Iran oo uga digtay dalalka Khaliijka inay Maraykanka u oggolaadaan inuu dhulkooda ka weeraro Iran

Tebin toos ah

1. 16 Luulyo 2026War deg deg ah, Iiraan oo bilowday weerarro cusub oo ka dhan ah saldhigyada Mareykanku ku leeyahayKhaliijka

   Tehran ayaa qaaday weerarro cusub oo ka dhan ah saldhigyada milatari ee Maraykanka ee ku yaalla dalalka Khaliijka ee deriska la ah, halka Washington ay sii waday weerarrada ay ku qaadayso goobo ku yaalla Iran habeenkii oo dhan ah.

   Tehran waxay sheegtay inay beegsatay bartilmaameedyo ku yaalla gobolka, oo ay ku jiraan Jordan, Kuweyt iyo Baxrayn, iyadoo maalintii lixaad ee colaadaha dib u soo cusboonaaday ay cadaadis saarayso heshiis hordhac ah oo lagu doonayay in lagu soo afjaro dagaalka.

   Dhanka kale, milatariga Maraykanka ayaa sheegay inuu qaaday weerarro socday lix saacadood oo meelo badan laga fuliyay, kuwaas oo lagu doonayay in lagu “wiiqo awoodda Iran ee ay ugu hanjabi karto badmaaxiinta aan waxba galabsan” ee marinka Hormuz.

   Is-weydaarsiga weerarradii ugu dambeeyay ayaa yimid kaddib markii Madaxweynaha Maraykanka Donald Trump uu uga digay Iran inay “si wanaagsan u dhaqanto”, isagoo sheegay in ay wajihi karto tallaabooyin milatari oo dheeraad ah haddii aysan Iran dib ugu soo laaban wada-hadallada.

2. 16 Luulyo 2026Mareykanka oo muwaadiniintiisa ku sugan Congo ka mamnuucay in ay galaan dalkiisa sabab la xiriira Ebola

   Safaaradda Mareykanka ee Kinshasa ayaa ku dhawaaqday in muwaadiniinta Mareykanka ee ka baxaya Jamhuuriyadda Dimuqraadiga ah ee Congo aan loo oggolaan doonin inay raacaan duulimaadyada ku socda Mareykanka ilaa ay 21 maalmood ku maqnaadaan meel ka baxsan DRC, sababo la xiriira faafitaanka cudurka Ebola ee ka jira bariga dalka.

   Tallaabadan ayaa timid kaddib digniin ay soo saartay Xarunta Xakamaynta iyo Ka Hortagga Cudurrada ee Mareykanka CDC, taas oo sheegtay in dadka ka imaanaya DRC, Uganda iyo Koonfurta Suudaan la baari doono caafimaadkooda muddo 21 maalmood ah.

   Sida ay sheegtay CDC, dadka ka baxaya DRC waxaa lagu soo rogi karaa amar ah "Ha Safrin", kaas oo ka hor istaagaya inay raacaan diyaaradaha ku socda Mareykanka ilaa muddada kormeerka caafimaadku dhammaato.

   Dadka loo oggolaado inay galaan Mareykanka waxay weli mari doonaan baaritaanno caafimaad oo lagu sameeyo garoomo diyaaradeed oo gaar ah, kuwaas oo ay ka mid yihiin cabbiridda heerkulka jirka iyo la socodka xaaladdooda caafimaad.

   Safaaradda Mareykanka ayaa uga digtay muwaadiniinteeda ku sugan DRC inay fishaan dib-u-dhacyo ku yimaada safarrada, isla markaana laga yaabo inay maraan dal kale ka hor inta aysan ku laaban Mareykanka. Si kastaba ha ahaatee, waxaa jiri kara qaar ka mid ah ka-reebitaanno loo oggolaan karo sababo jiro awgood.

   Dhanka kale, Xarunta Hawlgallada Gurmadka Caafimaadka Dadweynaha ee DRC ayaa sheegtay in faafitaanka Ebola uu weli sii kordhayo. Ilaa 13-ka Luulyo, waxaa la xaqiijiyay 2,011 xaaladood, halka ay dhinteen 754 qof oo ku kala sugan shan gobol. Gobolka Ituri ayaa laga soo wariyay tirada ugu badan ee caabuqyada cusub.

   Saraakiisha caafimaadku waxay sidoo kale sheegeen in kiisaska cusub ee laga helay gobolka Haut-Uélé ay muujinayaan in cudurku uu sii fidayo una gudbayo deegaanno cusub.Heerka dhimashada ee cudurkan ayaa gaartay 37.5%, taas oo muujinaysa saameynta weyn ee fayriska.

3. 16 Luulyo 2026War deg deg ah, Mareykanka oo sii wada weerarrada uu ku hayo Iiraan

   Hamzeh Amraei, ku xigeenka siyaasadda ee xafiiska guddoomiyaha gobolka Hamedan, ayaa sheegay in Mareykanku uu saaka weerarro ka geystay goobo ku yaalla magaalada Kabudarahang ee gobolkaas.

   Wuxuu sheegay in aanu jirin qof ku dhaawacmay weerarradaas.

   Faahfaahin dheeraad ah lagama bixin goobihii la bartilmaameedsaday.

4. 16 Luulyo 2026Ra'iisul Abiy oo shaaciyay sababta ay u waayeen marin ay u maraan Badda Cas

   Ra'iisul Wasaaraha Itoobiya, Abiy Axmed, ayaa mar kale sheegay in Itoobiya ay "weyday" helidda marinka Badda Cas ee Eritrea sababo la xiriira go'aanno ay qaateen "xukuumadaha aan shacabka soo dooran."

   "Qaabkii aan ku weynay marin u helidda Badda Cas wuxuu ka mid ahaa dhacdooyinkii ugu xumaa ee taariikhda," ayuu Abiy ku sheegay khudbad uu ka jeediyay munaasabadda furitaanka shirka wada-hadalka qaran ee ka dhacay Addis Ababa shalay.

   Khudbadda ayaa si toos ah uga baxaysay telefishinka dowladda, ETV.

   "Waxa ugu weyn ee sababay in xukuumaddii aan la dooran ay si qorsheysan uga dhigto Itoobiya dal juqraafi ahaan ku go'doonsan, iyadoo lumisay marinka Badda Cas oo ay qarniyo badan lahayd, maamuli jirtayna, isla markaana uga faa'iidaysan jirtay nafteeda iyo gobolka, waxay ahayd daciifnimadeenna gudaha; mana ahayn in ay jireen awoodo ku dhiirran kara inay waxyeelleeyaan danaha Itoobiya," ayuu yiri.

   Hadallada Abiy ayaa imanaya iyadoo xiisadda u dhexeysa Itoobiya iyo deriskeeda Eritrea ay sii kordhayso, taas oo la xiriirta dadaalka Addis Ababa ay ugu jirto inay hesho marin-badeed madax-bannaan oo ku yaalla Badda Cas.

   Itoobiya waxay noqotay dal aan lahayn xeeb kaddib markii Eritrea ay xornimadeeda qaadatay sannadkii 1991.

5. 16 Luulyo 2026War deg deg ah, Degdeg: Mareykanka oo ku dhawaaqay tallaabo Sacuudiga dan ugu jirto

   Wasaaradda Arrimaha Dibadda ee Mareykanka ayaa ku dhawaaqday inay oggolaatay heshiisyo hub looga iibinayo Sacuudiga oo qiimihiisa lagu qiyaasay 1 bilyan iyo 960 milyan oo doolar, si loo xoojiyo nidaamyada difaaca cirka ee dalkaas. Tallaabadan ayaa ku soo beegmaysa iyadoo ay sii kordhayaan colaadaha ka taagan Bariga Dhexe.

   Wasaaradda Arrimaha Dibadda ee Mareykanka ayaa war ay soo saartay ku sheegtay: “Iibkan wuxuu waafaqsan yahay siyaasadda arrimaha dibadda iyo amniga qaranka ee Mareykanka, taas oo ay ka mid tahay xoojinta amniga mid ka mid ah xulafada ugu muhiimsan ee aan xubinta ka ahayn NATO. Sacuudigu wuxuu door muhiim ah ka ciyaaraa xasilloonida siyaasadeed iyo horumarka dhaqaale ee gobolka Khaliijka Carabta.”

   Wasaaraddu waxay sidoo kale sheegtay in heshiiska la soo jeediyay uu Sacuudiga siinayo ilaa 20,000 unug oo hagitaan oo loogu talagalay Nidaamka Hubka Saxnaanta Sare, kuwaas oo loo adeegsan doono hawlgallada hawada-ilaa ilaa-dhulka. Heshiiska waxaa sidoo kale ku jira qalabka lagu rido, madaxyada gantaallada, qaybo dayactir, tababar iyo taageero saadka.

   Dhanka kale, Wasaaradda Arrimaha Dibadda ee Mareykanka ayaa sidoo kale oggolaatay heshiis gaaraya 484 milyan oo doolar oo loogu talagalay taageero farsamo oo la siinayo diyaaradaha Kuweyt.

   Heshiiska hubka ee Kuweyt waxa uu ka kooban yahay taageero farsamo iyo qalab la xiriira diyaaradaha C-17, oo ay ku jiraan qaybo beddel ah, adeegyo dayactir, software, tababar iyo adeegyo saadka.

   Heshiisyadan hubka ayaa la dhammaystiri doonaa lana hirgelin doonaa marka ay maraan habka dib-u-eegista ee Golaha Kongareeska Mareykanka.

6. 16 Luulyo 2026War deg deg ah, Iiraan oo xoojisay weerarrada xulufada Mareykanka iyo gantaaladeeda oo la qabtay

   Wakaaladda wararka ee Petra ee Urdun, oo soo xiganaysa ciidamada qalabka sida ee dalkaas, ayaa sheegtay in siddeed gantaal oo Iiraan ay ku ridday Urdun la qabtay lana burburiyey.

   Wakaaladdu waxay soo xigatay ilo ka tirsan militariga oo sheegay in qabashada gantaalladaasi aysan sababin wax dhimasho ah ama khasaare hantiyeed.

   Horey, militariga Iiraan ayaa sheegay inay adeegsadeen diyaaradaha aan duuliyaha lahayn si ay u beegsadaan nidaamyada isgaarsiinta, xarun raadaar oo joogto ah, iyo bakhaarro shidaal oo ay leeyihiin ciidamada Mareykanka oo ku yaalla saldhigga cirka ee Al-Azraq ee dalka Urdun.

7. 16 Luulyo 2026War deg deg ah, Degdeg: Iiraan oo soo ridday diyaarad Mareykanku leeyahay

   Iiraan ayaa sheegtay inay soo ridday oo burburisay diyaarad nooca MQ-9 ah oo Mareykanku leeyahay, taas oo ay ku andacoonayso inay ku duuleysay hawada magaalada Andimeshk.

   Sida ay sheegeen Ciidanka Ilaalada Kacaanka Islaamiga ah ee Iiraan, diyaaradda waxaa lagu soo riday nidaam casri ah oo difaaca cirka ah.

   Wakaaladda wararka ee Tasnim, oo xiriir la leh IRGC, ayaa sheegtay in howlgalkaasi uu guuleystay, hase yeeshee ma aysan soo bandhigin wax caddeyn ah oo xaqiijinaya sheegashadaas.

   Ilaa iyo hadda, Mareykanka iyo Taliska Dhexe ee Ciidamada Mareykanka CENTCOM, midkoodna si rasmi ah uma xaqiijin sheegashada Iiraan ee ah in diyaaradda MQ-9 la soo riday.

8. 16 Luulyo 2026War deg deg ah, Trump oo sheegay in la sii daayay haweeney Iiraan xirtay

   Madaxweynaha Mareykanka, Donald Trump, ayaa sheegay in Iran ay sii daysay haweeney Mareykan ah oo uu sheegay in si aan sharci ahayn loo xiray bishii Diseembar 2024.

   Qoraal uu ku daabacay baraha bulshada ee Truth Social, Trump wuxuu ku sheegay in Iran ay u oggolaatay haweeneydaas oo ah muwaadinad Mareykan ah inay ka baxdo dalka.

   Madaxweynaha Mareykanka ma shaacin magaca haweeneyda la sii daayay, balse wuxuu sheegay inay hadda nabad qabto, caafimaad qabto, isla markaana ay ka baxday Iran.

   Trump wuxuu sidoo kale sheegay in haweeneyda la xiray bishii Diseembar 2024, xilli uu Joe Biden ahaa madaxweynaha Mareykanka. Si kastaba ha ahaatee, ma uusan bixin faahfaahin dheeraad ah oo ku saabsan kiiska.

9. 16 Luulyo 2026War deg deg ah, Degdeg: Mareykanka oo duqeyay garoonka diyaaradaha ee Semnan ee dalka Iiraan

   Wakaaladda wararka dowladda Iran ee IRNA ayaa sheegtay in duqeymo uu Mareykanku xalay fuliyay lagu bartilmaameedsaday garoonka diyaaradaha ee Semnan.

   BBC Persian, oo soo xiganaysa IRNA, ayaa werisay in mas'uuliyiinta gobolka Semnan ay xaqiijiyeen weerarka, ayna sheegeen in dhowr gantaal ama madfac ay ku dhaceen gudaha garoonka diyaaradaha ee Semnan, taasoo sababtay qaraxyo laga maqlay meelo kala duwan oo magaalada ah.

   Sida ay sheegeen mas'uuliyiinta, dhowr ka mid ah gantaalladii ku dhacay garoonka diyaaradaha ee Semnan ayaa sababay qaraxyadii laga maqlay magaalada.

   Sida ay IRNA sheegtay, lama soo sheegin wax dhimasho ama dhaawac ah oo ka dhashay weerarka.

   Semnan waa gobol muhiim ah oo ku yaalla waqooyiga Iran, hase yeeshee weli lama shaacin faahfaahin ku saabsan nooca weerarka ama heerka khasaaraha uu geystay.

10. 16 Luulyo 2026War deg deg ah, Ciraaq oo lagu soo riday diyaarado weerar ku qaaday deegaanno halkaasi ku yaalla

    Ra'iisul Wasaaraha Ciraaq, Cali Al-Zaidi, ayaa xafiiskiisu ku sheegay war-qoraal ah inuu cambaareeyay "weerarka diyaaradaha aan duuliyaha lahayn ee ka dhacay Erbil, caasimadda Gobolka Kurdistaan ee Ciraaq. Bayaanka ayaa intaas ku daray in dhowr diyaaradood oo drone ah lagu soo riday deegaanka.

    Iyadoo aan la sheegin halka laga soo qaaday weerarka. Ra'iisul Wasaaraha Ciraaq ayaa yiri:"Waxaan amarnay in, iyadoo la kaashanayo ciidamada amniga ee Dowladda Gobolka Kurdistaan, la qaado dhammaan tallaabooyinka lagama maarmaanka ah si looga hortago in weerarro noocan oo kale ah ay mar kale dhacaan, lana fashiliyo isku day kasta oo lagu waxyeelleynayo amniga bulshada guud ee Ciraaq, meel kasta oo ay ka jirto."

11. 16 Luulyo 2026War deg deg ah, Ilaalada Kacaanka Iiraan oo qaaday weerarro culus oo lala beegsaday saldhigyo

    Ku dhowaad saacad kadib markii Mareykanku ku dhawaaqay weerarro cusub oo uu ka fuliyay gobollada koonfureed ee Iiraan, Ciidanka Ilaalada Kacaanka Islaamiga ah ayaa sheegay inay fuliyeen weerarro lagu beegsaday saldhigyo militari oo Mareykanku ku leeyahay Baxrayn iyo Kuweyt.

    Sida ay sheegtay BBC Persian, bayaan ay Ciidanka Ilaalada Kacaanka soo saareen ayaa lagu sheegay in intii lagu jiray hawlgal isku mar loo adeegsaday gantaallo iyo diyaarado aan duuliye lahayn "bakhaarro dhowr ah oo lagu kaydin jiray hub iyo qalab dayactir oo loogu talagalay maraakiibta iyo diyaaradaha cadowga ayaa lagu burburiyay Saldhigga Cirka ee Sheekh Ciise ee Baxrayn."

    Bayaanka ayaa intaas ku daray: "Waxaa sidoo kale la beegsaday goobta ay yaalleen diyaaradaha aan duuliyaha lahayn ee nooca MQ-9 ee cadowga oo ku sugan Saldhigga Cirka ee Ali Al-Salem ee Kuweyt." Waxa kale oo lagu sheegay in dhowr diyaaradood oo aan duuliye lahayn la burburiyay ama la dhaawacay weerarkaasi.

12. 16 Luulyo 2026Xoghayaha Guud ee Qaramada Midoobay oo walaac qoto dheer ka muujiyay xiisadda sii kordhaysa ee u dhaxaysa Mareykanka iyo Iiraan.

    Xoghayaha Guud ee Qaramada Midoobay ayaa muujiyay walaac xooggan oo ku saabsan sii kordhaya xiisadda u dhexeysa Iran iyo Mareykanka.

    Afhayeenka Xoghayaha Guud ee Qaramada Midoobay, Stephane Dujarric, ayaa sheegay in Antonio Guterres uu si weyn uga walaacsan yahay xaaladda sii xumaanaysa ee u dhexeysa Mareykanka iyo Iran.

    "Dib ugu laabashada dagaal buuxa waxay shacabka rayidka ah ku keeni doontaa dhibaato aan la qaadi karin," ayuu yiri Dujarric.

    Wuxuu intaas ku daray in "dagaalka noocaas ahi uu yeelan doono cawaaqib aad u daran oo ku wajahan nabadda iyo amniga caalamka, iyo sidoo kale dhaqaalaha dunida."

13. 16 Luulyo 2026IRGC oo sheegtay inay bartilmaameedsatay nidaamka radar-ka ee digniinta hor-dhaca bixiya ee saldhigga Ali Salem ee Kuwait

    Ilaalada Kacaanka Islaamiga ah ee Iran (IRGC) ayaa bayaan ay soo saartay ku sheegtay inay weerarradeeda ku beegsatay raadaarka digniinta hor-dhaca ah bixiya ee nidaamka C-RAM ee ku yaalla saldhigga Ali Al Salem ee dalka Kuwait.

    IRGC ayaa sidoo kale sheegtay inay weerartay goob ay ku sugnaayeen askar Mareykan ah oo ku taalla Kuwait.

    Bayaanka ayaa lagu sheegay in weerarradaasi ay ahaayeen howlgal isku dhaf ah oo lagu fuliyay gantaallo iyo diyaarado aan duuliye lahayn.

14. 16 Luulyo 2026Ciidanka Ilaalada Kacaanka Iran oo sheegay inay soo rideen diyaarad aan duuliye lahayn oo Mareykanka leeyahay

    Ilaalada Kacaanka Islaamiga ah ee Iran (IRGC) ayaa ku dhawaaqday inay soo ridday oo burburisay diyaarad aan duuliye lahayn oo nooca MQ-9 ah oo uu leeyahay Mareykanka, taasoo ay sheegeen inay dul maraysay magaalada Andimeshk.

    Sida ay qortay wakaaladda wararka ee Tasnim, IRGC waxay sheegtay in diyaaradda lagu soo riday nidaam casri ah oo difaaca cirka ah.

    Ilaa hadda, Mareykanka iyo Taliska Dhexe ee Ciidamada Mareykanka (CENTCOM) si rasmi ah uma xaqiijin sheegashada ah in diyaaradda MQ-9 la soo riday.

15. 16 Luulyo 2026Iran ayaa u yeertay safiirka Britain ee Tehran si ay cabasho uga muujiso mamnuucidda Ilaalada Kacaanka

    Warbaahinta dowladda Iran ayaa sheegtay in Wasaaradda Arrimaha Dibadda ee dalkaasi ay u yeertay safiirka Britain ee Tehran, si ay uga cabato go’aanka London ay Ilaalada Kacaanka Islaamiga ah (IRGC) ugu dartay liiska ururrada mamnuuca ah.

    Sida ay sheegayaan wararkaas, saraakiisha Iran ayaa intii uu socday kulanka cambaareeyay go’aanka dowladda Britain, iyagoo ku tilmaamay "mid sharci-darro ah" iyo "faragelin ah."

    Tehran ayaa sidoo kale ka digtay saameynta uu tallaabadani ku yeelan karo xiriirka labada dal.

    Dowladda Britain ayaa horay u shaacisay inay IRGC ku dartay liiska ururrada mamnuuca ah.

16. 16 Luulyo 2026Imaaraadka o war ka soo saaray duqeymaha ay Iran ku hayso dalalka Khaliijka

    Imaaraadka Carabta ayaa si "adag" u cambaareeyay weerarrada Iran ay ku qaaday dalalka Carabta.

    Wasaaradda Arrimaha Dibadda ee Imaaraadka ayaa ku tilmaantay weerarradaas "xadgudub cad oo ka dhan ah madax-bannaanida dalalka walaalaha ah iyo khatar ku wajahan ammaankooda iyo..."

17. 16 Luulyo 2026Mareykanka oo cunaqabateyn ku soo rogay muwaadiniin u kala dhalashay Iran, Ruushka iyo Talyaaniga

    Mareykanka ayaa ku soo rogay cunaqabateynno cusub oo la xiriira ka hortagga faafinta hubka shaqsiyaad iyo hay’ado ku sugan Iran iyo Ruushka.

    Sida ku xusan ogeysiis ay soo saartay Xafiiska Xakamaynta Hantida Dibadda ee Wasaaradda Maaliyadda Mareykanka (OFAC), mid ka mid ah dadka Iran u dhashay ee cunaqabateynta lagu soo rogay waa Behrouz Namazi, oo ah guddoomiyaha guddiga maamulka shirkadda Nika P Development Company iyo madaxa fulinta shirkadda Nika Jet Company, kuwaas oo lala xiriiriyay Ilaalada Kacaanka Islaamiga ah ee Iran (IRGC).

    Muwaadin Ruush ah iyo muwaadin Talyaani ah ayaa sidoo kale lagu daray cunaqabateynta, iyagoo lala xiriiriyay shaqsiga Iran u dhashay.

    Mareykanka, oo shalay dib u bilaabay go’doominta badda ee Iran, ayaa isla waqtigaas sii wada inuu cunaqabateyn ku soo rogo muwaadiniin iyo hay’ado ka tirsan Jamhuuriyadda Islaamiga ah ee Iran.

18. 16 Luulyo 2026Fars News Agency: Weerar gantaallo oo Mareykan ah ayaa ka dhacay meel u dhow Isbitaal lagu daweeyo Carruurta qabta Kansarka

    Wakaaladda wararka ee Fars News Agency ayaa war ay soo saartay ku sheegtay in dhowr gantaal oo Mareykan ah ay "ku dhaceen meel u dhow isbitaal lagu daweeyo carruurta qaba kansarka."

    Warbaahintu waxay qortay in "saacadihii la soo dhaafay, dadka magaalada Ahvaz ay arkeen weerarro gantaallo ah" oo ka dhacay goobo kala duwan.

    Fars waxay sheegtay:

    "Mid ka mid ah weerarradan, dhowr gantaal ayaa ku dhacay aagga ku dhow Isbitaalka Baghaei, kaasoo ah goob lagu bixiyo daaweynta kiimoterabiga ee bukaannada kansarka, gaar ahaan carruurta qaba kansarka."

    BBC-da si madax-bannaan uma xaqiijin karto warkan, sababo la xiriira inaysan si toos ah u heli karin xog gudaha Iran ah.

19. 16 Luulyo 2026Qaraxyo dhowr ah oo ka dhacay meel u dhow qunsuliyadda Mareykanka ee Erbil

    Warbaahinta caalamiga ah ayaa sheegtay in dhowr qarax laga maqlay meel u dhow Qunsuliyadda Mareykanka ee Erbil, oo ah caasimadda gobolka Kurdistan ee Ciraaq.

    Kadib qaraxyadaas, waxaa la hawlgeliyay nidaamyada difaaca cirka ee lagu rakibay agagaarka qunsuliyadda.

    Qunsuliyadda Mareykanka ee Erbil ayaa horey u noqotay bartilmaameed dhowr weerar oo loo adeegsaday gantaallo iyo diyaarado aan duuliye lahayn (drones) intii uu socday colaaddii ugu dambeysay ee Bariga Dhexe.

    Ilaa hadda lama soo saarin faahfaahin ku saabsan cidda ka dambeysay qaraxyada cusub, khasaaraha suurtagalka ah ee ka dhashay, ama heerka burburka.

    Saraakiisha Mareykanka iyo Ciraaq weli si rasmi ah ugama aysan jawaabin wararkan.

20. 16 Luulyo 2026Mareykanka oo mowjad cusub oo weerarro ah oo ka dhan ah Iran

    Milatariga Mareykanka ayaa ku dhawaaqay in ciidamadoodu ay bilaabeen mowjad cusub oo weerarro ah oo lagu qaaday bartilmaameedyo ku yaalla Iran.

    Faahfaahin dheeraad ah lagama soo saarin goobaha ay weerarradu ka dhaceen, bartilmaameedyada la beegsaday, ama baaxadda khasaaraha suurtagalka ah ee ka dhashay. Saraakiisha Iran weli kama aysan jawaabin warkan