Gearan an Ìle nach eil sgeul air maoin ùir taice a gheall an Riaghaltas

Tha gearainean ann an Ìle nach eil sgeul air taic-airgid a gheall Prìomh Mhinistear na h-Alba mu choinneimh thrioblaidean nan seirbheisean aiseig.

Chaidh Maoin Seasmhachd nan Eilean a stèidheachadh an toiseach an-uiridh airson taic a thoirt do ghnothachasan ann an cuid de sgìrean eileanach air an robh suidheachadh nan aiseagan air call a dhèanamh.

Bha connspaid ann mun sgeama, agus cuid de dh'eileanan nach robh airidh air taic.

Thuirt John Swinney, aig àm an taghaidh sa Chèitean am-bliadhna, gum biodh maoin ùr £10m air a stèidheachadh an taobh a-staigh 20 là den riaghaltas ùr.

Ach dà mhìos an dèidh sin tha luchd-gnothaich ann an Ìle ag ràdh nach fhaca iad dad den airgead fhathast.

Tha Dòmhnall MacIllÌosa, aig a bheil companaidh bathair a bhios a' ruith eadar an t-eilean agus tìr-mòr, ag ràdh gu bheil an gnothachas aige an cunnart a dhol fodha leis cho dona 's a tha na seirbheisean aiseig.

"Tha e seachad air ìre èiginnich," thuirt e.

"Tha sinn air a bhith ag obair cha mhòr 20 bliadhna, agus tha taobh còmhdhail a' ghnothachais a-niste neo-phrothaideach.

"Pàirt dheth sin 's e buaireadh nan aiseagan, ach cuideachd cosgais a' chonnaidh agus àrdachadh Àrachas Nàiseanta an Luchd-fastaidh.

"Tha an aiseag air buaidh mhòr uabhasach a thoirt oirnn. Chan fhaic mi ro fhada romham a thaobh còmhdhail mar a tha e. Feumaidh sinn carbadan a chur bhuainn, 's luchd-obrach a ghearradh."

Cha d' fhuair Dòmhnall sìon fon sgeama, 's an gnothachas aige air a mheas ann an roinn nach robh airidh air taic.

Tha cathraiche Buidheann Còmhdhail na Gàidhealtachd 's nan Eilean (HITRANS) Ùisdean Robasdan, an dòchas gum faigh gnothachasan anns a h-uile eilean air a bheil staing nan aiseagan air buaidh a thoirt cothrom air a' mhaoin ùr.

"Tha mi an dòchas an turas seo gun coimhead ann na doimhneachd air agus gum bi e nas cothromaiche mar a tha ga làimhseachadh," thuirt e.

"Ach aig deireadh an là chan eil e a' dol a bhualadh nan taobhannan.

"Tha sinn a' faicinn mar-thà gnothachasan ag ràdh nach eil iad a' faicinn na h-uiread de dhaoine."

Tha an Riaghaltas a-niste a' cumail choinneamhan co-chomhairleachaidh le gnothachasan agus buidhnean eile.

Thuirt neach-labhairt às leth Riaghaltas na h-Alba: "'S e fear de ghealltanasan 100 là Riaghaltas na h-Alba a th' ann am Maoin £10m Seasmhachd nan Eilean, agus thèid a thoirt air adhart sna seachdainnean a tha romhainn".