வெஸ்ட் இண்டீஸ் கிரிக்கெட் ஜாம்பவான் சர் கார்ஃபீல்ட் சோபர்ஸ் 89 வயதில் காலமானார்

வரலாற்றின் மிகச் சிறந்த கிரிக்கெட் வீரர்களில் ஒருவராகக் கருதப்படும், வெஸ்ட் இண்டீஸ் அணியின் புகழ்பெற்ற முன்னாள் ஆல்-ரவுண்டரான சர் கார்ஃபீல்ட் சோபர்ஸ் தனது 89வது வயதில் காலமானார்.

சோபர்ஸ் 1954 மற்றும் 1974க்கு இடையே 93 டெஸ்ட் போட்டிகளில் விளையாடி, 8,032 ரன்கள் குவித்ததுடன் 235 விக்கெட்டுகளையும் வீழ்த்தியுள்ளார்.

ரசிகர்களை மகிழ்விக்கும் இடது கை பேட்ஸ்மேனான சோபர்ஸ், 1958இல் பாகிஸ்தானுக்கு எதிராக ஆட்டமிழக்காமல் 365 ரன்கள் எடுத்தார். இந்தச் சாதனை 36 ஆண்டுக்காலம் டெஸ்ட் போட்டிகளில் அதிகபட்ச ஸ்கோராக நீடித்தது. அவர் சுழற்பந்து, வேகப்பந்து இரண்டையும் வீசக்கூடிய மிகச் சிறந்த பன்முகத்தன்மை கொண்ட பந்துவீச்சாளராகவும் திகழ்ந்தார்.

நாட்டிங்ஹாம்ஷையர் அணிக்காக கவுன்டி கிரிக்கெட்டிலும் விளையாடிய சோபர்ஸுக்கு, கிரிக்கெட் துறைக்கு அவர் ஆற்றிய சேவைகளுக்காக 1975ஆம் ஆண்டு 'சர்' பட்டம் வழங்கப்பட்டது. மேலும், விஸ்டன் அமைப்பால் 20ஆம் நூற்றாண்டின் மிகச் சிறந்த ஐந்து கிரிக்கெட் வீரர்களில் ஒருவராகவும் அவர் தேர்வு செய்யப்பட்டார்.

கடந்த 1968இல் நாட்டிங்ஹாம்ஷையர் அணியில் அவர் விளையாடியபோது, ஒரு ஃபர்ஸ்ட் கிளாஸ் (முதல்தர) போட்டியில் ஒரே ஓவரில் 6 பந்துகளிலும் 6 சிக்ஸர்களை விளாசிய முதல் வீரர் என்ற சாதனையை சோபர்ஸ் படைத்தார்.

சனிக்கிழமை அன்று எட்ஜ்பாஸ்டனில் ஹாம்ப்ஷையர் அணிக்கு எதிராக நாட்டிங்ஹாம்ஷையர் விளையாடும் டி20 பிளாஸ்ட் அரையிறுதிப் போட்டிக்கு முன்னதாக, சோபர்ஸின் நினைவாக அஞ்சலி மற்றும் கொண்டாட்ட நிகழ்வு ஒன்று நடத்தப்படவுள்ளது.

அந்த கிளப், சோபர்ஸை 'கிரிக்கெட் வரலாற்றின் மிகச் சிறந்த ஆல்-ரவுண்டர் மற்றும் நாட்டிங்ஹாம்ஷையர் வரலாற்றின் ஒரு முக்கிய அடையாளம்' என விவரித்துள்ளது. அதோடு, "சர் கார்ஃபீல்ட் சோபர்ஸின் மறைவைக் கேட்டு நாங்கள் அளவற்ற துயரில் இருக்கிறோம்" என்று நாட்ஸ் நிர்வாகம் தெரிவித்துள்ளது.

இங்கிலாந்து கிரிக்கெட் வாரியமும் சமூக ஊடகங்களில் தமது அஞ்சலியைச் செலுத்தியுள்ளது. அதில் சோபர்ஸை 'இந்த விளையாட்டை விளையாடிய மிகச் சிறந்த வீரர்களில் ஒருவர்' என்று குறிப்பிட்டதுடன், 'எங்கள் இதயங்களில் நீங்கள் என்றும் வாழ்வீர்கள், சர் கார்ஃபீல்ட் சோபர்ஸ்' என்றும் கூறியுள்ளது.

பாப் பாடகி ரிஹானாவுடன் சேர்ந்து, பார்படாஸ் நாட்டில் வாழ்ந்து வந்த இரண்டு 'தேசிய நாயகர்களில்' ஒருவராக சோபர்ஸ் திகழ்ந்தார்.

அவர் தனது 16வது வயதில் பார்படாஸ் அணிக்காக முதல்தர போட்டிகளில் அறிமுகமானார். 17வது வயதில் வெஸ்ட் இண்டீஸ் அணியில் விளையாடும் வாய்ப்பைப் பெற்றார். தொடக்கத்தில் அவர் பந்துவீச்சாளராகவே அதிகம் வெற்றி பெற்றார். அவர் இடது கை ஃபிங்கர்-ஸ்பின், அவ்வப்போது ரிஸ்ட்-ஸ்பின் மற்றும் வேகப்பந்து என அனைத்தையும் வீசினார். ஆனால் பின்னர் பேட்டிங்கிலும் ஜொலித்து 26 டெஸ்ட் சதங்களை விளாசினார். அதோடு 57.78 என்ற சிறந்த பேட்டிங் சராசரியுடன் தனது கிரிக்கெட் வாழ்க்கையை நிறைவு செய்தார்.

அவர் தனது முதல்தர கிரிக்கெட் வாழ்க்கையில் நாட்டிங்ஹாம்ஷையர் அணிக்காக எடுத்த 7,041 ரன்கள் உள்பட மொத்தம் 28,314 ரன்களை குவித்தார். மேலும் 1,043 முதல்தர விக்கெட்டுகளை வீழ்த்தியதோடு, ஒரு சிறந்த ஃபீல்டராகவும் விளங்கினார்.

ஒரு சிறந்த ஆட்டக்காரராகப் பெற்ற வெற்றியைப் போல ஒரு கேப்டனாக பெரிய வெற்றிகளைப் பெறாவிட்டாலும், அவர் 1965 முதல் 1972 வரை வெஸ்ட் இண்டீஸ் அணியின் கேப்டனாக செயல்பட்டார். இங்கிலாந்து மற்றும் ஆஸ்திரேலியா சுற்றுப் பயணங்களின்போது 'ரெஸ்ட் ஆஃப் தி வேர்ல்ட் லெவன்' அணியின் கேப்டனாகவும் அவர் பொறுப்பு வகித்தார்.

"அவரது அசாத்தியமான புள்ளிவிவரங்கள் (ரன்கள்/விக்கெட்டுகள்) மட்டுமின்றி, அவர் விளையாடிய விதம், தரம், தனித்திறன், நளினம், சாதனை ஆட்டங்களை அவர் வெளிப்படுத்திய சூழ்நிலைகள் ஆகியவற்றைக் கருத்தில் கொள்ளும்போது, அவர்தான் எக்காலத்திலும் வாழ்ந்த மிகச் சிறந்த கிரிக்கெட் வீரர் என்பதில் எவ்வித சந்தேகமும் இல்லை" என்று டெஸ்ட் மேட்ச் சிறப்பு வர்ணனையாளர் ஃபசீர் முகமது கூறியுள்ளார்.

"கரீபியன் தீவுகளில் மட்டுமின்றி, உலக அளவிலும் இந்த விளையாட்டின் முதல் சூப்பர் ஸ்டாராக அவரே திகழ்ந்தார். கிரிக்கெட் விளையாட்டு மாறத் தொடங்கிய ஒரு காலகட்டத்தை உள்ளடக்கியதாக அவரது தொழில் வாழ்க்கை அமைந்திருந்தது. வெஸ்ட் இண்டீஸ் கிரிக்கெட்டின் ஒட்டுமொத்த பிம்பத்திற்கும், அவர்களால் என்ன செய்ய முடியும் என்பதற்கும் கார்ஃபீல்ட் சோபர்ஸ் என்ற தனிமனிதரின் வருகை மட்டுமே மிகப் பெரிய மாற்றத்தை ஏற்படுத்தியது" என்றும் அவர் குறிப்பிட்டார்.

சர்வதேச கிரிக்கெட் கவுன்சிலின் தலைவர் ஜெய் ஷா, கிரிக்கெட் உலகம் தனது 'மிகச்சிறந்த அடையாளங்களில்' ஒன்றையும், 'வரலாறு கண்ட மிகச் சிறந்த ஆல்-ரவுண்டரையும்' இழந்துவிட்டதாகத் தெரிவித்துள்ளார்.

'விளையாட்டின் ஒவ்வொரு துறையிலும் ஒரு போட்டியின் போக்கை மாற்றக்கூடிய அவரது அசாத்திய திறன், அவரை சக வீரர்களிடம் இருந்து தனித்துக் காட்டியதாகவும்' ஜெய் ஷா புகழாரம் சூட்டியுள்ளார்.

"பேட்டிங், பந்துவீச்சு, ஃபீல்டிங் என எதுவாக இருந்தாலும், அதில் சிறந்து விளங்குவதின் இலக்கணமாக சர் கார்ஃபீல்ட் திகழ்ந்தார்; அவரது சாதனைகள், தலைமுறை தலைமுறையாக வரும் கிரிக்கெட் வீரர்கள் அடைய விரும்பும் ஒரு தரநிலையாகத் தொடர்ந்து விளங்குகின்றன.

"சர் கார்ஃபீல்ட் கிரிக்கெட்டின் உண்மையான ஒரு தூதராக இருந்தார். அவரது பாரம்பரியம் வெறும் சாதனைகளையும் புள்ளிவிவரங்களையும் தாண்டியது. வெஸ்ட் இண்டீஸ் கிரிக்கெட் வரலாற்றின் மிகவும் புகழ்பெற்ற ஒரு காலகட்டத்தில், அதன் அடையாளத்தை உருவாக்க அவர் உதவினார். அதோடு கிரிக்கெட் விளையாட்டின் வரலாற்றில் ஓர் அழியாத முத்திரையையும் பதித்துச் சென்றுள்ளார்."

கிரிக்கெட் வெஸ்ட் இண்டீஸ் அமைப்பின் தலைவர் கிஷோர் ஷாலோ, 'சர் கார்ஃபீல்ட் சோபர்ஸ் ஒரு விளையாட்டு அடையாளம் என்பதையும் தாண்டிய ஒருவராக மாறினார். அவர் கரீபியனின் சிறந்து விளங்குதல், மீள்திறன் மற்றும் சாத்தியக்கூறுகளின் அடையாளமாகத் திகழ்ந்தார்' என்று புகழாரம் சூட்டினார்.

'கிரிக்கெட் வரலாற்றில், சிறந்த வீரர்கள் இருக்கிறார்கள். சாம்பியன்கள் இருக்கிறார்கள். ஆனால், மகத்துவம் என்பதன் அர்த்தத்தையே மாற்றி அமைக்கும் அரிய மனிதர்களும் இருக்கிறார்கள்' என்று அவர் கூறினார்.

'சர் கார்ஃபீல்ட் சோபர்ஸ் உலகம் கண்ட மிகச் சிறந்த கிரிக்கெட் வீரர். பேட்டிங், பந்துவீச்சு, ஃபீல்டிங் ஆகியவற்றில் அவர் பெற்றிருந்த தேர்ச்சிக்கு நிகரே இல்லை. ஆனால் அவரது உண்மையான முக்கியத்துவம் மைதானத்தின் எல்லைக் கோடுகளையும் தாண்டி பரவியிருந்தது. நமது கரீபியன் பிராந்தியம் தனது சொந்தக் குரலைக் கண்டறிந்து, உலக அரங்கில் தனது இடத்தை நிலைநிறுத்திக் கொண்டிருந்த ஒரு காலகட்டத்தில் அவர் கரீபியனில் இருந்து உருவெடுத்தார்' என்றும் அவர் குறிப்பிட்டார்.

"தனது சிறந்த ஆட்டத்தின் மூலம், நமது தீவுகளிலும் மற்றும் புலம்பெயர்ந்து வாழும் லட்சக்கணக்கான மக்களிடையிலும் சாத்தியமானவை குறித்த ஒரு புதிய நம்பிக்கையை அவர் அளித்தார். மகத்துவம் என்பது நமது நாடுகளின் அளவாலோ, நமது தீவுகளின் நிலவியல் அமைப்பாலோ அல்லது நமது தொடக்க கால சூழ்நிலைகளாலோ கட்டுப்படுத்தப்பட்டது அல்ல என்பதை அவர் நிரூபித்துக் காட்டினார்."

அவரது சாதனைகள் பார்படாஸுக்கு பெருமையையும், வெஸ்ட் இண்டீஸுக்கு ஊக்கத்தையும், கிரிக்கெட் உலகின் ஒவ்வொரு மூலையில் இருந்தும் பாராட்டுகளையும் தேடித் தந்தன.

பார்படாஸ் பிரதமர் மியா மோட்லி, சோபர்ஸின் குடும்பத்தினருக்கும் அவரது அன்புக்கு உரியவர்களுக்கும் தனது ஆழ்ந்த இரங்கலைத் தெரிவித்துக் கொண்டதோடு, தீவில் வெள்ளிக்கிழமை தேசிய துக்க நாளாக அனுசரிக்கப்படும் என்றும், சோபர்ஸின் இறுதிச் சடங்கு நடைபெறும் நாளும் துக்க நாளாக இருக்கும் என்றும் அறிவித்துள்ளார்.

- இது, பிபிசிக்காக கலெக்டிவ் நியூஸ்ரூம் வெளியீடு