காணொளி: கவனம் பெறும் ஃபிஃபா இறுதிப் போட்டி - அனுபவம் வாய்ந்த வீரருடன் மோதும் இளம் வீரர்

ஒருபுறம் உலகின் தலைசிறந்த கால்பந்து வீரர்களில் ஒருவரான லியோனல் மெஸ்ஸி.

மறுபுறம், அவரது கால்பந்து வாரிசாகக் கருதப்படும் லமின் யமால்.

இருவரும் முதன்முறையாக நேருக்கு நேர் மோதவுள்ளதால் உலகக்கோப்பை கால்பந்து இறுதிப்போட்டி மிகுந்த எதிர்பார்ப்பை உருவாக்கியுள்ளது.

ஒருமுறை மெஸ்ஸியிடம் இளம் தலைமுறை கால்பந்தாட்ட வீரர்களில் சிறந்த ஒருவரின் பெயரை கூறுமாறு கேட்கப்பட்டபோது அவர் கூறியது யமாலின் பெயரைத் தான்.

அதேபோல், வரலாற்றில் சிறந்த கால்பந்தாட்ட வீரர் மெஸ்ஸிதான் என யமால் கூறுகிறார். அதேநேரம் மெஸ்ஸியுடன் தான் ஒப்பிடப்படுவதை அவர் தவிர்க்க விரும்புகிறார்.

39 வயதான மெஸ்ஸியும், 19 வயதான லமின் யமாலும் ஒரே போட்டியில் களமிறங்குவது, ஒருபுறம் மெஸ்ஸியின் நீண்டகால சிறப்பான பயணத்தையும், மறுபுறம் யமாலின் அபாரமான திறமையையும் வெளிப்படுத்துகிறது.

ஆனால், இவர்கள் சந்திப்பது இதுவே முதல் முறை அல்ல.

2007-ஆம் ஆண்டு, 20 வயதான மெஸ்ஸி பார்சிலோனாஅணியில் இடம்பிடித்து விளையாடிக் கொண்டிருந்தார்.

அதே நேரத்தில், லமின் யமாலுக்கு வயது வெறும் ஐந்து மாதங்கள்தான்.

அப்போது எடுக்கப்பட்ட சில புகைப்படங்களில், சிறிய குழந்தையான யமாலை மெஸ்ஸி கையில் தூக்கிக்கொண்டும், குளிப்பாட்டிக்கொண்டும் இருப்பது பதிவாகியுள்ளது.

இந்த புகைப்படங்களை புகைப்படக் கலைஞர் ஜோன் மொன்ஃபோர்ட் எடுத்திருந்தார்.

2024-ஆம் ஆண்டு, ஸ்பெயின் யூரோ கோப்பையை வென்றபோது, லமின் யமாலின் தந்தை இந்தப் புகைப்படங்களில் ஒன்றை சமூக வலைதளத்தில் பகிர்ந்து,

"இரண்டு ஜாம்பவான்களின் தொடக்கம்" என்று பதிவிட்டார்.

அதன்பிறகே இந்தப் புகைப்படங்கள் உலகம் முழுவதும் கவனம் பெற்றன.

இந்த புகைப்படம் குறித்து அதனை எடுத்த ஜோன் மொன்ஃபோர்ட் பேசும்போது, "2024-இல்தான் அந்தக் குழந்தை லமின் யமால் என்பதை அறிந்தேன்.

இது உண்மையிலேயே விதியின் அதிசயம்."என்றார். மேலும், "குழந்தையை எப்படி கையாளுவது என்று மெஸ்ஸிக்கு தெரியவில்லை" என்றும் அவர் குறிப்பிட்டார்.

இந்தப் புகைப்படங்கள் பார்சிலோனாவின் கேம்ப் நௌ மைதானத்தில் உள்ள விருந்தினர் உடைமாற்றும் அறையில் எடுக்கப்பட்டவை.

பார்சிலோனா மற்றும் யுனிசெஃப் இணைந்து நடத்திய குலுக்கல் போட்டியில் வெற்றி பெற்றதால், யமாலின் குடும்பத்திற்கு இந்த வாய்ப்பு கிடைத்தது.

19 வயதில் மெஸ்ஸி, 11 கோல்கள் அடித்திருந்தார். ஒரு லா லிகா பட்டம், ஒரு சாம்பியன்ஸ் லீக் பட்டம் வென்றிருந்தார்.

ஆனால், 19 வயதை எட்டியுள்ள லமின் யமால் ஏற்கனவே, 56 கோல்கள் அடித்துள்ளார். 3 லா லிகா பட்டங்கள், 1 கோபா டெல் ரே பட்டம், யூரோ 2024 சாம்பியன் பட்டம் ஆகியவற்றை வென்றுள்ளார்.

லாமின் என்ற அரபு வார்த்தைக்கு ஆங்கிலத்தில் நேர்மையான அல்லது நம்பகமான என்று பொருள், அதே வேளையில் யமால் என்பது ஜமால் என்பதன் திரிபுபோன்றது. இதற்கு நேர்த்தி அல்லது அழகு என்று பொருள்.

பார்சிலோனாவுக்கு வடக்கே அமைந்துள்ள தொழிலாளர் வர்க்க மக்கள் அதிகம் வசிக்கும் ரோகஃபோண்டா பகுதியில் வளர்ந்தவர் லமின் யமால்.

அந்தப் பகுதியின் அஞ்சல் குறியீடான 304-ஐ நினைவுகூரும் வகையில், கோல் அடித்த பிறகு 3-0-4 என்ற கைசைகையை அவர் அடிக்கடி காட்டுவார்.

ஒருமுறை எல் பைஸ் ஊடகத்துக்கு அளித்த பேட்டியில் யமால், "என் அம்மாவும் அப்பாவும் எனக்காக செய்ததை, என் குழந்தையைத் தவிர வேறு யாருக்காகவும் என்னால் செய்ய முடியாது.

பணம் இல்லாத சூழலில் ஒரு குழந்தையை கால்பந்து வீரராக உருவாக்குவது மிகவும் கடினம்.

ஆனால் என் பெற்றோர் அதைச் சாதித்தார்கள்.

அவர்களின் அந்தத் தியாகத்துக்கு நான் எந்த நாளும் ஈடுகொடுக்க முடியாது" என கூறியிருந்தார்.

"அவர் பிறந்த தருணத்திலேயே அவர் ஒரு நட்சத்திரமாக மாறப்போகிறார் என்பதை நாங்கள் அறிந்திருந்தோம்" என்று அவரது தந்தை யூரோ 2024 இறுதிப் போட்டிக்கு முன்னதாக செய்தியாளர்களிடம் பெருமையுடன் தெரிவித்தார்.

அவர் குழந்தையாக இருந்தபோது, வரலாற்றின் மிகச்சிறந்த கால்பந்து வீரரான லியோனல் மெஸ்ஸியைச் சந்தித்தார்.

அர்ஜென்டினா வீரரான மெஸ்ஸிக்கு அப்போது 20 வயதுதான் ஆகியிருந்தது, மேலும் அவர் யுனிசெஃப் நிகழ்ச்சிக்கு வந்திருந்தார்.

அவர் பார்சிலோனா கால்பந்து கிளப்பில் லாமினுடன் ஒரு புகைப்படம் எடுத்திருந்தார்.

"அவர் லாமினை ஆசீர்வதித்தது அவரது வாழ்க்கையில் நடந்த ஒரு தற்செயலான நிகழ்வு" என்று லாமினின் தந்தை குறும்புத்தனமாகக் கூறுகிறார்.

லமின் யமால் விரும்பினாலும், விரும்பாவிட்டாலும், அவரை லியோனல் மெஸ்ஸியுடன் ஒப்பிடுவது தொடர்ந்து நடைபெற்று வருகிறது.

அதற்கு முக்கியக் காரணம், இருவருமே இடது கால் வீரர்கள்.அதுமட்டுமல்லாமல், யமாலின் டிரிப்ளிங் திறன், எதிரணியை ஏமாற்றும் விதம், கடினமான ஆட்டத்தைக் கூட எளிதாக மாற்றும் பாணி ஆகியவை மெஸ்ஸியை நினைவூட்டுகின்றன.

உண்மையில், இதே வயதில் இருந்த மெஸ்ஸியைவிட, லமின் யமால் அதிக தாக்கத்தை ஏற்படுத்தியுள்ளார்.

ஆனால், அதைவைத்து அவர் மெஸ்ஸியின் சாதனைகளை நிச்சயமாக எட்டிவிடுவார் என்று இப்போதே கூறுவது அவசரமான முடிவாக இருக்கும்.

இருவரையும் ஒப்பிடுவது எளிதல்ல.

ஆனால், ஒரு புள்ளிவிவரம் லமின் யமால், மெஸ்ஸியின் தகுதியான வாரிசாக உருவாகி வருகிறார் என்பதை சுட்டிக்காட்டுகிறது.

வெறும் 18 வயதிலேயே, லமின் யமால் பார்சிலோனாவுக்காக 151 போட்டிகளில் விளையாடியுள்ளார்.

அதேநேரத்தில், மெஸ்ஸி தனது 19-வது பிறந்தநாளை கொண்டாடியபோது, பார்சிலோனாவுக்காக 41 போட்டிகளில் மட்டுமே விளையாடியிருந்தார்.

பார்சிலோனா அணியின் பொற்காலத்தின் தொடக்கத்தில் மெஸ்ஸியுடன் இணைந்து விளையாடி, அவருடன் சாம்பியன்ஸ் லீக் கோப்பையை வென்ற ரொனால்டின்யு இந்த ஒப்பீட்டை நேரடியாக ஏற்றுக்கொண்டுள்ளார்.

பிபா இணையதளத்துக்கு அளித்த பேட்டியில் அவர், ""மெஸ்ஸியும் நானும் சரித்திரம் படைத்தோம், இப்போது லமின் யமாலின் முறை. இவ்வளவு இளம் வயதிலேயே அவர் வெளிப்படுத்திய திறமை உண்மையிலேயே அசாதாரணமானது" என்றார்.

இப்போது, இறுதிப் போட்டியில் அர்ஜென்டினாவும் ஸ்பெயினும் மோதினால், மெஸ்ஸியும் யமாலும் நேருக்கு நேர் சந்தித்துக் கொள்வார்கள். அந்தத் தருணம் உலகெங்கிலும் உள்ள கால்பந்து ரசிகர்களுக்கு எவ்வளவு சிறப்பானதாக இருக்குமோ, அதேபோல யமாலுக்கும் அது மிகவும் சிறப்பானதாக இருக்கும்.

- இது பிபிசிக்காக கலெக்டிவ் நியூஸ்ரூம் வெளியீடு