राष्ट्रीय चित्रपट पुरस्कारांची घोषणा, सावरकरांवरील चित्रपटाचाही समावेश; जाणून घ्या कुणाला कोणता पुरस्कार

72व्या राष्ट्रीय चित्रपट पुरस्कारांची घोषणा करण्यात आली आहे. रणदीप हुड्डाच्या 'स्वातंत्र्यवीर सावरकर' या चित्रपटाला 'सर्वोत्कृष्ट नवोदित दिग्दर्शकाचा चित्रपट' हा राष्ट्रीय पुरस्कार मिळाला आहे.

हा चित्रपट (बायोपिक-ड्रामा) हिंदुत्ववादी विचारवंत विनायक दामोदर सावरकर यांच्या आयुष्यावर आधारित आहे. रणदीप हुड्डाने पहिल्यांदाच दिग्दर्शन केलं असून, त्याने यात सावरकरांची मुख्य भूमिकाही साकारली आहे.

72 व्या राष्ट्रीय चित्रपट पुरस्कारांमध्ये 'आर्टिकल 370' या चित्रपटाला 2024 मधील सर्वोत्कृष्ट फीचर फिल्मचा राष्ट्रीय पुरस्कार मिळाला आहे.

तर सर्वोत्कृष्ट हिंदी चित्रपटाचा पुरस्कार राजकुमार रावची भूमिका असलेल्या 'श्रीकांत' या चित्रपटाला मिळाला आहे.

मामुटी आणि कार्तिक आर्यन यांना 'ब्रह्मयुगम' आणि 'चंदू चॅम्पियन' या चित्रपटांसाठी 'सर्वोत्कृष्ट अभिनेता' (मुख्य भूमिका) हा पुरस्कार विभागून मिळाला आहे. मामुटी यांना राष्ट्रीय चित्रपट पुरस्कार मिळण्याची ही चौथी वेळ आहे.

यामी गौतमला 'आर्टिकल 370' या चित्रपटासाठी सर्वोत्कृष्ट अभिनेत्रीचा (मुख्य भूमिका) पुरस्कार मिळाला आहे.

तर 'भक्षक' या चित्रपटासाठी संजय मिश्रा यांना सर्वोत्तम सहाय्यक अभिनेत्याचा पुरस्कार देण्यात आला आहे.

रणदीप हुड्डाने काय म्हटलं?

2024 या वर्षात 'सेंट्रल बोर्ड ऑफ फिल्म सर्टिफिकेशन' कडून (सीबीएफसी) ज्या चित्रपटांना प्रमाणपत्र मिळाले आहे, त्यांना 72 वा राष्ट्रीय चित्रपट पुरस्कार दिला गेला आहे.

एएनआय या वृत्तसंस्थेने दिलेल्या वृत्तानुसार, रणदीप हुड्डाने एका प्रसिद्धीपत्रकात म्हटलं आहे की, "एक अभिनेता, सह-लेखक आणि पहिल्यांदाच दिग्दर्शक म्हणून मी या चित्रपटासाठी मी माझे सर्वस्व पणाला लावले. कारण वीर सावरकर यांची कथा प्रामाणिकपणे आणि सत्यतेसह जगासमोर मांडण्याची मोठी जबाबदारी माझ्या खांद्यावर होती."

रणदीप हुड्डा म्हणाला की, "हा चित्रपट बनवताना आम्हाला अनेक अडचणींचा सामना करावा लागला. पण स्वातंत्र्यवीर सावरकर यांच्या आयुष्यातील संघर्ष आणि त्यागापुढे या अडचणी खूपच लहान आहेत. या चित्रपटावर विश्वास ठेवून प्रत्येक चांगल्या-वाईट काळात माझ्यासोबत ठामपणे उभ्या राहिलेल्या संपूर्ण टीमचा मी मनापासून आभारी आहे."

तो पुढे म्हणाला, "हा सन्मान आमच्या संपूर्ण टीमचा आहे. या चित्रपटामुळे जास्तीत जास्त लोक, विशेषतः युवकांना स्वातंत्र्यवीर सावरकर यांचे कार्य आणि विचार जाणून घेण्यास, त्यावर विचार करण्यासाठी प्रेरणा मिळेल, अशी मला आशा आहे."

कुणी बाजी मारली?

शाश्वत सचदेव यांना 'आर्टिकल 370' या हिंदी चित्रपटासाठी सर्वोत्कृष्ट संगीत दिग्दर्शक पुरस्कार मिळाला आहे.

72 वा राष्ट्रीय चित्रपट पुरस्कार 2024 या वर्षात सीबीएफसीने प्रमाणपत्र दिलेल्या चित्रपटांना दिले जात आहेत.

या पुरस्कारांमध्ये सर्वोत्कृष्ट नॉन-फीचर फिल्मचा पुरस्कार सुमित्रा रॉय यांच्या 'भंगार' चित्रपटाला देण्यात आला आहे.

तर सर्वोत्कृष्ट दिग्दर्शनाचा पुरस्कार राजकुमार पेरियासामी यांना 'आमरण' या तमिळ चित्रपटासाठी देण्यात आला आहे.

सर्वोत्कृष्ट बालकलाकार पुरस्कारासाठी रिद्धिमान बॅनर्जी, तपोमोय देब, गीताश्री चक्रवर्ती, अरुणदेव पोथुला आणि आतिष एस. शेट्टी यांची निवड करण्यात आली .

सर्वोत्कृष्ट बालचित्रपटाचा पुरस्कार नंदा किशोर एमानी दिग्दर्शित 'चिन्ना कथा काडू' या तेलगू चित्रपटाला मिळाला.

72 व्या राष्ट्रीय चित्रपट पुरस्कारांमध्ये चित्रपटावरील सर्वोत्कृष्ट पुस्तकाचा पुरस्कार 'नानिरुवुदे निमगागी नादिरुवुदे ननगागी : कन्नड सिनेमाचे तत्त्वज्ञान आणि राजकारण' या पुस्तकाचे लेखक केंचनूर प्रदीप कुमार शेट्टी यांना देण्यात आला आहे.

या पुरस्कार सोहळ्यात तमिळ चित्रपटाला एकूण 10 पुरस्कार मिळाले असून त्यामध्ये आमरण, कॅप्टन मिलर आणि महाराजा यांसारखे चित्रपट विशेष उल्लेखनीय आहेत.

72 व्या राष्ट्रीय चित्रपट पुरस्कार सोहळ्यात 'टच्ड ॲज वॉटर' या मूकपटाने सर्वोत्कृष्ट ॲनिमेशन चित्रपटाचा पुरस्कार पटकावला. या चित्रपटाचे दिग्दर्शन आणि ॲनिमेशन जोशी बेनेडिक्ट यांनी केले होते.

पुष्पा-2 ला देखील पुरस्कार

तेलुगू चित्रपट 'कल्की 2898 एडी'ला सर्वोत्कृष्ट चित्रपटाचा पुरस्कार मिळाला आहे.

सर्वोत्कृष्ट गाण्याच्या श्रेणीत 'मैदान' या हिंदी चित्रपटाला 'जाने दो...' या गाण्यासाठी पुरस्कार मिळाला आहे.

'पुष्पा - द रूल पार्ट 2' (तेलुगू) या चित्रपटाने 72 व्या राष्ट्रीय चित्रपट पुरस्कार सोहळ्यात सर्वोत्कृष्ट पटकथेचा पुरस्कार पटकावला. या चित्रपटाला सर्वोत्कृष्ट वेशभूषेचा पुरस्कारही मिळाला.

अल्लू अर्जुनने एक्सवर एक पोस्ट करत 72 व्या राष्ट्रीय चित्रपट पुरस्कारांच्या सर्व विजेत्यांचे अभिनंदन केले.

तो म्हणाला, "'पुष्पा 2' साठी सर्वोत्कृष्ट पटकथेचा पुरस्कार जिंकल्याबद्दल माझे दिग्दर्शक सुकुमार यांचे मनःपूर्वक अभिनंदन. तसेच सर्वोत्कृष्ट वेशभूषेसाठी दिपाली आणि शीतल शर्मा यांचेही अभिनंदन."

सर्वोत्कृष्ट माहितीपटाचा पुरस्कार भरतबाला गणपती दिग्दर्शित 'राम-नामी'ला (हिंदी) देण्यात आला.

नॉन-फीचर फिल्म प्रकारात सर्वोत्कृष्ट पदार्पण दिग्दर्शनाचा पुरस्कार रवी राज मुर्मू यांना 'आंगेन'साठी (संताली) देण्यात आला.

(बीबीसीसाठी कलेक्टिव्ह न्यूजरूमचे प्रकाशन)