Amerika na Iran byarasanye nyuma yuko abasirikare babiri b'Amerika biciwe muri Jordan

Abategetsi ba gisirikare b'Amerika bavuze ko mu ijoro ryo ku wa gatandatu Amerika yagabye ibindi bitero byo mu kirere kuri Iran, bigambiriye ibigo byayo by'ubutasi byo ku nkombe hamwe n'ibigo by'ubwirinzi bw'ikirere.

Bumwe mu buyobozi bukuru bw'ingabo z'Amerika (CENTCOM) bwavuze ko ingabo zayo zarashe ubushobozi bwa gisirikare bwa Iran, mu gihe igitangazamakuru cya leta ya Iran cyatangaje ko ikirwa cya Qeshm kiri mu Muhora wa Hormuz cyarashweho.

CENTCOM yanavuze ko yarashe ku mutwe wihariye wo mu ngabo za Iran (IRGC) ivuga ko wagabye igitero cyishe abasirikare babiri b'Amerika muri Jordan ku wa gatanu, naho undi akaba akomeje kuburirwa irengero muri icyo gihugu.

Mu gusubiza kuri ibi bitero bishya, ingabo za Iran zavuze ko zagabye ibitero by'indege nto z'intambara zitajyamo umupilote (drone) ku bigo bibiri bya gisirikare by'Amerika biri muri Kuwait, nkuko igitangazamakuru cya leta ya Iran cyabitangaje.

Amerika na Iran byakajije umurego mu bitero byagabanyeho muri iyi minsi ya vuba aha ishize, buri ruhande rugashinja urundi kurasa ku bikorwa-remezo by'ingenzi cyane.

Ku wa gatandatu, Iran yavuze ko yagabye "ibitero byinshi bya 'drones' z'ubwiyahuzi [zisenyukira ku ho zigabwe]" ku "bubiko bwo mu Kigo cya Udairi" cy'ingabo z'Amerika kiri muri Kuwait hamwe no ku kindi "Kigo cy'Indege za gisirikare cya Ali Al Salem muri Kuwait", nkuko byatangajwe n'ibiro ntaramakuru Tasnim bifitanye isano na IRGC.

CENTCOM yavuze ko ibyo bitero, byo mu ijoro rya munani ryikurikiranya ry'ibitero, "bigamije gushegesha kurushaho ubushobozi bwa Iran bwo guteza inkeke ku mato y'ubucuruzi mu Muhora wa Hormuz".

Itangazo rya CENTCOM ryongeyeho ko ibyo bitero byari ibyo "guhana byihuse ingabo za 'Islamic Revolutionary Guard Corps' [umutwe wihariye wo mu ngabo za Iran] zagabye ibitero ku basirikare b'Amerika muri Jordan mu ijoro ry'ejo [ryo ku wa gatanu]".

Ibyo byakurikiye icyumweru cyongeye kuburamo imirwano, Washington igasubizaho kubuza urujya n'uruza ku byambu bya Iran, Tehran na yo igatangaza ko Umuhora wa Hormuz ufunze, mu gihe agahenge k'agateganyo hagati y'impande zombi kahirimye nta kwezi gushize gatangiye.

Mu itangazo yasohoye mbere yaho ku wa gatandatu, CENTCOM yagize iti: "Abasirikare babiri b'Amerika bari bari muri Jordan biciwe mu kazi mu gihe 'US Central Command' (Centcom) n'ingabo z'abafatanyabikorwa birwanagaho ku bitero bya misile na drone bya Iran. Ikindi, umusirikare umwe ubu yaburiwe irengero."

Mu gusubiza kuri iryo tangazo ry'impfu, Minisitiri w'ingabo w'Amerika Pete Hegseth yanditse ku rubuga nkoranyambaga rwa X ati: "Murabeho, ntwari. Igitambo cyabo nta kindi gikora kitari ukongerera imbaraga icyo twiyemeje."

Abasirikare b'Amerika bamaze gupfira muri iyi ntambara kugeza ubu biyongereye bagera kuri 16, nyuma yuko umupilote wo mu ngabo zirwanira mu mazi z'Amerika wari waburiwe irengero mu ntangiriro y'uku kwezi, bitangajwe ko yapfuye, ubu bukaba bubaye ubwa kabiri uwo mubare wiyongereye muri iki cyumweru.

Muri Iran, minisiteri y'ubuzima y'icyo gihugu yavuze ko abantu nibura 50 bamaze kwicwa naho abandi barenga 500 bakomerekeye mu bitero by'Amerika mu byumweru bitatu bishize.