራት ኢማራት ዓረብ ዝርከብ ወደብ ነዳዲ ዒላማ መጥቃዕቲ ሰብ-ኣልቦ ነፈርቲ ከምዝኾነ ሰብመዚ እታ ሃገር ኣፍሊጦም።

   ኣብቲ ኣብ ፉጃይራ ዝርከብ መደበር ነዳዲ፡ ዓቢ ሃልሃልታ ባርዕ ሓዊ ከምዝተራእየ ጸብጻባት ሓቢሮም።

   መጥፋእቲ ሓዊ ነቲ ባርዕ ንምቁጽጻር ይሰርሑ ከምዘለዉ ብመንግስቲ ፉጃይራ ዝመሓደር ሚድያ ገሊጹ።

   ፉጃይራ፡ ኣብታ ሃገር ዝዓበየት ወደብን ነዳዲ ዝኽዘነላን ምዃና ይፍለጥ።

   ብኻልእ ወገን፡ ብኣንፈት ኢራን ዝተበገሰ ሚሳይላት'ውን ናብ ኢማራት ከምዝተወንጨፈ ተገሊጹ።

   ሚኒስትሪ ምክልኻል እታ ሃገር ከምዝበሎ፡ ጸረ-ኣየር ሰለስተ ሚሳይላት ኣበርዒኖም ኣለዉ።

   እዚ ከምዚ'ሉ እንከሎ፡ ሓይልታት ኣመሪካ ኣብ ልዕሊ ናኣሽቱ ጃላቡ ሓይሊ ባሕሪ ኢራን መጥቃዕቲ ከምዝፈጸሙ ፕረዚደንት ዶናልድ ትራምፕ ሓቢሩ።

   ሓይልታት ኢራን ንገለ ብመጻብቦ ሆርሙዝ ክሓልፋ ዝፈተና መራኽብ ኲናት ኣመሪካ ንምዕጋት ናይ መጠንቀቕታ ጠያይት ከምዝተኮሱ ድሕሪ ምግላጾም'ያ ኣመሪካ ነቲ መጥቃዕቲ ከምዘካየደት ትገልጽ ዘላ።

   እዚ ሎሚ ዝተራእየ ነቲ ወጥሪ ዘጋድድ ሓድሽ ምዕባለታት እቲ ኣብ መንጐ ክልቲኦም ወገናት ጸኒዑ ዝጸንሐ ምቁራጽ ተዂሲ ብምጥሓስ ናብ ደግሲ ተጻብኦታት ከይምለሱ ስግኣት ፈጢሩ ይርከብ።

   ድሮ እቲ ክወርድ ትጽቢት ክግበረሉ ዝጸንሐ ዋጋ ነዳዲ ድሕሪ'ዚ ምዕባለታት መሊሱ ክንህር ጀሚሩ ኣሎ።

2. 4 ጉንቦት 2026ኢራን ንመግለጺ ሰራዊት ኣመሪካ ትነጽግ

   መራኽብ ኲናትን ንግዲን ብደገፍ ሓይልታት ኣመሪካ ብመጻብቦ ሆርሙዝ ከምዝሓለፋ ዝሕብር መግለጺ ሰራዊት ኣመሪካ "ጠቕሊሉ ቅኑዕ ኣይኮነን" ክትብል ኢራን ምላሽ ሂባትሉ።

   ኣቐድም ኣቢሉ፡ ማእከላይ እዚ ሰራዊት ኣመሪካ፡ ክልተ ባንዴራ ኣመሪካ ዝሰቐላ መራኽብ ንግዲ በቲ መጻብቦ ከምዝሓለፈ ገሊጹ ነይሩ።

   ሓይልታት ሓለዋ እስላማዊ ሰውራ ኢራን ኣብ ዘውጽእዎ መግለጺ፡ ሰራዊት ኣመሪካ ዝሃቦ ሓበሬታ "ውጹእ ሓሶት" እዩ ክብሉ ነጺጎም።

   "መራኽብ ንግዲ ይኹን ነዳዲ" በቲ ወሽመጥ ከምዘይሓለፋ ብመንገዲ መንግስታዊ ማዕከን ዜና ዝወጸ ካልእ ሓበሬታ የረድእ።

   ብዘይካ'ዚ 'ዲስትሮየርስ' ዝተባህላ መራኽብ ሓይሊ ባሕሪ ኣመሪካ'ውን በቲ መጻብቦ ሓሊፈን ናብ ወሽመጥ ኣትየን ከምዘለዋ ዋሽንግተን ሓቢራ ነይራ።

   ሰራዊት ኢራን ብወገኑ ኣብ ዝሃቦ መብርሂ፡ ናብ ኣንፈት ናይተን ራዳር ብምጥፋእ ክሓልፋ ዝፈተና መራኽብ ኲናት ኣመሪካ ናይ መጠንቀቕታ ጥይት ከምዝተኮሰ ኣፍሊጡ።

3. 4 ጉንቦት 2026ናይጀርያ ዜጋታታ ካብ ደቡብ ኣፍሪቃ ከተውጽእ ትዳሎ ኣላ

   በቲ ኣብ ደቡብ ኣፍሪቃ ዝካየድ ዘሎ ንኣፍሪቃውያን ስደተኛታት ዒላማ ዝገበረ መጥቃዕትታት ዝሰግአት ናይጀርያ ዜጋታታ ንምውጻእ ውጥን ከምዘውጽአት ኣፍሊጣ።

   ሚኒስተር ጉዳያት ወጻኢ እታ ምዕራብ ኣፍሪቃዊት ሃገር ቢያንካ ኦዱመግዉ ከምዝበለቶ፡ ዛጊት 130 ሰባት ካብ ደቡብ ኣፍሪቃ ንምውጻእ ተመዝጊቦም ኣለዉ።

   ፕረዚደንት ቦላ ቲኑቡ ነቲ ኣብ ደቡብ ኣፍሪቃ ኣብ ልዕሊ ወጻእተኛታት ዝካየድ ዘሎ "ጽልኢ ወጻእተኛታት፡ ዘረባታት ጽልኢን ጸረ-ስደተኛታት ዝኾነ ተዃሳሒ መግለጺታትን" ዝደረኾ ጎነጽ ከምዝኾነነ'ውን እታ ሚኒስተር ኣመልኪታ።

   በቲ ኩነታት ዝተቖጥዐት ኣቡጃ ንኣምባሳደር ፕሪቶርያ ኣብ ናይጀርያ ብምጽዋዕ ተቓውሞታታ ገሊጻ ኣላ።

   ኣብ ደቡብ ኣፍሪቃ፡ ንወጻእተኛታት፡ ብፍላይ ንኣፍሪቃወያን ስደተኛታት ዒላማ ዝገበረ መጥቃዕትታትን ጓስጓሳትን ክግበር ምጽንሑ ይፍለጥ።

   ብዙሓት ሓተትቲ ዕቑባ ዝርከብዎም ስደተኛታት'ውን ግዳይ ሞት ኮይኖም እዮም። ኣብዚ ቀረባ መዓልታት ድማ ኣንጻር ስደተኛታት ጐስጓሳት ክካየድ ቀንዩ'ሎ።

   ኣብ ርእሰከተማ ፕሪቶርያን ዓባይ ከተማ ጆሃንስበርግን ብገለ ፖለቲካዊን ማሕበራዊ ውዳቤታትን፡ ከምኡ'ውን ፖለቲከኛታት ዝተደፋፍኡ ጸለምቲ ደቡብ ኣፍሪቃውያን "ዘይሕጋውያን ስደተኛታት" ካብታ ሃገር ክወጹ ዝጽውዕ ሰላማዊ ሰልፍታት ከካይዱ ቀንዮም።

   እንተኾነ፡ ኣብታ ሃገር ዘሎ ጽልኣት ስደተኛታት (ዜኖፎቢያ) ናብቶም ወግዓዊ ሰነድ ዘይምብሎም ስደተኛታት ጥራይ ዝቐንዐ ኣይኮነን፣ መንበሪ ፍቓዱ ብዘየገድስ ዝኾነ ኣፍሪቃዊ ወይ ኤስያዊ ወጻእተኛ ግዳይ መጥቃዕቲ ክኸውን ከምዝኽእል'ዩ ዝግለጽ።

   ብኣሚት ኣሽሓት ዝቑጸሩ ሓተትቲ ዑቕባን ተቐባልነት ዝረኸቡ ስደተኛታትን ኣብ ደቡብ ኣፍሪቃ ከምዘለዉ ይንገር።

4. 4 ጉንቦት 2026ሰራዊት ኣመሪካ፡ ልዕሊ 15 ሽሕ ወተሃደራትን 100 ነፈርትን ን'ፕሮጀክት ሓርነት' ከምዝድግፋ ገሊጹ

   ኣብቲ ትራምፕ ዝኣወጆ ንዝተዓግታ መራኽብ ንምውጻእ ኣብ ዝግበር ዓይነት ወተሃደራዊ ወፍሪ "ፕሮጀክት ሓርነት" ንምድጋፍ፡ ሰራዊት ኣመሪካ፡ ልዕሊ 15 ሽሕ ወተሃደራትን 100 ነፈርትን ከም ዘዋፍር ማእከላይ እዚ (ሴንትኮም) ገሊጹ።

   እቲ እዚ ብሰንበት ኣብ ዘውጽኦ መግለጺ፡ “ሓይልታት ማእከላይ እዚ ኣመሪካ፡ ብመጻብቦ ሆርሙዝ ዝግበር ጕዕዞ ንግዳዊ መራኽብ ውሑስ ንምግባርን ናጽነቱ ንምምላስን፡ ካብ 4 ግንቦት ንፕሮጀክት ሓርነት ምድጋፍ ክጅምሩ እዮም” ይብል።

   እዚ ደገፍ 15 ሽሕ ኣባላት፡ ሚሳይላት ዝዓጠቓ መራኽብን፡ ልዕሊ 100 ነፈርትን ዘጠቓልል እዩ።

   ሴንትኮም "ርብዒ ካብ ንግዲ ነዳዲ ዓለምን ብዙሕ መጠን ፍርያት ድኹዒን በቲ መጻብቦ ይጓዓዝ” ይብል።

5. 4 ጉንቦት 2026ትራምፕ፡ ‘ፕሮጀክት ሓርነት መራኽብ’ ካብ መጻወድያ ሆርሙዝ

   ፕረዚደንት ዶናልድ ትራምፕ፡ ካብ ሰኑይ ጀሚራ ኣብ መጻብቦ ሆርሙዝ ንዝተዓግታ መራኽብ ንምውጻእ ኣመሪካ ክትሕግዝ ምዃና ገሊጹ።

   “ንጽቡቕ ኢራን፡ ማእከላይ ምብራቕን ኣመሪካን፡ ነዘን ዝተዓግታ መራኽብ ዝተፈላለያ ሃገራት፡ ካብዚ መጻብቦ ብሰላም ከነውጽአን ምዃንና ሓቢርናየን ኣለና፡” ክብል ኣብ ማሕበራዊ መራኸቢታት ጽሒፉ፤ ኣየኖት ሃገራት ከም ዝሕገዛ ግን ኣይገለጸን።

   ትራምፕ ኣብቲ “ፕሮጀክት ናጽነት” ክብል ዝጸውዖ መስርሕ ዝዀነ ይዅን ምትእትታው ብሓይሊ ከም ዝፍታሕ ኣፈራሪሑ’ሎ።

   ኢራን፡ እቲ ኲናት ኣብ ለካቲት ካብ ዝጅምር ኣትሒዙ፡ በቲ ዓቢይ ዓለምለኻዊ መስመር ማይ ኣቢለን ንዝሓልፋ መራኽብ ደሪታቶ ጸኒሓ እያ።

   ኣመሪካ ብወገና ኣብ ወደባት ኢራን ዕግታ ሓይሊ ባሕሪ ኣጽኒዓ ኣላ። ኣዛዚ እስላማዊ ሓለዋ ሰውራ ኢራን ዝነበረ ላዕለዋይ ኣባል ባይቶ ኢራን ኢብራሂም ዓዚዚ፡ “ዝኾነ ምትእትታው ኣመሪካ ከም ምጥሓስ ስምምዕ ደው ምባል ተዅሲ” ከም ዝቝጸር ኣፍሊጡ።

   ኣብቲ ትራምፕ ዝጸሓፎ መልእኽቲ፡ ወከልቲ ኣመሪካ ምስ ኢራን “ኣዝዩ እወታዊ” ዘተ ይገብሩ ከምዘለዉን፡ እቲ ዝርርብ “ንዅሉ ኣዝዩ እወታዊ ነገር ከምጽእ ከምዝኽእልን” እውን ገሊጹ።

   ትራምፕ ወሲኹ፡ እቲ ስርሒት ኣየኖት ሃገራት ከይዘርዘረ፡ ብስም ኣመሪካ፡ ኢራንን ካልኦት ሃገራት ማእከላይ ምብራቕን ዝግበር “ሰብኣዊ ምልክት” ክኸውን’ዩ ኢሉ።

   ምስ ቴህራን ዝግበር ምትሕብባር ብኸመይ ከም ዝመሓደር ተወሳኺ ዝርዝር ሓበሬታ ግን ኣይሃበን። ትራምፕ ኣስዒቡ፡ “ኣብ ኵሉ ኵነታት፡ እቲ ከባቢ ንመጓዓዝያ ባሕሪ ውሑስ ክሳብ ዝኸውን ንድሕሪት ከምዘይብሉ፡ ከምኡ'ውን ካልእ ኵሉ... ምንቅስቓስ መርከብ ፍጹም ጉድለት ንዘይገበሩ ሰባት፡ ኩባንያታትን ሃገራትን ሓራ ንምውጻእ ጥራይ” ዝዓለመ ምዃኑ ገሊጹ።

6. 30 ሚያዝያ 2026ፖሊስ ብሪጣንያ ኣብ ልዕሊ ክልተ ኣይሁዳውያን ዝተፈፀመ መጥቃዕቲ ካራ ግብረ ራዕዲ’ዩ ኢሉ

   ፖሊስ ዓባይ ብሪጣንያ ኣብ ልዕሊ ክልተ ኣይሁዳውያን ደቂተባዕትዮ ዝተፈፀመ መጥቃዕቲ ካራ ስዒቡ ግብረ ራዕዳዊ መጥቃዕቲ ከም ዝተፈፀመ ኣፍሊጡ።

   እቶም ክልተ ኣይሁዳውያን ኣብ ሰሜናዊ ለንደን ጎልደርስ ግሪን ኣብ ዝበሃል ከባቢ እዩ መጥቃዕቲ ካራ ተፈፂምዎም። ፖሊስ እታ ሃገር፡ እዚ ተግባር ግብረ ራዕዲ ከም ዝኾነ ኣፍሊጡ።

   እቶም ግዳያት፡ ወዲ 34 ዓመት ሺሎሜ ራንድን ወዲ 76 ዓመት ሞሼ ሺንን ይበሃሉ።

   ኣብቲ መጥቃዕቲ ዝተፈፀመሉ ከባቢ ሻቡ ንሻቡ ሕክምና ክግበረሎም እንከሎ፡ ኣብዚ ሕዚ እዋን ኣብ ሆስፒታል ኣብ ደሓን ኵነታት ይርከቡ።

   ወዲ 45 ዓመት ኣብ ሶማልያ ዝተወለደ ብሪጣንያዊ ውልቀሰብ፡ ብፈተነ ቅትለት ተጠርጢሩ ኣብ ቀይዲ ውዒሉ ኣሎ።

   ቀዳማይ ምኒስተር ዓባይ ብሪጣንያ ሰር ከር ስታርመር፡ ነዚ “ፀረ ሴማዊ መጥቃዕቲ” “ኣዝዩ ዘሰንብድን ተቐባልነት ዘይብሉን፡” ብምባል ኰኒንዎ።

   ስታርመር ወሲኹ፡ “ኣብ ልዕሊ ኣይሁዳውያን ማሕበረሰብና ዝፍፀም መጥቃዕቲ፡ ኣብ ልዕሊ ብሪጣንያ ዝፍፀም መጥቃዕቲ’ዩ፡” ኢሉ።

   ፖሊስ ሜትሮፖሊታን፡ ብረቡዕ ‘ሃይፊልድ’ ኣብ ዝበሃል ጐደና መጥቃዕቲ ከም ዝተፈፀመ ሪፖርት ምስ በፅሖ፡ በቲ ናይቲ ከባቢ ኣቈፃፅራ ሰዓት 11፡16 ፖሊስ ቅልጡፍ ምላሽ ከም ዝሃቡ ገሊፁ።

   እቲ ጥርጡር፡ ንቕልጡፍ ምላሽ ናብቲ ቦታ ንዝኸዱ ፖሊስ ክወግእ ፈቲኑ’ኳ እንተ ነበረ፡ ዝወረደ ጉድኣት ግና የሎን።

   ዝተዘርግሐ ተንቀሳቓሲ ምስሊ፡ ማእሰርቲ እቲ ጥርጡር፡ ከምኡ’ውን ፖሊስ ነቲ ውልቀሰብ “ኣብ ባይታ በጥ ክብልን” “ዝሓዞ ካራ ክድርብን” ብተደጋጋሚ እናኣዘዙዎ የርኢ።

   ኮምሽነር ፖሊስ ሜትሮፖሊታን ሰር ማርክ ሮውሊ፡ ነቲ ጥርጡር ኣብ ቀይዲ ዘውዓሉ መኰንናት ፖሊስ፡ ኣብቲ ህሞት ዘይተዓጠቑ ምንባሮምን እቲ ጥርጡር ተፈንጃሪ ሒዙ ከይኸውን ሰጊኦም ምንባሮምን ብምግላፅ፡ ንትብዓቶም ንኢዱ።

   እቲ ጥርጡር፡ ድሕረባይታ ከቢድ ዓመፅን ፀገም ጥዕና ኣእምሮን ከም ዝነበሮ ተገሊፁ።

7. 29 ሚያዝያ 2026ፈረንሳ ዜጋታታ ካብ ማሊ ክወጹ ተማሕጺና

   ፈረንሳ ዜጋታታ "ኣብ ዝቐልጠፈ እዋን" ካብ ማሊ ክወጹ ጸዊዓ።

   እቲ ሎሚ ዝወጸ መጠንቀቕታ፡ ፈረንሳውያን ናብታ ምዕራብ ኣፍሪቃዊት ሃገር ከይገሹ'ውን ዝመክር'ዩ።

   ኣብዚ ቀረባ መዓልታት ዕጡቓት ተቓወምቲ ብዘካየድዎ መጥቃዕትታት እታ ሃገር ኣብ ዓቢ ስግኣት ኣትያ ትርከብ።

   ኣብ ዝሓለፈ ቀዳም ኣብ ዝተፈላለዩ ከባቢታት ርእሰከተማ ባማኮ ድምጺ ተዂሲን ነትጒን ድሕሪ ምስምዑ፡ ሚኒስተር ምክልካል እታ ሃገር ከምዝተቐትለ ይፍለጥ።

   ብወተሃደራዊ ዕልዋ ስልጣን ዝሓዘ ጀነራል ኣኢሚ ጎይታ ግን፡ ነቲ ተፈጢሩ ዝነበረ ጸጥታዊ ኩነታት ኣብ ትሕቲ ቁጽጽሮም ከምዘእተውዎ'ዩ ዝምጉት ዘሎ።

   ንሓይልታት መንግስቲ ንምድጋፍ ኣብታ ሃገር ተዋፊሮም ዘለዉ ወተሃደራት ሩስያ ካብታ ኣብ ትሕቲ ተቓወምቲ ኣትያ ዘላ ሰሜናዊት ከተማ ኪዳል ክወጹ ከምዝተገደዱ ኣፍሊጦም ነይሮም'ዮም።

8. 29 ሚያዝያ 2026ንከይማረኹ ቦምባ ፈንጂሮም ዝተቐትሉ ወተሃደራት ሰሜን ኮርያ 'ጀጋኑ እዮም'- ኪም

   መራሒ ሰሜን ኮሪያ ነቶም ኣብ ኲናት ዩክረይን ርእሶም ዝቐተሉ ወተሃደራቱ "ጀጋኑ እዮም" ክብል ንኢዱ።

   ኪም ጆንግ ኡን ንዝኽሪ እቶም ኣብቲ ኲናት ዝሞቱ ብኣሽሓት ዝቑጸሩ ወተሃደራት እታ ሃገር ንዝተሃንጸ ሓወልቲ ኣብ ዝመረቐሉ እዋን'ዩ ነቲ መግለጺ ሂቡ።

   "ነቲ ዓቢ ክብሪ ንምክልኻል ብዘይምውልዋል ርእሶም ብምፍንጃር፡ ከምኡ'ውን ርእሰ-ቅትለታዊ መጥቃዕቲ" ምፍጻሞም ተወፋይነቶም ዘርኢ ምዃኑ'ዩ እቲ ዴሳዊ መራሒ ተዛሪቡ።

   "ካሕሳ ከይተጸበዩ ርእሶም ዝሰውኡን፡ ዓስቢ ከይተጸበዩ ዝተወፈዩን" ይብል ኪም።

   እቶም ወተሃደራት ኣብ ጐኒ ሓይልታት ሩስያ ብምስላፍ'ዮም ኣብቲ ኲናት ተሳቲፎም።

   ኣብቲ ብሰኑይ ኣብ ርእሰከተማ ፒዮንግያንግ ዝተኻየደ ስነስርዓት ሚኒስተር ምክልኻል ሩስያ ኣንድረይ በሎሶቭንተረኺቡ ነይሩ።

   ካብቶም ናብ ሩስያ ዝተላእኩ ኣስታት 15,000 ዝበጽሑ ወተሃደራት ሰሜን ኮርያ ኣስታት 2,000 ኣብቲ ውግእ ከምዝተቐትሉ ምንጭታት ስለያ ደቡብ ኮርያ የመልክቱ።

9. 28 ሚያዝያ 2026ብዝተዓጽወ መጻብቦ ሆርሙዝ ክትሓልፍ ዝኸኣለት መርከብ ሩስያ

   ሓንቲ ብሩስያዊ ቢልየነር እትውነን ዓባይ ጃልባ (ያት) በቲ ኣመሪካን ኢራንን ዓጽየንኦ ዘለዋ መጻብቦ ሆርሙዝ ክትሓልፍ ከምዝኸኣለት ተፈሊጡ።

   እታ 142 ሜትሮ ቁመት ዘለዋ 'ኖርድ' ተባሂላ ትጽዋዕ ጃልባ ምስቲ መሓዛ ፕረዚደንት ቭላድሚር ፑቲን ዝኾነ ኣለክሰይ ሞርዳሾቭ ዝተባህለ ሃብታም ምትእስሳር ከምዘለዋ ይግለጽ።

   ኣብ ዝሓለፈ ቀዳመ-ሰንበት ካብ ሕቡራት ኢማራት ዓረብ ናብ ዖማን ከምዝኣተወት'ዩ ዝግለጽ ዘሎ።

   ኣብዚ ቀረባ መዓልታት ላዕለዋይ ልኡኽ ኢራን ምስ ፕረዚደንት ፑቲን ዝርከቦም ሰበስልጣን ሩስያ ተዘራሪቡ ምንባሩ ይዝከር።

   ዋላ'ኳ እቲ ቢልየነር ብቐጥታ ዝውንና እንተዘይኮነት፡ ኣብ ትሕቲ ብዓልቲቤቱ ትውንኖ ትካል ዝተመዝገበት እያ። እታ 500 ሚልዮን ዶላር እትግመትን ሓያሎ ደርብታት ዘለዋን ክብርቲ ጃልባ ብዓርቢ ካብ ዱባይ ተበጊሳ'ያ ናብ ርእሰከተማ ሙስካት ኣትያ።

   ምዕጻው ናይቲ ማሕንቖ ንግዲ ነዳዲን ካልእ ቀመማዊ ቀረባትን ዝኾነ መጻብቦ ሆርሙዝ ኣብ ዕዳጋ ዓለም ቅልውላው ፈጢሩ ይርከብ።

10. 28 ሚያዝያ 2026ኣስመራ፡ ባርዕ ሓዊ ኣብ ሰብ ጉድኣት ኣውሪዱ

    ኣብ ርእሰከተማ ኣስመራ ብዝተወልዐ ባርዕ ሓዊ ክልተ ሰባት ከምዝሞቱ መንግስታዊ ማዕከናት ዜና ሓቢረን።

    ሓደ ወዲ 36 ከምኡ'ውን ጓል 21 ዓመት ኣብቲ ብሰንበት 26 ሚያዝያ ዘጋጠመ ባርዕ ሞይቶም ኣለዉ።

    ካብቲ ባርዕ ዝደሓኑ ሓንቲ ኣደን ኣርባዕተ ቆልዑን ብዝወረዶም ጉድኣት ኣብ ሆስፒታል ተዓቚቦም ከምዘለዉ'ውን እቲ ጸብጻብ ይጠቅስ።

    ጠንቂ ናይቲ ኣብ "ምምሕዳር ከባቢ ሓሊበት" ዘጋጠመ ባርዕ እንታይ ምዃኑ ንምርግጋጽ መርመራ ይካየድ ከምዘሎ ሓላፊ ምክልኻል ገበን 6ይ መደበር ፖሊስ ኣቶ ክብርኣብ ገብረክርስቶስ ሓቢሩ።

    "እቲ ሓደጋ ዝተኸስተ ከባቢ ሰዓት 12:30 ድሕሪ ቀትሪ ኮይኑ፡ እቲ ባርዕ ንምቁጽጻር ኣሃዱ መጥፋእቲ ሓዊ ምስ ነበርቲ እቲ ከባቢ ብምዃን ብዝገበርዎ ርብርብ፡ ኣብ ውሽጢ 30 ደቓይቕ ኣብ ትሕቲ ቁጽጽር ክኣቱ ተኻኢሉ እዩ።

    "እንተኾነ ግን፡ ብሰንኪ እቲ ዝተፈጥረ ጽዑቕ ትኪ፡ ሓንቲ ኣደን ኣርባዕተ ቆልዑን ብምዕፋኖም ህጹጽ ሕክምናዊ ረድኤት ንምርካብ ናብ ሆስፒታል ኦሮታ ተወሲዶም ኣለዉ። እቶም ግዳያት ኣብዚ እዋን እዚ ኣድላዪ ክንክን ይግበረሎም ከምዘሎ ተፈሊጡ ኣሎ" ይብል እቲ ኣብ ጋዜጣ ሓዳስ ኤርትራ ዝወጸ ሓበሬታ።

    ሕብረተሰብ ምስ ሓዊ ዝተሓሓዝ ግቡእ ጥንቃቐ ክገብር ዝተማሕጸኑ ሰብመዚ መጥፋእቲ ሓዊ፡ "ተቓጻሊ ባህሪያት ዘለዎ ንብረት ኣብ ውሽጢ መንበሪ ኣባይቲ ካብ ምኽዛን ክቑጠብ ጻውዒት ኣቕሪቦም ኣለዉ።"

    ኣብ ኤርትራ ባርዕ ሓዊ መንበሪ ሳሕቲ ዘጋጥም'ኳ እንተኾነ ኣብ ቀረባ ዓመታት ግን ሓሓሊፉ ክርአ ጸኒሑ'ዩ።

    ተወሳኺ ሓበሬታ ንምርካብ ናብ 6ይ መደበር ፖሊስ ዝገበርናዮ ፈተነ ኣይሰመረን።

11. 28 ሚያዝያ 2026ጥርጡር መጥቃዕቲ ድራር ዋይት ሃውስ ብፈተነ ቅትለት ተኸሲሱ

    ብረት ሒዙ ናብቲ ኣብ ዋሽንግተን ዝተኻየደ እንግዶት ድራር ጋዜጠኛታት ዋይት ሃውስ ክኣቱ ዝፈተነ ጥርጡር ብፈተነ ቅትለት ተኸሲሱ።

    እቲ ኣብ ልዕሊ ፕረዚደንት ዶናልድ ትራምፕ ቅትለት ክፍጽም ፈቲኑ ዝብል ወግዓዊ ክሲ ተመስሪትሉ ዘሎ ኮል ቶማስ ኣለን፡ ምስ ብረት ዝተሓሓዝ ተወሳኺ ክልተ ክስታት'ውን ቀሪቦምሉ ኣለዉ።

    እቲ ወዲ 31 ዓመት፡ ሓደ 'ሰሚ-ኦቶማቲክ'፡ ሓጺር ብረት፡ ከምኡ'ውን ሰለስተ ካራታት ሒዙ'ዩ ናብቲ ትራምፕ ዝተረኽበሉ እንግዶት ክኣቱ ኣብ ዝፈተነሉ ብኣባለት ፍሉይ ሓለዋ ፕረዚደንት (ሲክረት ሰርቪስ) ተታሒዙ።

    ኣብቲ ፍጻመ ብጥይት ዝቖሰለ ሓደ ካብቶም ሓለውቲ፡ ኣብ ድሓን ኩነታት ከምዘሎ ይፍለጥ።

    እቲ ነባሪ ካሊፎርንያ ዝኾነ ጥርጡር በቲ ቀሪብሉ ዘሎ ክስታት ገበነኛ ኮይኑ እንተተረኺቡ ንሕልፈት ክፍረድ ይኽእል'ዩ።

    ብሰንኪ እቲ ዝተፈጥረ ኩነታት፡ እቲ ፕረዚደንት ናብ ባዕሉ፡ ደገፍቱን ተቓወምቱን፡ ከምኡ'ውን ናብ ጋዜጠኛታት ዘነጻጸረ ዋዛታት ክወርውረሉ ዝተሓሰበ ዓቢ ናይ ዳእላ ምሸት ክስረዝ ከምዝተገደደ ይዝከር።

12. 28 ሚያዝያ 2026ኣመሪካ “ሽፍትነት ባሕሪ” ትፍጽም ኣላ - ኢራን

    ኣመሪካ ኣብ ዝሓለፈ ሰሙን ኣብ ህንዳዊ ውቅያኖስ ንሓንቲ ናይ ኢራን መርከብ ነዳዲ ኣብ ትሕቲ ቍጽጽር ኣእትያ።

    ወሃቢ ቃል ምኒስትሪ ጉዳያት ወጻኢ ኢራን እስማዒል ባጋይ ኣብ ትዊተር ኣብ ዝዘርግሖ መልእኽቲ፡ ነቲ ናይ ኣመሪካ ስጕምቲ “ሽፍትነት ኣብ ባሕሪ” ክብል ገሊጽዎ።

    "እንቋዕ ናብ ሽፍትነት ባሕሪ ብደሓን መጻእኩም። ሕጂ ወግዓዊ መንግስታዊ ፍቓድ ዘለዎ፡ ባንዴራኡ ብግልጺ ዘንበልብል፡ ገበኑ ድማ 'ምኽባር ሕጊ' ብዝብል ስም እዩ ዝፍጸም ዘሎ" ክብል እቲ ወሃቢ ቃል ነቲ ናይ ኣመሪካ ስጕምቲ ኮኒኑ።

    ብተወሳኺ እቲ ስጕምቲ “ዓለምለኻዊ ሕግን መትከላት ዓለማዊ ናጻ ንግድን ዝጥሕስ” ምዃኑ ገሊጹ።

    እቲ ወሃቢ ቃል ነዚ ዝብል ዘሎ፡ ዋና ኣኽባሪ ሕጊ ኣመሪካ ጂኒን ፌሪስ ፒሮ፡ እታ መርከብ ኣብ ቍጽጽር ክትኣቱ ትእዛዝ ከምዝተዋህበ ድሕሪ ምግላጻ’ዩ።

13. 28 ሚያዝያ 2026ኣብ ድራር ዋይት ሃውስ ተዅሲ ዝኸፈተ ጥርጡር ብፈተነ-ቅትለት ተኸሲሱ

    ዋይት ሃውስ ብቐዳም ምሸት ንጋዜጠኛታት ኣብ ዘዳለዎ እንግዶት ድራር፡ ኣብቲ ሆቴል ተዅሲ ብምኽፋቱ ዝተታሕዘ ኮል ቶማስ ኣለን ኣብ ልዕሊ ፕረዚደንት ኣመሪካ ዶናልድ ትራምፕ ፈተነ-ቅትለት ብምፍጻም ተኸሲሱ።

    እቲ እቲ ወዲ 31 ዓመት ኮል፡ ኣብ ውሽጢ ሆቴል ዋሽንግተን ሂልተን ብወከልቲ ጸጥታ ድሕሪ ምትሓዙ፡ ዕላማኡ ንሰበስልጣን ምምሕዳር ትራምፕ ንምቕንጻል ምዃኑ ተዛሪቡ ከም ዝነበረ ጸብጻብ ሲቢኤስ የመልክት።

    ነቲ ናይ ጸጥታ መፈተሺ ነቝጣ ክሓልፍ እንከሎ፡ ሓውሲ ኣውቶማቲክ ሽጉጥ፣ ሻትጋንን ሰለስተ ካራን ሒዙ ከምዝነበረ ኣኽበርቲ ሕጊ ገሊጾም።

    ኣብቲ ዝተፈጸ መጥቃዕቲ ሓደ ወኪል ሚስጢራዊ ኣገልግሎት ብጥይት ተሃሪሙ ነይሩ፤ ግን ብኸቢድ ኣይተጎድአን።

    ኮል ቶማስ ገበነኛ ኰይኑ እንተተረኺቡ ንዕድመ ልክዕ ማእሰርቲ ክፍረድ ተኽእሎ ኣሎ።

14. 27 ሚያዝያ 2026ፒተርስበርግ፡ ምስ ፕረዚደንት ቭላድሚር ፑቲን ዝተራኸበ ልኡኽ ኢራን

    ብሚኒስተር ጉዳያት ወጻኢ ኢራን ዝምራሕ ልኡኽ ኣብ ሩስያ ምብጻሕ የካይድ ኣሎ።

    ኣብ ምዕራባዊት ከተማ ፒተርስበርግ ዝርከብ ዓባስ ኣራግቺ ምስ ፕረዚደንት ቭላድሚር ፑቲን ብምርኻብ ብዛዕባ ኩነታት ሃገሩ ተዘራሪቡ።

    ኣብቲ ርክብ ሚኒስተር ጉዳያት ወጻኢ ሩስያ ሰርገይ ላቭሮብ፡ ተሓጋጋዚ ፕረዚደንት ፑቲን ዝኾነ ዩሪ ኡሻኮቭን ሓላፊ ወተሃደራዊ ስለያ ሩስያ ኢጎር ኮስቲዩኮቭን ተሳቲፎም ነይሮም።

    ኣብ ማእከላይ ምብራቕ ሰላም ንክሰፍን ሩስያ ዝክኣላ ከምእትገብርን፡ "ሰናይ ድልየት ወይ ንክልቲኦም ወገናት ቅቡል ዝኾነ ናይ ምሽምጋል ኣገልግሎት" ንምሃብ ቅርብቲ ምዃናን ፑቲን ነቲ ኢራናዊ ጉጅለ ከምዝገለጸሉ ኣፈኛ ክረምሊን ድሚትሪ ፐስኮቭ ሓቢሩ።

    "ኣብ መወዳእታ ሰላም፡ ዘላቒ ሰላም ንክሰፍን፡ ከምኡ'ውን ናብ ተጻብኦታት ንዘይምምላስ ዝክኣለና ኩሉ ከንገብር ቅሩባት ኢና" ይብል ፐስኮቭ።

    እቲ ኢራናዊ ሚኒስተር ብወገኑ ንጋዜጠኛታት ኣብ ዝሃቦ መብርሂ፡ ኣመሪካ ተወሳኺ ልዝብ ክግበር ሓቲታ ከምዘላ ተዛሪቡ።

    ሃገሩ "ኣንጻር ልዕለ ሓያላን ዝኾነት ሃገር [ኣመሪካ] ገጢማ ትርከብ" ዝበለ ኣራግቺ፡ ኣመጥቃዕቲ ኣመሪካውያን "ሓንቲ ካብ ዕላማታቶም'ውን ከዕውቱ ኣይክኣሉን" ኢሉ።

    "ከምኡ ስለዝኾነ ድማ'ዮም፡ ዘተ ክግበር ጠሊቦም ዘለዉ፡ ንሕና'ውን ንግምግሞ ኣለና" ብምባል ድማ፡ ኢራን "ከም ሩስያ ዝበላ ዓበይቲ መሓዙትን መሻርኽትን" ከምዘለዋ ተነይቱ።

15. 27 ሚያዝያ 2026ማሊ፡ ሩስያውያን ዕጡቓት ካብ ሰሜን እታ ሃገር ኣንሳሒቦም

    ኣብ ጐኒ ሰራዊት ማሊ ተሰሊፎም ክዋግኡ ዝጸንሑ ሓይልታት ሩስያ ካብ ሰሜን እታ ሃገር ከምዝወጹ ኣፍሊጦም።

    ናይ ሩስያ 'ኮር ኣፍሪቃ' ብማሕበራዊ መራኸቢታት ኣብ ዝሃቦ ሓበሬታ፡ ካብቲ ከተማ ኪዳል ትርከበሉ ከባቢታት ከምዝወጹ ኣረጋጊጹ።

    ነታ ከተማ ተቖጻጺሩ ዘሎ ግንባር ሓርነት ኣዛዋድ (FLA) ብሰንበት ከምዝበሎ፡ ኣብ መንጎኦምን ሞስኮን ብዝተበጽሐ ስምምዕ'ዮም እቶም ሩስያውያን ዕጡቓት ብሰላም ክወጹ ክኢሎም ዘለዉ።

    ብቐዳም ኣብ ዝተፈላለየ ቦታታት ኣብ ርእሰከተማ ባማኮ ድምጺ ተዂሲን ነትጒን ተሰሚዑ ነይሩ'ዩ።

    ሚኒስተሰር ምክልኻል እታ ሃገር ሳድዮ ካማራ እውን ኣብቲ ጥቓ ርእሰ-ከተማ ባማኮ ኣብ ዝርከብ መንበሪ ገዝኡ ብዝተፈጸመ ነብሰ-ቅለታዊ መጥቃዕቲ ተቐቲሉ ከምዘሎ ይፍለጥ።

    ብጀነራል ኣሲሚ ጎይታ ዝምራሕ ወተሃደራዊ መንግስቲ ኣብ 2020 ከምኡ'ውን ኣብ 2021 ብዝተፈጸመ ዕልዋ መንግስቲ ስልጣን ዝተቖጻጸረ ኮይኑ፡ ነቲ ካብ እስላማውያን ዝርከብዎም ዕጡቓት ተቓወምቲ ዝነቅል ጸጥታዊ ዘይምርግጋእ ከህድእ'ዩ ቃል ኣትዩ ነይሩ።

16. 27 ሚያዝያ 2026ናታንያሁ ኣብ ልዕሊ ሕዝቦላህ ሓያል መጥቃዕቲ ክካየድ ኣዚዙ

    ቀዳማይ ምኒስተር እስራኤል በንያሚን ናታንያሁ፡ እቲ ስምምዕ ምቍራጽ ተዅሲ ንሰለስተ ሰሙን ካብ ዝናዋሕ ድሕሪ ክልተ መዓልታት፡ ሰራዊቱ ኣብ ልዕሊ ሕዝቦላህ "ሓያል መጥቃዕቲ" ክኸፍት ኣዚዙ።

    እዚ ትእዛዝ`ዚ ዝመጽአ፡ ቀዳም ኣብ ደቡባዊ ሊባኖስ ብዝተፈጸመ ደብዳብ ሽድሽተ ሰባት ድሕሪ ምቕታሎምን ክልተኦም ወገናት ብተደጋጋሚ ነቲ ስምምዕ ብምጥሓስ ክካሰሱ ድሕሪ ምጽናሖምን እዩ።

    ምኒስትሪ ጥዕና ሊባኖስ፡ እስራኤል ኣብ ናባቲየን ቢንት ጀበይልን ብዘካየደቶ መጥቃዕቲ ሽዱሽተ ሰባት ከም ዝተቐተሉን 17 ድማከም ዝቘሰሉን ገሊጹ።

    ሰራዊት እስራኤል ብወገኑ፡ ኣጽዋር ጽዒኖም ይንቀሳቐሱ ነይሮም ዝበሎም ሰለስተ ኣባላት ሕዝቦላህን ካልኦት ሰለስተ ዕጡቓትን ከም ዝቐተለ ኣፍሊጡ።

    ሕዝቦላህ፡ እስራኤል ኣብ ዮህሞር ኣል-ሻቂፍ ንዝፈጸመቶ መጥቃዕቲ ሕነ ንምፍዳይ፡ ንሓንቲ ወተሃደራዊት መኪና እስራኤል ከም ዝሃረመ ሓቢሩ ኣሎ።

    ንናጽነት ሜድያ ዝጣበቕ ትካል፡ እስራኤል ኣብልዕሊ ጋዜጠኛታት እተካይዶ መጥቃዕቲ "ተቐባልነት የብሉን" ክብል ኰኒኑዎ።

    ኣብዚ ቀረባ እዋን ኣማል ካሊል ዝተባህለት ጋዜጠኛ ክትቅተል ከላ፡ ሰበስልጣን ሊባኖስ ድማ ጋዜጠኛታት ብደይመደይ ዒላማ ይግበሩ ከም ዘለዉ ይኸሱ።

    ሰራዊት እስራኤል ግን ንጋዜጠኛታት ዒላማ ከም ዘይገብር እዩ ዝገልጽ።

17. 27 ሚያዝያ 2026ማሊ፡ ምኒስተር ምክልኻል ተቐቲሉ፣ ኪዳል ኣብ ኢድ ዕጡቓት ወዲቓ

    ኣብ ማሊ፡ ብጅሃዳውያን ዕጡቓትን ተገንጸልቲ ሓይልታትን ብዝተወደበ ማዕበል መጥቃዕትን፡ ምኒስተር ምክልኻል እታ ሃገር ሳድዮ ካማራ ተቐቲሉ።

    እቲ ምኒስተር ዝተቐትለ፡ ኣብቲ ጥቓ ርእሰ-ከተማ ባማኮ ዝርከብ መንበሪኡ ብዝተፈጸመ ነብሰ-ቅለታዊ መጥቃዕቲ እዩ።

    መንግስታዊ ተለቪዥን ከም ዘረጋገጾ፡ ካማራ ምስቶም መጥቃዕቲ ዝፈጸሙ ዕጡቓት ኣብ ምክልኻል ከሎ ብዝበጽሖ መውጋእቲ ኣብ ሆስፒታል ህይወቱ ሓሊፋ።

    ኣብቲ መጥቃዕቲ ሰለስተ ኣባላት ስድራኡ እውን ተቐቲሎም እዮም።

    መሪሕነት እታ ሃገር፡ ጀነራል ኣሲሚ ጎይታ፡ ድሕሪ እቲ ኣብ ልዕሊ መንበሪ ገዛኡ ዝተፈጸመ መጥቃዕቲ ናብ ውሑስ ቦታ ከም ዝተሰጋገረ ተፈሊጡ ኣሎ።

    ዓወት ተገንጸልቲ ሓይልታትን ምስሓብ ሩስያውያን ዕጡቓትን ኣብ ሰሜናዊ ክፋል እታ ሃገር፡ ተገንጸልቲ ሓይልታት ኣዛዋድ (FLA) ንኸተማ ኪዳል ከም ዝተቘጻጸሩዋ ገሊጾም።

    ብመሰረት ጸብጻብ እቲ ጕጅለ፡ እቶም ብመንግስቲ ማሊ ተቘጺሮም ዝነበሩ ሩስያውያን ወተሃደራት (Africa Corps) ድሕሪ ናይ ክልተ መዓልታት ኲናት፡ ካብታ ከተማ ብሰላም ንኽወጽኡ ምስቶም ዕጡቓት ስምምዕ ብምግባር ለቒቖማ ወጺኦም ኣለዉ።

    ኵነታት ጸጥታን ዞባዊ ግብረ-መልስን ናይዚ መጥቃዕቲ፡ ኣብዚ ዝሓለፈ ዓመታት ኣብ ማሊ ዝተፈጸመ ዝዓበየ ዝተወሃሃደ መጥቃዕቲ ጅሃዳውያን ምዃኑ ተንተንቲ ይገልጹ።

    መንግስቲ ማሊ ኣብ መላእ ሃገር ናይ ድሕነት መጠንቀቕታ ኣዊጁ፡ ኣብ ባማኮን ካልኦት ከባቢታትን ድማ ናይ እዋን እቶ-እቶ ኣዋጅ ኣንቢሩ ኣሎ።

    ዋና ጸሓፊ ሕቡራት ሃገራት ኣንቶንዮ ጉተረዝን ምዕራብ ኣፍሪቃዊ ዞባዊ ውድብን ነቲ መጥቃዕቲ ብትሪ ኰኒኖሞ ኣለዉ። ፕረዚደንት ቡርኪና ፋሶ ካፕተን ኢብራሂም ትራኦሬ እውን ነቲ ተግባር "ጭካነ ዝመልኦ" ክብል ብምግላጽ ደገፉ ንህዝቢ ማሊ ገሊጹ።

    ማሊ ካብ 2020 ጀሚሩ ብወተሃደራዊ ጕጅለ ትመሓደር እኳ እንተ ሃለወት፡ ክሳዕ ሕጂ ግን ነቲ ካብ ኣልቓዒዳን ዳዕሽን ዝምንጩ መጥቃዕቲ ክትገትኦ ኣይከኣለትን። ብዙሕ ክፋል ሰሜንን ምብራቕን እታ ሃገር ድማ ካብ ቍጽጽር መንግስቲ ወጻኢ ኰይኑ ይርከብ።

18. 27 ሚያዝያ 2026ሊባኖስ፡ ኣብ መንጎ ተኣፋፊ ስምምዕ ብዝተፈጸመ መጥቃዕቲ እስራኤል 14 ሰባት ተቐቲሎም

    ኣብ ሊባኖስ፡ ሰንበት ብዝተፈጸመ ደብዳብ ነፈርቲ እስራኤል፡ ክልተ ህጻናትን ክልተ ደቀንስትዮን ዝርከባኦም 14 ሰባት ከም ዝተቐተሉን 37 ድማ ከም ዝቘሰሉን ምኒስትሪ ጥዕና እታ ሃገር ኣፍሊጡ።

    ሰራዊት እስራኤል ቅድሚ እቲ መጥቃዕቲ ኣብ ደቡባዊ ሊባኖስ ንዝርከባ ዓድታት ናይ ምውጻእ መጠንቀቕታ ሂቡ ዝነበረ ኰይኑ፡ እቲ ስርሒት ድማ ንወተሃደራቱ ስግኣት ዝዀኑ ድፋዓት ሕዝቦላህ ንምጥቃዕ ዝዓለመ ምዃኑ ገሊጹ።

    ሕዝቦላህ ብወገኑ ብዘካየዶ መጥቃዕቲ ድሮን፡ ሓደ ወዲ 19 ዓመት እስራኤላዊ ወተሃደር ክቕተል እንከሎ፡ ሽዱሽተ ድማ ቈሲሎም። እስራኤል ግን ካልኦት ሰለስተ ድሮናት ዶብ ቅድሚ ምስጋረን ከም ዘፍሸለተን ሓቢራ።

    እዚ ሓድሽ ወተሃደራዊ ምስሕሓብ ዝካየድ ዘሎ፡ ክልተአን ሃገራት ካብ 16 ምያዝያ ጀሚሩ ኣብ ስምምዕ ምቍራጽ ተዅሲ ኣብ ዝርከባሉን እቲ ስምምዕ ድማ ዝሓለፈ ሓሙስ ንተወሳኺ ሰለስተ ሰሙን ኣብ ዝተናወሓሉን እዋን እዩ።

    ቀዳማይ ምኒስተር በንያሚን ናታንያሁ፡ ሕዝቦላህ ነቲ ስምምዕ የፍርሶ ከም ዘሎ ብምጥቃስ፡ እስራኤል ርእሳ ንምክልኻልን ስግኣታት ንምፍሻልን "ናይምንቅስቓስ ናጽነት" ከምዘለዋ ኣስሚሩሉ።

    ኣብቲ ዲፕሎማስያዊ ሸነኽ ድማ ምኒስተር ወጻኢ ጉዳያት ኢራን ዓባስ ኣራግቺ ምስ ዋሽንግተን ክካየድ ብዛዕባ ዝሕሰብ ዘሎ ዘተ ሰላም ንምምይያጥ ኣብ ፓኪስታን ዑደት ድሕሪ ምግባር፡ ምስ ቭላድሚር ፑቲን ንምርኻብ ናብ ሞስኮ ከም ዘምርሕ ይጥቀስ።

    ፕረዚደንት ዶናልድ ትራምፕ ምስ ኢራን ዝካየድ ዘተ ዕድል ንምሃብ፡ ነቲ ተዅሲ ደው ናይ ምባል ግዜ እኳ እንተ ኣናውሖ፡ እቲ ናብ ኢስላማባድ ክግበር ዝነበሮ ዑደት ፍሉያት ልኡኻት ግን ከም ዝተሰረዘ ተፈሊጡ ኣሎ።

    እዚ ኵነታት ነቲ ተኣፋፊ ሰላም እቲ ዞባ ኣብ ትሕቲ ዓቢ ጸቕጢ የውድቘ ኣሎ።

19. 24 ሚያዝያ 2026ልኡኽ ኢራን ናብ ፓኪስታን ክብገስ'ዩ

    ኢራን፡ ብሚኒስተር ጉዳያት ወጻኢ ዝምራሕ ልኡኽ ናብ ፓኪስታን ክትሰድድ ምዃና ኣፍሊጣ።

    ዓባስ ኣራግቺ ሎሚ ለይቲ ናብታ መዲና ዘተ ሰላም ኢራንን ኣመሪካን ኮይና ዘላ ኢስላማባድ ክብገስ ምዃኑ እቲ መግለጺ ይጠቅስ።

    እቲ ላዕለዋይ ብዓልስልጣን ናብ ሙስካትን ሞስኮን ብምብጻሕ'ውን ምስ ሰበስልጣን ዖማንን ሩስያን ብዛዕባ ኲናትን ካልእ ክልተኣዊ ጉዳያትን ክዝቲ ምዃኑ ቴህራን ኣፍሊጣ'ላ።

    እቲ ብወገን መንግስቲ ኢራን ብመንገዲ ኤክስ ዝተዋህበ ሓበሬታ ብዛዕባ ዘተ ሰላም ኣይጠቐሰን።

    ምስ ወከልቲ ኢራን ንምዝርራብ ናብ ፓኪስታን ክመለስ'ዩ ክብሃለሉ ዝቐነየ ምክትል ፕረዚደንት ኣመሪካ ጀይ-ዲ ቫንስ ናብ ኢስላማባድ ብዛዕባ ምብጋሱ ግን ኣይተነጸረን ዘሎ።

    ፕረዚደንት ዶናልድ ትራምፕ ነቲ ምስ ኢራን ዝተበጽሐ ስምምዕ ምቁራጽ ተጻብኦታት ኣብ ፈለማ ናይዚ ሰሙን ንዘይተወሰነ እዋን ከምዘናውሖ ይፍለጥ።

    ሎሚ ጋዜጣዊ መግለጺ ዝሃቡ መራሕቲ ኲናት ኣመሪካ ብወገኖም፡ ኢራን "ለባም ምርጫ" ብምውሳድ ንዘተ ቅርብቲ ክትከውን ብምምካር ሓይልታቶም ኣድላዪ ኣብ ዝኾነሉ ንዳግማይ ኲናት ድሉዋት ምዃኖም ኣጠንቂቖም።

    ጸሓፊ (ሚኒስተር) ኲናት ፒት ሄግሰት ከምዝበሎ ኣመሪካ ኣዊጃቶ ዘላ ንገለ ካብን ናብን ወደባት ኢራን ዝጓዓዛ መራኽብ ዒላማ ዝገበረ ዕግታ ሓይሊ ባሕሪ ኣመሪካ ይሕይልን ይሰፍሕን ኣሎ።

    ላዕለዋይ ኣዛዚ ሓይልታት ምክልኻል ኣመሪካ ጀነራል ዳን ኬን እውን፡ ዝተወሰና መራኽብ ይሓልፋ ከምዘለዋ ብምእማን፡ ቴህራን ንስምምዕ ምቁራጽ ተዂሲ ብምጥሓስ ኣብ መጻብቦ ሆርሙዝ ፈንጂ ማይ ተጻውድ ኣላ ክብል ከሲሱ። ሓይልታቱ 34 መራኽብ ንግዲ ከምዝመለሱ'ውን እቲ ኣቦመንበር ሓለቓታት ጠቕላሊ ስታፍ ሓቢሩ'ሎ።

20. 24 ሚያዝያ 2026ሩብዮ፡ ኢራን ካብ ሱታፈ ዋንጫ ዓለም ኣይተኸልከለትን

    ኣብ ቤትጽሕፈት 'ኦቫል' ኣብ ዝተዋህበ ጋዜጣዊ መግለጺ፡ ጸሓፊ ጉዳያት ወጻኢ ማርኮ ሩብዮ፡ ኢራናውያን ስፖርተኛታት ኣብዚ ዓመት ኣብ ኣመሪካ ኣብ ዝካየድ ግጥማት ዋንጫ ዓለም ክሳተፉ ከም ዘይክእሉ ካብ ወገን ኣመሪካ ዝነገሮም ሰብ ከም ዘየሎ ገሊጹ።

    ኢራን ኣብቲ ግጥማት ንኸይትሳተፍ፡ ኣብ ክንድኣ ድማ ኢጣልያ ክትትካእ ትኽእል እያ ዝብል ግምታት ከም ዝነበረ ዝጠቐሰ ሩብዮ፡ ኢራን እንተ ዘይመጺኣ ግን ምርጫኣ ምዃኑ ወሲኹ ገሊጹ።

    ኢራን ኣብ ግጥማት ዋንጫ ዓለም ኣብ ምስታፋ ዘሎ ጸገም እቶም ስፖርተኛታት ዘይኰኑስ፡ እቶም ምስኣቶም ሒዛቶም ክትመጽእ እትኽእል ሰባት ምዃኖም ኣገንዚቡ።

    "እቲ ክገብርዎ ዘይክእሉ፡ ብዙሓት ግብረ-ሽበራውያን 'ሰራዊት ሓለዋ ሰውራ ኢራን' ከም ጋዜጠኛታትን ኣሰልጠንቲ ስፖርትን ኣምሲሎም ናብ ሃገርና ሒዞሞም ክመጽኡ ኣይፍቀድን እዩ፡" ኢሉ።