राष्ट्रवादी काँग्रेसनं सुरू केला LGBT सेल, निवडणुकीत आरक्षणाची मागणी

प्रत्येक राजकीय पक्षांमध्ये युवक, युवती, विद्यार्थी, कामगार, महिला अश्या अनेक संघटना असतात. या संघटना त्या विशिष्ट वर्गासाठी काम करतात. या संघटनांमार्फत राजकीय पक्षांना त्या विशिष्ट वर्गापर्यंत पोहचता येतं. असाच दुर्लक्षित असणारा समुदाय म्हणजे 'LGBT' समुदाय. राष्ट्रवादी काँग्रेसने एक पाऊल पुढे टाकत 'LGBT' समुदायासाठी स्वतंत्र सेलची स्थापना केली आहे.

हा 'LGBT सेल' त्यांच्या समुदायातील वंचितांसाठी काम करणार असल्याचं राष्ट्रवादी काँग्रेसचे प्रदेशाध्यक्ष जयंत पाटील यांनी म्हटलं आहे. हा सेल नेमकी काय कामं करणार? 'एलजीबीटी' समुदायाला राजकीय पक्षात सामील करून ते मुख्य प्रवाहात येतील का? याबाबतचा हा आढावा...

राष्ट्रवादी काँग्रेसचा हेतू काय?

समाजातील विविध वर्गापर्यंत, तळागाळातील वंचितांपर्यंत राजकारण पोहोचतं. पण 'LGBT' समुदाय राजकीयदृष्याही वंचित राहिला आहे. LGBT समुदायाला मुख्य प्रवाहात आणण्यासाठी सामाजिक स्तरांवर प्रयत्न केले जातात. पण LGBT सेल स्थापन करून राजकीयदृष्ट्या त्यांना महत्त्व देणारा राष्ट्रवादी काँग्रेस हा पहिला राजकीय पक्ष ठरला आहे.

या 'LGBT' सेलच्या राज्यप्रमुखपदी प्रिया पाटील यांच्यासह 14 जणांची निवड करण्यात आली आहे. यावेळी बोलताना राष्ट्रवादी काँग्रेसच्या नेत्या खासदार सुप्रिया सुळे म्हणाल्या, "गेली अनेक वर्षं LGBT समुदायाची वेल्फेअर बोर्डाची मागणी होती. ती पूर्ण झाली आहे. सामाजिक न्याय मंत्री धनंजय मुंडे यांच्या मार्गदर्शनाखाली हे 'वेलफेअर बोर्ड' स्थापन करण्यात आलं आहे."

"राष्ट्रवादी काँग्रेसचे अध्यक्ष शरद पवार यांनी पुरोगामी विचार हे कायम भाषणातून न मांडता कृतीतून दाखवले आहेत. देशात पहिल्यांदा महिला आरक्षण हे महाराष्ट्रात सुरू झालं. पहिल्यांदा युवती कॉंग्रेस हे राष्ट्रवादी काँग्रेसमध्ये सुरू झालं आणि आता LGBT सेल हा सुध्दा आम्ही सुरू करतोय याचा आम्हाला अभिमान आहे. या सेलमार्फत एलजीबीटी समुदायाचे आर्थिक, सामाजिक प्रश्न सुटावेत हा यामागचा हेतू आहे," असं सुप्रिया सुळे पुढे म्हणाल्या.

LGBT वॉर्ड आरक्षण हवं!

देश स्वतंत्र झाल्यापासून समाजातील समानता महत्त्वाची राहिली आहे. एलजीबीटी समाजाला समानतेची वागणूक मिळत नाही. लोकांचा त्यांच्याकडे बघण्याचा दृष्टीकोन हा आजही पूर्णपणे बदललेला दिसत नाही. तो बदलण्याची गरज असल्याचं वारंवार बोललं जातं. पण प्रत्यक्षात काही होताना दिसत नाही.

राष्ट्रवादी काँग्रेसच्या या LGBT सेलच्या प्रमुख प्रिया पाटील सांगतात, "गेली कित्येक वर्षं आम्ही समान वागणूक मिळण्यासाठी झटतोय. आज आम्हाला राजकीय पक्षाचं पाठबळ मिळालं. या LGBT सेलमधून आम्ही सर्वांत आधी लोकांचा दृष्टीकोन बदलण्यासाठी काम करणार आहोत. त्यासाठी प्रशिक्षण घेणार आहोत."

"१४ जणांची आमची कमिटी स्थापन करण्यात आली आहे. जसे आमच्याकडे लोक येतील तसे आम्ही त्यांना सामावून घेणार आहोत. जिल्हा आणि तालुका पातळीवर विविध संघटना तयार करणार आहोत. शहरातील LGBTचे प्रश्न सोडवण्याचं काम आम्ही करत आहोत. आता ग्रामीण भागातील LGBT समुदायाचे प्रश्न काय आहेत हे जाणून घेऊन सोडवण्याचा प्रयत्न करू," असं प्रिया पाटील यांनी स्पष्ट केलंय.

महापालिका किंवा विधानसभा निवडणुकीच्या रिंगणात अनेकदा तृतियपंथी उमेदवार दिसले. पण अद्याप राज्यात कोणी निवडून आलेलं नाही. 2019 विधानसभा निवडणुकीत पिंपरी चिंचवडमधून नताशा लोखंडे या निवडणुकीच्या रिंगणात होत्या. पण लोकांकडून फारसा प्रतिसाद मिळाला नसल्याचं सांगितलं गेलं.

याबाबत बोलताना प्रिया पाटील म्हणतात, "मुख्य प्रवाहात येऊन अडचणी सोडविण्यासाठी आम्हाला राजकीय पाठबळाची गरज होती. निवडणुकीत महिला आणि पुरुष असे आरक्षित वॉर्ड असतात. त्या आरक्षणात LGBT समाजालाही सामावून घेण्याची मागणी आम्ही निवडणूक आयोगाकडे करणार आहोत. या मागणीचं आमचा पक्ष स्वागत करेल असा विश्वास आहे".

हे वाचलंत का?

(बीबीसी मराठीचे सर्व अपडेट्स मिळवण्यासाठी तुम्ही आम्हाला फेसबुक, इन्स्टाग्राम, यूट्यूब, ट्विटर वर फॉलो करू शकता.'बीबीसी विश्व' रोज संध्याकाळी 7 वाजता JioTV अॅप आणि यूट्यूबवर नक्की पाहा.)