Rwanda: Ibyo wamenya ku wari maneko wa CIA witezwe kuba Ambasaderi mushya w'Amerika

    • Umwanditsi, Juventine Muragijemariya
    • Igikorwa, BBC Gahuzamiryango i Nairobi
  • Yatangajwe
  • Igihe co gusoma: iminota 2

Leta Zunze Ubumwe z'Amerika zatanze izina rya Nicholas Checker nk'umukandida wo kuzibera ambasaderi mushya mu Rwanda.

Perezida w'Amerika Donald Trump yashyikirije iryo zina Sena ku itariki ya 21 y'ukwa karindwi mu 2026. Ariko mbere yuko atangira inshingano, Checker agomba kubanza kwemezwa na Sena y'Amerika.

Naramuka yemejwe, azasimbura Eric Kneedler, wari ambasaderi w'Amerika mu Rwanda kugeza mu kwezi kwa mbere mu 2026, wamaze imyaka hafi itatu ahagarariye igihugu cye mu Rwanda.

Ariko se Nicholas Checker ni muntu ki?

Checker ni umudipolomate w'Umunyamerika ufite uburambe mu by'umutekano n'ububanyi n'amahanga.

Mbere yo kujya muri minisiteri y'ububanyi n'amahanga y'Amerika, yamaze imyaka irenga 10 akorera ikigo cy'Amerika cy'ubutasi bwo mu mahanga, CIA, hagati y'umwaka wa 2014 n'uwa 2025.

Muri icyo gihe, yakurikiranye ibibazo by'intambara mu Burasirazuba bwo Hagati no mu karere k'Ihembe ry'Afurika.

Yanakoze mu biro bishinzwe umubano hagati ya CIA n'inteko ishingamategeko y'Amerika.

Skip Ibisomwa cane and continue reading
Ibisomwa cane

End of Ibisomwa cane

Mu bihe bya vuba bishize, hagati y'ukwezi kwa mbere n'ukwa gatandatu mu 2026, Nicholas Checker yari umukuru w'ibiro bishinzwe Afurika byo muri minisiteri y'ububanyi n'amahanga y'Amerika.

Yanabaye umunyamabanga nshingwabikorwa wungirije w'akanama k'umutekano w'igihugu ku butegetsi bwa Perezida Trump.

Akazi yakoreye CIA muri Afghanistan kamuhesheje umudali w'ishimwe mu 2021 ndetse n'igihembo gitangwa n'umukuru wa CIA yahawe mu 2022 ku bw'isesengura rye ry'amakuru y'ubutasi.

Afite impamyabumenyi y'icyiciro cya mbere cya kaminuza (bachelor's degree) mu mateka na siyanse ya politike yakuye kuri Kaminuza ya Wisconsin n'impamyabumenyi y'icyiciro cya kabiri cya kaminuza (master's degree) mu masomo y'umutekano yaboneye kuri Kaminuza ya Georgetown, zombi zo muri Amerika.

Mu Rwanda, yitezwe kuba ku rwego rusumbya ububasha ambasaderi usanzwe, aho biteganyijwe ko azaba ari intumwa yihariye ya Perezida w'Amerika (ambassador extraordinary and plenipotentiary).