महाराष्ट्रात मान्सूनचा जोर वाढला; जाणून घ्या तुमच्या जिल्ह्यातील हवामानाचा अंदाज

महाराष्ट्रात गेल्या चोवीस तासांत अनेक ठिकाणी जोरदार पावसानं हजेरी लावली असून पुढचे काही दिवस राज्यात पावसाचा जोर कायम राहण्याची शक्यता आहे. कोकण, विदर्भ, मराठवाडा आणि मध्य महाराष्ट्रात पुढच्या चोवीस तासांत हवामान कसं असेल, कुठल्या जिल्ह्यांत रेड अलर्ट दिला आहे जाणून घेऊया.

पुढे दाखवलेला नकाशा 1 जूनपासून ते 22 जुलैपर्यंतची पावसाची स्थिती दाखवतो. हिरव्या जिल्ह्यांत सरासरीएवढा तर निळ्या रंगातील जिल्ह्यांत सरासरीपेक्षा जास्त पाऊस झाला आहे. पण विदर्भ आणि मराठवाड्यात बहुतांश जिल्ह्यांमध्ये पावसात मोठी तूट आहे. तर नंदुरबारमध्ये सर्वात कमी पाऊस झाला आहे.

पुढच्या चोवीस तासांत यात बदल घडू शकतो, कारण सध्या महाराष्ट्रातही मान्सून अगदी सक्रीय झाला आहे. 22 जुलैच्या दुपारच्या सॅटेलाईट दृश्यांमध्ये राज्यात अनेक ठिकाणी पावसाचे ढग दाटलेले दिसता.

भारत फोरकास्टिंग मॉडेलनुसार मध्य प्रदेशावर एक हवेच्या वरच्या स्तरात सायक्लॉनिक सर्क्युलेशन म्हणजे चक्राकार वाऱ्यांची स्थिती तयार झाली आहे.

परिणामी महाराष्ट्राच्या उत्तरेकडे गुजरातपासून जोरदार वारे पश्चिमेकडून पूर्वेकडे वाहतायत, ज्यानं राज्यात मान्सूनच्या पावसाला बळ मिळालं आहे.

या वाऱ्यांमुळेच दक्षिण गुजरात तसंच महाराष्ट्राच्या किनारी भागांत आणि उत्तरेकडील भागात जोरदार पावसाची शक्यता आहे.

बीबीसी वेदर फोरकास्टनुसारही पुढच्या 24 तासांत, पालघर, ठाणे, मुंबई, रायगड, पुणे आणि नाशिकच्या घाट भागांत जोरदार ते अतीजोरदार पावसाची शक्यता आहे.

विदर्भ आणि मराठवाड्यातील काही भागांत मध्यम स्वरुपाचा तर काही ठिकाणी मुसळधार पाऊस पडू शकतो. मराठवाड्यातील दक्षिणेकडचे जिल्हे आणि दक्षिण मध्य महाराष्ट्रात तुलनेनं कमी पाऊस पडू शकतो.

मुंबईच्या प्रादेशिक हवामान केंद्रानं दिलेल्या इशाऱ्यांनुसार 22 जुलैच्या उत्तरार्धासाठी पालघर जिल्हा तसंच नाशिक आणि पुण्याच्या घाट प्रदेशात रेड अलर्ट आहे. तर सातारा आणि कोल्हापूरचे घाट प्रदेश तसंच मुंबई, ठाणे, रायगड, रत्नागिरी, अमरावती, नागपूर, भंडारा, गडचिरोलीमध्ये जोरदार पावसासाठी ऑरेंज अलर्ट आहे.

सिंधुदुर्ग, पुणे, अहिल्यानगर, नाशिक, धुळे, नंदुरबार, जळगाव, संभाजीनगर, जालना, बीड, अकोला वाशिम, वर्धा आणि गोंदियामध्ये जोरदार पावसासाठी यलो अलर्ट आहे. तर बुलढाणा, यवतमाळ, चंद्रपूरमध्ये मेघगर्जनेसह पावसासाठी यलो अलर्ट आहे.

23 जुलैसाठी हवामान विभागानं पुण्याच्या घाट प्रदेशात रेड अलर्ट दिला आहे. तर नाशिक आणि साताऱ्याचा घाट प्रदेश, तसंच रत्नागिरी, रायगड, पालघर या जिल्ह्यांत जोरदार पावसासाठी ऑरेंज अलर्ट आहे. तर मुंबई, ठाणे, सिंधुदुर्ग, कोल्हापूर, अकोला, यवतमाळ, चंद्रपूर, गडचिरोलीत जोरदार पावसासाठी यलो अलर्ट आहे. नंदुरबार, धुळे, जळगाव, बुलढाणा, वाशिम, अमरावती, वर्धा, नागपूर, बुलढाणा आणि गोंदियामध्ये मेघगर्जनेसह पावसासाठी यलो अलर्ट आहे.

(बीबीसीसाठी कलेक्टिव्ह न्यूजरूमचे प्रकाशन.)