ژوندۍ پاڼه, د امریکا د بریدونو اتمه پرلپسې‌ شپه پای ته ورسېده؛ ایران وایي، په کویت کې یې د امریکا پر اډو د ډرون بریدونه کړي

ژوندی پوښښ

1. ۴۳ دقیقې وړاندېبحرین: د ایران توغندیز او ډرون بریدونه مو شنډ کړل

   د بحرین پوځ په یوه اعلامیه کې ویلي چې د ایران د توغندیزو او ډرون بریدونو پر وړاندې یې دفاعي اقدامات کړي دي.

   په دې تړاو یوه اعلامیه کې راغلي:

   ''د بحرین د دفاعي ځواکونو د هوايي دفاع سیسټمونو د یکشنبې په ورځ په ټینګې ارادې او لوړ کچ جګړه‌ییز چمتووالي سره د ایران څو هوايي بریدونه شنډ او له منځه یوړل.''

   اعلامیه زیاتوي:

   ''د ملکي وګړو او شخصي شتمنیو د په نښه کولو لپاره د توغندیو او ډرونونو قصدي کارول، د نړیوالو بشرپالو قوانینو څرګنده سرغړونه ګڼل کېږي.''

   د بحرین پوځ له خلکو هم غوښتنه کړې چې:

   ''له احتیاطه کار واخلي او هر هغه ناپېژندلی یا شکمن شی ته، چې د ایران د بریدونو له پاتې شونو وي، نژدې نه شي. د داسې څیزونو د لیدلو په صورت کې باید ژر تر ژره اړوندو چارواکو ته خبر ورکړل شي.''

2. ۲ ساعتونه وړاندېاسرائیل د غزې شاوخوا سیمه ''ممنوع پوځي سیمه'' اعلان کړه

   د اسرائیل پوځ اعلان کړی چې د غزې تړانګې شاوخوا سیمه به د نن ورځې د سهار له ۸ بجو د سبا، دوشنبې د سهار تر ۸بجو پورې د ''تړلې او ممنوع پوځي سیمې'' په توګه ګڼل کېږي.

   د ټایمز اف اسرائیل د راپور له مخې، دغه پرېکړه د ښي اړخي مېشت‌ ځای جوړوونکو د ډلې ''ناهالا'' له لاریون مخکې شوې ده.

   دغه سخت دریځي اسرائیلۍ ډله د غزې تړانګې دننه د اسرائیلي مېشت‌ ځایونو د بیا جوړولو ملاتړ کوي.

   د ټایمز اف اسرائیل په وینا، دا تړلې سیمه د غزې ټولې شاوخوا سیمې رانغاړي، چې له شمال څخه د ''یاد مردخای'' سیمې، ختیځ لوري ته د ۲۳۲سړک او په سوېل کې تر کرم شالوم پورې غځېدلې ده.

   راپور دغه راز د یوه پوځي سرچینې له قوله وایي چې د سیمې د تړلو امر ځکه صادر شوی چې ځینې مېشت‌ ځای جوړوونکي هڅه کوي په غیرقانوني ډول غزې تړانګې ته ننوځي.

3. ۲ ساعتونه وړاندېد کویت پوځ: د ایران له بریدونو سره مقابله کوو

   د کویت پوځ وايي، د ایران له هوایي بریدونو سره مقابله کوي.

   له دې وړاندې د ایران پوځ ویلي و، دوی په کویت کې د ډرون بریدونو کې د امریکا اډې په نښه کړې دي.

   د کویت پوځ په خپل بیان کې ویلي، دوی د "له ایراني له یرغل" سره مقابله کوي او دا چې "د هوايي دفاع سیسټمونه یې اوس د دښمن د توغندیو او ډرون بریدونو سره مقابله کوي."

   د اې ایف پي خبري اژانس وایي، په کویت کې د خطر کړنګول شوي دي.

   په کویت کې د مالګین کولو پر فابریکو، د بریښنا تولید او د تېلو تاسیساتو اړوند بنسټونو باندې برید د فارس خلیج د عربي هېوادونو له غبرګون سره مخامخ شوی دی.

   د خلیج هېوادونو د همکارۍ شورا په یوه بیان کې لیکلي، "په ګاونډیو هېوادونو کې په ملکي اهدافو د ایران بریدونه جنګي جرم دی."

4. ۶ ساعتونه وړاندېوروستی, پر ایران د امریکا د بریدونو پرله‌پسې اتمه شپه: سېنټکام وايي پوځي تاسیسات یې په نښه کړي

   د امریکا پوځ مرکزي قومندانۍ سېنټکام وايي، ځواکونو یې‌ پر اتمه پرله‌پسې شپه هم په ایران کې بریدونه کړي او د سواحلو څارونکې سیستمونه، د هوايي‌دفاع سیستم، سمندري وړتیاوې او د توغندیو زېرمې یې په نښه کړې دي.

   په بیان کې راغلي په دغو بریدونو کې د سپاه پاسداران هغه ځواکونه هم هدف ګرځول شوي، چې د جولای ۱۷ اردن کې د امریکا پر پوځي اډې برید کې ښکېل وو.

   سېنټکام زیاته کړې چې له ۵۰ زرو ډېر امریکايي سرتېري منځني ختیځ کې ځای پر ځای او تیارسي په حالت کې دي.

5. ۲۷ چنګاښ ۱۴۰۵ - ۱۸ جولای ۲۰۲۶وروستی, د اسرائيل دیارلسم کانال: امریکا له ایران سره د جګړې پراخېدو ته چمتووالی نیسي

   د اسرائيل دیارلسم کانال د دغه هېواد د یوه چارواکي په حواله رپوټ ورکړی، چې امریکا پر ایران د بریدونو سختېدو او د جګړې پراخېدو ته چمتووالی نیسي.

   د دغه چارواکي له خولې ویل شوي چې ښايي په دې لړ کې راتلونکې اوونۍ برخلیک ټاکوونکې وي.

   دې رسنۍ ادعا کړې چې امریکا شاوخوا ۱۰۰ تېل رسوونکې الوتکې سیمې ته استولې دي.

   خو پخپله امریکايي چارواکو تر اوسه دغه رپوټ او سیمې ته د استول شویو الوتکو دا شمېر نه دی تایید کړی.

   د اسرائيل ۱۳م کانال د یوه جګپوړي اسرائیلي چارواکي په حواله ویلي: "ایرانیان هڅه کوي چې اسرائيل په دې جګړه کې ورښکېل نه کړي. خو که امریکایان پر ایران بریدونه سخت کړي، نو اوضاع ښايي بدله شي."

   د یادونې ده چې تېره ورځ هم سیمې ته د پام وړ شمېر تېل‌رسوونکو امریکايي الوتکو د لېږدول کېدو خبر ورکړ شوی و.

6. ۲۷ چنګاښ ۱۴۰۵ - ۱۸ جولای ۲۰۲۶د امریکا دفاع وزیر: د سرتېرو وژل کېدل مو هوډ لا پیاوړی کوي

   د امریکا دفاع وزیر پیټ هګسېټ په اردن کې د ایران بریدونو کې د دوو امریکايي سرتېرو وژل کېدو ته غبرګون ښودلی دی.

   هغه سېنټکام لخوا د دغو سرتېرو د وژل کېدو په تړاو خپره شوې اعلامیه پر خپله اېکس پاڼه شریکه کړې او ورسره لیکلي یې دي: "خدای پامان اتلانو... د هغوی قرباني یوازې زموږ هوډ لا پیاوړی کوي."

   د یادونې ده چې د امریکا پوځ مرکزي قومندانۍ شنبه (د جولای ۱۷مه) اعلان وکړ چې پر اردن د ایران د توغندیو او ډرون بریدونو کې د دوی ۲ سرتېري وژل شوي، یو بې‌درکه دی او څلور نور چې درملنې لپاره روغتون ته لېږدول شوي وو، بېرته رخصت شوي دي.

   سېنټکام زیاته کړې چې کورنیو ته درناوي لپاره دمګړۍ د وژل شویو سرتېرو هویت نه شریکوي.

   دا د ایران او امریکا ترمنځ د جګړې د پای ته رسولو له هوکړې راوروسته د تازه تاوتریخوالي او متقابلو بریدونو له پیلېدو راهیسې لومړی ځل دی چې د ایران په بریدونو کې د امریکايي سرتېرو د وژل کېدو پخلی کېږي.

7. ۲۷ چنګاښ ۱۴۰۵ - ۱۸ جولای ۲۰۲۶سېنټکام: د ایران د سمندري کلابندۍ اډانه کې مو تر اوسه د ۵ بېړیو لوري بدل کړي دي

   د امریکا د پوځ مرکزي‌ قومندانۍ یا سېنټکام په عرب سمندرګي کې د خپلې "یواېس‌اېس ډونلډ کوک" جنګي بېړۍ د یوه عکس له خپرولو سره ویلي، چې امریکايي ځواکونه په ټینګه "د ایران سمندري کلابندۍ" ته دوام ورکوي.

   د سېنټکام لخوا په خپاره شوي عکس کې له دې سترې الوتکې لېږدونکې بېړۍ سره نږدې په اسمان کې یوه "اېم‌اېچ-۶۰ اېس سي‌هاک" چورلکه هم ښکاري.

   د امریکا پوځ مرکزي‌ قومندانۍ پر خپله اېکس پاڼه خپاره کړي بیان کې زیاته کړې، چې د جولای تر ۱۸مې یې د پېنځو بېړیو لوری بدل کړی او یوه کښتۍ یې له کاره غورځولې ده.

8. ۲۷ چنګاښ ۱۴۰۵ - ۱۸ جولای ۲۰۲۶د امریکا پوځ: پر اردن د ایران بریدونو کې دوه امریکايي سرتېري وژل شوي

   د امریکا د پوځ مرکزي قومندانۍ (سېنټکام) وايي‌ د دغه هېواد دوه سرتېري چې په اردن کې یې له خپلو شریکانو سره یو ځای د ایران لخوا د توغول شویو توغندیو او ډرونونو دفاع کوله، وژل شوي دي.

   په دې تړاو خپره شوې اعلامیه کې راغلي چې یو بل امریکایي سرتېری بې‌درکه دی.

   سېنټکام په دغو بریدونو کې د خپلو یو شمېر سرتېرو د ټپي کېدو خبر هم ورکړی دی.

   تر دې ورمخکې ایران اعلان کړی و چې په اردن کې یې د امریکا پر پوځي اډي برید کړی دی.‌

   بل خوا د فارس خلیج د همکاریو شورا سرمنشي جاسم محمد بدیوي، هغه څه چې ده په لوی لاس په بحرین، کویت او اردن کې د غیر پوځي زېربناوو او تاسیساتو هدف ګرځول بللي، غندلي دي.

9. ۲۷ چنګاښ ۱۴۰۵ - ۱۸ جولای ۲۰۲۶وروستی, د ایران روغتیا وزارت: د امریکا نویو بریدونو کې ۵۰ کسان وژل شوي او تر ۵۰۰ ډېر ټپیان دي

   د ایران د روغتیا وزارت ویاند ویلي، د چنګاښ له ۶مې تر ۲۷مې نېټې پورې په هوايي بریدونو کې ۵۰ کسان وژل شوي او له ۵۰۰ ډېر نور ټپیان شوي دي.

   حسین کرمانپور ویلي، په وژل شویو کسانو کې ښځې او ۲ ماشومان او تر ۱۸ کلونو کم‌عمره تنکي ځوانان هم دي.

   هغه زیاته کړه، په ټپیانو کې ۳۲ ښځې او ۱۸ تنکي ځوانان هم شامل دي.

   د روغتیا وزارت د ویاند په وینا، ۳۷ ټپیان لا هم په روغتونونو کې تر درملنې لاندې دي.

10. ۲۷ چنګاښ ۱۴۰۵ - ۱۸ جولای ۲۰۲۶وروستی, د ایران د بهرنیو چارو وزارت مرستیال: د اسلام‌آباد د تفاهم‌لیک د ټولو ژمنو عملي کول مو درولي

    د ایران د بهرنیو چارو وزارت مرستیال ویلي، ایران "د اسلام‌اباد د تفاهم‌لیک په چوکاټ کې د خپلو ټولو ژمنو عملي کول درولي دي."

    کاظم غریب‌آبادي ټینګار کړی: "امریکا د خپلو تېریزو اقداماتو له لارې د اسلام‌اباد د تفاهم‌لیک له مخې خپلې ټولې ژمنې ماتې کړې دي." هغه وویل، د ایران دا اقدام د امریکا د چلن په غبرګون کې شوی دی.

    غریب‌آبادي، چې له امریکا سره د ایران د مذاکره کوونکې ډلې غړی هم دی، زیاته کړه: "په اوسنیو شرایطو کې د هېواد لومړیتوب د ایران پرېکنده دفاع او یرغلګرو ته ځواب ورکول دي. "

    د اسلام‌اباد تفاهم‌لیک، چې د پاکستان په منځګړیتوب د ایران او امریکا ترمنځ شوی و، ټاکل شوې وه د دواړو هېوادونو ترمنځ د تلپاتې سولې د تړون لپاره د خبرو اترو زمینه برابره کړي.

    خو له تېرې اونۍ راهیسې، پر بېړیو له بریدونو، د هرمز تنګي له بیا تړل کېدو او پر ایران د سمندري محاصرې له بیا پیلېدو وروسته، د ایران او امریکا ترمنځ د متقابلو بریدونو لړۍ یو ځل بیا پیل شوې ده.

11. ۲۷ چنګاښ ۱۴۰۵ - ۱۸ جولای ۲۰۲۶وروستی, جرمني د بهرنیو سرچینو له لوري د امنیتي ګواښونو د زیاتېدو خبر ورکړ

    د جرمني د کورنیو چارو وزیر د امنیتي ګواښونو د زیاتېدو په اړه خبرداری ورکړی او ویلي یې دي چې د هېواد امنیتي خبرداری یې تر "لوړې کچې" لوړ کړی؛ داسې وضعیت چې د هر وخت د برید شونتیا پکې ده.

    الکساندر دوبرینت له "وېلت ام زونټاګ" ورځپاڼې سره په مرکه کې ویلي، داسې "روښانه شواهد" شته چې په جرمني کې پر خلکو، بنسټیزو زېربناوو او دولتي ادارو د بریدونو پلانونه شته.

    هغه زیاته کړه چې د دغو ګواښونو سرچینه له جرمني بهر ده، خو په دې اړه یې نور جزییات ورنه کړل.

12. ۲۷ چنګاښ ۱۴۰۵ - ۱۸ جولای ۲۰۲۶وروستی, محسن رضايي: د "هم جګړه او هم خبرې اترې" سیاست پای ته رسېدلی

    د ایران د اسلامي جمهوریت د مشر پوځي سلاکار محسن رضايي ویلي، د "هم خبرې اترې او هم جګړه" سیاست پای ته رسېدلی دی.

    هغه ویلي: "که امریکایان په راتلونکو دوو یا درېیو ورځو کې جګړه روانه وساتي، موږ به د بشپړو یرغلیزو او ویجاړونکو عملیاتو پړاو ته داخل شو."

    دا په داسې حال کې ده چې تېره شپه، د ایران او امریکا ترمنځ د نښتو په اوومه شپه، د ایران په سوېلي برخو کې نورې سیمې هم د امریکا له بریدونو سره مخ شوې. ایران اعلان کړی چې کویټ، بحرین، اردن او سعودي عربستان پرې برید کړی دی.

    له بلې خوا، د لبنان د ولسمشرۍ دفتر اعلان کړی چې د دغه هېواد ولسمشر جوزف عون نن بیروت پرېښی او واشنګټن ته روان شوی دی.

    تمه ده چې هغه په دغه سفر کې له ډونلډ ټرمپ سره وګوري او د "له هغو سیمو څخه د اسرائیلو د وتلو" په اړه خبرې وکړي چې اوس مهال د اسرائیلو تر اشغال لاندې دي.

    په ایران کې، د قضائیه قوې ویاند اعلان کړی چې د رضا پهلوي پر ضد قضیه جوړه شوې ده.

13. ۲۷ چنګاښ ۱۴۰۵ - ۱۸ جولای ۲۰۲۶وروستی, عراق وايي د تېلو او برېښنا په برخو کې له امریکايي شرکتونو سره ۴۸ هوکړې لاسلیک کړې دي

    د عراق د لومړي وزیر دفتر د شنبې په ورځ اعلان وکړ چې دغه هېواد امریکا ته د لومړي وزیر علي زیدي د سفر پر مهال له امریکايي شرکتونو سره ۴۸ هوکړې او مشارکتونه لاسلیک کړي، چې ډېری یې د تېلو له برخې سره تړاو لري.

    دغه هوکړې د عراق د تېلو او برېښنا وزارتونو او د اکسون موبیل، کې‌بي‌ار، جي‌اي ورنووا، شېل او هالیبرټن په څېر شرکتونو ترمنځ "همکارۍ او مشارکتونه" رانغاړي. همداراز، د عراق او سوریې ترمنځ د خام تېلو د لېږد لپاره د یوې سترې نل‌لیکې د جوړولو په تړاو څو قراردادونه هم لاسلیک شوي دي.

    عراق له سټارلنک شرکت سره هم یوه هوکړه لاسلیک کړې، چې د نړۍ په کچه د سپوږمکۍ له لارې د مخابراتي خدمتونو په برخه کې مخکښ شرکت دی، څو په دغه هېواد کې خپل خدمات وړاندې کړي.

    د سې شنبې په ورځ د امریکا ولسمشر ډونالډ ټرمپ په سپینه ماڼۍ کې له علي زیدي سره د لیدنې پر مهال هغه "اتل" وباله.

    علي زیدي، چې یو سوداګر دی، سږ کال وروسته له هغې واک ته ورسېد چې ټرمپ د لومړي وزیرۍ د بل نوماند پر وړاندې له خپل ویټو حقه کار واخیست او د امریکا په ملاتړ یې د زیدي د واک ته رسېدو زمینه برابره شوه.

    زیدي ژمنه کړې چې د عراق کمزورې اقتصاد پیاوړی کړي او په دغه هېواد کې له ایران سره نژدې وسله والې ډلې، چې پر امریکايي تاسیساتو یې بریدونه کړي، بې وسلې کړي.

14. ۲۷ چنګاښ ۱۴۰۵ - ۱۸ جولای ۲۰۲۶وروستی, د هرمزګان د اوبو شرکت: د اوبو خوږولو تأسیسات په بشپړه توګه ویجاړ شوي

    د هرمزګان ولایت د اوبو او فاضلابو شرکت اجرائیه رئیس عبدالحمید حمزه‌پور، ویلي چې د امریکا له لوري د جاسک ولسوالۍ په لوېدیځ کې د بونجي د اوبو خوږولو پر تأسیساتو د برید له امله، د شاوخوا ۲۰ کلیو د نژدې ۱۰ زره اوسېدونکو د څښاک اوبو رسونه په بشپړه توګه ګډوډ شوې او د دغو کلیو خلک له اوبو د بې‌برخېتوب سره مخ شوي دي.

    د خبري سرچینو د راپورونو له مخې، په دغو بریدونو کې له سمندر څخه د خامو اوبو د پمپ کولو سټېشن او همدارنګه د بونجي د اوبو خوږولو فابریکې اړوند برېښنايي ټرانسفارمر، چې په شپه او ورځ کې یې د ۳۱۵۰ مکعب مترو اوبو د تولید ظرفیت درلود، په بشپړه توګه ویجاړ شوي دي.

15. ۲۷ چنګاښ ۱۴۰۵ - ۱۸ جولای ۲۰۲۶وروستی, د کویت هوايي شرکت د خپلو ډېرو الوتنو مهالوېش بدل کړ

    د کویت هوايي شرکت د شنبې په ورځ اعلان وکړ چې د ایران له خوا د توغندیو او بې‌پیلوټه الوتکو (ډرونونو) د بریدونو وروسته، د کویټ نړیوال هوايي ډګر د فعالیتونو د لنډمهاله ځنډېدو له امله یې د ډېرو الوتنو مهالوېش بدل کړی دی.

    دغه هوايي شرکت مخکې ویلي وو چې د الوتنو د مهالوېش بدلون د کویت د هوايي حریم د تړل کېدو له امله ترسره شوی دی.

    کویت څو ساعته مخکې اعلان کړی و چې په خپل هوايي حریم کې یې بالستیک توغندي او بې‌پیلوټه الوتکې کشف او شنډې کړې دي.

16. ۲۷ چنګاښ ۱۴۰۵ - ۱۸ جولای ۲۰۲۶وروستی, ملګرو ملتونو کې د ایران استازی: د ملکي زیربناوو په نښه کول جنګي جنایت دی

    په ملګرو ملتونو کې د ایران استازي په یوه لیک کې د امنیت شورا ته د ایران پر ملکي زیربناوو د امریکا بریدونه "په کلکه وغندل".

    امیر سعید ایرواني وویل چې پر ملکي ځایونو، په ځانګړې توګه د سړکونو او اورګاډي د حیاتي ترانسپورتي شبکو، پرله‌پسې بریدونه "جنګي جنایت" ګڼل کېږي.

    د ایران استازي همدارنګه خبرداری ورکړ چې که ملګري ملتونه او د امنیت شورا اغېزمن اقدام ونه کړي، "د ایران اسلامي جمهوریت د نړیوالو حقوقو له مخې خپل حق خوندي ساتي چې د خپل حاکمیت، ځمکنۍ بشپړتیا، خلکو او مهمو ملي ګټو د دفاع لپاره ټول اړین اقدامات ترسره کړي."

17. ۲۷ چنګاښ ۱۴۰۵ - ۱۸ جولای ۲۰۲۶د ایران پوځ: په بحرین کې مو امریکايي اډه او څو پلونه په نښه کړي

    د ایران پوځ وايي، د ''صاعقه'' عملیاتو په پنځلسم پړاو کې یې د انتحاري ډرونونو په کارولو سره په بحرین کې د شیخ عیسی هوايي اډې د الوتکو د ځای پر ځای کېدو ساحې، د الوتکو هنګرونه او د سون‌ توکو زېرمې په نښه کړې دي.

    د پوځ په اعلامیه کې ادعا شوې چې په بحرین کې څو ارتباطي پلونه د ډرون بریدونو هدف ګرځېدلي دي.

    تر اوسه د بحرین یا متحده ایالاتو چارواکو د دغو ادعاوو او د احتمالي زیانونو یا مرګ ژوبلې په اړه کوم رسمي غبرګون نه دی څرګند کړی.

18. ۲۷ چنګاښ ۱۴۰۵ - ۱۸ جولای ۲۰۲۶د اردن پوځ: لس ایراني توغندي مو شنډ او راوغورځول

    د اردن پوځ وايي،وروسته له هغه چې د اردن هوايي حریم ته داخل شوي وو او د هېواد خاوره یې په نښه کوله، د دغه هېواد د هوايي دفاع سیستمونو لس ایراني توغندي شنډ او راوغورځول.

    د اردن د پوځ په اعلامیه کې ویل شوي چې د دغو بریدونو له امله هیڅ انساني تلفات یا مالي زیان نه دی رامنځته شوی.

19. ۲۷ چنګاښ ۱۴۰۵ - ۱۸ جولای ۲۰۲۶وروستی, سينټکام پر ایران د اوومې پرلپسې شپې د بریدونو پای ته د رسېدو اعلان وکړ

    د امریکا مرکزي قوماندانۍ (سينټکام) پر اېکس ټولنیزه شبکه د یوې ویډیو په خپرولو سره اعلان کړی چې پر ایران د بریدونو اوومه پرلپسې شپه د تهران پر وخت د شنبې ورځې د سهار په پنځو بجو پای ته ورسېده.

    د سينټکام په وینا، په دې پړاو بریدونو کې د ایران د څارنې مرکزونه، پوځي لوژستیکي زیربناوې، د وسلو تر ځمکې لاندې زېرمتونونه او سمندري پوځي وړتیاوې په نښه شوي دي.

    سینټکام ویلي، په دې عملیاتو کې جنګي الوتکې، ډرونونه او جنګي بېړۍ کارول شوې دي.

    دغه راز، سينټکام ټینګار کړی چې د ایران د بندرونو پر ضد سمندري محاصره لا هم دوام لري او دا مهال له ۵۰ زرو ډېر امریکايي پوځیان په منځني ختیځ کې ځای پر ځای شوي دي.

20. ۲۷ چنګاښ ۱۴۰۵ - ۱۸ جولای ۲۰۲۶د بندرعباس – رودان پر لویه لاره دوه پلونه د امریکا په برید کې په نښه شوي

    تسنیم خبري اژانس د پېښې له سیمې د یوې ویډیو په خپرولو سره راپور ورکړی چې د بندرعباس – رودان لویې لارې په اوږدو کې دوه پلونه د امریکا د برید هدف ګرځېدلي او دغه مسیر ته زیان اوښتی دی.

    د دې رسنۍ د راپور له مخې، په دغه برید کې یو شمېر کسان وژل شوي او یو شمېر نور ټپیان شوي دي، خو د مړو او ټپیانو کره شمېر او د اوښتو زیانونو دقیق معلومات لا تر اوسه نه دي اعلان شوي.