Umwe mu mikino y'ibihe byose y'igikombe cy'isi – Ubwongereza bwatunguye Ubufaransa mu mukino w'ishiraniro waguyemo imvura y'ibitego

Umukino umuntu n'umwe atashakaga gukinamo byarangiye ubaye umukino umuntu n'umwe atashakaga ko urangira.

'Umukino wa nyuma w'umuringa' Ubwongereza bwakinnye n'Ubufaransa wahindutse akajagari k'imvura y'ibitego 10, bitandatu muri byo by'ikipe y'igihugu y'Ubwongereza, 'the Three Lions'. Ndetse byashobokaga cyane ko haboneka n'ibindi.

Bukayo Saka yabaye umukinnyi wa kabiri gusa w'Ubwongereza utsinze ibitego bitatu mu mukino umwe wo mu cyiciro cyo gukuranamo mu gikombe cy'isi, nyuma ya Sir Geoff Hurst wabitsinze mu mukino wa nyuma wo mu mwaka wa 1966. Undi mukinnyi wenyine watsinze ibitego bitatu mu mukino n'Ubufaransa mu irushanwa ni Pelé mu mwaka wa 1958.

Kandi ibyo bisobanuye ko Ubwongereza burangije ku mwanya wo hejuru cyane mu gikombe cy'isi ku ikipe y'abagabo kuva habaye irushanwa ryo mu mwaka wa 1966 – kandi ni na wo mwanya mwiza cyane bugezeho mu irushanwa ribereye mu mahanga.

Bwabigezeho mu mukino wo guhatanira umwanya wa gatatu mu gikombe cy'isi wa mbere utsinzwemo ibitego byinshi cyane, urenze igihe Ubufaransa bwanyagiraga Ubudage bw'Uburengerazuba ibitego 6-3 mu mwaka wa 1958, ndetse Ubwongereza bwabigezeho butsinze mu gikombe cy'isi ikipe iri imbere yabwo ku rutonde rwa FIFA, ku nshuro ya mbere kuva butsinze Argentine mu mwaka wa 2002.

Nyuma yo gutsindwa na Argentine mu mukino wa kimwe cya kabiri wabaye ku wa gatatu mu buryo bwarakaje abafana benshi babwo, Ubwongereza bwerekanye ko butaheranwe n'ibyabaye, busukiranyamo ibitego bine ku mwuka mu gice cya mbere cyahinduye ibiganiro byari byabanjirije uwo mukino byuko Ubwongereza butari gukandiraho ku Bufaransa.

Saka yatsinze ibitego bibiri nyuma yuko Declan Rice na Ezri Konsa bari bamaze gutsindira Ubwongereza mu minota 18 ibanza y'uwo mukino.

Ubufaransa bwatewe ibitego bine mu gice cya mbere cy'umukino uwo ari wo wose ku nshuro ya mbere guhera muri Mata (4) mu mwaka wa 1930, ndetse uko byagaragaye abakinnyi babwo mu kiruhuko bihanangirijwe cyane n'umutoza Didier Deschamps – uyu wari umukino we wa nyuma nk'umutoza w'ikipe y'igihugu y'Ubufaransa.

Nuko ibintu bihindura isura neza neza nyuma y'icyo kiruhuko, 'Les Bleus' – ikipe y'igihugu y'Ubufaransa – itsinda ibitego bine ndetse ihusha amahirwe menshi yari yabazwemo ibitego yajyaga gutuma inganya n'Ubwongereza.

Kylian Mbappé yatsinze ibitego bibiri mbere na nyuma y'igitego cya mugenzi we Bradley Barcola, bituma Mbappé aba imbere mu rugamba rwo guhatanira igihembo cy'Urukweto rwa Zahabu cy'umukinnyi watsinze ibitego byinshi mu gikombe cy'isi cy'uyu mwaka, ajya imbere ya Lionel Messi aba umukinnyi wa mbere kugeza ubu utsinze ibitego byinshi mu mateka y'igikombe cy'isi ku bitego 22.

Ariko Saka yujuje igitego cya gatatu muri uwo mukino, yatsinze kuri penaliti ku munota wa 87 nyuma yuko Djed Spence yari akorewe ikosa na Malo Gusto.

Ousmane Dembélé yashyizemo igitego ku munota wa gatandatu wo mu gihe cy'inyongera, biba bibaye 5-4, ariko Jude Bellingham yunyuguza ba myugariro b'Ubufaransa ashimangira intsinzi y'Ubwongereza ku munota wa 98.

Mbere y'aha, Ubufaransa ntibwari bwigere na rimwe butsindwa ibitego bitandatu mu mukino w'igikombe cy'isi. Ni bwo bwa mbere butsinzwe ibitego bitandatu mu mukino uwo ari wo wose mu myaka hafi 66 ishize.

Hagati aho, Bellingham yarangije iri rushanwa neza cyane n'ibitego birindwi yatsinze muri iki gikombe cy'isi – bya mbere byinshi cyane umukinnyi w'ikipe y'Ubwongereza y'abagabo atsinze mu irushanwa rimwe ry'igikombe cy'isi.

Mu kiganiro cya BBC cyitwa 'Match of the Day' (cyangwa Umukino w'Umunsi, mu Kinyarwanda), Stephen Warnock wahoze ari myugariro w'ikipe y'igihugu y'Ubwongereza yagize ati: "Byari byiza cyane."

"[Ni] Umwe mu mupira w'amaguru ufunguye mwiza cyane tubonye mu irushanwa ryose."

Danny Murphy, na we wo muri icyo kiganiro, yongeyeho ati: "Hagaragaye impano nyinshi cyane."

"Umwe mu mupira w'amaguru nabonye uyu munsi ni wo wa mbere mwiza cyane maze kubona. Wari urimo byose."